XIDONDZRO 02

Bibele Dzri Hi Nyika Ku Lavisela

Buku Ledzri Gandlisiwiki

Vhanu a misaveni hinkwayu va kumana ni swizralanganya leswi swi va vangelaka ku vaviseka, ku hlatiyela nambi ku vabya. Xana u sama u va ka xiyimu lexi ku yentxiki u titwa hi ndlela leyo? Kumbexana wa xaniseka hi leswi u vabyaka kumbe hi leswi u lahlekeliwiki hi mhunu lweyi u mu zrandzraka. U nga ha tivutisa leswi: Xana wutomi byi ta yampswa siku dzrin’wana? Bibele dzri nyikela nhlamulo.

1. Xana Bibele dzri hi nyika ku lavisela hi ndlela yini?

Bibele dzri tlhamuxela swivangelo leswi yentxaka misava yi tala hi swikazratu, dzri tlhela dzri hi byela madzrungula lamanene ya leswaku swikazratu leswi i swa nkamanyana ntsena nakone swi ta hela ku nga li khale. Leswi Bibele dzri swi dumbisaka swi nga ku ‘nyika ku lavisela ni wumundzruku’. (Dondzra Yeremiya 29:11, 12, BIBELE DRA KUXWENGA, BX.) Ku lavisela loko ku nga hi pfuna ku tiyisela hansi ka swikazratu ni ku kuma ku nyonxa nambi swoswi. Swidumbiso leswo swi tlhela swi hi tiyisa leswaku hi ta hanya hi ku nyonxa hi la ku nga helikiki.

2. Xana Bibele dzri khanela hi wumundzruku bya muxaka muni?

Bibele dzri khanela hi nkama lowu taka, dzri ku: ‘Ku fa ku nga ha vi kone; ku nga ha vi na nkosi; ni ku bongosa; ni ku vaviseka.’ (Dondzra Apfuletelo 21:4.) Swikazratu leswi hi vangelaka ku xaniseka namunhla—swa ku fana ni wusiwana, wubihi, mavabyi ni lifu—swi nga ha ti va kone. Bibele dzri dumbisa leswaku vhanu va ta kota ku hanya hi la ku nga helikiki a Paradeyisini kola misaveni.

3. I yini lexi nga ku yentxaka u dumba leswaku leswi Bibele dzri swi hlayaka swi ta yentxeka?

Vhanu vanyingi va lavisela leswaku ku ta yentxeka mintxhumu leyinene kambe a va na lexi va tiyisaka leswaku leswi va swi laviselaka swi ta yentxeka. Kambe leswi Bibele dzri swi dumbisaka a swi tanu. Hi nga dumba leswi dzri swi hlayaka hi ku ‘lavisisa matsralwa’. (Amintiṛo 17:11) A nkama u dondzraka Bibele, u ta swi vona ha wuswaku leswaku u nga kholwa leswi Bibele dzri swi hlayaka hi wumundzruku kumbe im-him.

KELISISA

Kambisisa yin’we ya mintxhumu leyi Bibele dzri dumbisaka leswaku yi ta yentxeka a nkameni lowu taka. Vona ndlela leyi ku lavisela loku Bibele dzri ku nyikelaka ku nga va pfunaka ha yone vhanu namunhla.

Mufoto: Mifoto leyi nga swiyimu swa ku hambana, yi dzringanisa swiyimu leswi vhanu va hanyaka ka swone namunhla ni swiyimu leswi Bibele dzri swi dumbisaka swa nkama lowu taka. Swiyimu leswi swi tlhela swi kombisiwa la hansi.

4. Bibele dzri hi dumbisa leswaku hi ta hanya hi la ku nga helikiki a nkameni lowu taka a swiyin’wini leswinene

Lavisa swidumbiso leswi kumekaka a Bibeleni. Hi swini swi ku nyonxisaka ngopfu? Ha yini?

Dondzrani tindzrimana leti tsrhahiwiki ta swidumbiso swoleswo mi tlhela mi bulisana hi swivutiso leswi landzrelaka:

Hi mavonela yaku, tindzrimana leti, mpela ta hi nyika ku lavisela? Xana u vona leswaku tindzrimana leti ti nga tiyisa nhlana ndangu ni vanghanu vaku?

Tivone na u hanya a misaveni leyi tsrhamisiki xileswi

VHANU HINKWAVU . . .	MUN’WANA NI MUN’WANA . . .
a va ha dzrilisiwi hi swa ku vavisa, a va ha duhwali nakone a va ha fi.—Ezaya 25:8.	a ta hoyozela maxaka yake lama fiki loko ma pfuxiwa lani misaveni.—Yohan 5:28, 29.
a va ha vabyi nakone a va ha na swikazratu swa wulema.—Ezaya 33:24; 35:5, 6.	a ta hanya na a nge na mavabyi, a tlhela a tsrhama na a li mumpswha.—Yob 33:25.
a va ha yentxeliwi mintxhumu ya ku biha.—Ezaya 32:16, 17.	a ta da a xuzra, a tsrhama ka yindlu ya ku tsrhamiseka, a tlhela a va ni ntizro wa ku nyonxisa.—Amapsalma 72:16; Ezaya 65:21, 22.
a va ha xaniseki hi mhaka ya yimpi.—Amapsalma 46:9.	a ta hanya a ku zruleni.—Amapsalma 37:11.
a va ha twi mbilu yi vavisa loko va dzrimukela mintxhumu ya khale.—Ezaya 65:17.	a ta hanya hi la ku nga helikiki a swiyin’wini leswinene.—Amapsalma 37:29.

Xidjahatana lexi afaka xi vabya, xi hanyile nakone xi xingazra mamana wa xone.

Wanuna lweyi afaka a duhwalile, swoswi i mumpswha nakone a txhova xikarinyana lexi taliki hi swakuda swa makamba.

5. Leswi Bibele dzri swi dumbisaka swi nga hi pfuna

Vhanu vanyingi va hetiwe ntamu va tlhela va hlundzrukisiwa hi swizralanganya leswi va swi vonaka. Van’we va dzringisa ku lwa akuva va yampswisa mintxhumu. Vona ndlela leyi ha yone ku tiva leswaku Bibele dzri li mintxhumu yi ta yampswa swi pfunaka vhanu namunhla. Vonani VHIDIYU, mi gama mi bulisana hi swivutiso leswi landzrelaka.

VHIDIYU: A Ni Djula Ku Helisa Ku Kala Wululami (4:07)

Xiyimu lexi nga vhidiyu ledzri liki ‘A Ni Djula Ku Helisa Ku Kala Wululami.’ Rafika a khayelaka ligudawu ni vhanu va lixaka dzrakwe na e he ntsrongo.

Ka vhidiyu ledzri, hi byini wubihi lebyi a byi kazrata Rafika?
Nambileswi wubihi lebyi a byi voniki byi kalaka byi nga helanga, xana Bibele dzri mu pfunise kuyini?

Loko hi kholwa leswi Bibele dzri swi dumbisaka, ka leswaku swi ta yentxeka a nkameni lowu taka, hi nga kuma ntamu hi tlhela hi nyonxa nambiloko hi ni swizralanganya. Dondzrani Amaproverbia 17:22 ni Ba-le-Roma 12:12, mi gama mi bulisana hi swivutiso leswi landzrelaka:

Hi mavonela yaku, xana leswi Bibele dzri swi dumbisaka swi nga ku pfuna a wuton’wini byaku namunhla? Ha yini u swi vonisa xileswo?

VAN’WE VA LI: “Leswi Bibele dzri swi dumbisaka hi wumundzruku a swi nge yentxeki ni siku ni dzrin’we.”

Hi mavonela yaku, ha yini swi li swa lisima ku kumisisa swivangelo swa ku kholwa swidumbiso swoleswo?

NKATSRAKANYU

Bibele dzri hi nyika ku lavisela, dzri tlhela dzri hi pfuna ku lwisana ni swikazratu leswi hi nga naswu hi ku hi dumbisa wumundzruku lebyi taliki hi ku nyonxa.

Mpfuxeto

Ha yini vhanu va vilela ku tiva swidumbiso swa Xikwembu Nkulukumba?
Xana Bibele dzri li yini hi wumundzruku?
Xana ku kholwa leswi Bibele dzri swi dumbisaka swi nga ku pfunisa kuyini namunhla?

Xidondzro lexi xi hele hi:

Lwela leswi

Lwela ku tivisisa swidumbiso swa Bibele hi ku dondzra tindzrimana leti longoloxiwiki ka xidondzro lexi.

Swin’wana:

Swin‘wana Leswi U Nga Swi Yentxaka

HANDZRISISA

Dondzra leswi yengetelekiki mayelanu ni leswi ku lavisela ku nga ku pfunisaka xiswone loko u kumana ni swikazratu.

“Dumbo—Xana U Nga Dzri Kuma Kwini?” (Pfukani!, 22 ka Abrili wa 2004)

Vona ndlela leyi ku lavisela ku nga pfunaka ha yone lava nga ni mavabyi lama nga dahekikiki.

“Xana Bibele Dzri Nga Ni Pfuna Ku Hanya Ni Mavabyi Lama Nga Dahekikiki?” (Leswi kumekaka ka jw.org)

Loko u hlalela vhidiyu ledzri dzra wunanga, tivone ni ndangu waku na mi tikholisa hi wutomi a Paradeyisini.

Yanakanya Hi Nkama Lowo (3:37)

Dondzra mfambu wa mhunu lweyi a a lwela ku yampswisa wutomi bya vhanu, lweyi wutomi byake byi txintxiki loko a dondzre swidumbiso wa Bibele hi wumundzruku.

“A Na Ha Swi Djuli Ku Txintxa Misava” (Xihondzro Xa Ku Zrindzra, 1 ka Julhu wa 2013)