DONDZRO 5

Xana U Ta Kuma Yini A Mintlhaganwini Yezru Ya Wukriste?

Timboni ta Yehovha leti nga ka Yindlu ya Mfumu a Argentina — Argentina

Ntlhanganu wa Timboni ta Yehovha a Serra Leoa — Serra Leoa

Ntlhanganu wa Timboni ta Yehovha a Bélgica — Bélgica

Ntlhanganu wa Timboni ta Yehovha a Malásia — Malási

Vhanu va ku tala va tsrhike ku ya a makezrekeni yavu hikusa a va kumi nkongomiso wa moya kumbe ku txhaveleliwa. Kutani, ke, ha yini u fanela ku hlalela mintlhanganu leyi lulamiseliwaka hi Timboni ta Yehovha? Xana u ta kuma yini ka mintlhanganu yoleyo?

U ta nyonxa hi ku va makazri ka vhanu lava nga ni lizrandzru ni ku hanyelana. Ka dzana dzra ku sungula, Vakriste a va hlengeletana hi mabandla, nangweso a va tlhangana akuva va gandzrela, va dondzra Matsralwa ni ku kutxanana. (Ba-Heberu 10:24, 25) Hi ku hlengeletana ka mbangu lowu nga ni lizrandzru, a va titwa na va li makazri ka vanghanu va xihlayelamfuzri—vamakwavu va moya. (2 Ba-le-Thesalonika 1:3; 3 Yohan 14) Na hine hi landzra xikombiso xolexo, mfuzri hi kuma ku nyonxa loku fanaka.

U ta pfuneka hi ku dondzra ku tizrisa minsinya ya milawu ya Bibele. Swanga hi leswi a swi li xiswone a minkameni ya ku tsraliwa ka Bibele, vaxinuna, vaxisati ni vatsrongwana hinkwavu va hlengeletana a mbangwini wun’we. Vadondzrisi lava fanelekaka, va tizrisa Bibele ku hi pfuna leswaku hi twisisa ndlela leyi hi nga tizrisaka minsinya ya dzrone ya milawu ka wutomi bya siku ni siku. (Deuteronoma 31:12; Nehemiya 8:8) Hinkwezru hi nga hlengela ka mabulo lama patsraka vayingiseti ni le ku yimbeleleni, leswi hi nyikaka nkama wa ku kombisa dumbo dzrezru dzra Wukriste.—Ba-Heberu 10:23.

U ta kuma tovoko dzra ku tiyisiwa lipfumelo ka Xikwembu Nkulukumba. Muapostola Pawulo a byele dzrin’we dzra mabandla a nkameni wakwe a ku: “Ni navela ku mi vona, . . . akuva hi ta tiyisana hi lipfumelo ledzri mun’wana ni mun’wana a nga nadzru, dzra ka kwanga ni dzra ka kwenu”. (Ba-le-Roma 1:11, 12, NM) Loko hi vonana ni vapfumeli-kulozri a mintlhanganwini nkama ni nkama swi tiyisa lipfumelo dzrezru ni ku tiyimisela ka ku hanya swanga Vakriste.

Ha ku zramba leswaku u ya hlalela ntlhanganu lowu hi taka va na wone vhiki ledzri akuva u tivonela ha wuswaku leswi nga tlhamuxeliwa la henhla. U ta hoyozeliwa hi mavoko mabidzri. Ka mintlhanganu hinkwayu ku ngheniwa mahala—a ku fambisiwi xiparatwana xa minhlengo.

Xana i xikombiso xini lexi mintlhanganu yezru ya bandla yi xi landzraka?
Hi nga kuma mabindzru wani loko hi ya ka mintlhanganu ya Wukriste?