DONDZRO 6
Hi Dzrini Dumbo Ledzri Nga Salela Vhanu Lava Fiki?
1. Hi wani madzrungula lamanene mayelanu ni vhanu lava fiki?
Loko Yesu a tlhasa Bethaniya kusuhi na Yerusalema, a ku khalute mune wa masiku na munghanu wakwe, Lazaru, a file. Yesu a kongome sizreni na Marta na Mariya, vamakwavu va mufi. Hi nkamanyana, ku buyetela vhanu va vanyingi. Xana wa swi vona leswi Marta na Mariya va nga nyonxisa xiswone loko Yesu a pfuxe Lazaru?—Dondzra Yohan 11:21-24, 38-44.
Marta a a ma tiva madzrungula lamanene mayelanu ni vafi. A a swi tiva leswaku Yehovha a ta pfuxa vafi akuva va tlhela va hanya la misaveni.—Dondzra Yob 14:14, 15.
2. Vafi va le ka xiyimu xini?
Xikwembu Nkulukumba a te ka Adamu: ‘U ntsrhuzri, u ta buyela ntsrhuzrini’.—GENESIS 3:19.
Hine vhanu hi hambiwe hi ntsrhuzri. (Genesis 2:7; 3:19) A hi mimoya leyi hanyaka ndzreni ka mizri wa nyama. Hi swivumbiwa swa nyama. Xileswo, loko hi fa a ku na ntxhumu ka hine lowu tamaka wu hanya. Loko hi fa, na byone vongwe byezru bya fa, kutani mimpimiso yezru yi hela. Xiswoswo, Lazaru a nga dzrungulanga ntxhumu mayelanu ni leswi nga mu yentxekela loko a file hikusa vafi a va tivi ntxhumu.—Dondzra Amapsalma 146:4; Eklesiasta 9:5, 6, 10.
Xana Xikwembu Nkulukumba a xanisa vhanu hi ndzrilo loko va file? Leswi Bibele dzri kombisaka leswaku vafi a va tivi ntxhumu, swa voneka leswaku ndondzro ya ku ya pswha tilweni i madzrimi lama ntxhimisaka Xikwembu Nkulukumba. Nambi hi mimpimiso ya ku xanisa vhanu hi ndzrilo ya mu nyenyentsa.—Dondzra Yeremiya 7:31.
Hlalela vídeo Vafi Va Le Ka Xiyimu Xini?
3. Xana vafi va nga khanela na hine?
Vafi a va swi koti ku khanela kumbe ku twa. (Amapsalma 115:17) Kambe tintsrumi tin’wana ti bihile, nakone ti nga khanela ni vhanu ti tiyentxa ingiki i vhanu va nga fa. (2 Petros 2:4) Yehovha awa tsimbisa ku dzringisa ku khanela ni vafi.—Dondzra Deuteronoma 18:10, 11.
4. Hi vamani lava taka tlhela va hanya?
Vhanu va ntsrandzra-vahlayi lava fiki lava nga masizreni va ta tlhela va hanya la misaveni. Nambi van’wana lava a va nga mu tivi Xikwembu Nkulukumba nakone a va yentxetela mintxhumu ya ku biha va ta pfuxiwa.—Dondzra Luka 23:43; Amintiṛo 24:15.
Lava taka pfuxiwa va ta kota ku dondzra ntiyiso mayelanu na Xikwembu Nkulukumba ni ku kombisa lipfumelo ka Yesu hi ku mu yingiseta. (Apfuletelo 20:11-13) Lava taka pfuxiwa va tlhela va yentxa mintxhumu leyinene va ta kota ku hanya hi ku nyonxa hi la ku nga helikiki la misaveni.—Dondzra Yohan 5:28, 29.
5. Xana ku pfuxiwa ka vafi ku hi byela yini mayelanu na Yehovha?
Xikwembu Nkulukumba a yentxe leswaku swi koteka kuva vafi va va ni dumbo hi ku zrumela N’wanakwe akuva a hi fela. Xileswo, ku pfuxiwa ka vafi ku hi dondzrisa leswaku Yehovha a ni lizrandzru ni wumbilu lebyikulu. Loko vafi va pfuxiwa, hi mani lweyi ngopfu-ngopfu wene u djulaka ku mu vona?—Dondzra Yohan 3:16; Ba-le-Roma 6:23.