XIDONDZRO 29

Ku Yentxeka Yini Loko Mhunu A Fa?

Buku Ledzri Gandlisiwiki

Xana u sama u feliwa hi mhunu lweyi u mu zrandzraka? Ka xiyimu lexo xa ku kazrata swinene, u nga ha tivutisa leswi: ‘Ku yentxeka yini loko mhunu a fa? Xana ku ni dumbo dzra ku tlhela ni mu vona?’ Ka xidondzro lexi ni ka lexi landzrelaka, hi ta kuma tinhlamulo ta Bibele leti hi txhavelelaka.

1. Ku yentxeka yini loko mhunu a fa?

Yesu a fananise lifu ni wuzrongo lebyikulu. Mhunu lweyi a yetleliki wuzrongo lebyikulu a nga swi tivi leswi yentxekaka matlhelweni kwake. Xana lifu dzri fana ni wuzrongo hi ndlela yini? Ntsrhaku ka loko mhunu a file, a nga ha twi ntxhumu. A nga twi ku vavisa nakone a nga li ku xanisekeni. A Bibele dzri li: ‘A vafi a va tivi ntxhumu.’—Dondzra Eklesiasta 9:5.

2. Xana ku tiva ntiyiso mayelanu ni lifu swi hi pfuna hi ndlela yini?

Vhanu vanyingi va txhava ku fa va tlhela va txhava ni vafi! Kambe ku tiva leswi Bibele dzri swi dondzrisaka mayelanu ni lifu, swi hi yentxa hi zrula. Yesu a te: ‘A xihlayelamfuzri xi ta n’wi ntsrhunxa.’ (Yohan 8:32) Wukhongoti byin’wana byi dondzrisa leswaku vhanu hinkwavu va ni moya lowu kalaka wu nga fi, kambe leswo a hi swone leswi Bibele dzri swi dondzrisaka. Xileswo, a ku na lweyi a xanisekaka ntsrhaku ka loko a file. Handle ka leswo, leswi vafi va kalaka va nga tivi ntxhumu, a va nge hi vavisi. Kutani a swi vileleki ku va yentxela xa kukazri akuva hi va nyonxisa kumbe ku va gandzrela, nambi ku va hambela swikhongoto.

Van’we va li va nga swi kota ku khanela ni vafi. Kambe leswo a swi koteki. Hi lani hi swi voniki ha kone ‘a vafi a va tivi ntxhumu’. Loko mhunu a pimisa leswaku awa swi kota ku vulavula ni munghanu wake kumbe ni xaka dzrake ledzri fiki, hi ntiyiso wa kone a va na a vulavula ni mademona lama tiyentxaka ingiki i mhunu lweyi a fiki. Xileswo, ku tiva ntiyiso mayelanu ni lifu swi hi sizrelela ka mademona. Yehovha a hi byela leswaku a hi fanelanga ku dzringisa ku vulavula ni vafi hikusa awa swi tiva leswaku mademona ma bihe ngopfu swinene.—Dondzra Deuteronoma 18:10-12.

KELISISA

Tiva leswi yengetelekiki mayelanu ni leswi yentxekaka loko mhunu a fa. U ta tlhela u dondzra leswaku Yehovha Xikwembu Nkulukumba wa lizrandzru a nge txhuki a xanisa mhunu ntsrhaku ka loko a file. Leswo swi ta ku yentxa u ya u mu dumba Yehovha, Xikwembu Nkulukumba wezru wa lizrandzru.

Wanuna lweyi a tsrhamiki ka banku ni vana vake vabidzri hi siku dzra ku lahliwa ka nkatake tlhelo mamana wa vanake. Vanghanu ni maxaka va yime matlhelweni kwavu akuva va va txhavelela ni ku va seketela.

3. Tiva ntiyiso mayelanu ni vafi

A misaveni hinkwayu, vhanu va ni mavonela ya ku siyanasiyana mayelanu ni leswi yentxekaka loko hi fa. Nakone swi le livaleni leswaku ka mavonela lawo a hi hinkwawu ma nga ntiyiso.

A mugangeni waku, xana vhanu va li ku yentxeka yini loko mhunu a fa?

Akuva u tiva leswi Bibele dzri swi dondzrisaka, vonani VHIDIYU.

VHIDIYU: Vafi Va Le Ka Xiyimu Muni?—Xitlephu (1:19)

Mifoto: Leswi kombisiwaka ka vhidiyu ledzri liki ‘Vafi Va Le Ka Xiyimu Muni?—Xitlephu.’ Mifoto: 1. Ntsrumbu lowu nga ka mubede a xipiritana. 2. Wanuna lweyi a khomiwiki hi wuzrongo na a tsrhame makazri ka vhanu vabidzri na va yendzra hi xitimela.

Dondzrani Eklesiasta 3:20, mi gama mi bulisana hi swivutiso leswi landzrelaka:

Hi ku ya hi ndzrimana leyi, i yini leswi yentxekaka loko mhunu a fa?
Xana a ndzrimana leyi ya hlaya leswaku ntsrhaku ka loko mhunu a file, a moya wake wu tama wu hanya a mbangwini wun’wana?

Bibele dzri hi byela hi ta ku fa ka Lazaru, lweyi a a li munghanu lwenkulu wa Yesu. Dondzrani Yohan 11:11-14, akuva mi vona leswi Yesu a swi hlayiki mayelanu ni xiyimu lexi Lazaru a a li ka xone. Mi gama mi bulisana hi swivutiso leswi landzrelaka:

Xana Yesu a fananise wuzrongo ni yini?
Xana xifananiso lexo xi hi dondzrisa yini mayelanu ni leswi yentxekaka loko mhunu a fa?
Xana u swi vona na swi twala leswi Bibele dzri swi hlayaka?

4. Ku tiva ntiyiso mayelanu ni lifu swa hi pfuna swinene

Ku dondzra ntiyiso mayelanu ni lifu swi hi yentxa hi nga va txhavi vafi. Dondzrani Eklesiasta 9:10, mi gama mi bulisana hi xivutiso lexi landzrelaka:

Xana vafi va nga hi vavisa?

Loko hi tiva ntiyiso lowu nga a Bibeleni, a hi nge ti kholwa ka madzrimi ya leswaku vafi va fanela ku nyonxisiwa kumbe ku gandzreliwa. Dondzrani Ezaya 8:19 ni Apfuletelo 4:11, mi gama mi bulisana hi xivutiso lexi landzrelaka:

Xana u yanakanya leswaku Yehovha a titwisa kuyini loko mhunu wa kukazri a gandzrela vafi kumbe a kombela mpfunu ka mhunu lweyi a fiki?

Mifoto: Swihena leswi fambisanaka ni ku gandzrela vafi. 1. Wanuna lweyi a khinsamiki a khongota ka sizra ledzri tlhantekiwiki swakuda. 2. Vavanuna vazrazru lava kinaka nkino wa ntumbuluku. 3. Ntlawa wa vhanu lava yambaliki mamaxkara lama nga ni xifaniso xa pala va tlhela va tlakula xikeletu xa xikulu hi Siku dzra Vafi. — Ku tiva ntiyiso mayelana ni lifu swi hi ntsrhunxa ka swihena leswi khunguvanyisaka Yehovha

5. Ku tiva ntiyiso mayelanu ni lifu swi hi yentxa hi nyonxa

Vhanu vanyingi va dondzrisiwa leswaku ntsrhaku ka loko va file, va ta xanisiwa hi mhaka ya mintxhumu ya ku biha leyi va yi yentxiki. Kambe swa hi tlema mbilu ku tiva leswaku ntsrhaku ka loko hi file, a hi nge ti xanisiwa nambi loko hi yentxe mintxhumu ya ku biha ngopfu. Dondzrani Ba-le-Roma 6:7, mi gama mi bulisana hi xivutiso lexi landzrelaka:

Bibele dzri li loko mhunu a fa, Xikwembu Nkulukumba a nga ha mu voni nandzru hi mhaka ya swidoho swake. Hi mazritu man’wana, a swidoho swake swi dzrivaleliwile. Leswi mhaka yi tsrhamisiki xileswo, xana u vona leswaku mhunu lweyi a fiki a ta xanisiwa hi mhaka ya swidoho leswi a swi yentxiki?

Loko hi ya hi tiva Yehovha, hi ya hi twisisa leswaku a nge txhuki a xanisa vhanu lava fiki. Dondzrani Deuteronoma 32:4 na 1 Yohan 4:8, mi gama mi bulisana hi swivutiso leswi landzrelaka:

Xana Xikwembu Nkulukumba lweyi a nga ni matsrhamela lawa hi ma voniki ka tindzrimana leti, a a ta tsrhika vhanu lava fiki va xanisiwa?
Xana wa nyonxa hi ku tiva ntiyiso mayelanu ni leswi yentxekaka loko mhunu a file? Ha yini?

VAN’WE VA LI: “Loko ni pimisa hi leswi swi taka ni yentxekela loko ni file, swi ni yentxa ni txhava.”

He tini tindzrimana ta Bibele leti a wu ta ti tizrisa akuva u pfuna mhunu lweyo?

NKATSRAKANYU

Loko mhunu a file, a nga ha tivi ntxhumu. Vafi a va li ku xanisekeni nakone a va nge va vavisi lava hanyaka.

Mpfuxeto

Ku yentxeka yini loko mhunu a fa?
Xana ku tiva ntiyiso mayelanu ni lifu swi hi pfuna hi ndlela yini?
Ha yini ku tiva ntiyiso mayelanu ni lifu swi hi yentxa hi nyonxa?

Xidondzro lexi xi hele hi:

Lwela leswi

Dzringisa ku bekisa ndzrimana yin’we leyi kumekaka ka xidondzro lexi akuva yi ku pfuna ku tlhamuxela van’wana leswi yentxekaka loko mhunu a fa.

Swin’wana:

Swin‘wana Leswi U Nga Swi Yentxaka

HANDZRISISA

Vona leswaku a Bibeleni a zritu ledzri liki “hika” dzri tlhamuxela yini.

“Xana A Hika I Yini?” (Leswi kumekaka ka jw.org)

Kambisisa leswaku xana Xikwembu Nkulukumba a xanisa vhanu lava yentxiki swa ku biha a infernu?

Xana A Infernu I Mbangu Wa Hakakunene Wa Ku Xaniseliwa Kone? (3:07)

Xana hi fanela ku va txhava vafi?

Mimoya Ya Vafi—Xana Yi Nga Ku Pfuna Kumbe Yi Nga Ku Vavisa? Xana Yi Kona Hakunene? (xibukwana)

Vona ndlela leyi wanuna wa kukazri a kumiki ku zrula ha yone ntsrhaku ka loko a dondzre ntiyiso mayelanu ni leswi yentxekaka loko hi file.

“Ni Nyonxisiwe Hi Tinhlamulo Ta Bibele” (Xihondzro Xa Ku Zrindzra, 1 ka Fevhereru wa 2015)