Hi Hleleliwe Ku Yentxa Ku Zrandzra Ka Yehovha

A MISAVENI hinkwayu, ku ni tinhlengeletanu tinyingi ta wukhongoti, ta politika, ta mabindzru ni ta ku lwela matsrhamela ya vhanu. Tinhlengeletanu leti ta hambana hi matsrhamela, minkongometo, mavonela ni mapimisela. Kambe ku ni nhlengeletanu yin’we leyi hambaniki swinene ni letin’wana hinkwatu. Zritu dzra Xikwembu Nkulukumba dzri swi beka a livaleni leswaku nhlengeletanu yoleyo i ya Timboni ta Yehovha.

² Xa ku nyonxisa hi leswaku u titlhanganisile ni nhlengeletanu ya Yehovha. Leswi kutani u swi voniki u tlhela u tikholwisa ha wuswaku leswaku a ku zrandzra ka Xikwembu Nkulukumba he kwini, u le ku ku yentxeni. (Ps 143:10; Ro 12:2) U muzrezri wa nkhinkhi, lweyi a tizraka ni nhlengeletanu ya misava hinkwayu ya vamakwezru lava nga ni lizrandzru. (2Ko 6:4; 1Pe 2:17; 5:9) Hi lani swi dumbisiwiki ha kone a Zritwini dzra Xikwembu Nkulukumba, leswo swi ku tisela matovoko ni ku nyonxa lokukulu. (Pr 10:22; Mr 10:30) Hi ku yentxa ku zrandzra ka Yehovha hi ku dumbeka swoswi, u le ku lulamiseliweni akuva u kuma wumundzruku bya ku xonga, lebyi nga helikiki.​—1Tm 6:18, 19; 1Yh 2:17.

³ Muvumbi wezru Lwenkulu a ni nhlengeletanu leyi nga fanikiki ni yimbeni a misaveni hinkwayu, leyi zrangeliwaka a tilweni. Leswo swi hlaya leswaku yi kongomisiwa ha Yehovha, lweyi a nga Nhloko ya hinkwaswu. Hi mu dumba hi ku helela. I Muyavanyisi wezru, ni Muhambi wa Milawu wezru, ni Hosi yezru. (Eza 33:22) Leswi a nga Xikwembu Nkulukumba wa nhleleko, a yentxe malulamiselo leswaku hi ‘tizrisana na yene’ a ku hetisiseni ka nkongometo wakwe.​—2Ko 6:1, 2.

⁴ Leswi wugamu bya xiyimu lexi xa mintxhumu byi tsrhindzrekelaka wugan’wini hi ku hatlisa, hi ya a mahlweni na hi tibeka hansi ka wuzrangeli bya Hosi leyi bekiwiki, Yesu Kriste. (Eza 55:4; Mpf 6:2; 11:15) Yesu ha byakwe a te a valandzreli vakwe a va ta yentxa mintizro leyikulu ku tlula leyi a yi yentxiki a wutizrelini byakwe la misaveni. (Yh 14:12) Leswo a swi ta hetiseka hikusa a valandzreli va Yesu a va ta ya mahlweni va yandzra nakone a va ta zrezra a nsin’wini leyi yaka yi nava a misaveni hi nkama wa ku leha. A va ta zrezra madzrungula lamanene ya Mfumu ku ya tlhasa mimbangwini ya le kule ya misava.​—Mt 24:14; 28:19, 20; Min 1:8.

⁵ Leswo kutani swi yentxekile. Nambitanu, hi lani Yesu a khanyisiki ha kone, a ntizro wa ku zrezra madzrungula lamanene wu ta yima hi nkama lowu bekiwiki ha Yehovha. Swikombiso hinkwaswu leswi nga Zritwini dzra wuprofeta dzra Xikwembu Nkulukumba swi kombisa leswaku a siku ledzrikulu ni ledzri txhavisaka dzra Yehovha dzri tsrhindzrekelile.​—Yl 2:31; Tsf 1:14-18; 2:2, 3; 1Pe 4:7.

⁶ Loko hi ya hi twisisa ku zrandzra ka Yehovha loko nkama wu ya wu hela, hi fanela ku tikazrata hi ku tlulisa a ku yentxeni ka leswi Xikwembu Nkulukumba a swi djulaka. Leswo swi djula hi tiva ha hombe a matizrela ya nhlengeletanu ya Xikwembu Nkulukumba hi tlhela hi tizrisana na yone hi ku helela. Matizrela ya nhlengeletanu ma seketeliwe ka minsinya ya milawu ya Matsralwa, ku patsra ni swileleto, milawu, minkongomiso ni tindondzro leti humaka a Zritwini ledzri huhutiwiki dzra Xikwembu Nkulukumba.​—Ps 19:7-9.

⁷ Loko vhanu va Yehovha va namazrela nkongomiso lowo, lowu seketeliwiki Bibeleni, va hanyisana va tlhela va tizrisana hi ku zrula ni wumun’we. (Ps 133:1; Eza 60:17; Ro 14:19) I yini xi tiyisaka wumun’we lebyi hi nga nabyu ni vamakwezru a mimbangwini hinkwayu? I lizrandzru. Hi yambale lizrandzru hi tlhela hi susumetiwa ha dzrone. (Yh 13:34, 35; Kl 3:14) Hi ndlela leyo, leyi nyonxeliwaka ha Nkulukumba, hi kota ku fambisana ni xiyenge xa le tilweni xa nhlengeletanu ya Yehovha.

XIYENGE XA LE TILWENI XA NHLENGELETANU YA YEHOVHA

⁸ Vaprofeta Ezaya, Ezekiyele na Daniyele va vonisiwe xiyenge xa le tilweni xa nhlengeletanu ya Yehovha. (Eza, ndzrima 6; Ezk, ndzrima 1; Dn 7:9, 10) Hi ku fanana, mupostola Yohane a vonisiwe lulamiselo ledzri dzra le matilweni a va a hi txhumbutela switsrongo ka buku dzra Apfuletelo. A vone Yehovha a xiluvelweni xa ku phatima na a tsrandzreliwe hi swivumbiwa leswi nga tintsrumi, na swi ku: ‘Yi xwengile, yi xwengile, yi xwengile, Hosi Xikwembu Nkulukumba wa ntamu hinkwawu; lweyi e faka e kone, lweyi a nga kone, lweyi a taka!’ (Mpf 4:8) Yohane a tlhele a ‘vona a makazri ka xiluvelo . . . a hambana’, a Hambana ya Xikwembu Nkulukumba, Yesu Kriste.​—Mpf 5:6, 13, 14; Yh 1:29.

⁹ Xivoniso lexi xa Yehovha na a tsrhame a xiluvelweni xi kombisa leswaku i Nhloko ya nhlengeletanu leyi. Mayelanu na yene ni xiyimu xakwe lexi tlakukiki, a buku dzra 1 Makronika 29:11, 12 dzri li: ‘Yehovha i swaku a wukulu, ni ntamu, ni wumenyemenye, ni ku hlula, ni wuhosi, hikusa hinkwaswu leswi nga tilwini ni le misaveni i swaku; Yehovha, a mfumu i waku, wene u tlakukiki, hosi ya hinkwaswu! A wukosi ni ku twala swi pfa ku wene; wa fuma hinkwaswu: a ntamu ni ku tiya swi le vokweni dzraku; u nga kulisa, u nga tiyisela kumbe u nga nyika hinkwavu a ntamu.’

¹⁰ Swanga mutizri-kulobye wa Yehovha, Yesu a le xiyin’wini lexi tlakukiki a tilweni, nakone a nyikiwe wuhosi byikulu swinene. Ku hlaya ntiyiso, Xikwembu Nkulukumba a “beke hinkwaswu a hansi ka minkondzro yakwe ava a mu yentxa nhloko ya hinkwaswu a bandleni”. (Ef 1:22, NM) Mupostola Pawulo a hlaye leswi ha Yesu: ‘Xikwembu Nkulukumba a mu tlakuxile a henhla-henhla ngopfu, a mu nyika ni vito ledzri nga henhla ka mavito hinkwawu, akuva, a vitweni dzra Yesu, a matsrolo hinkwawu ma khisama, a ya leswi nga tilweni, ni ya leswi nga misaveni, ni ya leswi nga hansi ka misava ne swaku a tindzrimi hinkwatu ti ta hlaya leswaku Yesu Kriste i Hosi, a ku twaliseni ka Xikwembu Nkulukumba Tatana.’ (Flp 2:9-11) Xileswo, hi nga byi dumba hi ku helela wuzrangeli bya Yesu Kriste lebyi lulamiki.

¹¹ Muprofeta Daniyele a vone Nkulukumba Wa Masiku a xivonisweni na a tsrhame a xiluvelweni Xakwe a matilweni, ‘a tizreliwa hi khume dzra madzana ya makume ya madzana; dzana dzra madzana ya madzana ya madzana kumbe 10.000 ma yandzrisiwe ka 10.000 ma yimile mahlweni kwakwe’. (Dn 7:10) Bibele dzri vulavula hi butsrhu ledzri dzra tintsrumi swanga ‘mimoya leyi tizrelaka, leyi yi bekisiwiki ku tizrela lava fanekelaka ku da pfindla dzra ku huluka’. (Hb 1:14) Tintsrumi leti hinkwatu ti hleliwe hi ku ya hi ‘swiluvelo, wuhosi, mimfumu ni mintamu’.​—Kl 1:16.

¹² Loko hi tinyika nkama wa ku yanakanyisisa hi matsrhamela lawa ya xiyenge xa le tilweni xa nhlengeletanu ya Yehovha, hi nga kota ku twisisa matitwela ya Ezaya loko ka xivoniso a vone ‘Yehovha a tsrhami xiluvelweni lexi nga henhla xi tlakukile’ na ‘hi le henhla ku yene . . . ku yimi maserafime’. Kutani Ezaya a ku: ‘Yowee ku mine! Ndzri file, hikusa ndzri mhunu wa milomu ya xambya, ndzri tsrhama makazri ka vhanu va milomu ya xambya, hikusa mahlu yanga ma vonile Hosi, Yehovha wa makhandzra.’ Ina, Ezaya a sale a pfule nomu hi ku hlamala, a tivona na a nge wa ntxhumu loko a twisise wukulu bya nhlengeletanu ya Yehovha. Xivoniso lexo xi mu khumbe ngopfu lakakuva loko ku hume zritu na dzri sukela tilweni, na ku djuliwa lweyi a nga yentxaka ntizro wa ku hlawuleka wa ku twalisa wuyavanyisi bya Yehovha, Ezaya a tekele ku: ‘Hi mine lwe; zruma mine.’​—Eza 6:1-5, 8.

¹³ Ku twisisa ni ku tlangela nhlengeletanu ya Yehovha swi kutxa vhanu Vakwe ku titwa hi ndlela leyi fanaka. Loko nhlengeletanu yi ya mahlweni, hi navela hi mbilu hinkwayu ku fambisana na yone. Hi lwela ku kombisa ku dumbeka kwezru ka nhlengeletanu ya Yehovha hi ku helela namunhla.

NHLENGELETANU YA YEHOVHA YI LE KU FAMBENI

¹⁴ Ka ndzrima 1 ya wuprofeta bya Ezekiyele, Yehovha a voniwa na a fambisa kalitxhi dzrikulu swinene dzra le matilweni. Kalitxhi ledzri, ledzri phatimaka, dzri yimela xiyenge lexi nga vonekiki xa nhlengeletanu ya Yehovha. A fambisa kalitxhi ledzri hi ndlela ya lizrandzru ya ku dzri kongomisa ni ku dzri tizrisela ku hetisisa nkongometo wakwe.​—Ps 103:20.

¹⁵ Roda ha dzrin’we dzra kalitxhi ledzri, dzri ni roda dzrimbeni he ndzreni​—dzri hingakanyaka kambe na dzri dzringanana ni munghanu. Leswo swi ma yentxa ma kota ku ‘famba hi matlhelo ya wone laya mune’. (Ezk 1:17) Maroda ma nga ndzruluka kola na kola. Nambitanu, a swi hlayi leswaku kalitxhi ledzri a dzri lawuleki kumbe a dzri na mufambisi lwa tivaka. Yehovha a nga yi pfumeleli nhlengeletanu yakwe yi dlodloseka. A buku dzra Ezekiel 1:20 dzri li: ‘Lomu a moya afaka wu swi fambisa kone, swa ku ya kone.’ Xileswo, i Yehovha lweyi a fambisaka nhlengeletanu yakwe kun’wana ni kun’wana lomu a moya wakwe wu djulaka kone. Xivutiso lexi hi fanelaka ku tihamba hi lexi: “Xana ni fambisana na yone?”

¹⁶ Ku fambisana ni nhlengeletanu ya Yehovha a swi heleli ka ku hlalela mintlhanganu ni ku ya a ku zrezreni ntsena. Xa ku sungula, ku va hi longoloka ni nhlengeletanu swi patsra ku va hi hluvuka hi tlhelo dzra moya. Hi ‘hlawula leswa ku lulama [ngopfu]’ hi tlhela hi fambisana ni ndlela leyi hi phameliwaka ha yone swakuda swa moya. (Flp 1:10; 4:8, 9; Yh 17:3) Hi fanela ku tlhela hi dzrimuka leswaku lomu ku nga ni nhlengeletanu, ku ni ntizrisanu lowunene ni ntwananu. Xileswo, hi fanela ku vona lisima dzra ku tizrisa hi ndlela leyinene leswi Yehovha a hi nyikiki akuva hi hetisisa ntizro wakwe, ku nga nkama wezru, ntamu, wuswikoti ni mintxhumu yezru leyi vonekaka. Loko hi fambisana ni kalitxhi dzra le tilweni dzra Yehovha, wutomi byezru byi fambisana ni dzrungula ledzri hi dzri zrezraka.

¹⁷ Hi ku pfuniwa hi nhlengeletanu ya Yehovha, hi ya mahlweni hi yentxa ku zrandzra kwakwe. Dzrimuka leswaku Yehovha hi yene Mufambisi wa kalitxhi dzra le tilweni. Xileswo, ku fambisana ni kalitxhi dzrakwe swi kombisa leswaku ha mu hlonipha Yehovha, mfuzri ha mu dumba swanga Zribye dzrezru. (Ps 18:31) Bibele dzri dumbisa leswi: ‘Yehovha a ta hanana tiko dzrakwe ntamu; Yehovha a ta tovokisa tiko dzrakwe hi ku zrula.’ (Ps 29:11) Leswi hi nga xiyenge xa nhlengeletanu ya Yehovha namunhla, ha tiyisiwa hi tlhela hi tikholisa hi ku zrula loku a tovokisaka ha kone vhanu vakwe lava hlelekiki. Ina, a ku na ku ganaganeka ka leswaku loko hi ya mahlweni hi yentxa ku zrandzra ka Yehovha hi ta tama hi tovokisiwa hi lani ku nga helikiki.