Ndlela Leyi Bandla Dzri Hleliwaka Ni Ku Kongomisiwa Ha Yone

A PAPELENI dzrakwe dzra ku sungula ku va le Korinte, mupostola Pawulo a tlhamuxele ntiyiso wa lisima mayelanu na Xikwembu Nkulukumba. Pawulo a tsrale leswi: ‘Xikwembu Nkulukumba a hi Xikwembu Nkulukumba wa madzolonga, kambe wa ku zrula.’ Ntsrhaku, loko a vulavula hi mintlhanganu ya bandla a te: ‘Kambe hinkwaswu a swi yentxiwe hi mfanelo ni hi nawu.’​—1Ko 14:33, 40.

² A ku sunguleni ka papela ledzri, mupostola a be ndleve bandla dzra le Korinte mayelanu ni ku yavana loku a va li naku. Pawulo, a dzrimuxe vamakwavu leswaku ‘va vulavula zritu dzri va dzrin’we’, va tlhela va va ‘lava tlhanganisiwiki a ku yanakanyeni kun’we ni ku pimiseni kun’we’. (1Ko 1:10, 11) A game a va nyika xilayu mayelanu ni timhaka tinyingi leti a ti khumba wumun’we bya bandla. Hi ku tizrisa xifananiso xa mizri wa mhunu, a kombise xivileleko xa wumun’we ni ntizrisanu. A kutxe hinkwavu a bandleni dzra wukriste akuva va zron’weka hi vambeni hi ndlela ya lizrandzru, swi nge na mhaka leswaku va ni xiyenge muni. (1Ko 12:12-26) A ntizrisanu lowo a makazri ka lava va nga bandleni wu hi yentxa hi vona leswaku a bandla a dzri ta va ledzri hlelekiki.

³ Kambe xana bandla dzra wukriste a dzri fanela ku hlelisiwa kuyini? A dzri ta hleliwa hi mani? A ma ta va wani mavumbekela ya dzrone? A dzri ta zrangela ha mani? Loko hi tizrisa Bibele swanga nkongomiso wezru, hi ta kuma tinhlamulo leti khanyaka ta swivutiso leswi.​—1Ko 4:6.

DZRI HLELIWE HI NDLELA YA LE TILWENI

⁴ A bandla dzra wukriste dzri vumbiwe hi Pentekoxta wa 33 N.Y. Xana hi nga dondzra yini mayelanu ni bandla dzra dzana dzra ku sungula? A dzri hleliwe ni ku kongomisiwa hi ndlela ya le tilweni, leswi liki a dzri li hansi ka wuzrangeli (kra’tos) bya Xikwembu Nkulukumba (the·osʹ hi xigrika). Mazritu lawa mabidzri ma humelela ka 1 Petros 5:10, 11. Wudzrunguli lebyi huhutiwiki mayelanu ni leswi yentxekiki a Yerusalema kolomu ka 2.000 wa malembe ntsrhaku byi hi yentxa hi nga ganaganeki ka leswaku a bandla dzra vakriste lava totiwiki dzri simekiwe ha Xikwembu Nkulukumba. (Min 2:1-47) A dzri li wuyako byakwe, a yi li yindlu yakwe. (1Ko 3:9; Ef 2:19) A bandla dzra wukriste namunhla dzri landzrela mahlelekela ni matizrela ya bandla dzra dzana dzra ku sungula.

⁵ A bandla dzra dzana dzra ku sungula dzri sungule ni kolomu ka 120 wa vadondzrisiwa. Hi ku hetiseka ka Yoel 2:28, 29, moya wa ku xwenga wu txhululiwe hi khambi dzra ku sungula a henhla kwavu. (Min 2:16-18) Kambe hi siku dzro dzra dzrin’we, kolomu ka 3.000 wa vhanu va babatisiwile, va sungula ku hamba xiyenge xa bandla dzra lava pswaliwiki hi moya. A va yamukele zritu mayelanu na Kriste nakone ‘a va khinyela a ndondzrweni ya vapostola’. Ntsrhaku ka leswo, ‘a Hosi ifa yi va yengetelela vahuluxiwa hi siku dzrin’wana ni dzrin’wana’.​—Min 2:41, 42, 47.

⁶ Ku kula ka bandla a Yerusalema ku ve kukulu lakakuva muprista lwenkulu wa muyuda a khala, a ku a vadondzrisiwa a va tate Yerusalema hi dondzro yavu. Ka vadondzrisiwa lavampshwa a Yerusalema a ku ni vaprista vanyingi va va-Yuda, lava ndzrulukiki va va xiyenge xa bandla.​—Min 5:27, 28; 6:7.

⁷ Yesu a te: ‘N’wi ta va timboni tanga, la Yerusalema, ni le tikweni hinkwadzru dzra Yudeya, ni le Samariya, ni ku ya tlhasa vugan’wini bya misava.’ (Min 1:8) Swi ve xitanu, lakakuva ntsrhaku ka loko Stefano a file, ku sungule tinxanisa tikulu a Yerusalema, nakone a vadondzrisiwa lava a va hanya kone, va hangalasiwe a Yudeya ni le Samariya hinkwaku. Kambe o va lomu a va ya kone a va zrezra madzrungula lamanene ni ku yentxa vadondzrisiwa ku patsra ni van’we ku va-Samariya. (Min 8:1-13) Hi ku famba ka nkama, a madzrungula lamanene ma zrezriwe hi ndlela leyi humelelaka a makazri ka lava nga sokangakiki, ku lava nga liki va-Yuda, ku nga vamatiko. (Min 10:1-48) Ntizro lowu hinkwawu wa ku zrezra wu yentxe leswaku ku va ni vadondzrisiwa va ku tala ni ku vumbiwa ka mabandla manyingi lamampshwa a Yerusalema.​—Min 11:19-21; 14:21-23.

⁸ I malulamiselo wani ma yentxiwiki akuva ku tiyisekisiwa leswaku mabandla hinkwawu lamampshwa ma hleliwe ni ku zrangeliwa hi ndlela ya Xikwembu Nkulukumba, kumbe ya le tilweni? Hi ku kongomisiwa hi moya wa Xikwembu Nkulukumba, ku yentxiwe lulamiselo dzra leswaku ku va ni vabyisi lava hlayisaka ntlhambi. Pawulo na Barnaba va beke vakulu a mabandleni lawa va ma yendzreliki ka liyendzro dzravu dzra ku sungula. (Min 14:23) Luka, mutsrali wa Bibele, a khanela hi ntlhanganu lowu Pawulo a viki na wone ni vakulu va bandla dzra Efesa. Pawulo a va byele leswi: “Tivonelani n’wine ni ntlhambi hinkwawu, lowu moya lowa ku xwenga wu mi bekiki ku va valaviseli va wone, mi ta byisa bandla dzra Xikwembu Nkulukumba, ledzri a dzri xaviki hi ngati ya N’wanakwe.” (Min 20:17, 28, NM) A va faneleka ku va vakulu hi leswi a va tlhaselela timfanelo ta Matsralwa. (1Tm 3:1-7) Tito, mutizri-kulobye wa Pawulo, a a pfumeleliwe ku beka vakulu a mabandleni ya le Kreta.​—Ti 1:5.

⁹ Loko mabandla ma ya ma vumbiwa, vapostola ni vakulu a Yerusalema a va ya mahlweni va tizra swanga valaviseli va ntshima va bandla dzra wukriste dzra dzana dzra ku sungula, ledzri a dzri ndlandlamuka a misaveni hinkwayu. A va tizra swanga huvo leyi zrangelaka.

¹⁰ Loko a tsralela bandla dzra le Efesa, mupostola Pawulo a tlhamuxele leswaku loko va tizra hi ku pfumelelana ni moya wa Xikwembu Nkulukumba, bandla a dzri ta tama dzri va ni wumun’we hi ku fambisana ni wunhloko bya Yesu Kriste. Mupostola a kutxe vakriste ku txutxela ku titsrongahata ni ku tama va va ni ‘wumun’we bya moya’ hi ku tizrisana hi ku zrula ni hinkwavu a bandleni. (Ef 4:1-6) Ntsrhaku, a tsrhahe Amapsalma 68:18 a va a yi tizrisela ku vulavula hi lulamiselo dzra Yehovha dzra vavanuna lava fanelekaka hi tlhelo dzra moya akuva va zron’weka hi swivileleko swa bandla hi ku tizra swanga vapostola, vaprofeta, vazrezri va evhangeli, vabyisi ni vadondzrisi. Vavanuna lava, swanga swihiwa swa Yehovha, a va ta yaka bandla hinkwadzru akuva dzri wupfa he moyeni, dzri nyonxisa Yehovha.​—Ef 4:7-16.

MABANDLA NAMUNHLA MA LANDZRELA XIKOMBISO XA VAPOSTOLA

¹¹ Namunhla, mabandla hinkwawu ya Timboni ta Yehovha ma landzrela xikombiso lexi fanaka. Hinkwawu ma vumba bandla dzrin’we dzra misava hinkwayu ledzri kongomisiwaka hi vamakwezru lava totiwiki hi moya. (Zk 8:23) Yesu Kriste hi yene a yentxaka swi koteka. A hetisise xidumbiso xakwe hi ku tsrhama a dumbekile ka vadondzrisiwa vakwe lava totiwiki ‘hi masiku hinkwawu, ku kondzra ku hela minkama’. Vhanu lava tisiwaka a bandleni ledzri, ledzri kulaka, va yamukela madzrungula lamanene, va nyiketela wutomi byavu ka Yehovha hi ku helela, va tlhela va babatisiwa swanga vadondzrisiwa va Yesu. (Mt 28:19, 20; Mr 1:14; Min 2:41) Va yamukela Yesu Kriste, ‘mubyisi lwemunene’, swanga Nhloko ya ntlhambi hinkwawu, lowu vumbiwaka hi vakriste lava totiwiki, kun’we ni lava ‘tihamba tin’wanyana’. (Yh 10:14, 16; Ef 1:22, 23) Leswi va nga ‘ntlhambi wun’we’ va kondletela wumun’we hi ku pfumela wunhloko bya Yesu hi ku dumbeka ni ku tibeka hansi ka nkongomiso wa nhlengeletanu, ku nga ‘nandzra lwe wa ku dumbeka ni ku tlhazriha’, lweyi a bekiwiki ha Kriste. Mawaku loko ho tama hi dumba nandzra lweyi hi ku helela.​—Mt 24:45.

NTIZRO WA SWIHUBYANA SWA WUKHONGOTI LESWI HI YIMELAKA A TIMHAKENI TA NAWU

¹² Akuva ku nyikeliwa swakuda swa moya hi nkama wa kone ku tlhela ku zrezriwa madzrungula lamanene ya Mfumu na wugamu byi nge si na tlhasa, ku simekiwe swihubyana swa kukazri leswi tsralisiwiki nawini. Swihubyana leswi swi pfumeleliwe hi nawu a matikweni ya ku hambana-hambana mfuzri swa tizrisana. Swi nabyalisa ntizro wa ku zrezra a misaveni hinkwayu.

LESWI A ZRWAVI DZRI HLELISIWIKI XISWONE

¹³ Loko ku simekiwa zrwavi, ku hlawuliwa vakulu vazrazru kumbe ku tlula leswaku va vumba Xihubyana xa Zrwavi lexi taka lavisela ntizro lowu yentxiwaka a tikweni kumbe a matikweni lawa ma zrangeliwaka ha dzrone. Xizro xin’we xa xihubyana xi tizra swanga mutlhanganisi wa Xihubyana xa Zrwavi.

¹⁴ Mabandla lawa ma zrangeliwaka hi zrwavi ma hleliwa hi ku ya hi miganga. Miganga leyi ya siyana hi ku kula ka yone, hi ku ya hi mbangu ni lidzrimi dzra kone, kun’we ni ntsrengo wa mabandla lawa ma nga ndzreni ka muganga lowu yaviwiki hi zrwavi. Ka muganga ha wun’we ku bekiwa mulaviseli leswaku a lavisela mabandla ya muganga lowo. Zrwavi dzri nyikela nkongomiso ka mulaviseli wa muganga mayelanu ni leswi a fanelaka ku swi yentxa.

¹⁵ Mabandla ma titsrongahatela malulamiselo ya nhlengeletanu hikusa ma hambeliwa ku pfuna hinkwavu. Ma yamukela ku bekiwa ka vakulu lava va languselaka ntizro wa mazrwavi, miganga ni mabandla. Va yimela nandzra lwe wa ku dumbeka ni ku tlhazriha leswaku a va nyika swakuda swa moya hi nkama wa kone. Kasi yene nandzra lwe wa ku dumbeka ni ku tlhazriha namunhla, a womelelana ni wuzrangeli bya Kriste, a landzrelelisa minsinya ya milawu ya Bibele a tlhela a pfumela ku kongomisiwa hi moya lowa ku xwenga. Loko hi tizra hi wumun’we, hinkwezru hi tikholisa hi mabindzru ya ku fana ni ya vakriste va dzana dzra ku sungula: “Nakunene, a mabandla a ma ya mahlweni ma tiyisiwa a lipfumelweni ni ku yandzra hi nhlayu siku ni siku.”​—Min 16:5, NM.