Xiyengetela

Dzrungula Ledzri Yaka Ka Vapswele Lava Nga Vakriste:

Swanga tatana kumbe mamana, u navela ku pfuna vanaku lava zrandzrekaka akuva va zrandzra Yehovha va tlhela va tinyiketela kwakwe. U nga va pfunisa kuyini ku tilulamisela ku babatisiwa? U nga va vonisa kuyini leswaku va tibekiselile ku teka gwansu ledzri dzra lisima?

Yesu a lelete valandzreli vakwe, a ku: ‘Fambani, n’wi ya dondzrisa matiko hinkwawu, n’wi va babatisa.’ (Mt 28:19) Hi ku ya hi xileleto lexi, akuva u babatisiwa swi djula u zranga hi ku va mudondzrisiwa​—lweyi a nga gameliki ntsena ka ku twisisa tindondzro ta Kriste a tlhela a ti kholwa, kambe a tlhelaka a hanya ha tone. Leyo i mintxhumu leyi nambi vana va nga yi yentxaka.

Bekela vanaku xikombiso lexinene, u tlhela u va gongondzrela tindondzro ta Yehovha. (Dt 6:6-9) Leswo swi patsra ku tizrisa dzrungula ledzri nga ka mabuku lama liki I Yini Leswi Hi Nga Swi Dondzraka A Bibeleni? ni Tama U Zrandzra Xikwembu Nkulukumba akuva u va dondzrisa ntiyiso wa masungulo wa Bibele ni ku yanakanyisisa, va tlhela va hanya hi ku tizrisa minsinya ya milawu ya Bibele. Pfuna vanaku leswaku va tiva ku tlhamuxela hi ta lipfumelo dzravu hi ku tizrisa mazritu yavu. (1Pe 3:15) Wutivi ni ku kutxiwa loku va ku kumaka kwaku ni ka dondzro ya ximhunu, wugandzreli bya ndangu, mintlhanganu ya bandla ni vanghanu lavanene swi ta va pfuna ku hluvuka, va tlhasela ku babatisiwa ni ku yentxa leswi yengeselekiki. Va bekele makungu ya moya.

A buku dzra Amaproverbia 20:11 dzri li: ‘Nambi a ntsrongwana, a tiviwa hi ku yentxa kwakwe, loko mayentxela yakwe ma ta basa ni ku lulama.’ He yini mintizro yimbeni leyi a n’wana a nga kombisaka ha yone leswaku a ndzruluke mudondzrisiwa wa Yesu Kriste ni leswaku a tibekiselile ku babatisiwa?

N’wana lweyi a kombisaka nhluvuku leswaku a babatisiwa a fanela ku yingiseta mpswele kumbe vapswele. (Min 5:29; Kl 3:20) Loko Bibele dzri khanela ha Yesu na a ha ni 12 wa malembe dzri li: ‘A hamba a va yingiseta [vapswele vakwe].’ (Lk 2:51) Nakunene, a wu yimelanga leswaku n’wanaku ava lweyi a hetisekiki. Kambe n’wana lweyi a navelaka ku babatisiwa a tikazratela ku landzrela xikombiso xa Yesu a tlhela a tiviwa hi ku yingiseta vapswele.

A kombisa leswaku awa swi zrandzra ku dondzra mintiyiso ya Bibele. (Lk 2:46) Xana n’wanaku awa swi zrandzra ku ya a mintlhanganwini a tlhela a nyikela tinhlamulo? (Ps 122:1) Xana awa swi zrandzra ku dondzra Bibele siku ni siku a tlhela a tihambela dondzro ya ximhunu?​—Mt 4:4.

N’wana lweyi a hluvukaka leswaku a babatisiwa a tikazratela ku zrangisa timhaka ta Mfumu. (Mt 6:33) Awa swi twisisa leswaku a ni wutiyanguleli bya ku byela vambeni hi ta lipfumelo dzrakwe. A zrezra hi tindlela ta ku hambana-hambana, nakone a swi mu danisi ku byela vadondzrisi vakwe ni vadondzri-kulobye a xikole leswaku yene i Mboni ya Yehovha. A swi tekela nhlokweni swiyavelo leswi a nyikiwaka ka Ntlhanganu Wa Wutomi Ni Wutizreli.

A tlhela a lwela ku hlayisa mahanyela lama basiki hi ku fulazrela vanghanu va ku biha. (Pr 13:20; 1Ko 15:33) Mahanyela lawo ma ta tikomba hi ndlela leyi a hlawulaka ha yone tinsimu, ma-filme, minongonoko ya televhizawu, ma-vídeogame, ni ndlela leyi a tizrisaka internet ha yone.

Vanyingi va yamukele mpfuno lowu vapswele vavu va tikazrateliki ku va nyika, va yamukela ntiyiso va va va fanelekela ku babatisiwa. Ingiki Yehovha a nga ku tovokisa loko u li ku pfuneni ka vanaku leswaku va tlhaselela gwansu ledzri dzra lisima a wuxakeni byavu na Yehovha.

Dzrungula Ledzri Yaka Ka Muzrezri Lweyi A Nga Siki Na Babatisiwa:

I tovoko ku tizra ni bandla swanga muzrezri lweyi a nga siki na babatisiwa. Wa tlangeliwa hi leswi u yentxiki nhluvuku wa moya. U tive Xikwembu Nkulukumba hi ku dondzra Zritu dzrakwe u tlhela u kombisa lipfumelo ka swidumbiso swakwe.​—Yh 17:3; Hb 11:6.

Na u nge si na sungula ku dondzra ni Timboni ta Yehovha, swi nga yentxeka leswaku hi ndlela ya kukazri a u lumba nhlengeletanu yimbeni ya wukhongoti, kumbexana a wu nge na wukhongoti. N’waninkama a u hamba ntizro wa kukazri lowu nga fambisaniki ni minsinya ya milawu ya Bibele. Kambe swoswi u kombise lipfumelo dzraku hi ku tisola, leswi tlhamuxelaka ku tisola hi ku helela hi swidoho leswi u swi yentxiki, ni ku ndzruluka, leswi tlhamuxelaka ku fulazrela mahanyela lama bihiki ni ku tiyimisela ku yentxa leswi lulamiki a mahlweni ka Xikwembu Nkulukumba.​—Min 3:19.

Hi tlhelo dzrimbeni, swi nga yentxeka u tive matsralwa ya ku xwenga ‘na we he ntsrongo’. Xileswo u sizreleliwile leswaku u nga tipeti ka mahanyela lama nga liki ya wukriste ni ku yentxa swidoho leswikulu. (2Tm 3:15) U dondzre ku yala ku sindzrisiwa hi tintanga taku ni ku kutxeteliwa hi tindlela timbeni leswaku u yentxa leswi bihiki a matihlweni ya Yehovha. U kombise lipfumelo hi ku seketela wugandzreli bya xihlayelamfuzri ni ku byela vambeni leswi u swi kholwaka. U wupfisiwile a wutizrelini bya wukriste. Swoswi u titekele xiboho xa ku tizrela Yehovha swanga muzrezri lwa nga siki na babatisiwa.

Nambi u tive Yehovha na u kulile kumbe na we he ntsrongo, swi nga yentxeka swoswi u li ku yanakanyisiseni hi magwansu mabidzri ya lisima​—ku tinyiketela ni ku babatisiwa. U tinyiketela ka Yehovha hi ku mu tsrhindzrekelela hi xikhongoto ni ku mu byela xiboho lexi u titekeliki xone xa ku tinyiketela kwakwe ntsena hi la ku nga helikiki. (Mt 16:24) U funga ku tinyiketela koloko hi ku babatisiwa a matini. (Mt 28:19, 20) Loko u tinyiketela u tlhela u babatisiwa, u ndzruluka mutizreli wa Yehovha Xikwembu Nkulukumba. Mawaku ndjombo leyo ya ku xonga!

Hi lani xidondzro xaku xa Bibele xi kombisiki ha kone, u nga ha tlhangana ni swikazratu swa ku hambana-hambana. Dzrimuka leswaku na a ha ku babatisiwa, ‘Yesu . . . a fambisiwe hi moya huleni na a dzringiwa hi Diyavulosi’. (Mt 4:1) Swanga mudondzrisiwa wa Yesu, u nga ha lavisela ku dzringiwa hi tindlela timbeni loko wa ha ku babatisiwa (Yh 15:20) Yi ta buya hi tindlela ta ku hambana-hambana. U nga ha kanetiwa hi swizro swa ndangu. (Mt 10:36) U nga ha hlekiwa hi vadondzri-kuloni, vatizri-kuloni ni khale ka vanghanu vaku. Minkama hinkwayu dzrimuka mazritu ya Yesu lama kumekaka ka Marka 10:29, 30, lama liki: ‘Ndzri hlayela mfuzri, ndzri n’wi byela ndzri li: a ku na mhunu lwa tsrhikiki yindlu, nambi ve vamakwavu, kumbe vamakwavu va vavasati, kumbe mamana wakwe, kumbe tatana wakwe, kumbe vana, kumbe masimu, ha mine ni evhangeli, a nga tiki kuma leswi tlulaka ka dzana swoswi, a nkameni wolowo, a tiyindlu ni vamakwavu va vavanuna ni vavasati, na va mamana ni masimu, kun’we ni tinxanisa, nakone a ta kuma vutomi lebyi nga gamikiki.’ Hi ndlela leyo, tama u tikazratela ku tsrhama kusuhi na Yehovha ni ku hanya hi ku landzra milawu yakwe ya ku lulama.

Loko u navela ku babatisiwa, byela mutlhanganisi wa huvo ya vakulu. Vakulu va ta bula na wene hi swivutiso leswi taka landzrela dzrungula ledzri akuva va vona kumbe swa fanela kuva u babatisiwa. U nga sungula ku kambisisa swivutiso leswo wuswaku swanga xiyenge xa dondzro yaku ya ximhunu ya nkama ni nkama.

Loko u lulamisela bulu ledzro, tinyike nkama wa ku dondzra u tlhela u gayela hi matsralwa lama tsrhahiwiki. U nga ha titsralela ka buku dzroledzri kumbe kumbeni. U nga swi tizrisa leswi u swi tsraliki u tlhela u pfula buku ledzri loko vakulu va ku kambela. Loko ku ni xivutiso lexi ku kazratelaka ku xi twisisa, titwe na u ntsrhunxekile ku kombela mpfuno ka lweyi u dondzraka na yene Bibele kumbe ka vakulu.

Ka bulu dzraku ni vakulu, u nga pimisi leswaku swi djula ku va u nyikela tinhlamulo ta ku leha kumbe ta ku kazrata. I swinene ku nyikela nhlamulo ya ku nabyala ni ya ku kongoma hi mazritu yaku. Minkama yinyingi, loko u hlamula i swinene ku tizrisa ndzrimana yin’we kumbe tibidzri leti seketelaka mhaka yaku a Matsralweni.

Loko u nge si va ni wutivi lebyi dzringanaka mayelanu ni tindondzro ta Bibele ta masungulo, vakulu va ta hamba malulamiselo leswaku u kuma mpfuno akuva u kota ku tlhamuxela wutivi bya Matsralwa hi ku tizrisa mazritu yaku ni ku fanekela ku babatisiwa a nkameni lowu taka.

[Ka vakulu va bandla: Swileleto swa ndlela ya ku bula ni lava djulaka ku babatisiwa swi kumeka ka matluka 208-212.]