Bulu Dzra Ku Gimeta Ni Lava Yaka Ku Babatisiweni

Hi ntolovelo babatiso dzri hambiwa a tinhlengeletanwini ta muganga ni le tinhlengeletanwini letikulu ta xifundzra ta Timboni ta Yehovha. Loko wukaneli bya babatiso byi ya ku heleni, xikaneli xi ta kombela lava yaka ku babatisiweni leswaku va sekeleka va hlamula swivutiso swibidzri leswi landzrelaka hi zritu dzra ku tlakuka:

1. Xana u tisolile a swidohweni swaku, u tinyiketela ka Yehovha, u tlhela u pfumela ka ndlela yakwe ya ku huluxa hi ku tizrisa Yesu Kriste?

2. Xana wa swi twisisa leswaku babatiso dzraku dzri ku yentxa u tiviwa swanga mun’wana wa Timboni ta Yehovha lweyi a fambisanaka ni nhlengeletanu ya Yehovha?

Loko lava yaka ku babatisiweni va hlamula swivutiso leswi va ku ina, va va na va swi “hlaya a livaleni” leswaku va kombisa lipfumelo ka xitizrulo ni leswaku va tinyiketele hi ku helela ka Yehovha. (Ro 10:9, 10) Lava djulaka ku babatisiwa va fanela ku zranga va khongota ni ku yanakanyisisa hi swivutiso leswi akuva va kota ku hlamula hi ku ya hi leswi mhunu ha byakwe a swi kholwaka.

Xana u tinyiketelile ka Yehovha hi xikhongoto, u mu dumbisa ku gandzrela yene ntsena ni ku yentxa ku zrandzra kwakwe swanga ntxhumu wa lisima ku tlula hinkwaswu a wuton’wini byaku?

Xana wa kholwiseka hi ku helela leswaku u djula ku babatisiwa ka nhlengeletanu leyi landzrelaka?

Xana u fanela ku yambalisa kuyini loko u ya ku babatisiweni? (1Tm 2:9, 10; Yh 15:19; Flp 1:10)

Hi fanela ku yambala ‘hi ku simama ni hi ku tikhoma’ akuva hi kombisa leswaku hi ‘tizrela Xikwembu Nkulukumba’. Xileswo, lava yaka ku babatisiweni a va fanelanga va yambala mpahla leyi gomiki, yi kombisaka mizri loko va tsrakamile kumbe leyi tsraleteliwiki. Va fanela ku yambala mpahla leyi basiki, yi hlelekiki, ni leyi fanelekaka ka xiyentxakalo lexo.

Xana mhunu a fanela ku tikhomisa kuyini loko a babatisiwa? (Lk 3:21, 22)

Babatiso dzra Yesu dzri beke xikombiso xa ndlela leyi vakriste va fanelaka ku babatisiwa ha yone namunhla. A a swi twisisa leswaku babatiso a hi gwansu dzra matlangwana, nakone a swi kombise hi mimpimiso ni hi mintizro. Xileswo, a mbangu wa babatiso a hi wa ku hamba mafenya, wa ku tlangela kone, ku hlambeta, kumbe swimbeni leswi nga ha susaka lisima dzra babatiso; handle ka leswo mukriste lweyi a ha ku babatisiwaka a nga fanelanga ku titeka ingi hi loko a ganye xihiwa xa kukazri lexikulu. Nambi leswi ku babatisiwa swi nyonxisaka, ku nyonxa koloko ku fanela ku kombisiwa hi ndlela ya xitxhavu.

Xana ku ya mintlhanganwini nkama ni nkama ni ku titlhanganisa ni bandla swi ta ku pfunisa kuyini ku ya mahlweni u tinyiketela ka Yehovha?

A ntsrhaku ka ku babatisiwa ha yini swi ta va swa lisima ku tibekela xiyimiso lexinene xa dondzro ya ximhunu ni ku ya nsin’wini nkama ni nkama?

SWILELETO LESWI YAKA KA VAKULU VA BANDLA

Loko muzrezri lweyi a nga siki na babatisiwa a hlaya leswaku a navela ku babatisiwa, a fanela ku kutxiwa ku kambisisa hi wuyenti “Swivutiso Leswi Hambiwaka Lava Djulaka Ku Babatisiwa”, leswi kumekaka ka matluka 185-207 ya buku ledzri. A fanela ku tlhela a kambisisa “Dzrungula Ledzri Yaka Ka Muzrezri Lweyi A Nga Siki Na Babatisiwa”, dzri sungulelaka ka tluka 182, ledzri tlhamuxelaka ndlela leyi a nga tibekiselaka ha yone leswaku a bula ni vakulu. Hi lani swi tlhamuxeliwiki ha kone ka tluka ledzro, lweyi a djulaka ku babatisiwa a nga ha tizrisa leswi a titsraleliki ka buku dzrakwe a tlhela a pfula buku ledzri loko a bulisana ni vakulu. Kambe a swi vileleki ku pfuxeta swivutiso leswo ni mhunu mumbeni na a nge si na kambeliwa hi vakulu.

Mun’wana ni mun’wana lweyi a djulaka ku babatisiwa a fanela ku byela mutlhanganisi wa huvo ya vakulu. Loko lweyi a djulaka ku babatisiwa a hetile ku dondzra “Swivutiso Leswi Hambiwaka Lava Djulaka Ku Babatisiwa”, mutlhanganisi wa huvo ya vakulu a fanela ku mu vutisa kumbe a tinyiketelile ka Yehovha hi xikhongoto leswaku a yentxa ku zrandzra Kwakwe. Loko a tinyiketelile, mutlhanganisi wa huvo ya vakulu a ta hamba malulamiselo ya leswaku vakulu vabidzri va bula na yene hi ku tizrisa “Swivutiso Leswi Hambiwaka Lava Djulaka Ku Babatisiwa”. Xiyenge ha xin’we xi fanela ku tameliwa hi nkulu mun’we. Mabulu lawo ma nga ha yentxiwa nambi loko ku nge si na hambiwa xitiviso xa nhlengeletanu ya muganga kumbe nhlengeletanu leyikulu ya xifundzra.

Swiyenge ha swibidzri swi nga hetiwa hi makhambi mabidzri, lani ha xin’we xi tekaka wora dzrin’we, kambe a ku na lexi sivelaka ku teka nkama lowu yengeselekiki loko swi vileleka. Xiyenge xin’wana ni xin’wana xi fanela ku sungula ni ku pfala hi xikhongoto. Nambi vakulu kumbe lweyi a kambeliwaka a va fanelanga ku tsrutsrumisiwa loko ku buliwa hi swivutiso leswi. Vakulu lava hlawuliwiki leswaku va hamba swikambelo leswi va fanela ku zrangisa mhaka leyi ka xiyimiso xavu.

Hi ntolovelo i swinene ku kambela swivutiso leswi ni mhunu ha mun’we, a matsrhan’wini ya ku va patsra hi ntlawa. Loko lweyi a kambeliwaka a hlamula swivutiso hinkwaswu ha xin’we-xin’we, swi ta pfuna vakulu ku tiva leswaku a ni wutivi bya ku ya gama kwini, kutani va teka xiboho xa leswaku awa fanekeleka ku babatisiwa kumbe im-him na va nga ganaganeki. Handle ka leswo, lweyi a kombelaka ku babatisiwa a hlamula na a ntsrhunxekile loko a kambeliwa wuswakwe. Nuna na nsati va nga patsriwa va kambeliwa xikan’we.

Loko lweyi a taka kambeliwa a li makwezru wa xisati, bulu dzri fanela ku hambiwa mbangwini lowu va taka voniwa hi vambeni hi ku nabyala, kambe va nga swi twi leswi va bulaka swone. Loko swi kombela ku va ni mhunu mun’wana ka bulu ledzro, a fanela ku va nkulu wa bandla kumbe nandzra wa wutizreli, kambe swi ta ya hi xiyenge lexi a kambeliwaka, hi ku ya hi ntlhamuxelo wa yava ledzri landzrelaka.

Loko vakulu a bandleni va li vatsrongo swinene, malandzra ya wutizreli lama nga ni wuswikoti ma tlhela ma hluteka a miyanakanywini ma nga kambisisa swivutiso swa “Xiyenge 1: Leswi Vakriste Va Swi Kholwaka”, ni lweyi a djulaka ku babatisiwa. Ko va vakulu ntsena va fanelaka ku kambisisa “Xiyenge 2: Mahanyela Ya Vakriste”. Loko bandla dzri nge na vamakwezru va xinuna lava fanelekaka hi ntsrengo lowu dzringanaka, ku nga byeliwa mulanguseli wa muganga akuva a vona kumbe bandla ledzri kumekaka kusuhi dzri nga pfunisa.

Loko lweyi a djulaka ku babatisiwa a li ntsrongwana, vapswele vakwe lava nga vapfumeli kumbe mun’we wa vone a fanela ku va kone ka swiyenge hinkwaswu. Loko mpswele kumbe vapswele va nge ti swi kotisa ku va kone, vakulu vabidzri (kumbe nkulu mun’we ni nandzra wa wutizreli, hi ku ya hi xiyenge lexi kambisisiwaka) va fanela ku kumeka ka xiyenge ha xin’we.

Vakulu va fanela ku tiyiseka leswaku lweyi a djulaka ku babatisiwa a ni wutivi lebyi dzringanaka bya tindondzro ta Bibele ta masungulo. Handle ka leswo, va fanela ku tiyiseka leswaku a zrandzra ntiyiso hi mbilu hinkwayu ni leswaku a yi bekela lisima nhlengeletanu ya Yehovha. Loko mhunu wa kone a nga ti twisisi tindondzro ta Bibele ta ntshima, vakulu va ta hamba malulamiselo leswaku a pfuniwa hi ku kongoma akuva a faneleka ku babatisiwa a nkameni lowu taka. Vambeni va nga ha djula nkama lowu yengeselekiki akuva va kombisa leswaku va dzri twisisa lisima dzra ntizro wa ku zrezra kumbe dzra ku tibeka hansi ka malulamiselo ya nhlengeletanu. Vakulu va fanela ku tizrisa nkama wa kolomu ka wora, ka xiyenge ha xin’we hi wutlhazri akuva va swi twisisa hi ku helela kumbe swa fanekela kuva mhunu wa kukazri a babatisiwa. Nambi leswi ku nga ha tekiwaka nkama wunyingi ka swivutiso swin’we ku tlula swimbeni, swivutiso hinkwaswu swi fanela ku hambiwa.

Ntsrhaku ka xiyenge xa wubidzri, vakulu lava yaveliwiki ku kambela swivutiso leswi va ta tlhangana akuva va kambisisa kumbe mhunu wa kone awa faneleka ku babatisiwa kumbe im-him. Vakulu va ta kambisisa ndlela leyi mhunu a kuliki ha yone, wuswikoti byakwe ni swiyimu swimbeni swa mhunu ha mun’we. Hi zron’weka hi lava zrandzraka Yehovha va tlhela va twisisa mintiyiso ya Bibele ya masungulo. Loko hi va pfuna hi lizrandzru, lava va babatisiwaka va ta tibekisela hi lani swi djulekaka ha kone akuva va hetisisa ntizro wavu wa lisima swanga vazrezri va madzrungula lamanene.

Ntsrhaku ka leswo, nkulu mun’we kumbe ha wubidzri byavu va fanela ku tlhangana ni lweyi va mu kambeliki akuva va mu byela kumbe awa faneleka ku babatisiwa. Loko mhunu wa kone a faneleka, vakulu va fanela ku bulisana na yene hi ku tizrisa “Bulu Dzra Ku Gimeta Ni Lava Yaka Ku Babatisiweni”, ledzri kumekaka ka matluka 206-207. Loko lweyi a yaka ku babatisiweni a nge si na heta ku dondzra buku ledzri liki Leswi Hi Nga Swi Dondzraka ni ledzri liki Tama U Zrandzra Xikwembu Nkulukumba, vakulu va fanela ku mu kutxa ku yentxa leswo a ntsrhaku ka babatiso. Byela lweyi a yaka ku babatisiweni leswaku a siku dzrakwe dzra babatiso dzri ta tsraliwa ka Xibiko Xa Muzrezri Wa Bandla lexi buyaka hi vito dzrakwe. Mu dzrimuxani leswaku vakulu va ta teka dzrungula dzra ximhunu dzra muzrezri akuva a nhlengeletanu yi kota ku vonelela ntizro wa wukhongoti wa Timboni ta Yehovha a misaveni hinkwayu ni kuva a muzrezri a kota ku hlengela ka mintizro ya moya a tlhela a kuma mpfuno hi tlhelo dzra moya. Hi ku yengesela, vakulu va nga byela vazrezri lavampshwa leswaku dzrungula dzrini na dzrini dzra ximhunu dzri hlayisiwa hi ku ya hi Política Global de Proteção de Dados das Testemunhas de Jeová (ku nga milawu ya misava hinkwayu ya Timboni ta Yehovha ya ku sizrelela dzrungula dzra ximhunu), leyi kumekaka ka jw.org.

A ntsrhaku ka lembe na muzrezri a babatisiwile, vakulu vabidzri va fanela ku tlhangana na yene akuva va mu tiyisa ni ku mu kutxa hi lani swi djulekaka ha kone. Mun’we wa vakulu a fanela ku va mulaviseli wa ntlawa wakwe wa nsimu. Loko makwezru lweyi a pfuxeliwaka a ha li ntsrongo, vapswele kumbe mpswele wakwe lweyi a nga mupfumeli a fanela ku va kone. Mabulu ma fanela ku yentxiwa hi ndlela ya xinghanu ni leyi kutxaka. Vakulu va ta bula na yene hi nhluvuku wakwe wa moya va tlhela va mu pfuna hi ndlela leyi kongomaka mayelanu ni ndlela leyinene ya kuva a ya mahlweni ni dondzro yakwe ya ximhunu, ku dondzra Bibele siku ni siku, ku va ni wugandzreli bya ndangu bya vhiki ni vhiki, kuva a nga lovhi mintlhanganwini ni kuva a hlamula ka yone a tlhela a ya nsin’wini vhiki ni vhiki. (Ef 5:15, 16) Loko a nge si na heta ku dondzra buku ledzri liki Leswi Hi Nga Swi Dondzraka ni ledzri liki Tama U Zrandzra Xikwembu Nkulukumba, vakulu va fanela ku mu djulela mhunu wa ku mu dondzrisa. Vakulu va fanela ku mu kombisa lizrandzru va tlhela va mu kulungela. Hi ntolovelo, ku mu laya ni ku mu pfuna ka timhaka tibidzri swa yanela.