6 Wa Mintungu Leyi Landzreliki

Moxe na Aroni va tlhela va phindhela va ya khanela na Faro, va tlhasa va ku: ‘Xikwembu Nkulukumba a hlaye leswaku loko u nga tsrhiki Vaisrayele va famba, a ta tata tiko hinkwadzru dzra Egipta hi mabawa.’ Ntsrhaku ka leswo, mabawa ma ve manyingi ngopfu swinene lakakuva ma tata miti ya Vaegipta, kambe a mabawa lawa a ma nga va hlaseli Vaisrayele. A ntungu lowu ni yin’wana leyi landzreliki a yi hambanile nakone a yo hlasela Vaegipta ntsena. Loko Faro a vona leswo a ku: ‘Moxe, kombela Yehovha a hi susela mabawa lawa hinkwawu kutani ni ta mi tsrhika mi famba.’ Hiloko Yehovha a helisa mabawa hinkwawu, kambe Faro a nga va tsrhikanga Vaisrayele va famba.

Xileswo Yehovha a ku: ‘Loko Faro a nga tsrhiki vhanu vanga va famba, a swihazri swa le Egipta swi ta vabya swi tlhela swi fa.’ Phela leswo swi yentxeke hi siku ledzri landzreliki. O va ku a swihazri swa Vaisrayele a swi fanga.

Faro a yi tivile mhaka leyo kambe leswi yene a a ni nkanu a nga va tsrhikanga Vaisrayele va famba. Xileswo Yehovha a byela Moxe a ku: ‘Teka nkuma u wu hlwanya a moyeni.’ Moxe a yentxa swoswo kutani ku va ni ntsrhuzri a mpfhukeni. Hiloko a ntsrhuzri wu wa, kutani a swihazri ni Vaegipta va sungula ku tala hi mazrumba ya ku vavisa ngopfu swinene. Nambitanu Faro a yala ku tsrhika Vaisrayele va famba.

Yehovha a tlhela a zruma Moxe akuva a ya vulavula na Faro, Moxe a tlhasa a ku: ‘Leswi wene u kalaka u nga swi djuli ku tsrhika vhanu vanga va famba, mundzruku ku ta na mpfula ya mazralana a tikweni hinkwadzru dzra Egipta.’ Xileswo hi siku ledzri landzreliki, Yehovha a yentxa leswaku ku na mpfula leyikulu ya mazralana ku tlhela ku ba ni tilo. Phela a ku ngi ngi sama ku yentxeka ntxhumu wa ku fana ni lowu a Egipta. A mpfula leyo yi hohlote minsinya hinkwayu ni swimila swin’wana, kambe a yi zanga hi ku na a makaya ya Vaisrayele. Hiloko Faro a byela Moxe a ku: ‘Ni kombela kuva u byela Yehovha a yimisa mpfula leyi, ni ta mi tsrhika mi famba.’ Moxe a vulavula na Yehovha kutani mpfula yi yima, kambe Faro a nga swi hetisisanga leswi a swi dumbisiki.

Hiloko Moxe a byela Faro a ku: ‘A swimila hinkwaswu leswi kalaka swi nga hohlotiwanga hi mpfula, swi ta deteteliwa hi mintete.’ Xileswo mintete ya yinyingi ngopfu swinene yi hlasela tiko dzra le Egipta nakone yi sungula ku detetela minsinya ni swimila leswi siyiwiki hi mpfula. Hiloko Faro a ku: ‘Ni kombela kuva u byela Yehovha a hi susela mintete leyi.’ Yehovha a yentxa leswaku mintete hinkwayu yi suka, kambe Faro a nga va tsrhikanga Vaisrayele va famba.

Hi leswi yentxiki Yehovha a zruma Moxe akuva a tlakuxa voko dzrake a matilweni. Nkama lowu Moxe a nga tlakuxa voko dzrake, hi ku kahlula tiko hinkwadzru dzra le Egipta dzri ve ni munyama. Ku dzringana masiku mazrazru, a Vaegipta a va nga koti ku vona ntxhumu hikusa a ke mphum, kambe lomu Vaisrayele a va tsrhama kone a ku vona.

A hiloko Faro a vitana Moxe a mu byela leswi: ‘Hi swone, wene ni vhanu vaku mi nga famba, kambe tihomu ni tihamba tenu swi ta sala.’ Moxe a hlamula a ku: ‘Hi fanela ku famba ni swifuyu swezru hikusa hi djula ku swi nyikela ka Yehovha swanga magandzrelo.’ Hiloko Faro a kwata ngopfu swinene a va a bongela Moxe na Aroni a ku: ‘Sukani lani, loko no tlhela ni mi vona ni ta mi dlaya.’