Xidumbiso Xa Yefta

A Vaisrayele va tsrhike ku gandzrela Yehovha va va va gandzrela swikwembu swa madzrimi. Kambe a swikwembu leswi a swi va pfunanga nkama lowu va nga hlaseliwa hi Vaamori. Phela va xaniseke ku dzringana malembe manyingi, va za va khongota ka Yehovha va ku: ‘Yehovha, leswi hi swi yentxiki a hi swinene, hi kombela u hi huluxa ka valala vezru.’ Xileswo va hohlotele swithombe swa swikwembu swa madzrimi va va va tlhela va gandzrela Yehovha. Kutani Yehovha a a djula ku va pfuna.

Akuva va kota ku hlula Vaamori, va hlawule wanuna wa kukazri akuva a va zrangela, wanuna lweyo a a vitaniwa Yefta. O va ku, na va nga si na ya yimpini, Yefta a dumbise Yehovha a ku: ‘Yehovha, loko hi hlula Vaamori, ni ta ku nyika a mhunu wa ku sungula lweyi a taka huma hi kaya kwanga a ni tlhangaveta; a ta ku tizrela wutomi byake hinkwabyu.’ Xileswo, hi mpfunu wa Yehovha Vaisrayele va hlulile.

Ku yentxeke leswaku mhunu wa ku sungula lweyi a tlhangavetiki Yefta loko a buya hi le yimpini a a li n’wanake wa n’hwanyana, wa mun’we, phela a hume na a kina a tlhela a txhaya dandana (pandeireta). Kutani i yini leswi Yefta a a ta swi yentxa? Yefta a dzrimuke xidumbiso lexi a xi hambeliki Yehovha, kutani a ku: ‘Oo n’wananga, u ni vavise mbilu! Phela ni hambele Yehovha xidumbiso, nakone akuva ni xi hetisisa swi djula ni ku zrumela a Xilo akuva u ya tizra ka tarbernakela dzra Yehovha.’ Hiloko n’wana wa Yefta a hlamula a ku: ‘Papayi, loko u hambe xidumbiso xi hetisisi. Kambe ni kombela ntxhumu wun’we na ni nga si famba. Ni tsrhiki ni ya tsrhama tinhaveni ni vanghanu vanga ku dzringana tihweti tibidzri, ni ta gama ni famba.’ Kutani a n’wana wa Yefta a tizrele a tabernakeleni hi ku dumbeka wutomi byake hinkwabyu, futsrhi lembe dzrin’wana ni dzrin’wana a vanghanu vake a va ya a Xilo akuva va ya mu pfuxela.