Yehovha A Nyike Samisoni Ntamu

Vaisrayele vanyingi va tlhele va sungula ku gandzrela swikwembu swa madzrimi, hi kola ka leswo Yehovha a tsrhike Vafilista va xanisa Vaisrayele. O va ku, a ku ni Vaisrayele va kukazri lava a va mu zrandzra Yehovha. Mun’we wavu a ku li Manowa. Yene ni nsati wake a va nge na vana. Siku dzrin’wana Yehovha a zrumela a ntsrumi yake akuva yi ya vulavula ni nsati wa Manowa. A ntsrumi yi tlhasa yi ku: ‘Yehovha a ta ku nyika n’wana lweyi a taka huluxa Vaisrayele ka Vafilista. A n’wanaku a ta va Munaziri.’ Wa swi tiva leswaku a a li vamani Vanaziri? A va li malandzra ya Yehovha ya ku hlawuleka. Nakone a va nga fanelanga va tsremeta misisi yavu.

Hi ku famba ka nkama, Manowa ni nkatake va ve ni n’wana lweyi va mu txhuliki vito dzra ku Samisoni. Nkama lowu Samisoni a a ya a kula, Yehovha a mu yentxa a va wanuna wa ntamu ngopfu swinene. Hi ntamu lowu a a li na wone a kote ni ku dlaya nghonyama hi mavoko. Siku dzrimbeni Samisoni a dlaye 30 wa Vafilista na a li wuswake. Xileswo, a Vafilista a va mu nyenya ngopfu swinene Samisoni, lakakuva va djuletela tindlela ta ku mu dlaya. Ka wusiku bya kukazri, hi nkama lowu Samisoni a a li ku yetleleni ka doropa dzra le Gaza, Vafilista va ye yima wusiku hinkwabyu a nyangweni wa doropa ledzro akuva va mu dlaya. Hiloko a pfuka xikazri ka wusiku a tlwavula xipfalu xa doropa, a tlhela a xi pakatsra a khwela na xone a henhla ka nhava leyi a yi li kusuhi ni doropa dzra le Hebroni.

Hi ku famba ka nkama, a Vafilista va ya vulavula na Dalila lweyi a a li namorada wa Samisoni, va tlhasa va ku: ‘Hine hi djula ku pfalela Samisoni a djele. Loko u hi byela a xihundla xa leswaku Samisoni a wu kuma kwini ntamu lowu a nga na wone hi ta ku nyika mali ya yinyingi ngopfu swinene ya prata.’ Dalila a a yi djula ngopfu swinene mali leyo, kutani a pfumelile. Dalila a a tsrhamela ku vutisa Samisoni xihundla lexi a xi mu yentxa a va ni ntamu lowu hlamalisaka. A ku sunguleni Samisoni a a nga swi djuli ku paluxa xihundla, kambe hi wugamu a xi hlayile, a te: ‘Hi swone, ni ta ku byela. Phela mine ni Munaziri nakone ku sukela ni pswaliwa a ni ngi ngi tsremeta misisi. Loko mhunu wa kukazri o ni tsrema misisi, a ni nge he ti va ni ntamu.’ Samisoni a dohile hi ku va a paluxe xihundla xake.

Hiloko Dalila a tekela ku teka mhaka leyi a ya yi byela Vafilista. Ntsrhaku ka leswo, a tlhelela kaya a va a yetlelisa Samisoni ka milenge yake, a gama a kombela mhunu wa kukazri akuva a tsremeta misisi ya Samisoni. Kolanu loko Vafilista va hlasela Samisoni, yene a zame ku lwa kambe a gungule leswaku a a nge he na ntamu. Xileswo, a Vafilista va khoma Samisoni va mu xokola matihlo va tlhela va mu pfalela djele.

Siku dzrin’wana, a Vafilista hinkwavu va hlengeletana akuva va gandzrela xikwembu xavu Dagoni. Va huwelela va ku: ‘Xikwembu xezru Dagoni, xi hi pfune ku khoma Samisoni! Buyisani Samisoni halenu, akuva a ta hi hlekisela.’ Hiloko va teka Samisoni va mu yimisa a makazri ka mapilari mabidzri, va sungula ku mu poyilela. Kutani Samisoni a huwelela ka Yehovha a kombela mpfunu a ku: ‘We Yehovha, ni kombela u tlhela u ni nyika ntamu kan’we ntsena.’ Hi nkama wolowo, a misisi ya Samisoni a yi kulilenyana. Hiloko Samisoni a susumeta mapilari ha mabidzri ya tempele hi ntamu wake hinkwawu. Kutani a tempele hinkwadzru dzri gilhika dzri djeka Vafilista hinkwavu lava a va li ndzreni ka dzrone va fa, ku patsra na Samisoni.