A Mfumu Wu Sungula Ku Yavana

A nkama lowu Solomoni a a gandzrela Yehovha, a ku ni ku zrula a tikweni dzra Israyele. Kambe Solomoni a teke vasati vanyingi va matiko mambeni nakone vone a va gandzrela swikwembu swa madzrimi. Hi kutsrongokutsrongo, na yene Solomoni a sungule ku gandzrela swikwembu swa madzrimi. Leswo a swi mu nyonxisanga Yehovha. Kutani Yehovha a byela Solomoni a ku: ‘A tiko dzra Israyele dzri ta susiwa a ndangwini waku dzri tlhela dzri yaviwa hi swiyenge swibidzri. A mbangu wa wukulu wa mfumu lowu ni ta wu nyikela ka mun’we wa malandzra yaku, kasi a ndangu waku wu ta fuma xiyenge lexitsrongo xa mfumu.’

Yehovha a yentxe leswaku xiboho lexi a xi tekiki xi hetiseka. Yerobuwamu, mun’we wa malandzra ya Solomoni, na a li ku yendzreni a kumane na muprofeta Akiya. Akiya a handzrule xiyambalu xake xi va ni 12 wa switlephu a va a byela Yerobuwamu a ku: ‘Yehovha a ta susa mfumu wa Israyele a ndangwini wa hosi Solomoni a va a wu yava hi swiyenge swibidzri. Teka 10 wa switlephu hikusa wene u tava hosi ya 10 wa tinxaka.’ Loko hosi Solomoni a yingela mhaka leyo, a djule ku dlaya Yerobuwamu. Xileswo, Yerobuwamu a tsrutsruma a ya a tikweni dzra Egipta. Hi ku famba ka nkama, hosi Solomoni a fa, kutani a n’wanake Robowamu a va hosi. Hiloko Yerobuwamu a vona leswaku i nkama lowunene wa ku tlhelela a Israyele.

A vakulu va Israyele va byela Robowamu va ku: ‘Loko u va hlayisa ha hombe vhanu, vone va ta ku seketela.’ Kambe a vanghanu va Robowamu lava a va ha li vampshwa, va mu byela leswi: ‘Robowamu, a Vaisrayele lava u nga va feleli, va yentxi va tizra swi phela.’ Hiloko Robowamu a landzra leswi a byeliwiki swone hi vanghanu vake. Robowamu a xanisa Vaisrayele kutani vone va mu terekela. Hiloko 10 wa tinxaka ta le Israyele ti hlawula Yerobuwamu swanga hosi ya tone. Kasi a tinxaka letin’wana ta tibidzri ta le Yuda ti hlawula ku seketela Robowamu. Kutani swoswi a 12 wa tinxaka ta Israyele a ti yavanile hi mimfumu yibidzri. A tinxaka leta 10 ti tiviwe swanga mfumu wa le Israyele kasi a tinxaka letibidzri ta Yuda ti tiviwe swanga mfumu wa le Yuda.

Yerobuwamu a a nga swi djuli kuva vhanu vake va ya a Yerusalema, lani a ku fuma Robowamu, akuva va ya gandzrela Yehovha. Xana wa swi tiva leswaku ha yini a a nga swi djuli? Yerobuwamu a a nga swi djuli hikusa a a txhava ku djikeliwa hi vhanu vake, va va va sungula ku seketela Robowamu. Kutani Yerobuwamu a hambe 2 wa swithombe swa woru, a va a byela vhanu vake a ku: ‘A Yerusalema i kule ngopfu swinene, xileswo Xikwembu Nkulukumba mi nga mu gandzrela kola.’ Kutani a vhanu va sungula ku gandzrela swithombe swa woru va va va dzrivala Yehovha hi ku helela.