Mfumu Lowu Taka Tsrhama Hi Lani Ku Nga Helikiki

Ka wusiku bya kukazri, hosi Nebukadnetsara a ve ni milozro ya ku txhavisa ngopfu swinene leyi yi mu yentxiki a kazrateka ni wuzrongo a nga ha byi kumi. Ntsrhaku ka leswo, a vitana valoyi a va byela a ku: ‘Ni tlhamuxelani leswi ni swi lozriki.’ A valoyi va ku: ‘Ina hosi yezru. Kambe ku sungula hi byele leswi u swi lozriki.’ Hiloko hosi yi va byela yi ku: ‘Im-him. Hi n’wine mi fanelaka ku ni byela leswi ni swi lozriki. Loko mi nga ni byeli ni ta mi dlaya hinkwenu!’ Kutani a valoyi va mu hlamula va ku: ‘Hosi Nebukadnetsara ha ku kombela, hi byeli leswi u swi lozriki kutani hine hi ta ku byela ntlhamuxelo wa kone.’ Hiloko hosi Nebukadnetsara a ku: ‘N’wine mi dzringisa ku ni kanganyisa, ni byelani swoswi leswi ni swi lozriki.’ Kutani a valoyi va ku: ‘Leswo a swi koteki hosi, a nga kone lweyi a nga swi kotaka leswo.’

Nebukadnetsara a hlundzruka ngopfu swinene lakakuva a djula ku dlaya tintlhazri hinkwatu leti a ti le Babilona. Leswo swi beke wutomi bya Daniyele, Xadraki, Mixaki na Abedinego a nghozini. Xileswo, Daniyele a ya vulavula ni hosi, a yi kombela leswaku yi mu nyika nkamanyana akuva a kota ku kuma ntlhamuxelo wa kone. Kutani Daniyele ni vanghanu vake va khongota ka Yehovha va kombela mpfunu. Xana Yehovha a xi hlamulile xikhongoto xavu?

Hiloko Yehovha a byela Daniyele leswi lozriwiki hi Nebukadnetsara ni ntlhamuxelo wa kone. Hi siku ledzri landzreliki, Daniyele a byela mun’we wa malandzra ya hosi a ku: ‘U nga dlayi ntlhazri ni yin’we. Ni nga hlaya leswi hosi yi swi lozriki.’ Hiloko wanuna lweyi a a tizrela ndlwini ya hosi a teka Daniyele a mu yisa ka hosi Nebukadnetsara. Kutani Daniyele a byela hosi a ku: ‘Xikwembu Nkulukumba a ku byela leswi taka yentxeka a nkameni lowu taka. Wene hosi u lozre leswi: U vone xithombe xa xikulu ngopfu swinene, a xithombe lexo a xi ni nhloko ya woru, a xi ni xifuva ni mavoko ya prata nakone a xi ni khuzri ni mintsrhumbi ya kobri. Phela a xithombe a xi ni milenge ya nsimbi, ni minkondzro ya nsimbi leyi patsraniki ni vumba. Hiloko ku tsremiwa zribye a nhaveni dzri wa dzri ba minkondzro ya xithombe. Hi ku landzrela, a xithombe xi helisiwa xi va ntsrhuzri kutani a moya wu xi hangalasa. Kambe a zribye ledzri dzri biki xithombe lexo dzri ndzruluka nhava leyikulu yi va yi tata misava hinkwayu.’

Daniyele a tlhamuxele hosi Nebukadnetsara a ku: ‘A nhloko ya woru yi fanekisela mfumu waku. Kambe a prata i mfumu lowu taka landzrela ntsrhaku ka mfumu waku. Ntsrhaku ka leswo, ku ta humelela mfumu wun’wana lowu fanisiwaka ni kobri nakone wu ta fuma misava hinkwayu. Kutani ku ta humelela mfumu wun’wana lowu taka tiya ku fana ni nsimbi. Kambe a mfumu wa wugamu wu ta yaviwa, wu ta tiya tlhelo dzrin’we ku fana ni nsimbi kasi a tlhelo dzrin’wana wu ta va wu nga tiyanga ku fana ni vumba. A zribye ledzro, ledzri dzri ndzrulukiki nhava, dzri fanekisela Mfumu wa Xikwembu Nkulukumba ku nga Mfumu lowu wu ta ka helisa mimfumu hinkwayu, kambe wone wu tsrhama hi lani ku nga helikiki.’

Loko hosi Nebukadnetsara a yingela leswo, a khinsama a byela Daniyele a ku: ‘Nakunene Xikwembu Nkulukumba waku hi yene a ku tlhamuxeliki leswi ni swi lozriki. A ku na Xikwembu Nkulukumba lweyi a fanaka na yene.’ A matsrhan’wini ya ku dlaya Daniyele, hosi Nebukadnetsara a mu yentxe muzrangeli wa tihosana hinkwatu a tlhela a mu beka swanga mufumi wa xifundzra xa Babilona. Xana wa yi vona ndlela leyi Yehovha a hlamuliki xikhongoto xa Daniyele ni vanghanu vake ha yone?