Nsinya Wa Ku Leha Ngopfu Swinene

Ka wusiku bya kukazri, hosi Nebukadnetsara a ve ni lozro wa ku txhavisa ngopfu swinene. A hosi yi kombele kuva tintlhazri ta mfumu wake ti mu byela leswi lozro wu tlhamuxelaka swone. Kambe ni wa mun’we wavu a nga swi kotanga ku swi tlhamuxela. Xileswo a hosi yi teke xiboho xa ku bula na Daniyele.

A hosi yi mu byele yi ku: ‘Ni lozre nsinya wa wukulu. A ku leha ka wone a wu tlhasa tilweni, lakakuva a wu voniwa misaveni hinkwayu. A nsinya lowo a wu ni makamba ya ku xonga wu tlhela wu va ni mihandzru ya yinyingi. A swihazri a swi swi zrandzra ku tsrhama ka ntsrhuti wa nsinya lowo, swi tlhela swi hamba swisaka ka wone. Kutani ku humelele ntsrumi leyi taka hi le tilweni yi ku: “Tsremani nsinya lowo, mi tsrema ni tinkambu ta wone. A mbilu ya nsinya yi ta ndzruluka yi nga ha vi ya mhunu. Kambe yi ta va xihazri xa nhova. Kutani ku ta khaluta 7 wa minkama, vhanu hinkwavu va ta swi tiva leswaku Xikwembu Nkulukumba i mufumi nakone a nyika mfumu mun’wana ni mun’wana lweyi a mu djulaka.”

Hiloko Yehovha a byela Daniyele leswi lozro wu tlhamuxelaka swone. Loko Daniyele a twisise ntlhamuxelo wa lozro, a txhave ngopfu swinene. A byele hosi a ku: ‘A ni djula kuva lozro lowu wu vulavula mayelanu ni valala vaku. Kambe wu kongoma wene hosi. A nsinya wa wukulu lowu tsremiwiki hi wene hosi yanga. Wene hosi u ta luzekeliwa hi mfumu waku u tlhela u da byanyi ku fana ni swihazri. Kambe leswi ntsrumi yi hlayiki leswaku ku nga tsremiwi xigodo ni timintsru ta xone, wene Nebukadnetsara u ta tlhela u va hosi.’

Loko ku khalute lembe, Nebukadnetsara a a fambafamba henhla ka lwangu na a hlamalisiwa hi doropa dzra Babilona. Yene a ku: ‘A hi ku xonga ka doropa ledzri ni dzri yakiki, nakunene mine na tiva ku tlula tihosi hinkwatu!’ Loko hosi yi hete ku hlaya mazritu lawa, yi yingele zritu na dzri pfa hi le tilweni dzri ku: ‘Nebukadnetsara, ku sukela swoswi awa ha li hosi.’

AHi nkama wolowo Nebukadnetsara a sungule ku hlanya. Swiyentxo swake a swi fana ni swa swihazri. A misisi ya hosi Nebukadnetsara yi lehe yi fana ni mavoya ya gama, a min’wala yake a yi fana ni min’wala ya gama.

Ntsrhaku ka 7 wa malembe, a lihlanyi dzra Nebukadnetsara dzri helile. Xileswo, Yehovha a pfumelele kuva hosi Nebukadnetsara a tlhela a va hosi ya Babilona. Hosi Nebukadnetsara a te: ‘Yehovha i hosi ya matilo. Swa mu fanela ku dzrumisiwa. Swoswi na swi tiva leswaku Yehovha hi yene a Fumaka. Yene a dondzrisa vhanu lava titlakuxaka akuva va titsrongahata, a tlhela a nyika mfumu mun’wana ni mun’wana lweyi a mu djulaka.’