Mimuru Ya Yerusalema

Swoswi a hi voneni leswi yentxekiki ka malembenyana lawa ma khalutiki loko ku pfuxetiwa a muru wa Yerusalema. Nehemiya, nandzra wa hosi Artaxerxi, a a li Muisrayele nakone a a tsrhama a Persiya, ka doropa dzra Xuxani. Siku dzrin’wana a makwavu a tlhele hi le Yuda na a ni madzrungula lawa ma nga liki manene. A tlhase a byela Nehemiya a ku: ‘A vhanu lava tlheleliki Yerusalema va le nghozini, ku ta tlhasa namunhla a ku na mhunu lweyi a pfuxetiki muru ni ku lunghisa swipfalu swa doropa leswi swi gilhitiwiki hi masotxha ya Babilona.’ Loko Nehemiya a yingela leswo, a hlundzruka ngopfu swinene. Nehemiya a a swi djula ngopfu ku ya Yerusalema akuva a ya pfuxeta muru, kambe a a nga swi tivi leswaku hosi a yi ta mu pfumelela, xileswo a khongota ka Yehovha a kombela mpfunu.

Siku dzrin’wana hosi Artaxerxi a xiye leswaku Nehemiya a a nga nyonxanga, kutani a ku: ‘A ni ngi sama ni ku vona hi ndlela leyi, u kazratiwa hi yini?’ Nehemiya a mu hlamula a ku: ‘Ni kazratiwa hi leswi yentxekiki a Yerusalema, doropa dzra Yerusalema dzri ndzruluke mazrumbi.’ Hiloko hosi yi vutisa Nehemiya yi ku: ‘Ni nga ku pfuna hi yini?’ Nehemiya a tekela ku khongota hi le mbilwini, kutani a byela hosi a ku: ‘Ni kombela u ni pfumelela kuva ni ya a Yerusalema leswaku ni ya pfuxeta muru wa doropa.’ Hosi Artaxerxi a pfumelela Nehemiya kuva a famba a va a yentxa hinkwaswu akuva a tiyiseka leswaku Nehemiya a ta sizreleleka ka liyendzro dzrake dzra ku leha. Artaxerxi a tlhela a beka Nehemiya akuva a va muzrangeli wa Yuda a va a mu nyika timhandzri leswaku a hamba swipfalu swa doropa.

Loko Nehemiya a tlhasa Yerusalema, a fambafamba akuva a vona muru wa doropa, kutani a hlengeleta vaprista ni vazrangeli a va byela a ku: ‘Mintxhumu hinkwayu lani yi honekelile, xileswo hi fanela ku sungula ku tizra.’ Vhanu hinkwavu va pfumela va va va sungula ku pfuxeta muru wa Yerusalema.

A ku ni lava a va tsrhohoka Vaisrayele, xileswo va sungula ku va poyilela va ku: ‘A muru lowu a hi wa ntxhumu nambi hi mbyana ya nhova yi nga wu wisa.’ Kambe a Vaisrayele a va nga na mhaka ni ku poyileliwa, va ye mahlweni va tizra nakone hi ku famba ka nkama a muru wu ye wu tlakuka ni ku tiya ngopfu swinene.

Hiloko valala va kunguhata ku hlasela Yerusalema na Vayuda va nga swi yimelanga, kutani loko Vayuda va yingela leswo va txhava ngopfu swinene. Kambe Nehemiya a va byela a ku: ‘Mi nga txhavi hikusa a hi wuswezru, hi na Yehovha.’ Hiloko Nehemiya a beka a masotxha akuva ma sizrelela lava a va li ku yakeni ka muru; hi ndlela leyo a valala a va zanga va swi kotile ku hlasela Yerusalema.

A muru ni swipfalu swi hetiwe hi 52 wa masiku ntsena. Kutani Nehemiya a byela Valevhi leswaku va tlhelela a Yerusalema akuva va ta patsreka ka nkhuvu wa ku pfuxeta muru. A lulamisela mintlawa yibidzri ya vayimbeleli, yene a a li ka ntlawa wun’we kasi Ezra a a li ka ntlawa lowun’wana. A mintlawa ha yibidzri yi khwela ka lwangu yi va yi ya ka mimbangu ya ku hambana. Yi fambafamba ndzreni ka doropa na yi yimbelela tinsimu ta ku dzrumisa Yehovha yi va yi ya kumana a tempeleni. Vhanu hinkwavu a Yerusalema va tlhangana akuva va nyikela magandzrelo ka Yehovha ni ku tlangela siku ledzro. A va nyonxe ngopfu swinene lakakuva a mazritu yavu ma twala nambi ka mbangu wa le kule.