Yesu A Pfuxa Lazaru

Yesu a a ni vanghanu vazrazru lava a va tsrhama Betaniya, ku nga Lazaru ni vamakwavu Marta na Mariya. Siku dzrin’wana loko Yesu a li ka tlhelo dzrin’wana dzra Yordani, Marta na Mariya va mu zrumelele dzrungula dzra xihantla va ku: ‘Lazaru a vabya ngopfu. Hi kombela u kahlula u ta halenu.’ Kambe Yesu a nga tekelanga ku famba, ntsrhaku ka masiku mabidzri a byele valandzreli vake a ku: ‘A hi fambeni a Betaniya. Lazaru a yetlelile, kambe ni ya kohala akuva ni ya mu pfuxa.’ Kambe a vadondzrisiwa vake va mu byela va ku: ‘Hosi, loko a li leswaku a yetlelile i swinene hikusa swi ta mu pfuna ku hantla swi mu yampswela.’ Kutani Yesu a va khanyisela a ku: ‘Lazaru a file.’

Loko Yesu a tlhasa Betaniya, a kuma leswaku a ku khaluta mune wa masiku na Lazaru a file. A ku ni vhanu vanyingi lava a va ye txhavelela Marta na Mariya. Loko Marta a twa leswaku Yesu a tlhasile, a tsrutsruma a mu tlhangaveta a tlhasa a ku: “Hosi, loko a u li kone lani makwezru inaka a nga fanga.” Xileswo Yesu a mu byela a ku: ‘Makwenu a ta pfuka. Marta, xana wa swi kholwa leswo?’ Marta a mu hlamula a ku: ‘Na swi tiva leswaku a ta pfuka a ku pfuxiweni ka vafi.’ Hiloko Yesu a mu byela a ku: “Hi mine ku pfuka ni wutomi.”

Kutani Marta a ya byela Maria leswaku Yesu a tlhasile. Hiloko Mariya a tsrutsruma a ya ka Yesu, kutani vhanu vanyingi va mu landzra. Loko Mariya a tlhasa, a wela ka milenge ya Yesu a va a sungula ku dzrila swinene lakakuva a hluleka ni ku miyela. Kutani a byela Yesu a ku: ‘Hosi, loko a u li kone lani, makwezru inaka a nga fanga.’ Loko Yesu a vona ndlela leyi Mariya a a kazrateke ha yone, na yene a kazrateka a va a sungula ku dzrila. Loko xitsrhungu xi vona Yesu na a dzrila xi ku: ‘Vonani leswi a a mu zrandzrisa xiswone!’ Kambe van’wana a va tivutisa leswi: ‘Ha yini Yesu a nga yentxanga leswaku Lazaru a nga fi.’ Xana Yesu a a ta yentxa yini?

Yesu a ya sizreni lani Lazaru a a lahliwe kone, lani a ku pfaliwe hi zribye ledzrikulu. Kutani Yesu a ku: ‘Susani zribye.’ Kambe Marta a ku: ‘Hosi, nkama lowu awa nun’hwa hikusa ku khaluta mune wa masiku na a file.’ Nambitanu a zribye dzri susiwile. Kutani Yesu a khongota a ku: ‘Papayi, na ku tlangela hikusa u ni yingelile nakone na swi tiva leswaku minkama hinkwayu wa ni yingela, kambe ni hlaya leswo hi mhaka ya xitsrhungu lexi yimiki lani akuva xi ta kholwa leswaku u ni zrumile.’ Ntsrhaku ka loko a hlaye leswo, Yesu a huwelela a ku: “Lazaru, huma handle!” Hiloko ku yentxeka ntxhumu wa ku hlamalisa, Lazaru a huma he sizreni na a tsrondzriyeliwe hi panu. Kutani Yesu a va byela a ku: “Mu tlhantlhelelani, mi mu tsrhika a famba.”

Vanyingi ka lava va swi voniki, va kombisa lipfumelo ka Yesu kambe van’wana va ya byela Vafarisi. Ku sukela kolanu a Vafarisi a va djuletela tindlela ta ku dlaya Lazaru kun’we na Yesu. Yudasi Iskariyota, a nga mun’we ka vapostola lavayani va 12, a ya vutisa Vafarisi a ku: ‘Mi ta ni nyika yini loko no mi pfuna ku mu khoma?’ A Vafarisi va ku va ta mu nyika 30 wa mamuweda ya prata. Kutani Yudasi a sungula ku djuletela mikhandlu ya ku nyikela Yesu ka Vafarisi.