A Vadondzrisiwa Va Yamukela Moya Wa Ku Xwenga

Ntsrhaku ka 10 wa masiku na Yesu a tlhelele tilweni, a vadondzrisiwa vake va yamukele moya wa ku xwenga. Hi lembe dzra 33 N.Y., a vhanu va ye Yerusalema akuva va ya tlangela nkhuvu wa pentekoxta. A ku ni 120 wa vapostola va Yesu lava a va tlhanganile ka muti wa kukazri. Kolanu, ku yentxeke ntxhumu wa ku hlamalisa ngopfu swinene. Ka tinhloko tavu ku humelele ntxhumu lowu fanaka ni langavi dzra ndzrilo nakone va sungule ku vulavula tindzrimi ta ku hambanahambana. Ku ve ni pongwe ledzri fanaka ni xidzedze ledzri tatiki muti lowu a va li ka wone.

A vayendzri lava a va ye a Yerusalema va twe pongwe dzroledzro, kutani va tsrutsruma va ya ka muti wolowo akuva va ya vona leswi humeleliki. Hiloko va hlamala ngopfu loko va yingela vadondzrisiwa na va khanela tindzrimi letiyani ta ku siyanasiyana. Nakunene va hlamale ngopfu lakakuva va ku: ‘Hinkwavu lava vulavulaka a hi Vagalileya? Kutani swi kotekisa kuyini kuva mun’wana ni mun’wana wezru a va yingela hi lidzrimi dzrake?’

Kutani Petro ni vapostola van’wana va yima mahlweni ka xitsrhungu. Petro a tlhamuxela xitsrhungu ndlela leyi Yesu a nga dlayiwa ha yone ni leswi Yehovha a swi yentxiki akuva a pfuxa N’wanake Yesu a ku feni. Petro a ku: ‘Swoswi Yesu a tsrhamise vokweni dzra xinene dzra Xikwembu Nkulukumba a va a yamukela moya wa ku xwenga. Hi lani mi swi voniki ha kone ni ku swi yingela.’

A xitsrhungu xi khumbeke ngopfu hi mazritu lawa Petro a ma hlayiki, lakakuva xi mu vutisa xi ku: “Hi fanela ku yentxa yini?” Petro a ku: ‘Tisolani, nakone mun’wana ni mun’wana wenu a a babatisiwi hi vito dzra Yesu Kriste. Kutani mi ta yamukela moya wa ku xwenga.’ Hi siku dzroledzro ku babatisiwa 3.000 wa vhanu. Ku sukela kolanu a vadondzrisiwa va sungula ku yandzra hi ku kahlula. Hi ku pfuniwa hi moya wa ku xwenga, a vadondzrisiwa va simeka mabandla ya ku tala leswaku va ta swi kota ku dondzrisa van’wana hinkwaswu leswi Yesu a va dondzrisiki swone.