A Ku Na Ntxhumu Lowu A Wu Ta Va Tsrhikisa

A ku ni wanuna lweyi a a nga swi koti ku famba, a a tsrhamela ku kombela zimola siku ni siku a xipfalwini xa tempele. Hi nhlikanhi wa siku dzra kukazri, a vone Petro na Yohane na va nghena tempeleni, kutani a va byela leswi: ‘Ni kombela zimola.’ Petro a mu hlamula a ku: ‘Ni ni ntxhumu wa ku yampswa ku tlula mali akuva ni ku nyika wone. Hi vito dzra Yesu, sekeleka u famba!’ Hiloko Petro a mu sekelekisa, kutani wanuna lweyo a sungula ku famba! A xitsrhungu xi nyonxisiwe ngopfu hi hlolana ledzri lakakuva vanyingi va ndzruluke vapfumeli.

Kambe a vaprista ni Vasaduki va hlundzruka ngopfu. Xileswo va khoma vapostola va va yisa tribunali, kutani va ku: ‘I mani a mi nyikiki ntamu wa ku hanyisa wanuna lweyi?’ Petro a va hlamula a ku: ‘Hi nyikiwe ntamu ha Yesu Kriste, lweyi mi nga mu dlaya.’ Xileswo a vazrangeli va wukhongoti va huwelela va ku: ‘Tsrhikani ku khanela ha Yesu!’ Kambe a vapostola va va hlamula va ku: ‘Hi fanela ku vulavula ha yene, a hi nge tsrhiki.’

Loko Petro na Yohane va ntsrhunxiwile va ye byela vadondzrisiwa van’wana leswi humeleliki. Kutani va khongota kun’we va kombela Yehovha va ku: ‘Hi kombela u hi pfuna akuva hi ya mahlweni hi zrezra zritu dzraku na hi nga txhavi ntxhumu.’ Xileswo Yehovha a va nyika moya wa ku xwenga, va va va ya mahlweni va zrezra ni ku hanyisa vhanu. Vhanu vanyingi va sungula ku va vapfumeli. A Vasaduki va va ni matsrhoho, lakakuva va khoma vapostola va va pfalela djele. Kambe ni wusiku Yehovha a zruma ntsrumi leswaku yi pfula swipfalu swa djele yi tlhela yi byela vapostola yi ku: ‘Tlhelelani tempeleni, mi ya dondzrisa kone.’

Hi mixo wa siku ledzri landzreliki, a Sanedri kun’we ni vazrangeli va wukhongoti va byeliwe leswi: ‘A djele dzra ha khiyiwile, kambe vavanuna lava a va pfaleliwile a va ha li kone!’ Va le tempeleni va dondzrisa vhanu. Xileswo vapostola va tlhela va khomiwa va yisiwa ka huvo ya Sanedri. A muprista lwenkulu a va byela leswi: ‘Hi mi byele leswaku mi nga ha vulavuli mayelanu na Yesu!’ Kambe Petro a hlamula a ku: “Hi fanela ku yingiseta Xikwembu Nkulukumba swanga mufumi ku tlula vhanu.”

A vazrangeli va wukhongoti va hlundzruka ngopfu swinene lakakuva va djula ku dlaya vapostola. Kambe Mufarisi lweyi a a vitaniwa Gamaliyele a sekeleka a ku: ‘Tivonelani! Hikusa swi nga yentxeka Xikwembu Nkulukumba a li ni vavanuna lava. Xana mi djula ku lwa na Xikwembu Nkulukumba?’ Kutani va yingiseta xitsratsriyo xake. Kambe va va ba va gama va va byela leswaku va nga ha txhuki va zrezra, kutani va va tsrhika va famba. Kambe leswo a swi va yentxanga va tsrhika ku zrezra. Va tame va zrezra madzrungula lamanene hi xixixi, a tempeleni ni hi muti ni muti.