Yesu A Phamela Vhanu Va Vanyingi

Na ku sale nkama wutsrongo akuva ku hambiwa Paxkwa hi lembe dzra 32 N.Y., a vapostola a va buya he ku zrezreni. Leswi va kazraliki, Yesu a va teka hi boti va ya Betsaida lani a swi ta koteka akuva va wisa. Kambe loko a boti dzri li kusuhi ni ku tlhasa nkingeni wa nambu, Yesu a vona vhanu va vanyingi na va va yimelile. Nambileswi Yesu ni vapostola vake va djulaka ku wisa, Yesu a tlhasa a va yamukela hi timpswalu, a va a hanyisa lava va vabyaka a tlhela a va dondzrisa. A hete siku hinkwadzru na a va dondzrisa mayelanu ni Mfumu wa Xikwembu Nkulukumba. Kutani loko dzri pelile, a vadondzrisiwa va ya ka Yesu va tlhasa va ku: ‘A vhanu lava va twa ndlala, va byeli va famba akuva va ya tidjulela swakuda.’

Kambe Yesu a ku: ‘A swi sindzrisi kuva va famba, va nyikani swakuda kola.’ Kutani a vapostola va vutisa Yesu va ku: ‘U djula leswaku hi famba hi ya va xavela mapawu?’ Filipi, mun’we wa vapostola a ku: ‘Nambiloko a ho va ni mali ya yinyingi a hi nge ti swi kota ku xava mapawu ya ku yaneta vhanu hinkwavu lava.’

Yesu a vutisa a ku: ‘Swi gama kwini swakuda leswi hi nga na swone?’ Andreya a hlamula a ku: ‘Ho va ni ntlhanu wa mapawu ni swihlampfana swibidzri, a swi nge yaneti mhunu.’ Kutani Yesu a ku: ‘Swi buyisani halenu.’ Hiloko a byela vhanu leswaku va tsrhama ka byanyi hi mintlawa ya 50 ni ya 100. Kutani a teka mapawu ni tihlampfi a langusa a tilweni a khongota. A gama a teka mapawu lawo ni tihlampfi leto a nyiketa vapostola vake va va va yavela xitsrhungu. Lava va diki ku ve 5.000 wa vavanuna, na ku nga kontiwi vavasati ni vatsrongwana, va de va za va xuzra. Ntsrhaku ka leswo, a vapostola va hlengeleta hinkwaswu leswi saliki akuva ku nga txukumetiwe ntxhumu, kutani va tata 12 wa mintsrhava. A ve hlolana dzra ku hlamalisa, a hi swone?

Kutani a vhanu va nyonxa ngopfu swinene lakakuva va djula ku beka Yesu akuva a va hosi yavu. Kambe Yesu a a swi tiva leswaku a wu nge si na tlhasa nkama wa kuva Yehovha a mu yentxa hosi. A byela xitsrhungu leswaku xi muka a va a byela vapostola leswaku va ya ka tlhelo dzrin’wana dzra lwandle dzra Galileya. Hiloko a vapostola va khwela boti kambe yene a ya nhaveni na a li wuswake. Ha yini a fambe wuswake? Hi leswaku a a djula ku kuma nkama wa kuva a khongota ka Papayi wake. Ina, nambiloko a khomeke ngopfu, Yesu a a tidjulela nkama wa kuva a khongota.