Xilalelo Xa Wugamu Xa Yesu

Lembe ni lembe a Vayuda a va tlangela Paxkwa hi 14 ka Nisani. A va yentxa leswo akuva va dzrimuka ndlela leyi Yehovha a huluxiki Vaisrayele ha yone a Egipta. Kutani hi lembe dzra 33 N.Y., Yesu ni vapostola vake a va le ku tlangeleni ka Paxkwa. Loko va heta ku da, Yesu a byela vapostola vake a ku: ‘Mun’we kwenu a ta ni wonga.’ Kutani a vapostola va kazrateka ngopfu va va va mu vutisa va ku: ‘I mani a ta ka ku wonga?’ Kutani Yesu a va hlamula a ku: ‘Hi lweyi ni taka mu nyika pawu.’ Xileswo Yesu a khema pawu a va a nyika Yudasi Iskariyota. Ntsrhaku ka leswo, Yudasi a sekeleka a famba.

Hiloko Yesu a hamba xikhongoto, a khemelela pawu a va a yavela vapostola vake. Kutani a va byela a ku: ‘Danani pawu ledzri, dzri yimela mizri wanga lowu ni taka wu nyikela hi kola kwenu.’ Ntsrhaku ka leswo Yesu a tlhela a hamba xikhongoto xin’wana a va a teka kopo dzra vhinyu a nyika vapostola vake, a va a ku: ‘Nwanani vhinyu ledzri, dzri yimela ngati yanga leyi ni taka yi nyikela akuva mi dzrivaleliwa swidoho swenu. Na mi dumbisa leswaku mi ta fuma na mine a Mfun’wini wa Matilo. Xileswo tamani mi yentxa leswi lembe ni lembe akuva mi ni dzrimuka ha swone.’ Ku ta tlhasa ni namunhla a valandzreli va Yesu va tlhangana lembe ni lembe akuva va dzrimuka leswi a va yentxeliki swone. A ntlhanganu lowo wu vitaniwa Xidzrimuxo Xa Lifu Dzra Yesu Kriste.

Loko va hete ku lalela, a vapostola va sungule ku phikisana hi leswaku i mani lwenkulu xikazri kwavu. Xileswo Yesu a va byela a ku: ‘A lwenkulu hi lweyi a tivonaka na a nga li wa lisima ku tlula vhanu van’wana.’

Yesu a tlhela a va byela a ku: ‘N’wine mi vanghanu vanga, ni mi bulela hinkwaswu leswi Papayi a djulaka kuva ni mi bulela swone. Ku nga li khale ni ta ya matilweni ka Papayi wanga, kambe n’wine mi ta sala kola. Kambe a vhanu hinkwavu va ta tiva leswaku mi vadondzrisiwa vanga loko mi zrandzrana. Xileswo zrandzrananani hi lani mine ni mi zrandzriki ha kone.’

Hi wugamu Yesu a hamba xikhongoto xin’wana, a kombela leswaku Yehovha a sizrelela vadondzrisiwa vake hinkwavu, a tlhela a va pfuna leswaku va tizrisana hi ku zrula. Yesu a tlhela a khongota a kombela leswaku a vito dzra Yehovha dzri xwengisiwa. Xileswo Yesu ni vapostola vake va dzrumise Yehovha hi tinsimu. Kutani va suka va famba. A nkama wa kuva Yesu a khomiwa a wu li kusuhi.