Swivutiso Swa Vadondzri

A nkama lowu Yesu a nga hamba Xilalelo xa Hosi, a va li kwini vadondzrisiwa lavayani va 70 lava a va zrumiki ku ya ku zrezreni? Ku nga va leswaku ve mu tsrutsruma?

A hi na xivangelo xa ku yanakanya ka leswaku leswi vadondzrisiwa lava 70 a va nga li kone nkama lowu Yesu a simekiki Xilalelo xa Hosi, swi hlaya ka leswaku vadondzrisiwa lava a va nga yamukeleki kumbe va tsrutsrume Yesu. Kambe, Yesu a o djula ku va kun’we ni vapostola vake ntsena ka xiyentxakalo lexo.

Vadondzrisiwa vake lava 12 ku patsra ni lava 70 a va yamukeleka kwake. Ku sungula, Yesu a hlawule 12 wa vavanuna makazri ka vadondzrisiwa vake hinkwavu, lava a va txhuliki leswaku i vapostola. (Luk. 6:12-16) Yesu a a li Galileya nkama lowu a nga “vitana lava 12” a va “a va zruma ku ya zrezra hi ta Mfumu wa Xikwembu Nkulukumba ni ku hanyisa lava vabyaka”. (Luk. 9:1-6) Ntsrhaku ka leswo, na a li Yudeya Yesu a game a ‘hlawula van’wana va 70 a va zruma hi vabidzrivabidzri’. (Luk. 9:51; 10:1) Kutani, Yesu a a ni vadondzrisiwa ka mimbangu ya ku hambanahambana lava a va zrezra madzrungula mayelanu na yene.

Vayuda lava viki vadondzrisiwa va Yesu, a va ha ta tlangela Paxkwa lembe ni lembe, nakone swi nga yentxeka a va swi yentxa kun’we ni mindangu yavu. (Eks. 12:6-11, 17-20) Nkama lowu lifu dzrake a dzri ya dzri tsrhindzrekela, Yesu kun’we ni vadondzrisiwa vake va ye Yerusalema. Kambe a nga zrambanga vadondzrisiwa vake hinkwavu va le Yudeya, Galileya ni le Pereya akuva va ta ta tlangela Paxkwa xikan’we. Swi le livaleni leswaku Yesu a o djula kuva kun’we ni vapostola vake ntsena ka xiyentxakalu lexi. A va byele leswi: “A ni swi navela ngopfu ku da Paxkwa ledzri na n’wine na ni nga si na xaniseka.”—Luk. 22:15.

Yesu a a ni xivangelo lexi twalaka xa ku yentxa leswo. A a li kusuhi ni ku fa swanga “Xihambana xa Xikwembu Nkulukumba lexi susaka xidoho a misaveni”. (Yoh. 1:29) A a ta fela Yerusalema, lomu ku sukela khale a ku talisa ku nyikeliwa kone a magandzrelo ka Xikwembu Nkulukumba. A lifu dzra Yesu a dzri ta tisa ntsrhunxeko lowukulu ngopfu ku tlula ntsrhunxeko lowu mindangu ya Vaisrayele yi viki na wone hi ku da xihambana ka wusiku lebyi va humiki a Egipta. (1 Kor. 5:7, 8) Hi kola ka gandzrelo dzra Yesu, vapostola lava 12 a va ta va masungulo ya bandla dzra wukriste. (Efe. 2:20-22) Lexi hlamalisaka hi leswaku, a doropeni dzra ku xwenga dzra Yerusalema a ku ni “12 wa mazribye ya masungulo” lawa a ma tsraliwe “12 wa mavito ya vapostola va 12 va Xihambana”. (Mpful. 21:10-14) Ina, a vapostola lava va ku dumbeka a va ta va ni xiyenge lexikulu a ku hetisiseni ka nkongometo wa Xikwembu Nkulukumba. Xileswo, hi nga swi twisisa leswaku ha yini Yesu a a djula ku va kun’we ni vapostola vake ka Paxkwa dzra wugamu ni le ka leswi a swa ha ta landzrela, ku nga Xilalelo xa Hosi.

A vadondzrisiwa lava 70 kun’we ni lavan’wana a va nga li kone ka xilalelo na Yesu. Kambe, vadondzrisiwa hinkwavu lava ku dumbeka a va ta pfuneka ka Xilalelo xa Hosi lexi Yesu a xi simekiki. Vadondzrisiwa hinkwavu lava hi ku famba ka nkama va viki vatotiwa na vone a va ta nghena ka xipfumelelanu xa mfumu, lexi Yesu a vulavuliki ha xone ni vapostola vake ka wusiku lebyiyani.—Luk. 22:29, 30.