Yesu A Famba Henhla Ka Mati

Handle ka ku daha lava a va vabya ni ku pfuxa lava a va file, Yesu a a ni wuswikoti bya ku lawula timpfula ni swidzedze. Loko Yesu a hete ku khongota na a li nhaveni, a vone leswaku a ku sungule xidzedze a Lwandle dzra Galileya. A vapostola a va li botini nakone a swi va kazratela ku weta hi mhaka ya moya. Hiloko Yesu a xika a nhaveni, a sungula ku famba henhla ka mati na a kongoma botini. Loko vapostola va vona mhunu na a famba henhla ka mati, va txhava ngopfu swinene, kambe Yesu a va byela a ku: ‘Hi mine, mi nga txhavi.’

Petro a hlamula a ku: ‘Hosi, loko a li wene ni pfumeleli ni famba henhla ka mati, ni ta lanu u nga kone.’ Kutani Yesu a mu hlamula a ku: ‘Buya Petro.’ Nambileswi a ku ni xidzedze lexikulu, Petro a huma botini a va a famba henhla ka mati a ya ka Yesu. Kambe loko a tlhasa kusuhi na Yesu, a lavise xidzedze a va a txhava ngopfu swinene kutani a sungula ku mbombomela, a va a ba nyandha a ku: ‘Hosi, ni huluxi!’ Xileswo hi ku kahlula Yesu a mu khoma hi voko a ku: ‘Wene wa lipfumelo ledzritsrongo! Ha yini u ganaganeka? Dzri kwini lipfumelo dzraku?’

Ntsrhaku ka leswo, Yesu na Petro va nghena botini kutani hi ku kahlula a xidzedze xi yima. Xana wa yi yanakanya ndlela leyi vapostola va titwiki ha yone? Hi ku vona leswi yentxekiki a vapostola va mu byele leswi: “Hakunene u N’wana wa Xikwembu Nkulukumba.”

Kambe a ku va nga khambi ledzro ntsena lani Yesu a lawuliki ntumbuluku. Siku dzrin’wana, Yesu ni vapostola vake a va li ndzreni ka boti, kambe Yesu a game a ya ku yetleleni. Na a ha yetlelile, ku sungule xidzedze lexikulu. A mavimbi a ma betetela boti lakakuva dzri va kusuhi ni ku mbombomela. Kutani vapostola va pfuxa Yesu va mu byela va ku: ‘Mudondzrisi, xana a u swi voni swa ku ha fa?’ Hiloko Yesu a pfuka, a kawuka moya kutani a byela lwandle a ku: “Miyela u ku hwiii!” Hi nkama wolowo a moya wu yima, ku va ni ku zrula lokukulu. Ntsrhaku ka leswo, Yesu a vutisa vapostola vake a ku: ‘Xana a mi si va ni lipfumelo?’ Kutani vapostola va sungula ku byelana hi xivone va ku: ‘Nambi moya ni lwandle swa mu yingiseta.’ Hi ku vona leswi Yesu a swi yentxiki a vapostola va dondzre leswaku loko va mu dumba hi ku helela, a va fanelanga ku txhava ntxhumu.