A Wukriste Byi Hangalaka Matikweni Manyingi

A vapostola va Yesu va yingisete nawu wa ku zrezra madzrungula lamanene a misaveni hinkwayu. Hi lembe dzra wu 47 N.Y., a vakriste va le Antiyokiya va zrumele Pawulo na Barnaba leswaku va ya zrezra. A vazrezri lavabidzri va nkhinkhi va yendzre a mimbangwini hinkwayu ya Aziya Menor ku ya tlhasa ka mimbangu ya ku fana ni Derbe, Listra ni le Ikoniya.

Pawulo na Barnaba a va zrezrela vhanu hinkwavu, va ku ganya, swisiwana, vampshwa ku patsra ni lava kuliki hi ntanga. Vhanu vanyingi va pfumele ntiyiso mayelanu na Kriste. Loko Pawulo na Barnaba va zrezrela Serjio Pawulosi, lweyi a a li muzrangeli wa Kipra, ku humelele muloyi wa kukazri lweyi a dzringisiki ku va sivela. Pawulo a byela muloyi lweyo a ku: “Yehovha a ta ku khatisa.” Hiloko muloyi lweyo a tekela ku fa matihlo. Loko Serjio Pawulosi a vona leswi yentxekiki, hi ku kahlula a ndzruluka mukriste.

Pawulo na Barnaba a va zrezra mimbangwini hinkwayu, hi muti ni muti, a switaratwini, a mabazara ni le masinagogeni. Loko a Listra va dahe wanuna wa kukazri lweyi a a limalile, lava voniki hlolana ledzro va yanakanye leswaku Pawulo na Barnaba a va li swikwembu nakone a va fanela ku gandzreliwa. Kambe Pawulo na Barnaba va va sivelile hi ku va byela va ku: “Gandzrelani Xikwembu Nkulukumba ntsena! Na hine hi vhanu lava nga ni ku tsrana ku fana na n’wine.” Kutani Vayuda va kukazri va ya hlohlotela xitsrhungu leswaku xi pfukela Pawulo. Hiloko xitsrhungu xi mu khandla hi mazribye xi va xi mu humesa handle ka doropa, xi mu tsrhika na a li kusuhi ni ku fa. Nambitanu Pawulo a nga fanga. Hi ku kahlula, vamakwavu va ya mu pfuna. Va mu teka va famba na yene a doropeni. Ntsrhakunyana ka leswo, Pawulo a tlhelela a Antiyokiya.

Hi lembe dzra wu 49 N.Y., Pawulo a teke liyendzro dzrin’wana. Ntsrhaku ka loko a ye vona vamakwavu va le Aziya Menor, a ye mahlweni a zrezra madzrungula lamanene ku ya tlhasa mimbangwini ya le kule ya ku fana ni Ewuropa. Pawulo a ye Atena, Efesa, Filipiya, Tesalonika ni le mimbangwini yin’wana. Silasi, Luka ni djaha ledzri vitaniwaka Timotewu va fambe na Pawulo ka mayendzro yake. Va tizre kun’we akuva va simeka mabandla ku patsra ni ku tiyisa vamakwavu. Pawulo a tsrhame Korinte ku dzringana lembe ni hamfu akuva a tiyisa vamakwavu. A a zrezra, a dondzrisa ni ku tlhela a tsralela mabandla manyingi mapapela. Pawulo a a tihanyisa hi ku hamba matende. Hi ku famba ka nkama, Pawulo a tlhelele a Antiyokiya.

Kutani hi lembe dzra wu 52 N.Y., Pawulo a tlhele a teka liyendzro dzra wuzrazru, a sungula hi le Aziya Menor. A famba ku ya tlhasa n’walungu, a Filipiya, a tlhela a ya Korinte. Pawulo a hete masiku ya kukazri na a le a Efesa a dondzrisa, a daha vhanu ni ku pfuna bandla. Siku ni siku a a beka wukaneli bya le livaleni a swikole. Vhanu vanyingi va pfumelile kutani va txintxa mahanyela yavu. Ntsrhaku ka ku zrezra madzrungula lamanene a matikweni manyingi, Pawulo a ye a Yerusalema.