Pawulo Na Timotewu

Timotewu a a li mukriste wa le bandleni dzra le Listra lweyi a a ha li mumpshwa. Papayi wake a a li Mugriki kasi mamana wake a a li Muyuda. Timotewu a dondzrisiwe ntiyiso na a ha li ntsrongo hi mamana wake Ewunisi ni hi vhovho wake Luwiza.

Loko Pawulo a yendzrele doropa dzra Listra hi khambi dzra wubidzri na a le ntizrweni wa ku zrezra, a xiye leswaku Timotewu a a li mumpshwa lweyi a a ni lizrandzru ngopfu swinene nakone a a zrandzra ku pfuna vamakwavu. Hiloko a mu zramba akuva va yendzra xikan’we. Hi ku famba ka nkama, Pawulo a mu wupfisa akuva a va mudondzrisi ni muzrezri lwenene.

Xikwembu Nkulukumba a a kongomisa Pawulo na Timotewu hi ku tizrisa moya wa ku xwenga. Hi xikombiso, ka wusiku byin’wana, Pawulo a ve ni xivoniso xa kukazri lani a voniki wanuna mun’we na a mu kombela leswaku a ya Makedoniya a ya va pfuna. Xileswo, Pawulo, Timotewu, Silasi na Luka va yendzre va ya a Makedoniya va ya zrezra ni ku simeka mabandla.

Kutani vhanu vanyingi a Tesalonika, ku nga doropa dzra le Makedoniya, va ndzruluka vakriste. Kambe a Vayuda van’wana a va nyenya Pawulo ni vanghanu vake, xileswo va hlengeletana va va va teka Pawulo ni vanghanu vake va va yisa ka tihosi ta doropa. Va tlhasa va huwelela va ku: ‘Vavanuna lava, va lwisana ni nawu wa mfumu wa Roma.’ Leswi a wutomi bya Pawulo na Timotewu a byi li nghozini, a wusikwini ka kone va tsrutsrumile va ya a Bereya.

A vhanu va le Bereya a va swi djula ngopfu ku yingela madzrungula lamanene, hi leswi yentxiki Vayuda vanyingi ku patsra ni Vagriki va ndzruluka vakriste. Kambe loko van’we va Vayuda va le Tesalonika va ye Bereya akuva va ya hamba mpfilumpfilu, swi djule kuva Pawulo a suka a yendzra a ya Atena. Nambitanu, Timotewu na Silasi va sale a Bereya akuva va tiyisa lipfumelo dzra vamakwavu. Hi ku famba ka nkama, Pawulo a kombela Timotewu leswaku a tlhela a ya Tesalonika a ya pfuna vamakwavu leswaku va tiyiselela tinxanisa leti a va kumana na tone. Nakone a tlhele a zruma Timotewu leswaku a ya pfuxela ni ku tiyisa mabandla man’wana.

Pawulo a byela Timotewu a ku: ‘Lweyi a djulaka ku tizrela Yehovha a ta xanisiwa.’ Timotewu a xanisiwile a tlhela a pfaleliwa a djele hi leswi a a li mukriste. Nambitanu a a nyonxile hikusa a a vona tinxanisa leto na ku li mukhandlu wa ku kombisa leswaku awa dumbeka ka Yehovha.

Pawulo a byele Vafilipiya a ku: ‘Ni kombele Timotewu leswaku a mi yendzrela. A ta mi dondzrisa leswi hlayaka swone ku hanya hi ntiyiso ni ku tlhela a mi wupfisa leswaku mi kota ku zrezra.’ Pawulo a a mu dumba Timotewu hikusa va tizre xikan’we ku dzringana malembe manyingi nakone a va li vanghanu lavakulu.