Swivoniso Swa Yohane

Mupostola Yohane a a pfaleliwe a xihlaleni xa Patmosi. Na a li kohala, a kombiwe 16 wa swivoniso mayelanu ni mintxhumu leyi a yi ta yentxeka a nkameni lowu taka. Ka swivoniso leswo Yesu a kombe Yohane ndlela leyi a vito dzra Yehovha a dzri ta xwengisiwa ha yone, ndlela leyi Mfumu wa Xikwembu Nkulukumba a wu ta ta ha yone ni ndlela leyi ku zrandzra ka Yehovha a ku ta yentxeka ha yone lani misaveni ni le matilweni.

Ka xivoniso xa kukazri, Yohane a vone Yehovha na a tsrhame ka xiluvelo xake xa ku phatima a matilweni, na a tsrandzreliwe hi 24 wa vakulu lava yambaliki mpahla ya ku basa va tlhela va va ni tihazri ta woru a tinhlokweni tavu. Ka xiluvelo lexo, a ku hatima ku tlhela ku dzruma, nakone a vakulu lava va 24 a va khinsama va gandzrela Yehovha. Ka xivoniso xin’wana, Yohane a vone xitsrhungu lexikulu xa vhanu va misava hinkwayu na xi gandzrela Yehovha. A tlhele a vona xihambana, ku nga Yesu Kriste, na xi va kongomisa xi va yisa ka swihlovo swa mati ya wutomi. Yohane a tlhele a kombiwa xivoniso xin’wana, lani a voniki Yesu na a sungula ku fuma kun’we ni 24 wa vakulu. Ka xivoniso lexi landzreliki, Yohane a vone Yesu na a lwa ni dragona kun’we ni mademona ya dzrone. A dragona ledzro i Sathana. Yesu a va hlongole matilweni va va va buya lani misaveni.

Ntsrhaku ka leswo, Yohane a vona xivoniso xa ku xonga. A vona xihambana na xi yime a Nhaveni ya Siyoni na xi li ni lava 144.000. Yohane a tlhela a vona ntsrumi yin’wana na yi haha mpfhukeni, yi byela vhanu yi ku: ‘Gandzrelani Xikwembu Nkulukumba mi mu dzrumisa.’

Ka xivoniso xin’wana Yohane a vona yimpi ya Armagedoni, lani Yesu kun’we ni masotxha yake va lwaka ni misava ya Sathana va va va yi hlula. Kutani ka xivoniso xa wugamu, Yohane a vona ku zrula ni wumun’we a matilweni ni lani misaveni. Sathana ni hinkwavu lava mu seketelaka va helisiwa. Hi wugamu hinkwavu lani misaveni ni le matilweni va hlonipha vito dzra Yehovha, va va va gandzrela yene ntsena.