Lizrandzru Dzra Xikwembu Nkulukumba A Dzri Heli

1, 2. Ha yini u zrandzra Yehovha Xikwembu Nkulukumba?

XANA wa mu zrandzra Xikwembu Nkulukumba? Swi nga yentxeka u mu zrandzra lakakuva u nyiketele ni wutomi byaku kwakwe. Swi nga yentxeka mfuzri u tibyela leswi: “I Munghanu wanga lwenkulu.” Nambitasu, Yehovha hi yene a nga zranga a ku zrandzra. A Bibeleni hi kuma leswi: ‘Hine hi ni lizrandzru hi leswi . . . yene a sunguliki ku hi zrandzra.’​—1 Yohan 4:19.

² Pimisa hi tindlela tinyingi leti Yehovha a hi kombisiki lizrandzru dzrakwe ha tone. A hi nyike misava yi va kaya dzrezru dzra ku xonga swinene ni hinkwaswu leswi hi swi djulaka leswaku hi tikholisa hi wutomi. (Mattheo 5:43-48; Apfuletelo 4:11) A djula leswaku hi va ni wuxaka lebyinene na yene, nakone a hi pfulele tindlela ta kuva hi mu tiva. Loko hi dondzra Bibele, hi va na hi yingiseta Yehovha; kasi loko hi khongota, hi yene a hi yingisetaka. (Amapsalma 65:2) A hi kongomisa a tlhela a hi tiyisa hi moya wakwe wa ku xwenga lowu nga ni ntamu swinene. (Luka 11:13) Phela, a zrumele ni N’wanakwe wa ku zrandzreka la misaveni akuva a hi ntsrhunxa ka xidoho ni lifu.​—Dondzra Yohan 3:16; Ba-le-Roma 5:8.

3. Hi nga swi kotisa kuyini ku hlayisa wuxaka lebyinene na Yehovha?

³ Yimanyana, u pimisa hi munghanu waku lwenkulu, lwe a viki na wene loko swi bindzra ni loko swi nyonxisa. Swi djula ku tikazrata leswaku wunghanu bya ku tanu byi tsrhama byi tiyile. Swi tanu ni hi wunghanu byezru na Yehovha, Munghanu wezru lwenkulu ku tlula wini na wini hi nga vaka na yene. Wunghanu byezru na yene byi nga tsrhama hi lani ku nga gamikiki. Xileswo, Bibele dzri li: ‘Tibekisani a lizrandzrwini la Xikwembu Nkulukumba.’ (Yuda 21) Hi nga swi kotisa kuyini ku yentxa leswo? Bibele dzra hlamula: ‘Hikuva a ku zrandzra ka Xikwembu Nkulukumba hi loko hi bekisa swileleto swakwe; a swileleto swakwe a swi bindzri.’​—1 Yohan 5:3.

LESWI ‘A KU ZRANDZRA KA XIKWEMBU NKULUKUMBA’ SWI TLHAMUXELAKA SWONE

4, 5. a) Xana ma tlhamuxela yini mazritu lama liki ‘a ku zrandzra ka Xikwembu Nkulukumba’? b) Xana lizrandzru dzraku ha Yehovha dzri sungulise kuyini ku kula?

⁴ Xana a Bibele dzri djula ku hlaya yini loko dzri ku ‘a ku zrandzra ka Xikwembu Nkulukumba’? A swi hlayi leswi Xikwembu Nkulukumba a hi zrandzrisaka xiswone, kambe hi leswi hine hi mu zrandzrisaka xiswone. Xana wa dzrimuka loko wa ha sungula ku zrandzra Yehovha?

⁵ Dzrimuka leswi u titwisiki xiswone loko u swi twe ka ku sungula leswaku Yehovha a djula kuva u hanya hi lani ku nga helikiki a misaveni yakwe leyimpshwa. U dondzre mayelanu ni hinkwaswu leswi a swi yentxiki akuva kungu ledzro dzri koteka, u va u twisisa leswaku Yehovha a hi hanane hi ndlela leyikulu ngopfu hi ku zrumela N’wanakwe la misaveni. (Mattheo 20:28; Yohan 8:29; Ba-le-Roma 5:12, 18) Loko u tive leswi Yehovha a ku zrandzrisaka xiswone, mbilu yaku yi bile, kutani na wene u sungula ku mu zrandzra.​—Dondzra 1 Yohan 4:9, 10.

6. Loko u zrandzra mhunu, xana u swi kombisa hi ndlela yini? Ku zrandzra Xikwembu Nkulukumba swi ku susumetele ku yentxa yini?

⁶ Kambe lizrandzru ledzri u dzri twiki ha Xikwembu Nkulukumba i masungulo ntsena. Hi xikombiso, loko hi zrandzra mhunu a swi gameli ntsena ka ku hlaya hi ku “na ku zrandzra”. Lizrandzru dzri hi susumetela ku yentxa leswi taka nyonxisa mhunu lweyo. Hi ku fanana, lizrandzru dzraku ha Yehovha dzri ku yentxe u navela ku hanya hi ndlela leyi taka mu nyonxisa. Loko lizrandzru ledzro dzri ya dzri kula, kumbexana u tinyiketelile kwakwe u va u babatisiwa. Hi ku yentxa leswo, u dumbise Yehovha ku mu tizrela wutomi hinkwabyu. (Dondzra Ba-le-Roma 14:7, 8.) U nga yentxa yini akuva u hetisisa xidumbiso lexo?

‘HI BEKISA SWILELETO SWAKWE’

7. Loko hi zrandzra Yehovha, xana hi fanela ku yentxa yini? He swini swin’wana swa swileleto swakwe?

⁷ Leswi hi zrandzraka Yehovha, ‘hi bekisa swileleto swakwe’. Hi swi yentxisa kuyini leswo? Hi ku mu yingiseta. A Bibeleni hi dondzra leswi Yehovha a djulaka hi hanyisa xiswone. Hi xikombiso, a hi byela leswaku swi bihile ku popswa, ku yiva, ku hemba, ku yentxa timhaka ta tinkuku ni mhunu lweyi hi nga txhatangakiki na yene, ku gandzrela mhunu kumbe ntxhumu wini na wini handle kwakwe.​—1 Ba-le-Korinte 5:11; 6:18; 10:14; Ba-le-Efesa 4:28; Ba-le-Kolosa 3:9.

8, 9. Ka swiyimu leswi ku ngeke na nawu wa Bibele lowu kongomaka, hi nga swi tivisa kuyini leswi Yehovha a djulaka hi swi yentxa? Nyikela xikombiso.

⁸ Kambe akuva hi nyonxisa Yehovha, hi fanela ku yentxa leswi tlulaka ku yingiseta swileleto swakwe ntsena. A nga hi longoloxelanga milawu leyi kongomiki ka xiyimu xin’wana ni xin’wana a wuton’wini. Xileswo, minkama yin’wana ku nge ti va ni nawu wa Bibele lowu hi byelaka leswi hi fanelaka ku swi yentxa. Kutani ke, hi nga xi tekisa kuyini xiboho lexinene? (Ba-le-Efesa 5:17) A Bibeleni ku ni minsinya ya milawu, ku nga tindondzro ta masungulo leti hi dondzrisaka leswi Yehovha a yi vonisaka xiswone mintxhumu. Loko hi dondzra Bibele hi tiva wumhunu bya Yehovha. Hi tiva mapimisela yakwe, ku patsra ni leswi a swi zrandzraka ni leswi a swi hambulaka.—Dondzra Amapsalma 97:10; Amaproverbia 6:16-19; yana ka “Dondzra Swin’wana”, 1.

⁹ Hi xikombiso, hi nga hlawulisa kuyini leswi hi fanelaka ku swi hlalela ka televhizawu kumbe ka internet? Yehovha a nga hi byeli hi ku kongoma leswi hi fanelaka ku swi yentxa. Nambitasu, a hi nyika minsinya ya milawu leyi hi pfunaka ku teka swiboho leswinene. Namunhla, swihungatiso swinyingi swi tale hi madzolonga ni wusinge. A Bibeleni, Yehovha a hi byela leswaku ‘a venga lwemfani ni lwa zrandzraka ku lebya’ nakone ‘va vumbuye ni vawoswani . . . a ta va yavanyisa’. (Amapsalma 11:5; Ba-Heberu 13:4) Xana ke a minsinya leyi ya milawu yi nga hi pfunisa kuyini ku teka swiboho leswinene? Loko hi za hi tiva leswaku Yehovha a hambula ntxhumu wa kukazri kumbe a wu vona swanga wuwoswani, hi fanela ku wu tingawulela toto.

10, 11. Ha yini hi yingiseta Yehovha?

¹⁰ Ha yini hi yingiseta Yehovha? A hi leswi hi txhavaka ku khatisiwa kumbe swikazratu leswi tisiwaka hi swiboho leswi hoxekiki. (Ba-le-Galatia 6:7) A matsrhan’wini ya leswo, hi yingiseta Yehovha hi leswi hi mu zrandzraka. Ku fana ni leswi vana va djulaka ku nyonxisa tatana wavu, hi djula ku nyonxisa Tatana wezru wa le matilweni. A ku na xa ku yapswa ku tlula ku tiva leswaku Yehovha awa hi nyonxela!—Amapsalma 5:12; Amaproverbia 12:2; yana ka “Dondzra Swin’wana”, 2.

¹¹ A hi nge yingiseti Yehovha hi loko swi hi nabyalela kumbe loko hi nge na xa ku xi yentxa. Nakone a hi hlawuli milawu leyi hi taka yi landzra ni leyi hi taka yi ba hi makatla. (Deuteronoma 12:32) A matsrhan’wini ya leswo, hi mu yingiseta hi ku helela, ku fana na mupsalma lwa tiki: ‘Ndzri ta titsrhavisa hi swileleto swaku, leswi ndzri swi zrandzraka.’ (Amapsalma 119:47; Ba-le-Roma 6:17) Hi djula ku fana na Nowa, lweyi a kombisiki leswaku a zrandzra Yehovha hi ku yentxa hinkwaswu leswi Yehovha a mu leletiki. A Bibele dzri li Nowa ‘a ku yentxisa xiswoswo’. (Genesis 6:22) Xana a wu naveli kuva Yehovha a ku byela leswo?

12. Xana hi nga yentxa yini leswaku hi nyonxisa Yehovha?

¹² Xana Yehovha a titwisa kuyini loko hi mu yingiseta? Hi ‘tsrhavisa’ mbilu yakwe. (Amaproverbia 11:20; 27:11) Pimisa hi leswo! Loko hi yingiseta hi yentxa Mutumbuluxi wa wuyaku hinkwabyu a nyonxa. Kambe a nga zi a hi susumetela hi xikosi leswaku hi mu yingiseta. A matsrhan’wini ya leswo, a hi nyike ntsrhunxeko wa ku tihlawulela. Leswi hlayaka leswaku hi ntsrhunxekile ku hlawula ku yentxa leswinene kumbe leswi bihiki. Yehovha a djula leswaku lizrandzru ledzri hi dzri twaka ha yene dzri hi susumetela ku teka swiboho leswinene akuva hi va ni wutomi lebyinene ngopfu.​—Deuteronoma 30:15, 16, 19, 20; yana ka “Dondzra Swin’wana”, 3.

‘A SWILELETO SWAKWE A SWI BINDZRI’

13, 14. Hi swi tivisa kuyini leswaku a swileleto swa Yehovha a swi bindzri ngopfu ku swi yingiseta? Kombisa.

¹³ Swi li yini hi loko hi pimisa leswaku a swileleto swa Yehovha swi bindzra ngopfu ku swi landzra kumbe swi hi beka djele? Bibele dzra hi basisela, dzri ku: ‘A swileleto swakwe a swi bindzri.’ (1 Yohan 5:3) Zritu dzra xigriki ledzri ndzruluteliwiki dzri va ku ‘bindzra’, dzri hlaya ku ‘kazrata’. Ka matsralwa mambeni, zritu ledzri dzri tizriseliwa ku vulavula hi milawu leyi nga dzringaniseliwangakiki kumbe vhanu lava zamaka ku lawula vambeni ni ku va vavisa. (Mattheo 23:4; Amintiṛo 20:29, 30) Wundzruluteli byimbeni bya xinghiza byi hlayisa xileswi: “Swileleto swakwe a swi hi sinsinheli.” Swileleto swa Yehovha a swi ‘bindzri’, kumbe a swi kazrati ngopfu ku va hi swi yingiseta. Minkama hinkwayu awa dzringanisela loko a hi kombela xa kukazri.

¹⁴ Hi xikombiso, a hi nge u pfuna munghanu ku zruzrela mutini wumpshwa. A longele mintxhumu yakwe hinkwayu a mabokisini. Man’we ma vevuka ku ma tlakula, kasi mambeni ma bindzra lakakuva swi djula vhanu vabidzri. Xana munghanu waku a nga ku kombela ku tlakula ledzra ku bindzra dzra kone wene wuswaku? Nikutsrongo! Ha yini? Hikusa a nga djuli u vavisiwa. Ku fana ni munghanu lweyo, Yehovha a nge pfuki a hi kombele ku yentxa ntxhumu lowu kazrataka swinene. (Deuteronoma 30:11-14) Yehovha awa swi tiva leswaku hi vhanu muni. ‘A tivisisa vumbiwo dzrezru; i wa dzrimuka leswaku hi ntsrhuzri.’​—Amapsalma 103:14.

15. Ha yini hi fanela ku tiyiseka ka leswaku a swileleto swa Yehovha swi pfuna hine?

¹⁵ Moxe a byele tiko dzra Israyele leswaku a swileleto swa Yehovha afa swi ta va ‘xongela hi minkama hinkwayu’ ni leswaku ku yingiseta kwavu afa ku ta va ‘bekisa va hanya’. (Deuteronoma 5:28-33; 6:24) Ni namunhla swi xitanu. Xini ni xini lexi Yehovha a hi kombelaka ku xi yentxa xi yampswisa wutomi byezru. (Dondzra Ezaya 48:17.) Tatana wezru, Yehovha, minkama hinkwayu awa swi tiva leswi nga swinene kwezru. (Ba-le-Roma 11:33) Bibele dzri hi byela leswi: ‘Xikwembu Nkulukumba i lizrandzru.’ (1 Yohan 4:8) Leswi swi hlaya leswaku hinkwaswu leswi Yehovha a swi hlayaka ni ku swi yentxa a susumeteliwa hi lizrandzru.

16. Hi swi tivisa kuyini leswaku hi nga swi kota ku yingiseta nambi leswi hi nga hetisekangakiki ni leswi hi hanyaka a misaveni leyi bihiki?

¹⁶ A hi minkama hinkwayu swi nabyalaka ku yingiseta Xikwembu Nkulukumba. Hi hanya a misaveni ya ku biha, leyi fumiwaka ha Diyavulosi. A zama ku hlohlotela vhanu ku yentxa leswi bihiki. (1 Yohan 5:19) Na hine hi fanela ku lwisana ni matitwela kun’we ni miyanakanyu yezru leyi nga hetisekangakiki hikusa swi nga hi yentxa hi tsrhova milawu ya Xikwembu Nkulukumba. (Ba-le-Roma 7:21-25) Kambe lizrandzru dzrezru ha Yehovha dzri hi nyika ntamu wa ku yentxa leswinene. Awa yi vona minzamu yezru ya ku mu yingiseta nakone a hi pfuna hi ku hi nyika moya wakwe wa ku xwenga, lowu nga ni ntamu swinene. (1 Samuel 15:22, 23; Amintiṛo 5:32) Moya wa ku xwenga wu hi pfuna ku hlakulela mihandzru ya moya leyi yentxaka swi hi nabyalela ku mu yingiseta.​—Ba-le-Galatia 5:22, 23.

17, 18. a) Xana ke hi ta dondzra yini a bukwini ledzri? b) Hi ta dondzra yini ka ndzrima leyi landzrelaka?

¹⁷ A bukwini ledzri, hi ta dondzra leswaku hi nga hanyisa kuyini hi ndlela leyi nyonxisaka Yehovha. Hi ta dondzra ku tizrisa minsinya yakwe ya milawu ni milawu yakwe ya mahanyela a wuton’wini byezru. Dzrimuka leswaku Yehovha a nga hi susumeteli hi xikosi leswaku hi mu yingiseta. Loko hi hlawula ku yingiseta, wutomi byezru byi ta yapswa nakone hi ta va ni wumundzruku lebyi hlamalisaka. Xa lisima ngopfu hi leswaku ku yingiseta kwezru ku ta komba Xikwembu Nkulukumba leswaku hi mu zrandzra ku ya tlhasa kwini.​—Yana ka “Dondzra Swin’wana”, 4.

¹⁸ Akuva a hi pfuna ku tiva leswinene ni leswi bihiki, Yehovha a nyike mun’wana ni mun’wana wezru lipfalu. Loko hi dondzrisa lipfalu dzrezru, dzri nga hi pfuna ku ‘bekisa swileleto swakwe’. Kasi lipfalu dzrezru i yini, nakone hi nga dzri dondzrisa hi ndlela yini? Hi ta bula hi leswi ka nhloko-mhaka leyi landzrelaka.