Hi Mu Zrandzra Ngopfu Swinene Tatana Wezru, Yehovha

1-2. Ha yini Yehovha a yentxe swi koteka leswaku hi va swizro swa ndangu wakwe, nakone a swi yentxise kuyini leswo?

YEHOVHA a hi nyike xizrambu xa ku xonga: xa ku va swizro swa ndangu wakwe wa vagandzreli. Ndangu lowu wu vumbiwa hi vhanu lava tinyiketeliki ka Xikwembu Nkulukumba nakone i vhanu lava nga ni lipfumelo ka xitlhavelo xa xitizrulo xa N’wanakwe. Hine hi ndangu lowu tsrhaviki. Ha swi tiva leswaku hi hanyela yini swoswi, nakone ha nyonxa hi ku lavisela ku yamukela wutomi lebyi nga helikiki—ku nga va a tilweni kumbe a Paradeyisini la misaveni.

² Yehovha a yentxe swi koteka leswaku hi va swizro swa ndangu wakwe hi leswi a hi zrandzraka ngopfu swinene. (Yh 3:16) Hine hi ‘xaviwile hi nxavo’. (1Ko 6:20) Hi kola ka xitizrulo, Yehovha a yentxe swi koteka leswaku hi va ni wuxaka bya le kusuhi ngopfu na yene. Hi ni ndjombo ya ku tsrhindzrekelela Mhunu lwa tlakukiki ku tlula hinkwavu hi mu vitana Tatana. Nakone, swanga hi leswi hi swi voniki ka nhloko-mhaka leya ku sungula, a nga kone tatana wa ku fana na Yehovha.

3. I yini leswi hi nga ha tivutisaka swone? (Vona ni bokisi ledzri liki “Xana Yehovha Awa Ni Vona?”)

³ Ku fana ni mun’we wa vatsrali va Bibele, hi nga ha tivutisa leswi: ‘Ndzri ta tlhelisela yini ku Yehovha hi nkonta ya mintizro yakwe hinkwayu leya ku xonga ku mine xana?’ (Ps 116:12) Nhlamulo ya kone hi leswaku a hi na ku swi kota ku hakela Tatana wezru wa le tilweni hi leswi a hi yentxeliki swone. Nambitanu, lizrandzru dzrakwe dzri hi yentxa hi mu zrandzra na hine. Mupostola Yohane a tsrale leswi: ‘Hine hi ni lizrandzru hi leswi . . . yene a sunguliki ku hi zrandzra.’ (1Yh 4:19) Hi tini tindlela leti hi nga kombaka ha tone Tatana wezru wa le tilweni leswaku ha mu zrandzra?

TSRHAMA U LI KUSUHI NA YEHOVHA

4. Hi ku ya hi Yakob 4:8, ha yini hi fanela ku tikazratela ku va kusuhi na Yehovha?

⁴ Yehovha a djula hi va kusuhi na yene ni ku vulavula na yene. (Dondzra Yakob 4:8.) A hi kutxa ku ‘tiyisela a ku khongoteni’, nakone minkama hinkwayu awa hi yingela. (Ro 12:12) A swi nge yentxeki leswaku a pfumala nkama kumbe a titwa na a kazralile lakakuva a nge na ku hi yingela. Na hine, hi mu yingiseta hi ku dondzra Zritu dzrakwe, Bibele, ni mabuku lama hi pfunaka ku dzri twisisa. Hi mu yingiseta hi ku zreyisisa ndleve a mintlhanganwini ya bandla. Ku fana ni leswi ku vulavulisana lokunene ku pfunaka vana ku tsrhama kusuhi ni vapswele vavu, ku vulavula na Yehovha nkama ni nkama swi hi pfuna ku tsrhama kusuhi na yene.

5. Xana hi nga wu yampswisisa kuyini muxaka wa swikhongoto swezru?

⁵ Pimisa hi muxaka wa swikhongoto leswi u swi yentxaka. Yehovha a djula leswaku hi mu txhululela timbilu tezru hi xikhongoto. (Ps 62:8) Xileswo, hi fanela ku tihamba xivutiso lexi: ‘Xana swikhongoto swanga swi fana ni swinkento swa tolo kumbe tolweni, leswi ni swi nyikaka muyeni, kumbe swi fana ni swakuda swa ku nandzrika leswi no ko yentxa hi ku swi swekela muyeni loko a tlhasa?’ Handle ka ku ganaganeka u mu zrandzra swinene Yehovha, nakone u djula ku yentxa leswaku wuxaka byaku na yene byi tsrhama na byi tiyile. Akuva leswo swi koteka, u fanela ku vulavula na yene nkama ni nkama. Mu byele xihundla xa mbilu. Mu byele leswi u nyonxaka ha swone ni leswi swi ku vavisaka mbilu. Tiyiseka leswaku u nga swi kota ku tsrutsrumela ka yene akuva a ku pfuna.

6. Xana hi fanela ku yentxa yini akuva hi tsrhama kusuhi ni Tatana wezru wa le tilweni?

⁶ Akuva hi tsrhama kusuhi ni Tatana wezru wa le tilweni, hi fanela ku va vhanu lava tivaka ku khensa. Hi pfumelelana ni muyimbeleli wa mapsalma, lwa tsraliki leswi: ‘Yehovha Xikwembu Nkulukumba wanga, u yandzrisi mahlolana ni makungu lawa u hi yentxeliki wone. A ku na lwa fanaka na wene. Nambi ndzra ku zrandzra ku ma hlaya ni ku ma dzrungula, a ntalu wa wone wu tlula nhlayu.’ (Ps 40:5) Kambe a hi gameli ka ku khensa ntsena; hi kombisa ku khensa kwezru ka Yehovha hi mazritu ni swiyentxo swezru. Leswi swi hi yentxa hi hambana ni lavanyingi namunhla. Hi hanya a misaveni leyi vhanu va nga mu khensikiki Xikwembu Nkulukumba nikutsrongo hi leswi a va yentxelaka swone. Nakunene, xin’we xa swikombiso swa leswaku hi hanya ‘a masikwini ya vugamu’ i kuva vhanu va nga tivi ku tlangela. (2Tm 3:1, 2) Hi nga txhukeni hi va ni moya wolowo ni siku ni dzrin’we!

7. Xana Yehovha a djula hi yentxa yini, nakone ha yini?

⁷ Vapswele a va swi djuli leswaku vanavu va tsrhama hi ku lwa kambe leswaku va va vanghanu. Hi laha ku fanaka, Yehovha a djula leswaku vanakwe hinkwavu va twanana. Nakunene, lizrandzru ledzri hi nga nadzru hi vamakwezru hi dzrone dzri kombisaka leswaku hi vakriste va xihlayelamfuzri. (Yh 13:35) Hi pfumelelana ni muyimbeleli wa mapsalma, lwa tsraliki leswi: ‘Lavisani, a hi ku xonga ka swone, a hi ku nandzrika ka swone, loko vamakwavu va tsrhama kun’we ve van’we!’ (Ps 133:1) Loko hi zrandzra vamakwezru, hi komba Yehovha leswaku ha mu zrandzra. (1Yh 4:20) Swi nyonxisa ngopfu ku va xizro xa ndangu wa vamakwavu lava ‘pfunanaka [ni] lava vavelelanaka’!​—Ef 4:32.

KOMBISA LIZRANDZRU DZRAKU HI KU YINGISETA

8. Hi ku ya hi 1 Yohan 5:3, hi xini xivangelo lexikulu xa ku va hi yingiseta Yehovha?

⁸ Yehovha a djula leswaku vana va yingiseta vapswele vavu, ni leswaku na hine hi mu yingiseta. (Ef 6:1) Swa fanela kuva hi mu yingiseta hikusa hi yene Mutumbuluxi wezru ni Muhlayisi wa wutomi byezru, nakone a ni wutlhazri lebyi tlakukiki ngopfu ka bya vapswele va nyama. Nambitanu, xivangelo lexikulu xa kuva hi yingiseta Yehovha hi leswi hi mu zrandzraka. (Dondzra 1 Yohan 5:3.) Nambi leswi ku nga ni swivangelo swa ku tala leswi hi fanelaka ku yingiseta Yehovha ha swone, yene a nga hi sindzrisi. Yehovha a hi nyike nyiko ya ntsrhunxeko wa ku tihlawulela, xileswo awa nyonxa loko hi hlawula ku mu yingiseta hi leswi hi mu zrandzraka.

9-10. Ha yini swi li swa lisima kuva hi tiva milawu ya Xikwembu Nkulukumba hi va hi hanya ha yone?

⁹ Vapswele va djula leswaku vanavu va sizreleleka. Hi swoswo swi va yentxaka va bekela milawu vanavu akuva yi va pfuna. Loko vana va yingiseta swileleto leswo, va komba leswaku va va dumba vapswele vavu nakone va va hlonipha. Xileswo, i swa lisima hi ku tlulisa ngopfu kuva hi tiva swileleto swa Tatana wezru wa le tilweni hi va hi hanya ha swone. Loko hi yentxa tanu, hi komba Yehovha leswaku ha mu zrandzra nakone hi mu bekela xitxhavu. Handle ka leswo, ku pfuneka hine. (Eza 48:17, 18) Ku hambana ni swoswo, lava bakanyaka Yehovha ni milawu yakwe va gama hi ku tivavisa.​—Ga 6:7, 8.

¹⁰ Loko hi hanya hi ndlela leyi nyonxisaka Yehovha, hi timpfenkela ka makhombo ya le nyameni, ya le mbilwini ni le moyeni. Yehovha awa swi tiva leswi nga swinene ngopfu ka hine. Aurora, lweyi a tsrhamaka a Estados Unidos, a li: “Na swi tiva leswaku loko hi yingiseta Yehovha, minkama hinkwayu wutomi byezru byi ta va bya ku yampswa swinene.” Leswo ni ka hine swa tizra. Xana a wu pfumeli leswaku ku yingiseta milawu ya Yehovha hakunene swi ku tisela mabindzru?

11. Xana xikhongoto xi hi pfunisa kuyini?

¹¹ Xikhongoto xi hi pfuna ku yingiseta, nambi loko ku yentxa tanu swi kazrata. Minkama yin’wana, swa hi bindzrela ku yingiseta Yehovha, kambe minkama hinkwayu ku djuleka hi lwa akuva hi nga dohi. Muyimbeleli wa mapsalma a kombele Xikwembu Nkulukumba, a ku: ‘U ndzri seketela hi moya lowa nkhinkhi [ku yingiseta, Tradução do Novo Mundo].’ (Ps 51:12) Denise, lweyi a nga phayona dzra nkama hinkwawu, a li: “Loko swi ni bindzrela ku yingiseta wun’we ka milawu ya Yehovha, ni hamba xikhongoto ni kombela ntamu wa ku yentxa leswi lulamiki.” Hi nga tiyiseka leswaku Yehovha minkama hinkwayu a ta hlamula xikombelo xa muxaka lowo.​—Lk 11:9-13.

PFUNA VAN’WANA KU ZRANDZRA TATANA WEZRU

12. Hi ku ya hi Ba-le-Efesa 5:1, hi fanela ku yentxa yini?

¹² Dondzra Ba-le-Efesa 5:1. Swanga ‘vana va Yehovha lava zrandzriwaka’, hi yentxa hinkwaswu leswi hi nga swi kotaka akuva hi mu yetisa. Hi yetisa wumhunu byakwe hi ku va ni lizrandzru, wunene, hi tlhela hi dzrivalela van’wana. Loko lava nga mu tivikiki Xikwembu Nkulukumba va vona hanyela dzrezru, va nga ha susumeteleka ku dondzra leswi yengetelekiki hi yene. (1Pe 2:12) Vapswele lava nga vakriste va ni xivangelo xa ku yetisa Yehovha ka ndlela leyi va khomaka vanavu ha yone. Loko va yentxa tanu, vanavu na vone va nga ha djula ku yaka wuxaka ni Tatana wezru lwa nga ni lizrandzru.

13. Hi fanela ku dzrimuka yini akuva hi va ni xixixi?

¹³ Swivanana swa tibuma hi vatatana va swone nakone swi zrandzra ku khanela hi vone. Hi laha ku fanaka, na hine ha tibuma hi Tatana wezru wa le tilweni, Yehovha, nakone hi djula leswaku van’wana va mu tiva. A mbilwini yezru, hinkwezru hi titwa ku fana na Hosi Davhida, lweyi a tsraliki leswi: ‘A hika dzranga dzri ta titwalisa ha Yehovha.’ (Ps 34:2) Kambe, swi nga ku yini loko hi ni tingana? Hi nga xi kumisa kuyini xixixi? Hi kuma xixixi loko hi dzrimuka leswi hi nga mu nyonxisisaka xiswone Yehovha ni leswi van’wana va taka pfunekisa xiswone hi ku dondzra hi yene. Yehovha a ta hi nyika xixixi lexi hi xi vilelaka. A pfune vamakwezru a dzaneni dzra ku sungula ku va ni xixixi. Na hine a ta hi pfuna.​—1Te 2:2.

14. Ha yini swi li swa limisa ku zrezra madzrungula lamanene?

¹⁴ Yehovha a nga na xihlawuhlawu, nakone awa nyonxa loko a hi vona hi komba van’wana lizrandzru na hi nga lavisi xiyimu xavu. (Min 10:34, 35) Yin’we ya tindlela letinene ngopfu leti ha tone hi nga kombaka van’wana lizrandzru i ku va zrezrela madzrungula lamanene. (Mt 28:19, 20) Xana ntizro lowo wu nga tisa mihandzru yini ke? Lava hi yingisetaka va nga yampswisa wutomi byavu swoswi va tlhela va kuma dumbo dzra ku hanya hi laha ku nga helikikiki a nkameni lowu taka.​—1Tm 4:16.

ZRANDZRA TATANA WEZRU, U NYONXA

15-16. I yini swi hi yentxaka hi nyonxa?

¹⁵ Yehovha i Tatana lwa nga ni lizrandzru, xileswo a djula ndangu wakwe wu nyonxa. (Eza 65:14) I swinyingi leswi hi yentxaka hi nyonxa ni swoswi, nambi loko hi nga ha va hi kumana ni swikazratu. Hi xikombiso, ha tiyiseka leswaku Tatana wezru wa le tilweni a hi zrandzra ngopfu swinene. Hi tivisisa Zritu dzra Xikwembu Nkulukumba, a nga Bibele. (Yr 15:16) Nakone hi swizro swa ndangu lowu hlawulekiki lowu vumbiwiki hi vhanu lava zrandzraka Yehovha, va zrandzraka milawu yakwe leyi lulamiki, va tlhela va zrandzrana.​—Ps 106:4, 5.

¹⁶ Hi nga tsrhama na hi nyonxile hikusa hi ni dumbo ledzri tiyiki dzra ku va ni wutomi bya ku yampswa hi ku tlulisa a nkameni lowu taka. Ha swi tiva leswaku ku nga li khale Yehovha a ta helisa wubihi hinkwabyu nakone a ta tizrisa Mfumu wakwe ku yentxa misava yi tlhela yi va Paradeyisi. Handle ka leswo, hi ni dumbo ledzri hlamalisaka dzra ku vona lava fiki va pfuxiwa va va va tlhanganisiwa ni vazrandzriwa vavu. (Yh 5:28, 29) Vona ndlela leyi ku taka nyonxiwa ha yone! Nakone, xa lisima ku tlula hinkwaswu, ha tiyiseka leswaku ku nge khale hinkwavu a tilweni ni la misaveni va ta nyika Tatana wezru lwa nga ni lizrandzru lidzrumo, ku phatima ni wugandzreli lebyi mu fanelaka.