XIDONDZRO 08
U Nga Va Munghanu Wa Yehovha
Yehovha a djula u mu tiva ku yampswa. Ha yini? A dumba leswaku loko u ya u dondzra hi matsrhamela yake, tindlela take ni nkongometo wake, u ta ya u swi djula ku va munghanu wake. Xana hakunene swa koteka ku va munghanu wa Xikwembu Nkulukumba? (Dondzra Amapsalma 25:14.) U nga yentxa yini akuva u va munghanu wake? Bibele dzri hlamula swivutiso leswo nakone dzra tlhamuxela leswaku ha yini wunghanu lebyo byi li bya lisima ku tlula hinkwabyu u nga vaka na byone.
1. Hi xini xizrambu lexi Yehovha a ku nyikaka xone?
‘Tsrhindzrekelani ka Xikwembu Nkulukumba; na yene a ta tsrhindzrekela ku n’wine.’ (Yakob 4:8) Yehovha a ku zramba akuva u va munghanu wake. Van’we swi nga va kazratela ku tivona na va li munghanu wa mhunu lweyi va nga mu vonikiki, ngopfungopfu Xikwembu Nkulukumba. A Zritwini dzrake ku nga Bibele, Yehovha a tlhamuxela hinkwaswu leswi hi swi vilelaka akuva hi tiva a wumhunu byake leswaku hi tsrhindzrekela ka yene. Loko hi dondzra leswi Xikwembu Nkulukumba a hi byelaka swone a Bibeleni, wunghanu byezru na yene byi ta kula nambileswi hi nga samikiki hi mu vona.
2. Ha yini Yehovha a li munghanu lwenkulu lweyi u nga vaka na yene?
A nga kone lweyi a ku zrandzraka ngopfu ku tlula Yehovha. A djula leswaku u va mhunu lwa nyonxiki a wuton’wini. Nakone a tibekisele ku ku pfuna nkama wini na wini. Loko u vilela xipfunu, u nga ‘txukumetela ku hlatiyela [kwaku] hinkwaku a henhla kwakwe, hikuva a zron’wa ha [wene]’. (1 Petros 5:7) Yehovha minkama hinkwayu a tibekisele ku seketela vanghanu vake, a va txhavelela a tlhela a va yingela.—Dondzra Amapsalma 94:18, 19.
3. Xana Yehovha a lavisele yini ka vanghanu vake?
Yehovha a zrandzra vhanu hinkwavu, kambe lava lulamiki hi vone va nga ni ‘vunakulobye byakwe’. (Amaproverbia 3:32) Yehovha a lavisele leswaku vanghanu vake va tikazratela ku yentxa mintxhumu leyi a yi vonaka na yi li yinene ni ku tsrhika mintxhumu leyi a yi vonaka na yi bihile. Van’wana va nga ha yanakanya leswaku va nge swi koti ni siku ni dzrin’we ku hanya hi milawu ya Yehovha. Nambitanu, Yehovha a lehisa ngopfu mbilu. A yamukela vhanu hinkwavu lava mu zrandzraka va tlhela va tikazratela ku mu nyonxisa.—Amapsalma 147:11; Amintiṛo 10:34, 35.
KELISISA
Tiva leswaku u nga va munghanu wa Yehovha hi ndlela yini, u tlhela u vona leswaku ha yini a li munghanu lwenkulu ku tlula hinkwavu.
4. Abrahamu a a li munghanu wa Yehovha
Wudzrunguli bya Bibele lebyi khanelaka hi Abrahamu (lweyi mfuzri a vitaniwaka Abram) byi hi pfuna ku twisisa leswi ku va munghanu wa Xikwembu Nkulukumba swi tlhamuxelaka swone. Dondzrani hi Abrahamu ka Genesis 12:1-4. Ntsrhaku, mi bulisana hi swivutiso leswi landzrelaka:
Yehovha a kombele Abrahamu kuva a yentxa yini?
I yini leswi Yehovha a nga mu dumbisa?
Xana Abrahamu a yentxe yini loko Yehovha a mu leleta swa kukazri?
5. Leswi Yehovha a kombelaka kuva vanghanu vake va swi yentxa
Loko hi ni vanghanu, a swi kali kuva va hi kombela ku va yentxela swa kukazri.
I yini leswi u zrandzraka kuva vanghanu vaku va ku yentxela swone?
Dondzrani 1 Yohan 5:3, mi gama mi bulisana hi xivutiso lexi landzrelaka:
Xana Yehovha a lavisela kuva vanghanu vake va yentxa yini?
Akuva hi yingiseta Yehovha, hi fanela ku txintxa mahanyela yezru kumbe wumhunu byezru. Dondzrani Ezaya 48:17, 18, mi gama mi bulisana hi xivutiso lexi landzrelaka:
Ha yini Yehovha a lavisela kuva vanghanu vake va txintxa swa kukazri?
Munghanu lwenene a hi dzrimuxa leswi swi nga hi sizrelelaka swi tlhela swi hi pfuna. Na yene Yehovha a yentxa tanu ka vanghanu vake
6. Ndlela leyi Yehovha a pfunaka vanghanu vake ha yone
Yehovha a pfuna vanghanu vake ku lwisana ni swikazratu. Vonani VHIDIYU, mi gama mi bulisana hi xivutiso lexi landzrelaka.
Xana Yehovha a mu pfunise kuyini wansati lweyi a nga ka vhidiyu ku hlula mimpimiso ya ku biha ni ku titwa hi ndlela ya ku biha?
Dondzrani Ezaya 41:10, 13, mi gama mi bulisana hi swivutiso leswi landzrelaka:
I yini leswi Yehovha a djulaka ku swi yentxela vanghanu vake hinkwavu?
Xana wa swi navela ku va munghanu wa Yehovha? Ha yini?
Vanghanu va ntiyiso va ku pfuna loko u vilela mpfunu. Na yene Yehovha a ta ku pfuna
7. Akuva hi va vanghanu va Yehovha swi djula hi bulisana na yene
Vanghanu va tiyisa wunghanu byavu loko va tsrhama hi ku bulisana. Dondzrani Amapsalma 86:6, 11, mi gama mi bulisana hi swivutiso leswi landzrelaka:
Xana hi nga bulisana na Yehovha hi ndlela yini?
Xana Yehovha a bulisana na hine hi ndlela yini?
Hi vulavula na Yehovha hi xikhongoto; na yene a vulavula na hine hi Bibele
VAN’WE VA LI: “A swi koteki ku va munghanu wa Xikwembu Nkulukumba.”
U nga tizrisa ndzrimana yini akuva u va komba leswaku swa koteka ku va munghanu wa Yehovha?
NKATSRAKANYU
Yehovha a djula ku va munghanu waku nakone a ta ku pfuna leswaku u tsrhindzrekela ka yene.
Mpfuxeto
Xana Yehovha a va pfunisa kuyini vanghanu vake?
Ha yini Yehovha a byela vanghanu vake leswaku va txintxa mahanyela ya kukazri?
Hi mavonela yaku, xana leswi Yehovha a swi laviselaka ka vanghanu vake swa bindzra? Ha yini u hlamulisa xileswo?
HANDZRISISA
Xana ku va munghanu wa Xikwembu Nkulukumba swi nga byi khumbisa kuyini wutomi byaku?
“Yehovha I Xikwembu Lexi Fanelaka Ku Tiviwa” (Xihondzro Xa Ku Zrindzra, 15 ka Fevhereru wa 2003)
Dondzra ndlela ya ku txutxela wunghanu na Xikwembu Nkulukumba.
Vona xivangelo lexi yentxiki wansati wa kukazri a kulisa wunghanu byake na Yehovha.
“A Ni Nga Swi Djuli Ku Fa!” (Xihondzro Xa Ku Zrindzra No 1 2017)
Yingiseta leswi vampshwa va swi hlayaka hi leswi va titwisaka xiswone ha Yehovha.
Xana Swi Hlaya Yini Ku Va Munghanu Wa Xikwembu Nkulukumba? (1:46)