XIDONDZRO 54
I Mani “Nandzra Wa Ku Dumbeka Ni Ku Tlhazriha” Nakone A Yentxa Yini?
Yesu i nhloko ya bandla. (Ba-le-Efesa 5:23) Swoswi, a le matilweni nakone ku sukela kohala a kongomisa valandzreli vake lani misaveni hi ku tizrisa “nandzra wa ku dumbeka ni ku tlhazriha”. (Dondzra Matewu 24:45.) Yesu hi yene lweyi a bekiki “nandzra” a tlhela a mu nyika wulawuli hi mpimu wa kukazri. Nambileswi nandzra lweyi a nga ni wulawuli, a tizrela Kriste ku patsra ni vamakwavu. I mani nandzra lweyo? Xana a hi hlayisa hi ndlela yini?
1. Xana i mani “nandzra wa ku dumbeka ni ku tlhazriha”?
Minkama hinkwayu Yehovha a tizrisa mhunu kumbe ntlawa wa vhanu akuva a kongomisa vhanu vake. (Malaki 2:7; Ba-Heberu 1:1) A ntsrhaku ka ku fa ka Yesu, a vapostola ni vakulu a Yerusalema va sungule ku zrangela. (Amintiṛo 15:2) Ni namunhla swi yentxiwa hi ndlela yoleyo. Yehovha a tizrisa ntlawa lowutsrongo wa vakulu, ku nga Huvo leyi Zrangelaka ya Timboni ta Yehovha, akuva wu phamela swakuda swa moya ni ku zrangela ntizro wa ku zrezra. Ntlawa lowu wu vumba “nandzra wa ku dumbeka ni ku tlhazriha lweyi a n’winyi wake [Yesu] a mu bekiki”. (Matewu 24:45a) Swizro hinkwaswu swa Huvo leyi Zrangelaka i vakriste lava totiwiki hi moya wa ku xwenga nakone va langusele ku ya fuma na Kriste a tilweni loko va fa.
2. Xana nandzra wa ku dumbeka a va phamelisa kuyini swakuda swa moya vhanu va Yehovha?
Yesu a hlaye leswaku a nandzra wa ku dumbeka a ta “phamela [vakristekulobye] swakuda hi nkama wa kone”. (Matewu 24:45b) Swanga hi leswi swakuda swi hi tiyisaka swi tlhela swi hi nyika wutomi lebyinene, a swakuda swa moya, ku nga tidondzro leti pfaka ka Zritu dzra Xikwembu Nkulukumba, na tone ti hi nyika ntamu lowu hi wu vilelaka akuva hi tama hi dumbeka ka Yehovha ni ku yentxa a ntizro lowu Yesu a hi nyikiki wone. (1 Timoteo 4:6) Hi yamukela swakuda leswo swa moya a mintlhanganwini ya bandla, a maasembleya, a makongresu, ka mabuku ni ka mavhidiyu lama seketeliwiki a Bibeleni. Swakuda leswo hinkwaswu swi hi pfuna ku twisisa ku zrandzra ka Xikwembu Nkulukumba swi tlhela swi tiyisa wunghanu byezru na yene.
KELISISA
Vona leswaku ha yini hi djula “nandzra wa ku dumbeka ni ku tlhazriha”, ku nga Huvo leyi Zrangelaka.
Huvo leyi Zrangelaka yi hlayisa Timboni ta Yehovha a misaveni hinkwayu, yi va nyika swakuda swa moya ni minkongomiso leyi pfunaka
3. Vhanu va Yehovha va fanela ku va lava hlelekiki
Hi ku landzra nkongomiso wa Yesu, a Huvo leyi Zrangelaka yi hlela ntizro wa Timboni ta Yehovha. Swa ku fana ni leswi a swi yentxeka ka vakriste va ku sungula. Vonani VHIDIYU.
Dondzrani 1 Ba-le-Korinte 14:33, 40, mi gama mi bulisana hi xivutiso lexi:
Xana tindzrimana leti, ti swi kombisisa kuyini leswaku Yehovha a djula kuva Timboni take ti hleleka?
4. Nandzra wa ku dumbeka a hlela ntizro wezru wa ku zrezra
A ntizro wa ku zrezra a wu li ntizro wa lisima lowu a vakriste va le nkameni lowu khalutiki a va wu yentxa. Dondzrani Amintiṛo 8:14, 25, mi gama mi bulisana hi swivutiso leswi landzrelaka:
I mani lweyi a a kongomisa ntizro wa ku zrezra lowu vakriste va le nkameni lowu khalutiki a va wu yentxa?
Xana Petro na Yohane va wu yamukelise kuyini nkongomiso lowu vapostola van’wana va va nyikiki wone?
A wutihlamuleli lebyikulu bya Huvo leyi Zrangelaka i bya ku hlela ntizro wa ku zrezra. Vonani VHIDIYU.
Yesu a khanyise a lisima dzra ku zrezra. Dondzrani Marka 13:10, mi gama mi bulisana hi swivutiso leswi:
Ha yini ntizro wa ku zrezra wu li wa lisima swinene ka Huvo leyi Zrangelaka?
Ha yini hi djula leswaku “a nandzra wa ku dumbeka ni ku tlhazriha” a hlela ntizro lowu wa misava hinkwayu?
5. Nandzra wa ku dumbeka a nyikela nkongomiso
Huvo leyi Zrangelaka yi kongomisa vakriste a misaveni hinkwayu. Yi tekisa kuyini swiboho? Vona leswi a huvo leyi zrangelaka ya le nkameni lowu khalutiki a yi swi yentxisa xiswone. Dondzrani Amintiṛo 15:1, 2, mi gama mi bulisana hi swivutiso leswi landzrelaka:
I yini lexi vangiki ku kanetana a xikazri ka vakriste va ku sungula?
Pawulo na Barnaba ni van’wana va ye ka mani akuva va lulamisa xikazratu?
Dondzrani Amintiṛo 15:12-18, 23-29, mi gama mi bulisana hi xivutiso lexi landzrelaka:
Na yi nge si na teka xiboho xa kukazri, a huvo leyi zrangelaka ya nkameni wa vapostola a yi djula nkongomiso wa Xikwembu Nkulukumba mayelanu ni mhaka yoleyo. A yi swi yentxisa kuyini leswo?—Vona tindzrimana 12, 15 ni 28.
Dondzrani Amintiṛo 15:30, 31 ni 16:4, 5, mi gama mi bulisana hi swivutiso leswi landzrelaka:
Xana vakriste va nkama lowu khalutiki va wu yamukelile nkongomiso lowu va nyikiwiki hi huvo leyi zrangelaka ya nkama lowo?
Xana Yehovha a ku tovokisise kuyini ku yingiseta kwavu?
Dondzrani 2 Timoteo 3:16 na Yakob 1:5, mi gama mi bulisana hi xivutiso lexi landzrelaka:
Xana Huvo leyi Zrangelaka yi wu kuma kwini nkongomiso loko yi djula ku teka swiboho namunhla?
VAN’WE VA LI: “Loko u yingiseta Huvo leyi Zrangelaka, u va na wo landzra a nkongomiso wa vhanu.”
I yini lexi ku tiyisekisaka leswaku Yesu hi yene a kongomisaka Huvo leyi Zrangelaka?
NKATSRAKANYU
Huvo leyi Zrangelaka i “nandzra wa ku dumbeka ni ku tlhazriha” lweyi a bekiwiki hi Yesu Kriste. Huvo leyi yi nyikela minkongomiso ni swakuda swa moya a misaveni hinkwayu.
Mpfuxeto
I mani a bekiki “nandzra wa ku dumbeka ni ku tlhazriha”?
Xana Huvo leyi Zrangelaka yi hi hlayisa hi ndlela yini?
Wa kholwa leswaku a Huvo leyi Zrangelaka i “nandzra wa ku dumbeka ni ku tlhazriha”?
HANDZRISISA
Vona leswaku Huvo leyi Zrangelaka yi wu yentxisa kuyini ntizro wa yone namunhla.
“I Yini Huvo Leyi Zrangelaka Ya Timboni Ta Yehovha?” (Leswi kumekaka ka jw.org)
Vona leswi Huvo leyi Zrangelaka yi swi yentxaka akuva vhanu va Yehovha va kota ku yamukela swakuda leswi dumbekaka.
Xana lava va vumbaka Huvo leyi Zrangelaka va titwisa kuyini hi ntizro lowu va nyikiwiki hi Yesu?
Xana mintlhanganu yezru ni makongresu swi swi kombisa hi ndlela yini leswaku Huvo leyi Zrangelaka yi kongomisiwa hi Yehovha?