Dzrimukani Lava Mi Zrangelaka

MAZRITU lawa ya mupostola Pawulo, lama tsraliwiki ka Ba-Heberu 13:7, ma nga tlhela ma ndzruluteliwa hi ndlela leyi: ‘Dzrimukani lava n’wi fambisaka.’ Ku sukela hi Pentekoxta ya 33 Nguveni Yezru (N.Y.) ku ya mahlweni, vapostola lava dumbekaka va Hosi Yesu Kriste va hetisise ntizro lowo swanga huvo leyi zrangelaka a ku nyikeleni ka nkongomiso a bandleni dzra wukriste ledzri a dzra ha ku vumbiwa. (Min 6:2-4) Kolomu ka 49 N.Y., huvo leyi, leyi zrangelaka, a yi kulisiwile akuva yi patsra ni lava a va nga li vapostola va Kriste. Loko ku tekiwe xiboho mayelanu ni ku soka, huvo leyi zrangelaka a yi patsra ‘vapostola ni vakulu’ a Yerusalema. (Min 15:1, 2) A va ni wutiyanguleli bya ku kambisisa timhaka leti khumbaka vakriste va le mimbangwini hinkwayu. Va zrumele mapapela ni swileleto, leswi tiyisiki mabandla swi tlhela swi yentxa vadondzrisiwa va twanana hi miyanakanyu ni hi mintizro. Mabandla a ma yingiseta ma tlhela ma titsrongahatela nkongomiso wa huvo leyi zrangelaka. Swanga mihandzru, va tovokisiwile ha Yehovha va tlhela va yandzra.​—Min 8:1, 14, 15; 15:22-31; 16:4, 5; Hb 13:17.

² A ntsrhaku ka ku fa ka vapostola, ku sungule wukanganyisi byikulu bya wukhongoti. (2Te 2:3-12) Swanga hi lani Yesu a profetiki ha kone ka xifaniso xakwe xa mavele ni lihungu, ku byaliwe lihungu (vakriste va madzrimi) a henhla ka mavele (vakriste lava totiwiki). Hi ku famba ka madzana ya malembe, mintlawa leyi yi pfumeleliwe ku kula xikan’we ku ya tlhasela nkama wa ntsrhovelo, ku nga ‘a wugan’wini bya nkama lo’. (Mt 13:24-30, 36-43) Vakriste lava totiwiki va ye mahlweni va kombisiwa wumbilu ha Yesu hi nkama wolowo, kambe a ku nge si va ni huvo leyi zrangelaka, kumbe ndlela leyi vonekaka a misaveni leyi Yesu a yi tizrisaka leswaku a kongomisa valandzreli vakwe. (Mt 28:20) Nambitanu, a profete leswaku a ku ta va ni ku txintxa hi nkama wa ntsrhovelo.

³ ‘Hi mani-ke a nandzra lwe wa ku dumbeka ni ku tlhazriha’? Yesu Kriste a tizrise xivutiso lexo loko a sungula ku khanela hi xifaniso lexi a xi yentxa xiyenge xa ‘xikombiso’ xa ‘ku hela ka misava’. (Mt 24:3, 42-47) Yesu a kombise leswaku nandzra lweyi wa ku dumbeka a a ta khomeka hi ku phamela vhanu va Xikwembu Nkulukumba swakuda swa moya ‘hi la ku fanekelaka’. Ku fana ni leswi Yesu a tizrisiki ntlawa wa vavanuna​—a matsrhan’wini ya mhunu mun’we—​leswaku wu zrangela hi dzana dzra ku sungula, nandzra lwe wa ku dumbeka lweyi Yesu a mu tizrisaka a nkameni lowu a hi mhunu mun’we.

NDLELA YA KU TIVA ‘NANDZRA LWE WA KU DUMBEKA NI KU TLHAZRIHA’

⁴ Xana Yesu a beke mani leswaku a disa valandzreli vakwe? Swa twisiseka leswaku a a ta tizrisa vakriste lava totiwiki la misaveni. Bibele dzri va vitana swanga vaprista va hosi, ku nga lava va leletiwiki ku twalisa wunene bya lwe a va vitaniki va huma munyameni, va ta livaningweni dzrakwe ledzri hlamalisaka. (1Pe 2:9; Mlk 2:7; Mpf 12:17) Xana vatotiwa hinkwavu la misaveni va vumba nandzra lwe wa ku dumbeka ni ku tlhazriha? A swi tanu. Loko Yesu a hambe hlolana dzra ku phamela swakuda xitsrhungu xa kolomu ka 5.000 wa vavanuna, na ku nga kontiwi vavasati ni vatsrongwana, a swi yavele vadondzrisiwa, kutani vadondzrisiwa va swi yavela switsrhungu. (Mt 14:19) A phamele vanyingi hi mavoko ya lavatsrongo. Namunhla a nyikela swakuda swa moya hi ndlela leyi fanaka.

⁵ Kutani ke, ‘a mulaviseli wa yindlu lwe wa ku dumbeka’ a vumbiwa hi ntlawa wutsrongo wa vamakwezru lava totiwiki, lava khomekiki hi ku kongoma a ku lulamiseleni ni le ku nyikeleni ka swakuda swa moya a nkameni lowu wa wukone bya Kriste. (Lk 12:42) A masikwini lawa ya wugamu, vamakwezru lava totiwiki lava vumbaka ‘nandzra lwe wa ku dumbeka ni ku tlhazriha’ va tizra kun’we a ntsindzra wa misava hinkwayu. Namunhla, vamakwezru lava, lava totiwiki, va vumba Huvo leyi Zrangelaka ya Timboni ta Yehovha.

⁶ Kriste a tizrisa huvo leyi leswaku a paluxa dzrungula ledzri kombisaka ku hetiseka ka wuprofeta bya Bibele ni kuva nkama wun’wana ni wun’wana a hi nyika nkongomiso mayelanu ni matizrisela ya minsinya ya milawu ya Bibele a wuton’wini byezru. Swakuda leswi swa moya swi nyikeliwa hi ku tizrisa mabandla ya Timboni ta Yehovha. (Eza 43:10; Ga 6:16) A minkameni ya Bibele, a nandzra kumbe mulanguseli lwe a dumbekaka, a a siyeliwa yindlu leswaku a yi hlayisa. Hi ku fanana, a nandzra lwe wa ku dumbeka ni ku tlhazriha a zrwexiwe wutiyanguleli bya ku hlayisa yindlu ya lipfumelo. Xileswo a nandzra lwe wa ku dumbeka na yene a hlayisa mali, ntizro wa ku zrezra, minongonoko ya tinhlengeletanu ni tinhlengeletanu letikulu, ku yimisiwa ka valanguseli leswaku va dondzrisa timhaka ta ku hambana-hambana a nhlengeletanwini, ni ku humexa mabuku lama seketeliwiki Bibeleni. Hinkwaswu leswo swi pfuna va ‘ndangu’.​—Mt 24:45.

⁷ A va ‘ndangu’ ke, ku hlayiwa vamani? Hi ku kongoma, hi lava va disiwaka. A ku sunguleni, a va ndangu a ku hlayiwa vatotiwa. Ntsrhaku, va sungule ku patsra ni xitsrhungu lexikulu xa ‘tihamba tin’wanyana’. (Yh 10:16) Mintlawa leyi ha yibidzri yi da swakuda leswi nyikeliwaka hi nandzra lwe wa ku dumbeka.

⁸ Hi nkama wa nhlomulo lowukulu, loko Yesu a buya a ta ta yavanyisa a tlhela a helisa xiyimu lexi xa ku biha, a ta tamelisa nandzra lwe wa ku dumbeka ‘wukosi byakwe hinkwabyu’. (Mt 24:46, 47) Lava vumbaka nandzra lwe wa ku dumbeka va ta kuma hakelo dzravu a matilweni. Vone ni swizro leswimbeni hinkwaswu swa 144.000, va ta kuma wuhosi bya le tilweni kun’we na Kriste. Nambi leswi ku nge he tiki va ni nandzra wa ku dumbeka ni wa ku tlhazriha a misaveni, Yehovha na Yesu va ta kongomisa vafumiwa va Mfumu wa Mesiya hi ku tizrisa lava taka bekiwa swanga ‘tihosana’.​—Ps 45:16

HA YINI HI FANELA KU DZRIMUKA LAVA HI ZRANGELAKA?

⁹ Hi ni swivangelo swinyingi swa ku dzrimuka lava hi zrangelaka hi tlhela hi va dumba. Ha yini ku yentxa leswi swi hi pfuna? Mupostola Pawulo a te: ‘Hikusa vone va hitekela mahika yenu, swanga hi leswi va taka vutisiwa wone; akuva va swi tizra hi ku tsrhava, na va nga konyi, hikusa a swi nga ti n’wi pfuna leswo.’ (Hb 13:17) I swa lisima ku yingiseta lava zrangelaka ni ku tibeka hansi ka nkongomiso wavu hikusa va le ku hi voneleleni leswaku va sizrelela wumoya byezru ni ku va hi tsrhama hi hlayisekile.

¹⁰ Hi la swi tsraliwiki ha kone ka 1 Ba-le-Korinte 16:14, Pawulo a te: ‘A swenu hinkwaswu a swi yentxiwe hi lizrandzru.’ Swiboho leswi yentxeliwaka ku pfuna vhanu va Xikwembu Nkulukumba swi seketeliwe ka lizrandzru, ku nga tsrhamela ledzri tlakukiki swinene. Mayelanu ni lizrandzru, a buku dzra 1 Ba-le-Korinte 13:4-8 dzri li: ‘A lizrandzru li lehi mbilu; li ni wumbilu; a lizrandzru a li na xikwele; a lizrandzru a li na ku tikulisa; a li tikukumuxi; a li yentxisi tingana, a li tidjuleli swa lone; a li lebyi; a li pimisi leswi mfani. A li tsrhaveli ku somboloka; kambe li tsrhavelana ni xihlayelamfuzri. Li vevukisa milandzru hinkwayu; li pfumela hinkwaswu, li lavisela hinkwaswu, li byatsrha hinkwaswu. Lizrandzru li nga suvi ni siku ni dzrin’we.’ Leswi swiboho hinkwaswu leswi yentxeliwaka ku pfuna vatizreli va Yehovha swi seketeliwaka ka lizrandzru, hi ni swivangelo leswi twalaka swa ku titwa hi sizrelelekile a hansi ka wuzrangeli lebyi. Tlhantakubidzri, wuzrangeli lebyo i ndlela leyi Yehovha a kombisaka lizrandzru dzrakwe ha yone.

¹¹ Ku fana ni le ka dzana dzra ku sungula, lava Yehovha a va tizrisaka ku fambisa vhanu vakwe, a va hetisekanga. Nambitanu, a nkameni lowu khalutiki, Yehovha a tizrise vhanu va ku pfumala ku hetiseka akuva va hetisisa ku zrandzra kwakwe. Nowa a yake ngalawa a tlhela a zrezra mayelanu ni ku helisiwa ka misava ya le masikwini yakwe. (Gn 6:13, 14, 22; 2Pe 2:5) Moxe a hlawuliwe leswaku a humexa vhanu va Yehovha a Egipta. (Eks 3:10) Ku huhuteliwe vhanu lava nga hetisekangakiki leswaku va tsrala Bibele. (2Tm 3:16; 2Pe 1:21) Ku va Yehovha a tizrisa vhanu va ku pfumala ku hetiseka namunhla akuva va kongomisa ntizro wa ku zrezra ni wa ku yentxa vadondzrisiwa a swi pumbi ndlela leyi hi dumbaka nhlengeletanu yakwe ha yone. A matsrhan’wini ya leswo, ha tiyisiwa hikusa ha swi tiva leswaku handle ka mpfuno wa Yehovha, a nhlengeletanu a yi nge ti swi kota ku yentxa hinkwaswu leswi yi swi yentxaka. Ku va nandzra wa ku dumbeka a kote ku hlula swikazratu swinyingi swi kombisa leswaku a kongomisiwa hi moya wa Xikwembu Nkulukumba. Xiyenge lexi vonekaka xa nhlengeletanu ya Yehovha xi kume matovoko ya ku tala. Xileswo, ha xi seketela nakone hi xi dumba hi mbilu hinkwayu.

NDLELA YA KU KOMBISA LESWAKU HA YI DUMBA NHLENGELETANU YA YEHOVHA

¹² Lava va nyikiwaka wutiyanguleli a bandleni va kombisa leswaku va yi dumba a nhlengeletanu hi ku yamukela hi mbilu hinkwayu mintizro leyi va nyikiwaka yone va tlhela va yi hetisisa hi ku dumbeka. (Min 20:28) Swanga vazrezri va Mfumu, hi zrezra hi ku hiseka hi yindlu ni yindlu, hi hamba timpinda ni ku fambisa swidondzro swa le makaya swa Bibele. (Mt 24:14; 28:19, 20) Akuva hi pfuneka hi ku helela hi swakuda swa moya leswi nyikeliwaka hi nandzra wa ku dumbeka, hi lulamisela mintlhanganu yezru ya wukriste hi tlhela hi va kone ka yone, ku patsra ni ka tinhlengeletanu ta miganga ni ta swifundzra. Hi pfuneka swinene hi ku tiyisana ni vamakwezru loko hi va kone ka mintlhanganu leyo ya wukriste.​—Hb 10:24, 25.

¹³ Loko hi seketela nhlengeletanu hi ku nyikela hi leswi hi nga naswu, hi kombisa leswaku ha yi dumba. (Pr 3:9, 10) Loko hi xiya leswaku vamakwezru va ni xivileleko xa kukazri hi tlhelo dzra nyama, ha va tsrutsrumela hi xihatla. (Ga 6:10; 1Tm 6:18) Hi susumetiwa hi ku zrandzra vamakwezru, na minkama hinkwayu hi djuletela mikhandlu ya ku komba Yehovha ni nhlengeletanu yakwe leswaku ha byi tlangela wunene lebyi hi kombisiwiki byone.​—Yh 13:35.

¹⁴ Hi tlhela hi kombisa leswaku ha yi dumba nhlengeletanu hi ku seketela swiboho swa yone. Leswo swi patsra ku landzrisela hi ku titsrongahata a minkongomiso ya lava tamelisiwiki wutiyanguleli bya ku hi langusela, ku fana ni valanguseli lava famba-fambaka ni vakulu va bandla. Vamakwezru lava i van’we ka lava va hi zrangelaka, lava hi fanelaka ku va yingiseta ni ku tibeka hansi kwavu. (Hb 13:7, 17) Nambi loko hi nga swi twisisi ha hombe swivangelo swa swiboho swa kukazri, ha swi tiva leswaku ku swi yingiseta swi ta pfuna hine. Swanga mabindzru, Yehovha awa hi tovokisa hi nkonta ya ku yingiseta kwezru Zritu dzrakwe ni nhlengeletanu yakwe. Hi ndlela leyo, hi kombisa leswaku hi tibeka hansi ka Muzrangeli wezru, Yesu Kriste.

¹⁵ Ina, hi ni swivangelo hinkwaswu swa ku dumba nandzra wa ku dumbeka ni wa ku tlhazriha. Sathana, xikwembu xa misava leyi, a le ku zameni hi tindlela hinkwatu akuva a ntxhimisa vito dzra Yehovha ni nhlengeletanu yakwe. (2Ko 4:4) U nga phasiwe hi mazrengu ya ku biha ya Sathana! (2Ko 2:11) Awa swi tiva leswaku ‘a nkama lowu a nga nawu i wutsrongo’ na a nge si na txukumeteliwa kheleni, nakone a tiyimisele ku hambukisa vhanu vanyingi va Yehovha hi lani a nga kotaka ha kone. (Mpf 12:12) Nambitasu, a nkama lowu Sathana a yaka a yengesela mintamu yakwe, a hi yeneni mahlweni hi tsrhindzrekela kusuhi-suhi na Yehovha. Ingiki hi nga dumba Yehovha ni ndlela leyi a yi tizrisaka akuva a kongomisa vhanu vakwe namunhla. Loko hi yentxa leswo hi ta kota ku va ni wumun’we ni vamakwezru.