Kondletela Ku Zrula A Bandleni Dzra Wukriste

Loko hi li kun’we ni vamakwezru, hi titwa hi ndlela leyi Davhida a titwiki ha yone loko a te: ‘Lavisani, a hi ku xonga ka swone, a hi ku nandzrika ka swone, loko vamakwavu va tsrhama kun’we ve van’we.’ (Amapsalma 133:1) Kambe a wumun’we byolebyo a byo suketana byi titela. Mhunu mun’wana ni mun’wana a fanela ku hamba xiyenge xake.

1. He wini ntxhumu lowu hlamalisaka ka vhanu va Yehovha?

Loko wene u hlalela ntlhanganu ka tiko dzrimbeni, u ta vona leswaku nambiloko u nga dzri twi lidzrimi dzravu u ta titwa u li kaya. Ha yini? Hi leswi hi tizrisaka mabuku man’we akuva hi dondzra Bibele a misaveni hinkwayu. Nakone hi tikazratela ku kombana lizrandzru. Swi nge na mhaka leswaku hi huma kwini, ‘hi vitana hinkwezru a vito dzra Yehovha, hi mu tizrela hi mbilu yi li yin’we’.—Tsefaniya 3:9.

2. I yini leswi u nga swi yentxaka akuva ku va ni wumun’we bandleni?

‘N’wi zrandzranisisa hi timbilu leta ku basa.’ (1 Petros 1:22) U nga swi yentxisa kuyini leswo? U nga womelele ka swihoxo swa vambeni, kambe vona ni matsrhamela lawa va nga na wone ya ku xonga. A matsrhan’wini ya ku hamba wunghanu ntsena ni vhanu lava mi zrandzraka leswi fanaka, tikazrateli ku tiva vhanu vambeni. Hi fanela ku tikazratela ku susa ntxhumu wun’wana ni wun’wana lowu nga hi yentxaka hi va ni xihlawuhlawu.—Dondzra 1 Petros 2:17.a

3. I yini leswi u nga swi yentxaka loko u kwatisani ni makwezru wa kukazri?

Hine hi ni wumun’we, nambitanu a hi hetisekanga. Minkama yimbeni hi ta khunguvanyisa vambeni. Xileswo, Bibele dzri hi kutxa ku va hi ‘ya mahlweni hi dzrivalelana’. Nakone dzri tlhela dzri hlaya leswi: ‘Swanga heswi Yehovha a n’wi dzrivaleliki, na n’wine yentxisani xiswoswo.’ (Dondzra Ba-le-Kolosa 3:13.) A swi koteki ku hlaya makhambi lawa hi samiki hi dohela Yehovha. Nambitanu, Yehovha awa hi dzrivalela. Xileswo na yene a djula leswaku na hine hi dzrivalela vamakwezru. Loko u xiya leswaku u khunguvanyise mhunu, yentxa xa kukazri akuva mi kondletela ku zrula.—Dondzra Matewu 5:23, 24.b

KELISISA

4. Ndlela ya ku hlula xihlawuhlawu

Hi djula ku zrandzra vamakwezru hinkwavu. Kambe swi nga ha kazrata ku zrandzra mhunu lweyi a tikombaka na a hambanile ngopfu na hine. I yini leswi nga hi pfunaka? Dondzrani Amintiṛo 10:34, 35, mi gama mi bulisana hi swivutiso leswi landzrelaka:

• Yehovha a nga na xihlawuhlawu. A pfumelela mun’wana ni mun’wana akuva a mu gandzrela. Xana ku tiva leswo ha Yehovha swi ku pfunisa kuyini ka ndlela leyi u khomaka vhanu lava va hambaniki na wene ha yone?

• I mixaka muni ya xihlawuhlawu leyi yi tolovelekiki a mugangeni waku? Ha yini u djula ku yi bakanya?

Dondzrani 2 Ba-le-Korinte 6:11-13, mi gama mi bulisana hi xivutiso lexi landzrelaka:

• Xana u nga yentxa yini akuva u va ni wunghanu ni vamakwezru lava va hambaniki na wene?

5. Dzrivalela na swi sukela mbilwini u tlhela u kondletela ku zrula

Yehovha awa hi dzrivalela hi ku ntsrhunxeka, nambileswi yene a nga tiki txhuka a djule leswaku hine hi mu dzrivalela hi ntxhumu wa kukazri. Dondzrani Amapsalma 86:5, mi gama mi bulisana hi swivutiso leswi landzrelaka:

• Xana Yehovha a dzrivalela ku ya tlhasa kwini?

• Ha yini u tlangela hi leswi Yehovha a nga mhunu lweyi a dzrivalelaka?

• Hi swini swiyimu leswi nga ha yentxaka swi hi bindzrela ku va ni ku zrula ni van’wana?

Xana hi nga mu yetiselisa kuyini Yehovha hi va hi tama hi va ni wumun’we ni vamakwezru? Dondzrani Amaproverbia 19:11, mi gama mi bulisana hi xivutiso lexi landzrelaka:

• Loko mhunu a ku khunguvanyisa kumbe a ku zruketela, u nga yentxa yini akuva u lulamisa mhaka?

Hi txhuka hi khunguvanyisa vambeni. Loko leswo swi yentxeka, hi fanela ku yentxa yini? Vonani VHIDIYU, mi gama mi bulisana hi xivutiso lexi landzrelaka.

VHIDIYU: Yehovha A Tovokisa Lava Va Kondletelaka Ku Zrula (6:01)

• Ka vhidiyu, xana makwezru a ku kondletelise kuyini ku zrula?

6. Xiyisisa matsrhamela ya ku xonga lawa vamakwezru va nga na wone

Loko hi ya hi va kusuhi ni vamakwezru, hi ya hi tiva matsrhamela yavu ni ku tsrana kwavu. Xana hi nga xiyisisa matsrhamela ya vamakwezru hi ndlela yini? Vonani VHIDIYU, mi gama mi bulisana hi xivutiso lexi landzrelaka.

VHIDIYU: Vona Vamakwezru Hi Ndlela Yimbeni! (5:10)

• I yini xi nga ku pfunaka akuva u vona matsrhamela lamanene ya vamakwezru?

Yehovha a xiyisisa matsrhamela lamanene lawa hi nga na wone. Dondzrani 2 Makronika 16:9a, mi gama mi bulisana hi xivutiso lexi landzrelaka:

• Yehovha a xiyisisa matsrhamela lamanene lawa wene u nga na wone. U titwisa kuyini hi ku tiva leswo?

NKATSRAKANYU

U nga pfunisa akuva ku va ni ntwananu a bandleni loko u li mhunu lweyi a dzrivalelanaka u tlhela u kombisa lizrandzru ka vamakwezru.

Mpfuxeto

• U nga xi hlulisa kuyini xihlawuhlawu?

• I yini leswi u tiyimiseliki ku swi yentxa loko u kwatisani ni makwezru wa kukazri?

• Ha yini u djula ku yetisela Yehovha ka xikombiso xa ku dzrivalela?

HANDZRISISA

Vona leswaku xikombiso xin’we ka swikombiso swa Yesu xi nga ku pfunisa kuyini akuva u nga yavanyisi vambeni.

Susa Xigodo Tihlweni Dzraku (6:56)

Xana swa sindzrisa kuva hi kombela ku dzrivaleliwa nambiloko hi vona leswaku a hi hoxanga?

“Ku Kombela Lidzrivalelo I Ndlela Leyinene Ya Ku Kondletela Ku Zrula” (Xihondzro Xa Ku Zrindzra, 1 ka Novhembru wa 2002)

Vona ndlela leyi vanʼwana va dondzriki ha yone kuva va nga vi na xihlawuhlawu.

Unga Yavanyisi Hikuya hi Nghohe (5:06)

Vona tindlela leti u nga lulamisaka ha tone timhaka ni makwenu na ti nga si na hona wumun’we a bandleni.

“Lulamisa Timhaka Hi Lizrandzru” (Xihondzro Xa Ku Zrindzra, Mayu  wa 2016)