Ku Tsrhindzrekela Ka Van’wana I Ntxhumu Wa Wunene Kwezru

1-2. I yini leswi nga swa lisima ka Yehovha nakone a djula leswaku hi yentxa yini?

NDLELA leyi hi va khomaka ha yone van’wana i ya lisima ngopfu swinene ka Yehovha. Yesu a dondzrise leswaku hi fanela ku zrandzra vhanu van’wana ku fana ni leswi hi tizrandzrisaka xiswone. (Mat. 22:37-39) Leswo swi patsra ku kombisa wunene nambi ka vhanu lava kalaka va nga mu tizreli Yehovha. Loko hi yentxa leswo, hi va na hi yetisela Yehovha Xikwembu Nkulukumba “lweyi a humesaka dambu dzrake akuva dzri vaningela lava yentxaka swa ku biha ni lava yentxaka leswinene”.—Mat. 5:45.

² Yehovha a zrandzra vhanu hinkwavu, kambe a zrandzra ngopfungopfu lava mu yingisetaka. (Yoh. 14:21) Yehovha a djula leswaku hi mu yetisela, xileswo a hi byela a ku: “Zrandzrananani ngopfu swinene ingiki hi loko mi li vamakwavu.” (1 Pet. 4:8; Rom. 12:10) Loko hi yanakanya hi ku kombisa lizrandzru kumbe ku zron’wekela mhunu wa kukazri, hi nga ha yanakanya hi ndlela leyi hi titwaka ha yone hi mhunu lweyi a nga xaka dzra le kusuhi kumbe munghanu lweyi hi mu zrandzraka.

3. I yini leswi hi fanelaka ku swi dzrimuka mayelanu ni lizrandzru?

³ Ku fana ni leswi swi djulaka leswaku a xinsinyana hi xi hlayisa akuva xi kula, swi djula kuva hi tikazrata akuva a lizrandzru dzrezru hi van’wana dzri kula. Mupostola Pawulo a tsratsriye vakriste a ku: “Yanani mahlweni mi zrandzranana ingiki hi loko mi li vamakwavu.” (Heb. 13:1) Yehovha a djula leswaku hi tama hi txutxela lizrandzru dzrezru hi van’wana. Ka xidondzro lexi, hi ta vona leswaku ha yini hi fanela ku tsrhindzrekela ka vamakwezru ni leswaku hi nga tama hi yentxa leswo hi ndlela yini.

HA YINI HI FANELA KU VA KUSUHI NI VAMAKWEZRU?

4. Hi ku ya hi Amapsalma 133:1, xana hi nga tiyiseka hi ndlela yini leswaku hi tama hi byi nyika lisima wumun’we lebyi hi nga na byone ni vamakwezru? (Tlhela u vona ni mifoto.)

⁴ Dondzra Amapsalma 133:1. Ha pfumelelana ni mupsalma lweyi a tsraliki a ku: ‘A hi ku xonga ka swone, a hi ku nandzrika ka swone’ ku va ni wunghanu bya ntiyiso ni lava zrandzraka Yehovha. Kambe, ku fana ni leswi mhunu wa kukazri a nga ha tsrhikaka ku nyika lisima nsinya wa ku xonga lowu a u vonaka siku ni siku, na hine hi nga ha tsrhika ku xiya ku xonga loku nga kone ka wumun’we lebyi hi nga na byone ni vamakwezru. Hi vona vamakwezru nkama ni nkama, kumbe makhambi manyingi hi vhiki. Xana hi nga tiyiseka hi ndlela yini leswaku hi tama hi va nyika lisima vamakwezru? Hi ku tinyika nkama wa ku pimisa hi ndlela leyi mun’wana ni mun’wana wavu a nga wa lisima ha yone a bandleni ni kwezru.

5. Xana lizrandzru ledzri hi kombanaka dzrone ni vamakwezru dzri nga va khumbisa kuyini vhanu van’wana?

⁵ Van’we ka lava hlalelaka mintlhanganu yezru hi khambi dzra ku sungula, va hlamalisiwa ngopfu hi lizrandzru ledzri hi kombanaka dzrone. Loko va vona lizrandzru ledzri hi kombanaka dzrone swi nga yentxeka va tiyiseka leswaku hi vakriste va ntiyiso. Yesu a te: “Hinkwavu va ta swi tiva leswaku mi vadondzrisiwa vanga loko mi zrandzrana.” (Yoh. 13:35) Vona leswi yentxekeliki Chaithra lweyi a a dondzra univhersidadi nakone hi hala tlhelo a a dondzra Bibele ni Timboni ta Yehovha. Chaithra a yamukele xizrambu xa ku ya hlalela kongresu. Ntsrhaku ka loko a ve kone ka siku dzra ku sungula dzra kongresu, a byele mudondzrisi wake wa Bibele a ku: “Vapswele vanga a va ngi ngi sama va ni xingazra, kambe ka kongresu dzrenu ni xingazriwe ka 52 hi siku dzrin’we ntsena! Ni xiye leswaku Yehovha a a tizrisa vhanu vake leswaku a ni yentxa ni vona lizrandzru dzrake. Ni djula ku hamba xiyenge xa ndangu lowu.” Chaithra a tame a hamba nhluvuku a va a babatisiwa hi 2024. Nakunene loko lava va ha dondzraka Bibele va vona mintizro yezru leyinene ku patsra ni lizrandzru ledzri hi kombanaka dzrone, makhambi manyingi va susumeteleka ku tizrela Yehovha.—Mat. 5:16.

6. Xana ku tsrhindzrekelela vamakwezru swi hi sizrelela hi ndlela yini?

⁶ Ku tsrhindzrekela ka vamakwezru swi nga hi sizrelela. Pawulo a byele vakristekulobye a ku: “Kambe siku ni siku yanani mahlweni mi kutxanana . . . akuva ku nga vi na mhunu kwenu lweyi a tlanyalisiwaka mbilu hi ntamu wa xidoho lowu kanganyisanaka.” (Heb. 3:13) Loko hi hela ntamu lakakuva hi sungula ku swi vona na swi kazrata ku tama hi yentxa leswi nga swinene, Yehovha a nga ha tizrisa makwezru wa kukazri leswaku a hi pfuna hi leswi hi swi vilelaka. (Amaps. 73:2, 17, 23) A mpfunu lowo, hi wone hi wu vilelaka.

7. He kwini ku yelana loku nga kone ka lizrandzru ni wumun’we? (Vakolosa 3:13, 14)

⁷ Hi hamba xiyenge xa vhanu lava tikazrataka akuva va kombisana lizrandzru, xileswo hi tikholisa hi matovoko manyingi. (1 Yoh. 4:11) Hi xikombiso, a lizrandzru dzri hi susumetela kuva hi ya ‘mahlweni hi byatsrhanana’ nakone leswo swi hi pfuna kuva hi va ni wumun’we ni vamakwezru. (Dondzra Vakolosa 3:13, 14; Efe. 4:2-6) Hi ndlela leyo, a mintlhanganwini yezru hi tikholisa hi xinghanu lexi kalaka xi nga kumeki a mbangwini wun’wana a misaveni hinkwayu.

KOMBISANANI XITXHAVU

8. Xana Yehovha a hi pfunisa kuyini kuva ni wumun’we ni vamakwezru?

⁸ A wumun’we lebyi hi nga na byone ni vamakwezru a misaveni hinkwayu byo koteka ntsena hi mpfunu wa Yehovha. Yehovha a yentxa leswaku leswo swi koteka nambileswi hi kalaka hi nga hetisekanga. (1 Kor. 12:25) Bibele dzri hlaya leswaku ‘Xikwembu Nkulukumba a hi dondzrise ku zrandzranana’. (1 Tes. 4:9) Leswo swi hlaya leswaku Yehovha a tizrisa Bibele akuva a hi byela leswi hi fanelaka ku swi yentxa akuva hi tsrhindzrekela ka van’wana. Loko hi ti kambisisa hi wunyaminyami tidondzro ta Yehovha ni ku ti tizrisa a wuton’wini byezru hi va na hi dondzrisiwa ha yene. (Heb. 4:12; Yak. 1:25) Nakone hi leswi Timboni ta Yehovha ti tikazratelaka ku swi yentxa a misaveni hinkwayu.

9. Xana hi dondzra yini ka Varoma 12:9-13 mayelanu ni ku kombana xitxhavu?

⁹ Xana Zritu dzra Xikwembu Nkulukumba dzri hi pfunisa kuyini akuva hi tsrhindzrekela ka vamakwezru? Vona leswi Pawulo a swi hlayiki mayelanu ni mhaka leyi, hi lani swi kombisiwaka ha kone ka Varoma 12:9-13. (Dondzra.) Pawulo a hlaye leswaku “vanani va ku sungula ka ku kombisa van’wana xitxhavu”. Xana leswo swi tlhamuxela yini? Hi fanela kuva va ku sungula ka ku ‘zrandzranana ngopfu swinene ingiki hi loko hi li vamakwezru’ hi kuva hi dzrivalelana, hi hanana ni ku kombisana malwandla kumbe mintxhumu yin’wana. (Efe. 4:32) A u fanelanga u yimela leswaku makwezru a va yene wa ku sungula a ku tsrhindzrekelela leswaku mi hamba xinghanu. U nga va wa “ku sungula ka ku kombisa van’wana xitxhavu”. Loko u yentxa leswo u ta titwisa xileswi Yesu a swi hlayiki loko a ku: “Ku hanana swi tisa ku nyonxa lokukulu ku tlula ku yamukela.”— Mint. 20:35.

10. Xana hi nga va ni nkhinkhi “ka ku kombisa van’wana xitxhavu” hi ndlela yini? (Tlhela u vona ni mufoto.)

¹⁰ Lexi hlamalisaka hi leswaku ntsrhakunyana ka loko a hi byele leswaku hi fanela kuva va ku sungula ka ku kombisa van’wana xitxhavu, Pawulo a hi kutxe a ku: “Vanani ni nkhinkhi, mi nga lolohwi.” Mhunu lweyi a nga ni nkhinkhi awa hiseka nakone a tizra ngopfu. Loko a nyikiwa ntizro wa kukazri, a wu hetisisa hi nkhinkhi. Amaproverbia 3:27, 28 yi li: ‘Lwa nga ni mfanelo, u nga tsrhike ku mu yentxela leswinene, loko swi li mandleni yaku.’ Hi ndlela leyo loko hi vona mhunu wa kukazri na a vilela mpfunu hi yentxa hinkwaswu leswi hi swi kotaka akuva hi mu pfuna. A hi ganaganeki ku mu pfuna nambi ku tibyela leswaku mhunu mun’wana a ta mu pfuna.—1 Yoh. 3:17, 18.

11. I yini leswi nga hi pfunaka ku tsrhindzrekelela mun’wana ni mun’wana wa vamakwezru?

¹¹ Ndlela yin’wana ya ku kombisa xitxhavu ka van’wana i kuva hi nga hlweli ku va dzrivalela loko va hi khunguvanyisa. Vaefesa 4:26 yi li: “Hlundzrukani, kambe mi nga dohi; mi nga tsrhiki dambu dzri pela na ma ha kwatile.” Kambe ha yini? A ndzrimana 27 loko yi tlhamuxela yi li: “Mi nga nyiki Diyavulosi mukhandlu.” A Zritwini dzrake, makhambi manyingi Yehovha a hi byela leswaku hi dzrivalelana. Vakolosa 3:13 yi hi byela leswaku ‘hi ya mahlweni hi byatsrhanana nakone hi dzrivalelana hi ku ntsrhunxeka’. Ku dzrivalela van’wana i yin’we ya tindlela letinene ta kuva hi tsrhindzrekela kwavu. Loko hi dzrivalela van’wana, hi pfunisa ka ku ‘hlayisa wumun’we lebyi moya wu byi nyikelaka, hi tlhela hi hanya hi ku zrula’. (Efe. 4:3) Swi le livaleni leswaku loko hi dzrivalela van’wana, hi va na hi pfunisa leswaku a nhlengeletanu ya Yehovha yi va ni wumun’we ni ku zrula.

12. Xana Yehovha a hi pfunisa kuyini ku dzrivalela van’wana?

¹² I ntiyiso leswaku swi nga ha kazrata ku dzrivalela lava va hi khunguvanyisiki, kambe moya wa ku xwenga wa Xikwembu Nkulukumba wu nga hi pfuna kuva hi va dzrivalela. Ntsrhaku ka loko Matsralwa ma hi kutxe ku va hi ‘zrandzranana ngopfu swinene ingiki hi loko hi li vamakwezru’ ni ku va ni “nkhinkhi”, ma tlhela ma hi kutxa ma ku: “Pfumelelani moya wa ku xwenga wu mi yentxa mi hiseka.” Leswo swi tlhamuxela leswaku moya wa ku xwenga wa Xikwembu Nkulukumba wu nga hi pfuna ku va ni nkhinkhi kumbe ku hiseka. (Rom. 12:11) Hi ndlela leyo, a moya wa ku xwenga wa Xikwembu Nkulukumba wu nga hi pfuna leswaku hi zrandzra vamakwezru ni ku va dzrivalela hi ku ntsrhunxeka. Xileswo, hi kombela Yehovha hi mbilu hinkwayu leswaku a hi pfuna ku yentxa leswo.—Luk. 11:13.

“KU NGA VI NA KU YAVANA A XIKAZRI KWENU”

13. I yini leswi nga ha vangaka ku yavana makazri kwezru?

¹³ A bandla dzra wukriste dzri vumbiwa hi “vhanu va tinxaka hinkwatu” lava humaka ka mimbangu ya ku siyanasiyana. (1 Tim. 2:3, 4) Loko hi nga tivoneli, ku hambana loko ku nga vanga ku yavana ka swiyimu leswi mun’wana ni mun’wana swo ko djula kuva a titekela xiboho, swa ku fana ni ndlela leyi hi yambalaka kumbe ku tilunghisa ha yone, madahela kumbe leswi hi taka hungata ha swone. (Rom. 14:4; 1 Kor. 1:10) Leswi ‘Xikwembu Nkulukumba a hi dondzrisiki ku zrandzranana’, hi fanela ku tivonela akuva hi nga yentxi leswaku swiboho swezru swi tikomba swi li swone swa ku yampswa ku tlula swa van’wana.—Filp. 2:3.

14. I yini leswi minkama hinkwayu hi fanelaka ku tikazratela ku swi yentxa nakone ha yini?

¹⁴ Hi nga tlhela hi tivonela akuva hi nga vangi ku yavana a bandleni hi kuva hi tikazratela leswaku hi tiyisanana ni ku yakana minkama hinkwayu. (1 Tes. 5:11) Ka malembe ya swoswinyana, vhanu vanyingi lava a va holile hi tlhelo dzra moya xikan’we ni lava a va susiwe bandleni va tlhelelile. Hi va yamukela hi lizrandzru! (2 Kor. 2:8) Vona leswi humeleliki makwezru wa xisati lweyi a tlheleliki a Ndlwini ya Wugandzreli ntsrhaku ka loko ku khalute 10 wa malembe na a holile. Yene a li: “Va ni yamukele hi ndlela ya lizrandzru hikuva va ni n’wayitelela ni ku ni q’evula voko.” (Mint. 3:19) Xana ndlela leyi va nga mu yamukela ha yone yi mu khumbise kuyini? A li: “Ni xiye leswaku Yehovha a a tlhela a ni pfuna kuva lweyi a nyonxiki.” Loko hi tikazratela ku tiyisa vamakwezru, Kriste a ta hi nyika ntamu wa ku pfuna lava ‘kazraliki ni lava bindzriwaka’.—Mat. 11:28, 29.

15. I yini swin’wana leswi hi nga swi yentxaka leswaku hi va ni wumun’we a bandleni? (Tlhela u vona ni mufoto.)

¹⁵ Ndlela yin’wana ya kuva hi kondletela wumun’we i ku vulavula hi ndlela leyinene. Yob 12:11 yi li: ‘A ndleve a yi dzringi mazritu xana, swanga heswi malakatxe [lidzrimi] ma yingelaka ku nandzrika ka swakuda xana?’ Swanga hi leswi mhunu lweyi a swekaka ha hombe minkama hinkwayu a dzringaka swakuda akuva a tiyiseka leswaku swa nandzrika kumbe im-him na a nge si phamela van’wana, na hine hi yentxa swone loko hi pimisa ha hombe na hi nge si hlaya swa kukazri. (Amaps. 141:3) Minkama hinkwayu hi djula ku tiyiseka leswaku a mazritu lawa hi ma hlayaka ma yaka “akuva ma tiyisa lava va ma yingelaka”.—Efe. 4:29.

16. I vamani lava ngopfungopfu va fanelaka ku tikazratela ku kutxa van’wana?

¹⁶ Vanuna ni vapswele va fanela ku tiyiseka leswaku a mazritu lawa va ma vulavulaka ma tiyisana. (Kol. 3:19, 21; Tit. 2:4) Vakulu va bandla na vone va fanela ku va xihlovo xa ku tiyisa ni ntxhavelelo swanga vabyisi va ntlhambi wa Yehovha. (Eza. 32:1, 2; Gal. 6:1) A ndzrimana yin’wana ya Amaproverbia yi li: ‘A zritu ledzri hlayiwaka hi mfanelo dzri nandzrika swa ku nhati!’—Amapr. 15:23.

LIZRANDZRU “HI MINTIZRO NI HI NTIYISO”

17. Hi nga tiyiseka hi ndlela yini leswaku lizrandzru ledzri hi nga na dzrone hi vamakwezru dzri sukela mbilwini?

¹⁷ Mupostola Yohane a hi kutxa hi ku hlaya leswaku “a hi zrandzrananeni ku nga li hi mazritu kumbe hi nomu ntsena, kambe hi mintizro ni hi ntiyiso”.(1 Yoh. 3:18) Hi djula leswaku lizrandzru dzrezru hi vamakwezru dzri sukela mbilwini. Hi nga swi kotisa kuyini ku yentxa leswo? Loko hi tinyika nkama wa ku va ni vamakwezru hi ta ya hi tsrhindzrekela kwavu nakone a lizrandzru ledzri hi nga na dzrone ha vone dzri ta ya dzri kula. Xileswo, pfula mikhandlu ya ku va ni vamakwezru a mintlhanganwini ni le ku zrezreni. Tinyiki nkama wa ku va pfuxela. Loko hi yentxa leswo, hi kombisa leswaku ‘Xikwembu Nkulukumba a hi dondzrise ku zrandzranana’. (1 Tes. 4:9) Nakone hi ta tama hi tivonela ha wuswezru leswaku ‘a hi ku xonga ka swone, a hi ku nandzrika ka swone, loko vamakwavu va tsrhama kun’we ve van’we’.—Amaps. 133:1.