NHLOKOMHAKA YA XIDONDZRO 15
LISIMU 30 Xikwembu Xanga I Tatana Ni Munghanu Wanga
‘A Ku Va Kusuhi Ni Xikwembu Nkulukumba I Ndjombo’ Kwezru!
‘Kambe mine, a ku va kusuhi ni Xikwembu Nkulukumba i ndjombo.’—AMAPS. 73:28.
NKONGOMETO
Ku vona ndlela leyi hi nga tsrhindzrekelaka ka Yehovha ha yone ni ndlela leyi hi pfunekaka ha yone.
1-2. a) He kwini ku tikazrata loku hi fanelaka ku ku yentxa akuva hi va ni wunghanu bya le kusuhi ni mhunu wa kukazri? b) Hi ta vona yini ka xidondzro lexi?
XANA u ni munghanu wa le kusuhi? I yini leswi u swi yentxiki kuva mi va vanghanu? Swi nga yentxeka u tsrhame na yene ku dzringana nkama wa ku leha, u tive swikazratu swake u tlhela u tiva leswi a swi zrandzraka ni leswi a swi nyenyaka. Nakone u vone leswaku a ni matsrhamela ya ku xonga lawa u navelaka ni ku ma yetisela, hi ndlela leyo u sungule ku mu zrandzra munghanu waku.
2 A ku yaka wunghanu bya le kusuhi ni mhunu wa kukazri swi djula nkama ni ntamu. Hi lani ku fanaka, ni ku kulisa wunghanu na Yehovha swi djula nkama akuva hi kota ku mu tiva ku yampswa ni ku kulisa lizrandzru ledzri hi nga na dzrone ha yene. A xidondzro lexi xi ta hi pfuna ku vona leswi hi nga swi yentxaka akuva hi tsrhindzrekela ka Xikwembu Nkulukumba ni ndlela leyi hi taka pfuneka ha yone hi ku yentxa leswo. Ku sungula, hi ta kambisisa leswaku ha yini swi li swa lisima ku tsrhindzrekela ka Munghanu wezru lwenkulu, Yehovha.
3. Ha yini hi fanela ku yanakanyisisa hi ndlela leyi hi nga pfunekaka ha yone hi ku va kusuhi na Yehovha? Kombisa.
3 Handle ka ku ganaganeka u pfumelelana na swone leswaku a ku tsrhindzrekela ka Yehovha i swinene. Nakone ku yanakanyisisa hi ndlela leyi swi nga swinene ha yone swi ta hi pfuna ku tama hi tsrhindzrekela kwake. (Amaps. 63:6-8) Hi xikombiso, ha swi tiva leswaku ku da swakuda leswi nyikanaka lihanyu, ku hamba wutiwololi, ku yetlela nkama lowu dzringaniki ni ku nwa mati lama dzringaniki i swinene kwezru. Nambitanu, vhanu vanyingi a va na mhaka na swone leswo nakone a va zron’weki hi lihanyu dzravu. Kambe loko hi ya hi yanakanya hi ndlela leyi mintxhumu leyi yi hi nyikaka lihanyu ledzrinene yi hi pfunaka ha yone, leswo swi yengesela kuva hi tama hi yi yentxa. Hi lani ku fanaka, swi nga ha yentxeka hi swi tiva leswaku ku tsrhindzrekela kusuhi na Yehovha i swinene kwezru kambe ku yanakanyisisa hi ndlela leyi hi pfunekaka ha yone loko hi yentxa leswo, swi nga hi pfuna ku tama hi tsrhindzrekela ka Munghanu wezru Yehovha.—Amaps. 119:27-30.
4. I yini leswi mutsrali wa Amapsalma 73:28 a swi hlayiki?
4 Dondzra Amapsalma 73:28. A mutsrali wa Amapsalma 73 a a li Mulevhi lweyi a a yaveliwe ku tizra swanga muyimbeleli a tempeleni dzra Yehovha. Swi nga yentxeka a gandzrele Yehovha hi ku dumbeka ku dzringana malembe manyingi. Nambitanu a a vona na ku ni xivileleko xa kuva a dzrimuka ni ku tlhela a dzrimuxa vambeni leswaku ‘a ku va kusuhi ni Xikwembu Nkulukumba’ a swi li swinene ku yene. Ha yini swi li swa lisima ku va kusuhi na Yehovha ni ku tiyisa wunghanu byezru na yene?
‘A KU VA KUSUHI NI XIKWEMBU NKULUKUMBA’ SWI TISA KU NYONXA
5. a) Ha yini ku tsrhindzrekela ka Yehovha swi hi tisela ku nyonxa? b) Xana a wutlhazri lebyi Yehovha a ku nyikaka byone byi ku pfuna ni ku ku sizrelela hi ndlela yini? (Amaproverbia 2:6-16)
5 Loko hi ya hi tsrhindzrekela ka Yehovha, hi ta ya mahlweni hi nyonxa. (Amaps. 65:4) Loko hi dondzra hi leswi Yehovha a hi byelaka swone a Bibeleni hi va hi mu yingiseta, hi ta tlhazriha. Wutlhazri lebyo byi hi sizrelela ka minkutxetelo ya ku biha ni ku va hi nga yentxi swihoxo leswikulu. (Dondzra Amaproverbia 2:6-16.) Hi ku kongoma a Bibele dzri li: ‘Ku kateke mhunu lwa kumaka vutlhazri, ni lwa kumaka ku yingelisisa.’—Amapr. 3:13.
6. Ha yini mupsalma a heleliwe hi ku nyonxa?
6 I ntiyiso leswaku minkama yin’wana nambi vanghanu va Yehovha va heleliwa hi ku nyonxa. A mutsrali wa Amapsalma 73 a heleliwe hi ku nyonxa loko a pfumelele miyanakanyu ya ku biha yi mu tela. A sungule ku pimisa leswaku a vhanu va ku biha a va ni wutomi lebyinene nambileswi a va nga na mhaka ni Xikwembu Nkulukumba va tlhela va nga mu yingiseti. Leswi swi yentxe mupsalma a vaviseka ni ku tlhela a navela leswi a va li na swone. A a yanakanya leswaku vhanu va tihanyi ni va ku tikulisa a va kuma hinkwaswu leswi a va swi vilela, a va phatima nakone a va nga xaniseki. (Amaps. 73:3-7, 12) Leswo swi mu kazrate ngopfu mupsalma, lakakuva khambi dzrin’wana a tibyele leswaku mintxhumu hinkwayu leyi a a yi yentxa akuva a tizrela Yehovha a yi nga pfuni ntxhumu. Na a vavisekile a hlaye leswi: ‘Kunene a mbilu yanga ndzre ku yi xwengisela mahala, ndzri hlamba mandla yanga hi vusimami.’—Amaps. 73:13.
7. I yini leswi hi nga swi yentxaka loko hi hele ntamu? (Tlhela u vona mufoto ka kapa.)
7 Kambe mupsalma a nga pfumelanga leswaku ku vaviseka kwake ku mu heta ntamu. A yentxe xa kukazri, a nghene ‘mbangwini wa ku xwenga wa Xikwembu Nkulukumba’, lani Yehovha a lulamisiki ndlela leyi a a pimisa ha yone. (Amaps. 73:17-19) Loko hi vavisekile, Yehovha awa swi tiva. Loko hi vavisekile hi nga khongota ka Yehovha hi kombela leswaku a hi pfuna ku tiva leswi hi fanelaka ku swi yentxa. A switsratsriyo leswi hi swi kumaka a Bibeleni ni ka vamakwezru swi hi nyika ntamu wa ku tama hi mu tizrela. Nambiloko hi vavisekile hi nga xi tivi ni xa ku xi yentxa, Yehovha a ta hi txhavelela ni ku hi tiyisa.—Amaps. 94:19.a
Mulevhi lweyi a tsraliki Amapsalma 73 a yimiki ‘mbangwini wa ku xwenga wa Xikwembu Nkulukumba’ (Vona yava 7)
‘A KU VA KUSUHI NI XIKWEMBU NKULUKUMBA’ SWI HI NYIKA NKONGOMETO NI DUMBO
8. He tini tindlela tin’wana leti hi pfunekaka ha tone hi ku tsrhindzrekela ka Xikwembu Nkulukumba?
8 Ku ni tindlela tin’wana tibidzri leti hi pfunekaka ha tone loko hi va kusuhi ni Xikwembu Nkulukumba. Ya ku sungula, hi nga va ni wutomi byinene. Ya wubidzri, hi nga va ni dumbo ledzri tiyiki dzra wumundzruku. (Yer. 29:11) A hi ti kambisiseni ha hombe tindlela letibidzri.
9. Xana ku va kusuhi ni Xikwembu Nkulukumba swi yentxa wutomi byezru byi va ni nkongometo hi ndlela yini?
9 Ku tsrhindzrekela ka Yehovha swi yentxa leswaku wutomi byezru byi va ni nkongometo. Vhanu vanyingi namunhla va hlaya leswaku Xikwembu Nkulukumba a nga kone, xileswo va hlaya leswaku a va swi tivi leswaku ha yini ku ni vhanu misaveni, va tlhela va kholwa leswaku a nkameni lowu taka a ku nge he ti va ni vhanu a misaveni. Kambe loko hi dondzra Bibele, dzri hi tiyisekisa leswaku Xikwembu Nkulukumba “a kone ni leswaku awa va hakela lava mu djuletelaka hi timbilu tavu hinkwatu”. (Heb. 11:6) Handle ka leswo, Yehovha a hi tumbuluxe na hi ni xivileleko xa ku mu tizrela. Hi ndlela leyo, loko hi mu tizrela hi kuma ku nyonxa ka ntiyiso.—Deut. 10:12, 13.
10. I yini leswi Yehovha a swi dumbisaka lava mu dumbaka? (Amapsalma 37:29)
10 Vhanu vanyingi a va na dumbo mayelanu ni wumundzruku. Vone vo hanyela ntsena ku tizra, va txhata, va pswala vana ni ku tlhela va beka mali akuva va ta yi tizrisa loko va nga ha tizri. A va swi tivi leswi Xikwembu Nkulukumba a swi dondzrisaka mayelanu ni nkama lowu taka, kambe hi hala tlhelo a malandzra ya Yehovha ma beka dumbo dzravu kwake. (Amaps. 25:3-5; 1 Tim. 6:17) Ha mu dumba Xikwembu Nkulukumba tlhelo munghanu wezru nakone ha swi tiva leswaku a ta swi hetisisa hinkwaswu leswi a hi dumbisaka swone. Hi ni swinyingi leswi hi swi yimeliki a nkameni lowu taka ngopfungopfu ku mu gandzrela hi lani ku nga helikiki a Paradeyisini.—Dondzra Amapsalma 37:29.
11. I yini leswi yentxekaka loko hi va vanghanu va Xikwembu Nkulukumba nakone hi nga yentxa yini akuva hi mu nyonxisa?
11 Ku tsrhindzrekela ka Xikwembu Nkulukumba i swinene kwezru ni hi tindlela tin’wana. Hi xikombiso, Yehovha a dumbisa ku hi dzrivalela loko hi tisola. (Eza. 1:18) Hi ndlela leyo, a hi na xivangelo xa kuva hi titwa nandzru hi kola ka xidoho lexi hi xi yentxiki khale. (Amaps. 32:1-5) Nakone hi nyonxa ngopfu loko hi nyonxisa Yehovha. (Amapr. 23:15) Hi nga ha yanakanya hi matovoko man’wana lawa hi ma kumaka hi leswi hi nga ni wuxaka bya le kusuhi swinene na Yehovha. Kambe hi nga yentxa yini akuva hi tama hi va kusuhi na Yehovha?
LESWI HI NGA SWI YENTXAKA AKUVA HI TAMA HI VA ‘KUSUHI NI XIKWEMBU NKULUKUMBA’
12. I yini leswi u nga swi yentxa akuva u tsrhindzrekela ka Xikwembu Nkulukumba?
12 Na u nga si va mukriste lweyi a babatisiwiki, u tikazrate ngopfu swinene akuva u va munghanu wa Yehovha. U dondzre mintiyiso yinyingi mayelanu na Yehovha Xikwembu Nkulukumba kun’we na Yesu Kriste, u tisolile ka swidoho leswi u swi yentxiki khale, u kombise lipfumelo ledzri tiyiki ka Xikwembu Nkulukumba u tlhela u tikazratela ku hanya hi ndlela leyi a yi zrandzraka. Akuva hi ya hi va kusuhi na Xikwembu Nkulukumba hi fanela ku tama hi yentxa leswo.—Kol. 2:6.
13. He yini mintxhumu yizrazru leyi nga hi pfunaka ku tama hi tsrhindzrekela ka Yehovha?
13 I yini leswi taka hi pfuna ku tama hi va kusuhi na Yehovha? 1) Hi fanela ku tama hi dondzra Bibele. Loko hi li ku dondzreni a nkongometo wezru a wu fanelanga kuva ku dondzra ntsena mayelanu na Xikwembu Nkulukumba. A matsrhan’wini ya leswo, hi fanela ku zama ku twisisa mapimisela ya Yehovha, leswi a djulaka leswaku hi swi yentxa ni ku hanya hi ndlela leyi a djulaka leswaku hi hanya ha yone. (Efe. 5:15-17) 2) Hi fanela ku tiyisa lipfumelo hi ku va hi yanakanyisisa hi tindlela leti a kombisaka lizrandzru ka mun’wana ni mun’wana wezru ha tone. 3) Hi fanela ku tama hi nyenya mintxhumu leyi yi khunguvanyisaka Yehovha ni ku fambela kule ni vhanu lava va yi yentxaka.—Amaps. 1:1; 101:3.
14. I yini leswi hi nga swi yentxaka siku ni siku akuva hi nyonxisa Yehovha? (1 Vakorinte 10:31) (Tlhela u vona ni mifoto.)
14 Dondzra 1 Vakorinte 10:31. I swinene ku tikazratela ku yentxa mintxhumu leyi hi swi tivaka leswaku yi yentxa Yehovha a nyonxa. Kambe hi fanela ku yentxa mintxhumu leyi tlulaka ku ya ku zrezreni ni le mintlhanganwini. Mintxhumu leyi nyonxisaka Yehovha yi patsra hinkwaswu leswi hi swi yentxaka siku ni siku. Hi xikombiso, loko hi dumbeka ka mintxhumu hinkwayu ni ku hanana van’wana leswi hi nga na swone, swi yentxa Yehovha a nyonxa. (2 Kor. 8:21; 9:7) A tlhela a djula leswaku hi kombisa leswaku ha yi tlangela nyiko ya wutomi leyi a hi hananiki yone. Xileswo, ha dzringanisela ka ndlela leyi hi daka ha yone, hi nwaka ha yone ni ku yentxa mintxhumu leyi yi hi pfunaka leswaku hi va ni lihanyu ledzrinene. Minzamu hinkwayu leyi hi yi yentxaka leswaku hi nyonxisa Yehovha nambi ka mintxhumu leyi vonekaka na yi li yitsrongo, yi yentxa leswaku a hi zrandzra.—Luk. 16:10.
Ku fambisa hi ndlela leyinene, ku hlayisa lihanyu dzrezru hi ku tiwolola, ku da swakuda leswi nyikanaka lihanyu ledzrinene ni ku kombisa malwandla i tin’we ta tindlela leti hi nga nyonxisaka Yehovha ha tone (Vona yava 14)
15. Xana Yehovha a yimela leswaku hi va khomisa kuyini vhanu van’wana?
15 Yehovha a kombisa wunene ka vhanu hinkwavu, ka lava mu tizrelaka nambi lava kalaka va nga mu tizreli. (Mat. 5:45) A djula leswaku na hine hi kombisa wunene ka van’wana. Hi xikombiso, a hi fanelanga ku hona vhanu van’wana mavito, ku zrandzra timholova kambe minkama hinkwayu hi fanela ku va ni ku zrula ni vhanu hinkwavu. (Tit. 3:2) Nambiloko vhanu va nga mu tizreli Yehovha a hi tivoni na hi yampswa ku va tlula. (2 Tim. 2:23-25) Hi ya hi va kusuhi ngopfu swinene na Yehovha hi kuva minkama hinkwayu hi kombisa wunene ni ku khoma vhanu hinkwavu hi ndlela leyinene.
HI NGA VA ‘KUSUHI NI XIKWEMBU NKULUKUMBA’ NAMBILOKO HI YENTXA SWIHOXO
16. Xana mutsrali wa Amapsalma 73 a sungule ku titwa hi ndlela yini hi ku famba ka nkama?
16 Kambe swi li yini loko hi ku famba ka nkama u sungula ku titwa na u nga faneliwi hi ku zrandzriwa ha Yehovha? Hi lani hi swi voniki ha kone, ntxhumu lowu fanaka wu yentxekele mutsrali wa Amapsalma 73. A te: ‘A milenge yanga afa mi kusuhi ni ku kazrala, kutsrongo ni zretemuka mikondzro yanga.’ (Amaps. 73:2, BX) A tlhele a ku: Ni kazratekile ‘ndzra ku va singe, ndzri nga tivi ntxhumu, ndzri hamba swanga xihazri’ mahlweni ka Yehovha. (Amaps. 73:21, 22) Kambe, xana a a yanakanya leswaku hi kola ka swihoxo swake Yehovha a a nga ha mu zrandzri nakone a a nga te mu dzrivalela?
17. a) Nambiloko a hele ntamu, i yini leswi mupsalma a swi yentxiki? b) Hi nga dondzra yini ka mfambu wake? (Tlhela u vona ni mifoto.)
17 Loko a mupsalma a yanakanye leswaku Yehovha a a mu tsrhikile swi nga yentxeka matitwela lawo ma ve ya nkamanyana. Nambiloko a nga titwi ha hombe, a a swi tiva leswaku a swi djula leswaku a va kusuhi na Yehovha. A tsrale a ku: ‘Nambi swi tanu, ndzri na wene hi masiku hinkwawu. U ndzri khomi hi voko dzranga ledzra xinene. U ta va u ndzri fambisa hi ku mamulela kwaku, ku ku a ntsrhaku u ni yamukela ku phatimeni kwaku.’ (Amaps. 73:23, 24) Na hine hi fanela ku kombela Yehovha leswaku a hi tiyisa loko hi vona leswaku lipfumelo dzrezru dzra tsrekatsreka kumbe loko hi titwa na hi hele ntamu hi kola ka swihoxo swezru. (Amaps. 73:26; 94:18) Nambiloko hi yentxa swihoxo leswikulu hi nga tlhelela ka Yehovha na hi tiyiseka leswaku a lulamele ku hi dzrivalela. (Amaps. 86:5) Hi fanela ku tsrhindzrekela ka Xikwembu Nkulukumba wezru ngopfungopfu loko hi titwa na hi hele ntamu.—Amaps. 103:13, 14.
Loko hi titwa na hi tsranile hi tlhelo dzra moya, hi fanela ku khongota ka Yehovha nkama ni nkama hi tlhela hi kumeka hi xitalu a mintlhanganwini (Vona yava 17)
VANA ‘KUSUHI NI XIKWEMBU NKULUKUMBA’ HI LANI KU NGA HELIKIKI
18. Ha yini hi fanela ku va kusuhi na Yehovha hi lani ku nga helikiki?
18 Hi nga tama hi tsrhindzrekela ka Yehovha hi lani ku nga helikiki ni ku tlhela hi dondzra mayelanu na yene. A Bibele dzri li a tindlela, wutlhazri ni wutivi bya Yehovha “a swi koteki ku swi twisisa hi ku helela”.—Rom. 11:33.
19. I yini leswi Amapsalma 73 ma hi byelaka swone mayelanu ni nkama lowu taka?
19 Amapsalma 79:13 ma li: ‘Kutani hine, tiko dzraku a tihamba ta ku byisiwa hi wene, hi ta ku twalisa masiku hinkwawu; ku vatukulu ni vatukulwana, hi ta hlaya swidzrumiso swaku.’ Loko u tsrhindzrekela ka Xikwembu Nkulukumba, u nga tiyiseka leswaku u nga tama u va kusuhi na yene ni ku tovokisiwa ha yene hi lani ku nga helikiki. Ku fana ni mupsalma u nga hlaya leswi: ‘Xikwembu Nkulukumba i zribye dzra mbilu yanga, i yavelo dzranga hi la ku nga helikiki.’—Amaps. 73:26.
LISIMU 32 Yima Na Yehovha!
a Vhanu van’wana lava tsrhamelaka ku hlatiyela ku dzringana nkama wa ku leha, va nga ha vilela mpfunu wa vadokodela. Akuva u kuma leswi yengetelekiki, vona Xihondzo xo Rindza 01/2023.