XIDONDZRO 59
U Nga Swi Kota Ku Tiyiselela Ku Xanisiwa Hi Xixixi
Ku hlwela ni ku kahlula, vakriste hinkwavu va ta ndzrulukeliwa, nambi ku va va xanisiwa. Xana leswo swi fanela ku hi txhavisa?
1. Ha yini hi fanela ku swi yimela leswaku hi ta xanisiwa?
A Bibele dzri li: ‘Hinkwavu lava va zrandzraka ku hanya hi wukhongoti [hi ku tinyiketela ka Xikwembu Nkulukumba] ku Kriste Yesu, va ta xanisiwa.’ (2 Timoteo 3:12) Yesu a xanisiwile hi leswi a a nga hambi xiyenge xa misava ya Sathana. Na hine a hi hambi xiyenge xa misava leyi, xileswo, a hi hlamali loko hi xanisiwa hi tihosi ni wukhongoti bya misava leyi.—Yohan 15:18, 19.
2. Hi nga tilulamiselisa kuyini akuva hi tiyisela loko hi xanisiwa?
Hi fanela ku tiyisa dumbo dzrezru ka Yehovha na ke he swoswi. Tinyiki nkama siku ni siku akuva u khongota u tlhela u dondzra Bibele. U nga lovhi mintlhanganwini. Leswo swi ta ku nyika ntamu akuva hi xixixi u tiyiselela ku xanisiwa, nambi ku li hi maxaka yaku. Mupostola Pawulo, a xanisiwe ngopfu swinene, yene a te: ‘Hosi [Yehovha] i mupfunisi wanga; ndzri nga ka ndzri nga txhavi.’—Ba-Heberu 13:6.
Ntxhumu wun’wana lowu nga hi yengetelelaka xixixi i ku va hi nga lovhi ku zrezreni. Ku zrezra swi hi yengetela ku dumba Yehovha nakone swi tlhela swi hi pfuna ku hlula ku txhava mhunu. (Amaproverbia 29:25) Loko swoswi hi ni xixixi xa ku zrezra, hi fanela ku tiyimisela ku tama hi zrezra nambiloko mimfumu yi dzringisa ku hi yimisa ku zrezra.—1 Ba-le-Thesalonika 2:2.
3. Ha yini swi pfuna ku tiyisela loko hi xanisiwa?
A nga kone ni mun’we lweyi a zrandzraka ku xanisiwa, kambe loko hi tiyisela, lipfumelo dzrezru dzri ya dzri tiya. Loko hi vona leswaku Yehovha a hi nyika ntamu hi nkama lowu hi yanakanyaka leswaku a hi nge koti ntxhumu, leswo swi hi tsrhindzretela kusuhi na yene. (Dondzra Yakob 1:2-4.) Loko Yehovha a hi vona hi xaniseka, a vaviseka ngopfu swinene. Nambitanu, a nyonxa ngopfu swinene loko a hi vona hi tiyisela. Bibele dzri li: ‘Loko mi tiyisela ku xanisekeni, na n’wi yentxe leswinene, leswo [swa] khenseka ku Xikwembu Nkulukumba.’ (1 Petros 2:20) Loko hi dumbeka, Yehovha a ta hi hakela hi wutomi lebyi nga helikiki a misaveni leyimpshwa lani hinkwavu lava taka tsrhama ka yone va taka tizrela Yehovha na va nga siveliwi hi mhunu.—Matewu 24:13.
KELISISA
Vona leswaku ha yini swi koteka ku dumbeka ka Yehovha nambiloko hi xanisiwa. Tlhela u vona matovoko ya ku yentxa leswo.
4. U nga wu hlula nkaneto wa maxaka
Yesu a a swi tiva leswaku a hi minkama hinkwayu maxaka ma taka nyonxa loko mhunu wa kukazri a djula ku tizrela Yehovha. Dondzrani Matewu 10:34-36, mi gama mi bulisana hi xivutiso lexi landzrelaka:
I yini leswi nga yentxekaka loko xizro xa kukazri xa ndangu xi kunguhata ku tizrela Yehovha?
Akuva u vona xikombiso xa leswo, vonani VHIDIYU, mi gama mi bulisana hi xivutiso lexi landzrelaka.
U nga yentxa yini loko xaka dzra kukazri kumbe munghanu waku a nga swi djuli leswaku u gandzrela Yehovha?
Dondzrani Amapsalma 27:10 na Marka 10:29, 30. Ntsrhaku ka ku dondzra ndzrimana ha yin’we bulani hi xivutiso lexi landzrelaka:
Xana xidumbiso lexi, xi nga ku pfunisa kuyini loko u kanetiwa hi maxaka kumbe hi vanghanu vaku?
5. Yana mahlweni u tizrela Yehovha nambiloko u xanisiwa
Swi djula xixixi ku tizrela Yehovha loko vambeni va hi sivela ku yentxa leswo. Vonani VHIDIYU, mi gama mi bulisana hi xivutiso lexi landzrelaka.
Swikombiso leswi nga ka vhidiyu ledzri swi tiyisa lipfumelo hi ndlela yini?
Dondzrani Amintiṛo 5:27-29 ni Ba-Heberu 10:24, 25. Ntsrhaku ka ku dondzra ndzrimana ha yin’we bulani hi xivutiso lexi landzrelaka:
Ha yini swi ni lisima ku tama u tizrela Yehovha nambiloko ku yilisiwa a ntizro wa ku zrezra ni mintlhanganu?
6. Yehovha a ta ku pfuna leswaku u tiyisela
A Timboni ta Yehovha ta tintanga hinkwatu ni mimbangu hinkwayu ti tama ti tizrela Yehovha hi ku dumbeka nambiloko ti xanisiwa. Akuva u vona leswi pfuniki vamakwezru lavo, vonani VHIDIYU. Ntsrhaku, bulisanani hi xivutiso lexi landzrelaka.
Ka vhidiyu ledzri, i yini leswi pfuniki vamakwezru lavayani akuva va tiyisela?
Dondzrani Ba-le-Roma 8:35, 37-39 ni Ba-le-Filipi 4:13. Ntsrhaku ka ku dondzra ndzrimana ha yin’we bulani hi xivutiso lexi landzrelaka:
Xana ndzrimana leyi yi dzri tiyisa hi ndlela yini lipfumelo dzraku loko u tiva leswaku swa koteka ku hlula mindzringo hinkwayu leyi nga ha ku humelelaka?
Dondzrani Matewu 5:10-12, mi gama mi bulisana hi xivutiso lexi landzrelaka:
Ha yini u fanela ku nyonxa nambiloko u xanisiwa?
Vhanu vanyingi lava nga Timboni ta Yehovha va swi kotile ku tiyisela nkaneto. Na wene u nga swi kota!
VAN’WE VA LI: “Mine a ni nga ti swi kota ku tiyisela ku xanisiwa.”
Hi tini tindzrimana leti nga pfunaka mhunu lweyo akuva a va ni xixixi lexi a xi vilelaka?
NKATSRAKANYU
Yehovha a ku nyika lisima ku tikazrata kwezru ka ku djula ku mu tizrela, nambiloko hi xanisiwa!
Mpfuxeto
Ha yini vakriste va fanela ku yimela ku xanisiwa?
I yini leswi u nga swi yentxaka swoswi akuva u tilulamiselela ku xanisiwa?
Ha yini u nga tiyisekaka leswaku swa koteka ku tizrela Yehovha, nambiloko u xanisiwa?
HANDZRISISA
Vona ndlela leyi Yehovha a pfuniki makwezru wa kukazri akuva a tiyisela hi nkama lowu a nga khomiwa hi mhaka ya wukalatlhelo byake.
Vona leswi pfuniki vatekani va kukazri ku tama va tizrela Yehovha hi ku dumbeka hi malembe ya ku tala nambileswi a va kanetiwa.
Vona leswaku u nga lwisana ni ku xanisiwa hi ndlela yini.
“Tilulamiseli Na Ke He Swoswi Ku Langutana Ni Ku Xanisiwa” (Xihondzro Xa Ku Zrindzra, Junyu wa 2019)
Vona leswaku ha yini swi nga fanelanga swi hi txhavisa loko hi lwisana ni nkaneto wa maxaka. Tlhela u vona leswaku u nga hlayisa ku zrula u tlhela u tama u dumbeka ka Yehovha hi ndlela yini loko leswo swi ku yentxekela?
“A Ni Tisanga Ku Zrula, Kambe Ni Tise Ku Yavana” (Xihondzro Xa Ku Zrindzra, Otubru wa 2017)