Ndlela Leyi Yehovha A Hi Pfunaka Ku Tiyisela Ha Yone

1. Ha yini hi fanela ku tiyisela nakone he wini mpfunu lowu hi nga na wone? (1 Petro 5:10)

A MASIKWINI lawa ya wugamu, hinkwezru hi kumana ni swikazratu swinyingi. Xileswo, swanga vhanu va Yehovha hi djula ku tiyisela. Van’wana va xaniseka hi kola ka mavabyi lawa ma kalaka ma nga daheki, ku feliwa hi mhunu lweyi va mu zrandzraka, ku kanetiwa ku nga va hi maxaka kumbe wuhosi. (Mat. 10:18, 36, 37) U nga tiyiseka leswaku swi nge na mhaka ni leswaku he xini xikazratu lexi u lavisanaka na xone, Yehovha a nga ku pfuna ku xi tiyiselela.—Dondzra 1 Petro 5:10.

2. I yini leswi hi pfunaka kuva hi tiyisela?

² Ku tiyisela swi tlhamuxela ku tama hi dumbeka ka Yehovha hi ku mu tizrela hi ku nyonxa nambiloko hi kumana ni swikazratu, ku xanisiwa kumbe loko hi dzringiwa ku mu dohela. Hi kota ku tiyisela hi leswi Yehovha a hi nyikaka “ntamu lowu tlulaka lowu tolovelekiki”. A hi nge swi koti ku tiyisela loko Yehovha a nga hi nyiki ntamu. (2 Kor. 4:7) Ka xidondzro lexi, hi ta vona mune wa mintxhumu leyi Yehovha a yi tizrisaka akuva a hi pfuna kuva hi tiyisela. Hi ta tlhela hi vona ndlela leyi ntxhumu ha wun’we wu taka hi pfuna ha yone leswaku hi tiyisela.

XIKHONGOTO

3. Ha yini hi nga hlayaka leswaku xikhongoto i hlolana?

³ Yehovha a hi yentxele ntxhumu wa ku hlamalisa lowu nga hi pfunaka ku tiyisela. A yentxe leswaku swi koteka ku vulavulisana na yene nambileswi hi kalaka hi nga hetisekanga. (Heb. 4:16) Yanakanya hi leswi: Hi nga khongota ka Yehovha nkama wun’wana ni wun’wana ni hi mhaka yin’wana ni yin’wana. Yehovha a nga hi yingiseta loko hi khongota kwake hi lidzrimi dzrin’wana ni dzrin’wana ni ka mbangu wun’wana ni wun’wana lowu hi nga ka wone, nambiloko hi pfaleliwe djele. (Yon. 2:1, 2; Mint. 16:25, 26) Nambiloko hi kazrateke ngopfu lakakuva hi hluleka ni ku tlhamuxela leswi hi titwisaka xiswone, Yehovha awa swi kota ku twisisa leswi hi djulaka ku mu byela swone. (Rom. 8:26, 27) Nakunene a xikhongoto i hlolana!

4. Ha yini hi nga hlayaka leswaku swikhongoto swezru swa ku kombela ku tiyisela swi yelana ni ku zrandzra ka Yehovha?

⁴ A Zritwini dzrake, Yehovha a hi tiyisekisa leswaku “a ta hi yingela loko hi kombela ntxhumu wun’wana ni wun’wana lowu fambisanaka ni ku zrandzra kwake”. (1 Yoh. 5:14) Xana hi nga mu kombela Yehovha leswaku a hi pfuna kuva hi tiyisela? Ina! Phela ku yentxa leswo swi yelana ni ku zrandzra kwake. Hi swi tivisa kuyini? Yehovha a hlaya leswaku loko hi tama hi dumbeka a ta hlamula lweyi a mu tlhontlhaka, ku nga Sathana. (Amapr. 27:11) Handle ka leswo, Bibele dzri hlaya leswaku Yehovha a swi djula ngopfu ‘ku lwela lava mu dumbaka hi timbilu tavu hinkwatu’. (2 Makr. 16:9) Xileswo, hi nga tiyiseka leswaku Yehovha a ni ntamu nakone a navela ku hi pfuna leswaku hi tiyisela.—Eza. 30:18; 41:10; Luk. 11:13.

5. Xana xikhongoto xi nga hi pfunisa kuyini akuva hi kuma ku zrula? (Ezaya 26:3)

⁵ Bibele dzri hlaya leswaku loko hi khongota mayelanu ni leswi hi kazrataka, ‘a ku zrula ka Xikwembu Nkulukumba loku tlulaka ku twisisa hinkwaku, ku ta bekisa timbilu tezru ni miyanakanyu yezru’. (Filp. 4:7) A hi voneni leswi ndzrimana leyi yi tlhamuxelaka swone. Vhanu vanyingi lava kalaka va nga mu tizreli Yehovha va kumana ni swikazratu nakone va nga dzringisa tindlela tinyingi akuva va kuma ku zrula ka miyanakanyu kumbe ku dzrivala swikazratu swavu. Hi xikombiso, van’wana va zama ku susa hinkwaswu a miyanakanywini yavu akuva va titwa na va zrulile. Loko mhunu a yentxa leswo, a va a nga lawuli ndlela leyi a titwaka ha yone, a nga ha kutxeteliwa hi mademona nakone leswo swi ni khombo. (Dzringanisa ni Matewu 12:43-45.) Nambiloko vhanu va kuma ku zrula ntsrhaku ka loko va tizrise tindlela leti, a va na kone ku zrula ka ntiyiso loku pfaka hi ka Yehovha, loku yampswaka ku tlula ku zrula kun’wana ni kun’wana. Loko hi khongota ka Yehovha hi kombisa leswaku hi tiseketela ha yene hi ku helela nakone a ta hi ‘bekisa ku zruleni’. (Dondzra Ezaya 26:3.) Yin’we ya tindlela leti Yehovha a hi nyikaka ku zrula ha tone i ku va a hi dzrimuxa mintiyiso ya ku nyonxisa leyi hi yi dondzraka a Zritwini dzrake. Mintiyiso leyo yi zrulisa miyanakanyu ni mbilu yezru, hikusa ha swi tiva leswaku Yehovha awa zron’weka ha hine nakone a djula leswaku swi hi fambela ha hombe.—Amaps. 62:1, 2.

6. I yini leswi u nga swi yentxaka leswaku swikhongoto swaku swi ku pfuna? (Tlhela u vona ni mufoto.)

⁶ Leswi u nga swi yentxaka. Loko u kumana ni xikazratu xa kukazri, byela Yehovha ndlela leyi u titwaka ha yone, ‘nyiketa Yehovha mahanyela yaku’. Khongota kwake u kombela leswaku a ku nyika ku zrula. (Amaps. 55:22) Tlhela u mu kombela wutlhazri akuva u kota ku lavisana ni xikazratu lexo. (Amapr. 2:10, 11) Handle ka leswo, u nga dzrivali ku mu tlangela Yehovha ka swikhongoto swaku. (Filp. 4:6) Zama ku vona ndlela leyi Yehovha a ku pfunaka ha yone loko u kumana ni xikazratu nakone mu tlangeli hi kola ka leswo. U nga pfumeleli kuva mindzringo yi ku sivela ku vona matovoko lawa kutani u ma kumiki.—Amaps. 16:5, 6.

BIBELE

7. Xana ku dondzra Bibele swi nga hi pfunisa kuyini ku tiyisela?

⁷ Yehovha a hi nyike Bibele akuva a hi pfuna ku tiyisela. Bibele dzri ni tindzrimana tinyingi leti hi tiyisekisaka leswaku Yehovha awa hi seketela. Vona xikombiso xin’we. Matewu 6:8 yi li: “Papayi wenu awa swi tiva leswi mi swi vilelaka nambiloko mi nga si na mu kombela.” Yesu hi yene a hlayiki mazritu lawa nakone a mu tiva ku yampswa Yehovha ku tlula mhunu mun’wana ni mun’wana. Xileswo, a hi na xivangelo xa ku ganaganeka leswaku Yehovha awa zron’weka hi swivileleko swezru loko hi kumana ni swikazratu. A Bibele dzri tale hi swidumbiso swa Yehovha leswi kombisaka leswaku a ta hi nyika ntamu lowu hi wu vilelaka loko hi kumana ni swikazratu.—Amaps. 94:19.

8. a) Nyikela xikombiso xa nsinya wa nawu wa Bibele lowu nga hi pfunaka ku tiyisela. b) I yini lexi nga hi pfunaka ku dzrimuka minsinya ya milawu ya Bibele loko hi yi vilela?

⁸ Minsinya ya milawu ya Bibele yi nga hi pfuna ku tiyisela. Yi nga hi pfuna ku teka swiboho swa wutlhazri. (Amapr. 2:6, 7) Hi xikombiso, Bibele dzri hi byela leswaku hi nga kazrateki hi wumundzruku kambe hi fanela ku dumba Yehovha siku ni siku. (Mat. 6:34) Loko hi titoloveta ku dondzra Bibele ni ku yanakanyisisa ha dzrone, swi ta koteka ku dzrimuka minsinya ya milawu loko hi yi vilela.

9. Xana swikombiso swa le Bibeleni swi nga hi tiyisekisa hi ndlela yini leswaku Yehovha a ta hi pfuna?

⁹ Bibele dzri tlhela dzri va ni swikombiso swa vhanu va ku fana na hine lava dumbiki Yehovha nakone a va pfuniki. (Heb. 11:32-34; Yak. 5:17) Loko hi pimisa hi ndlela leyi Yehovha a va pfuniki ha yone, hi tiyisa dumbo dzrezru kwake dzra leswaku na hine a ta hi pfuna. Yehovha i ‘vutxhavelo byezru ni ntamu wezru, i xipfunu lexi kumekaka swinene a makhombyeni’. (Amaps. 46:1) Loko hi xiya ndlela leyi malandzra ya Yehovha ya le nkameni lowu khalutiki ma dumbekiki ha yone hi kutxeka ku yetisela lipfumelo dzravu ni ku tiyisela kwavu.—Yak. 5:10, 11.

10. U nga yentxa yini akuva u pfuneka hi ku dondzra Bibele siku ni siku?

¹⁰ Leswi u nga swi yentxaka. Dondzra Bibele siku ni siku nakone tsrala tindzrimana leti u vonaka leswaku ti nga ku pfuna. Vanyingi va dondzra tsralwa dzra siku, na siku dzra ha sungula, leswo swi va pfuna ku va ni ntxhumu wa ku yanakanyisisa ha wone siku hinkwadzru. Makwezru wa kukazri lweyi a vitaniwaka Mariea a vone ku hetiseka ka ntiyiso lowo, loko ku gunguliwe leswaku vapswele vake va ni kankru. Ka tihweti tavu ta wugamu na a va hlayisa, i yini lexi pfuniki Marie akuva a tiyisela? Yene a li: “Mixo wun’wana ni wun’wana a ni dondzra tsralwa dzra siku ni ku tlhela ni yanakanyisisa ha dzrone. Leswo swi ni pfune ku va siku ni siku ni yanakanya ha Yehovha ni mintxhumu ya ku xonga leyi a hi dumbisaka yone a Bibeleni, a matsrhan’wini ya ku pimisa hi swikazratu leswi a ni kumana na swone.”—Amaps. 61:2.

VAMAKWEZRU

11. Ha yini swi hi tiyisa ku tiva leswaku a hi wuswezru hi tiyiselelaka swikazratu?

¹¹ Yehovha a hi nyika vamakwezru a misaveni hinkwayu akuva va hi pfuna kuva hi tiyisela. Ntsena hi ku tiva leswaku ‘vamakwezru a misaveni hinkwayu va kumana ni tinxanisa leti fanaka’ swi hi tiyisekisa leswaku a hi wuswezru. (1 Pet. 5:9) Leswo swi tlhamuxela leswaku vamakwezru va kumana ni swikazratu leswi fanaka ni swezru kambe va tama va dumbeka ka Yehovha. Leswi liki, na hine hi nga swi kota ku tiyisela!—Mint. 14:22.

12. Xana vamakwezru va nga hi pfuna hi ndlela yini nakone hi nga va yentxela yini? (2 Vakorinte 1:3, 4)

¹² Vamakwezru va nga hi pfuna ku tiyisela hi leswi va swi hlayaka ni hi leswi va hi yentxelaka swone. Mupostola Pawulo a gungule leswaku leswo i ntiyiso. Ka mapapela yake a longoloxe mavito ya vhanu lava mu pfuniki loko swi sindzrise kuva a nga suki kaya nakone a va tlangelile. Va pfune Pawulo hi ku mu txhavelela, ku mu tiyisa ni ku mu nyika leswi a a swi vilela. (Filp. 2:25, 29, 30; Kol. 4:10, 11) Na hine namunhla hi nga ha kumana ni swiyimu leswi fanaka. Loko hi vilela mpfunu akuva hi kota ku tiyisela, vamakwezru va tsrhama na va lulamele ku hi pfuna nakone loko na vone va vilela mpfunu, na hine hi tsrhama na hi lulamele ku va pfuna.—Dondzra 2 Vakorinte 1:3, 4.

13. I yini leswi pfuniki makwezru lweyi a vitaniwaka Maya akuva a tiyisela?

¹³ Vamakwezru a misaveni hinkwayu va mu tiyise ngopfu makwezru wa le Rússia lweyi a vitaniwaka Maya. Hi 2020, mapholisa ma suketane ma nghena kaya kwake, ma setxha yindlu yake kutani hi ku landzrela ma famba na yene tribunali akuva va ya mu thethisa hi kola ka leswi a byelaka van’wana leswi a swi kholwaka. Maya a li: “Hi nkama wolowo a ni kazralile, a ni xukuvalile ni tlhela ni va ni ku vilela. Kambe vamakwezru va ni fonelile nakone van’we vavu va ni tsralele ni makarta va ni tiyisekisa leswaku va ni zrandzra. Ni buya na ni swi tiva leswaku ni ni ndangu lowu nga ni lizrandzru kambe ku sukela hi 2020 ni ye ni tiyiseka hi ku helela hi leswo.”

14. Xana hi nga pfuneka hi nseketelo wa vamakwezru akuva hi kota ku tiyisela hi ndlela yini? (Tlhela u vona ni mufoto.)

¹⁴ Leswi u nga swi yentxaka. Loko u kumana ni swikazratu, i swa lisima ku bula ni vamakwezru ni ku tinyika nkama wa ku va na vone. U nga ganaganeki ku ya kombela mpfunu ka vakulu, vone va nga va ‘vutxhavelo loko moya wu hunga, swanga hi xisizrelelo loko ku tlhasa xidzedze’. (Eza. 32:2) Dzrimuka leswaku vamakwezru hinkwavu na vone va kumana ni swikazratu. Kutani loko u yentxa ntxhumu lowunene ka mhunu lweyi a wu vilelaka u titwa na wu nyonxile nakone u mu pfuna ku tiyiselela xikazratu xake.—Mint. 20:35.

DUMBO DZREZRU

15. Xana dumbo ledzri Yesu a a li na dzrone hi wumundzruku dzri mu pfune hi ndlela yini nakone dumbo dzrezru hi wumundzruku dzri hi pfuna hi ndlela yini? (Vaheberu 12:2)

¹⁵ Yehovha a hi nyike dumbo ledzri tiyiki akuva dzri hi pfuna ku tiyisela. (Rom. 15:13) Dzrimuka ndlela leyi dumbo dzri pfuniki Yesu ha yone akuva a tiyiselela swikazratu na a ha li lani misaveni. (Dondzra Vaheberu 12:2.) Yesu a a swi tiva leswaku loko a tama a dumbeka a a ta kombisa leswaku leswi Sathana a swi hlayiki mayelanu na Yehovha a a li madzrimi ni leswaku Yehovha a faneliwa hi ku kombisiwa xitxhavu. Yesu a tlhele a yimela nkama akuva a ya va ni Papayi wake ni leswaku hi ku famba ka nkama a tizra ni lava 144.000 ka Mfumu wa le matilweni. Hi ndlela leyi fanaka, dumbo ledzri hi nga na dzrone dzra ku hanya a misaveni leyimpshwa ya Xikwembu Nkulukumba dzri hi pfuna ku tiyiselela swikazratu swin’wana ni swin’wana leswi hi kumanaka na swone ka misava leyi ya Sathana.

16. Xana dumbo dzri mu pfunise kuyini makwezru wa kukazri wa xisati nakone u dondzre yini ka leswi a swi hlayiki?

¹⁶ Vona ndlela leyi dumbo dzra Xikwembu Nkulukumba dzri pfuniki ha yone makwezru wa xisati wa le Rússia lweyi a vitaniwaka Alla, lweyi nuna wake a pfaleliwiki djele na a ha yimela ku yavanyisiwa. Loko ku yentxeke leswo, Alla a te: “Ku khongota hi dumbo ledzri ni nga na dzrone hi wumundzruku ni ku yanakanyisisa ha dzrone swi ni yentxa ni nga heli ntamu ngopfu. Na swi tiva leswaku lawa a hi magamu, Yehovha a ta hlula, na hine hi ta hlula.”

17. Xana hi nga swi kombisa hi ndlela yini leswaku ha dzri tlangela dumbo ledzri Yehovha a hi nyikiki dzrone? (Tlhela u vona ni mufoto.)

¹⁷ Leswi u nga swi yentxaka. Tinyiki nkama wa ku yanakanyisisa hi wumundzruku bya ku xonga lebyi Yehovha a ku bekiseliki byone. Tiyanakanyi na u li misaveni leyimpshwa ya Xikwembu Nkulukumba nakone yanakanya hi matovoko lawa hi taka ma kuma. Loko u yentxa leswo, mintxhumu leyi ku yentxaka u xaniseka namunhla u ta yi vona na yi li ya ‘nkamanyana nakone na yi vevuka’. (2 Kor. 4:17) Handle ka leswo, yentxa hinkwaswu leswi u nga swi kotaka akuva u byela van’wana hi dumbo ledzri u nga na dzrone hi wumundzruku. Yanakanya ndlela leyi swi va vavisaka ha yone ku lavisana ni swikazratu swa misava leyi ya Sathana na va nga wu tivi nkongometo wa Xikwembu Nkulukumba hi wumundzruku. Nambiloko wo va byela mintxhumunyana yitsrongo, u nga ha va kutxa ku djula ku tiva leswi yengetelekiki mayelanu ni Mfumu wa Xikwembu Nkulukumba.

18. Ha yini hi nga dumbaka swidumbiso swa Yehovha?

¹⁸ Ntsrhaku ka loko Yobe a tiyiselele mindzringo yinyingi, a byele Yehovha a ku: ‘Ndzra swi tiva leswaku u nga yentxa hinkwaswu, a ku na xikungu [ntxhumu] lexi ku hlulaka.’ (Yb. 42:2) Yobe a dondzre leswaku a ku na ntxhumu lowu nga sivelaka Yehovha ku hetisisa makungu yake. Leswi Yobe a swi hlayiki swi nga hi pfuna kuva hi tiyisela. Hi xikombiso, yanakanya hi wansati wa kukazri lweyi a vabyaka a heliki ntamu hi kola ka leswi vadotori vanyingi va hlulekiki ku daha mavabyi yake. Kambe loko dokodela lweyi a kotaka ku daha mavabyi yake nakone a dumbekaka a kota ku vona mavabyi a tlhela a mu tlhamuxela ndlela leyi a taka mu daha ha yone, leswo swi mu yentxa a zrula nambiloko swi ta teka nkamanyana wa kukazri leswaku a dahiwa. Hi lani ku fanaka, hi nga tama hi tiyisela hikusa ha swi tiva leswaku a xidumbiso xa Xikwembu Nkulukumba mayelanu ni Paradeyisi xi ta hetiseka.

19. Xana ku djuleka yini akuva hi tiyisela?

¹⁹ Hi lani hi swi voniki ha kone, Yehovha a hi pfuna ku tiyiselela swikazratu hi ku tizrisa xikhongoto, Bibele, vamakwezru ni hi dumbo ledzri hi nga na dzrone. Loko hi yentxa hinkwaswu leswi hi nga swi kotaka akuva hi tizrisa mintxhumu leyi Yehovha a hi nyikiki yone, a ta hi pfuna swi nge na mhaka swikazratu leswi hi kumanaka na swone namunhla. Hi ta kota ku tama hi tiyisela ku ya tlhasela lani misava ya Sathana ni ku xaniseka hinkwaku swi taka hela.—Filp. 4:13.