Ha Yini Mhaka Ya Ku Huluka Ka Bibele Yi Li Ya Lisima

Bibele dzri hambane swinene ni mabuku hinkwawu ya wukhongoti. A dzri kone buku ni dzrin’we ledzri kutxeteliki leswi vhanu va ku tala va swi pfumelaka ku ta tlhasa namunhla ku fana ni Bibele. Nakone a dzri kone buku ledzri solasoliwiki ngopfu dzri tlhela dzri dzreliwa ku fana na dzrone.

Hi xikombiso, swidondzri swimbeni swi hlaya leswaku a Bibele ledzri hi nga na dzrone namunhla a dzri fani ni dzra matsralwa ya ku sungula. Mudondzrisi mun’we wa le univhersidadi wa timhaka ta wukhongoti a li: “A hi tiyiseki leswaku matsralwa ya ku sungula ya Bibele hi nga va hi ma kopiyarise xileswi ma tsralisiwiki xiswone. Makopiya lawa hi nga na wone namunhla ma tale hi swihoxo swinyingi. Nakone ntalu wa makopiya wolawu ma hambiwe ntsrhaku ka malembe manyingi na lawa ya ku sungula ma nga ha li kone nakone ma hambane ngopfu swinene.”

Hi kola ka wukhongoti lebyi vhanu van’wana va kuleliki ka byone, swa va kazratela ku pfumela ka Bibele. Hi xikombiso, Faizal a kulele a mutini lowu a va nga khongeli. A dondzrisiwe leswaku a Bibele i buku dzra ku xwenga kambe swoswi dzri soholotiwile. A hlaya leswi: “Loko va djula ku vulavula na mine hi Bibele, a ni ganaganeka hikusa a ni tiva leswaku Bibele ledzri va nga na dzrone dzri txintxiwile nakone a dzra ha fani ni dzra ku sungula.”

Xana swi ni mhaka ku tiva leswaku Bibele dzri txintxiwile kumbe a dzri txintxiwanga? Yanakanya hi swivutiso leswi landzrelaka: Xana u nga swi kholwa swidumbiso leswi nga kone Bibeleni swa nkameni lowu taka leswi txhavelelaka, na kasi a wu tiyiseki leswaku swidumbiso swoleswo a swi li kone ka matsralwa ya ku sungula? (Ba-le-Roma 15:4) Xana a wu ta yi tizrisa minsinya ya milawu ya Bibele akuva u yentxa swiboho swa lisima leswi khumbaka ntizro, ndangu, ndlela ya ku gandzrela Xikwembu Nkulukumba loko a li leswaku mabibele ya nkama wezru i mabuku lawa ma taliki hi swihoxo nakone me ke tsraliwa hi vhanu?

Nambileswi mabuku ya ku sungula ya Bibele ma nga ha liki kone, hi nga kambisisa makopiya ya khale ku patsra ni matsralwa ya ku tala ya Bibele lama tsraliwiki hi voko. Kambe swi yentxekise ku yini kuva mabuku lawa ma huluka ku ta tlhasa swoswi nambi leswi a va djula ku ma helisa kumbe ku ma txintxa? Ku tiva leswo i swa lisima hikuva swi hi tiyisekisa leswaku hi nga dzri dumba Bibele namunhla hikuva i dzrungula dzra Xikwembu Nkulukumba. Ka swiyenge leswi landzrelaka hi ta dondzra hi matimu lama hlamalisaka ya ku huluka ka Bibele. Vona nhlamulo ya swivutiso leswi landzrelaka.