NHLOKOMHAKA YA KAPA | NDLELA YA KU SUSA LONDZROVOTO KA KU DONDZRA BIBELE
Ha Yini U Fanela Ku Dondzra Bibele?
“A ni pimisa leswaku swi ta ni bindzrela ku dzri twisisa.”—Jovy
“A ni pimisa leswaku ni ta kazrala loko ni dzri dondzra.”—Queennie
“Loko ni vona leswi Bibele dzri nga kulisa xiswone, a ni nga naveli ku dzri hlaya.”—Ezekiel
Xana u sama u djula ku dondzra Bibele kambe u titwa ku fana ni vhanu lava hlayiwiki lani henhla? Vanyingi, va vona ku dondzra Bibele swi li ntsrhwalu. Swi nga kuyini loko ku li leswaku ku dondzra Bibele swi nga ku pfuna ku kuma ku nyonxa ni ku hanya wutomi lebyi tsrhavisaka? Ku ni tindlela tin’wana leti nga ku pfunaka ku yentxa leswaku ku dondzra Bibele swi nyonxisa. Xana u nga swi nyonxela ku tiva tindlela leti Bibele dzri nga ku pfunaka ha tone?
Yingela leswi vhanu van’wana lava pfunekiki hi ku dondzra Bibele va swi hlayaka.
Ezekiel, lwa nga ni kolomu ka 20 wa malembe, a li: “Khale a ni hanya wutomi lebyi ngeke na nkongometo, kambe ku dondzra Bibele swi ni pfune swinene a wuton’wini. Dzri ni swilayu leswi pfunaka, leswi ni nga swi tizrisaka siku ni siku.”
Frieda, ku nga n’hwanyana lwa nga ni kolomu ka 20 wa malembe, a li: “Khale a ni li mhunu wa ku kahlula ni kwata, kambe Bibele dzri ni pfune ku dondzra ku tikhoma. Dzri tlhele dzri ni pfuna ku kota ku hanyisana ni vhanu van’wana, nakone swoswi ni ni vanghanu vanyingi.”
Eunice, lwa nga ni kolomu ka 50 wa malembe, loko a vulavula hi Bibele, a li: “Dzri ni pfuna ku yampswisa wumhunu byanga ni ku tsrhika mikhuva ya ku biha.”
Ku fana ni vhanu lava ha ha ka ku vulavula ha vone, ku patsra ni van’wana va ntsrandzravahlayi lava Bibele dzri va pfuniki, ku dzri dondzra swi nga ku pfuna akuva u nyonxa a wuton’wini. (Ezaya 48:17, 18) Dzri nga tlhela dzri ku pfuna akuva u 1) Yentxa swiboho leswinene, 2) u kuma vanghanu lavanene, 3) u kota ku langutana ni swiyimu swa ku bindzra, 4) nakone xa lisima swinene u dondzra ntiyiso mayelanu na Xikwembu Nkulukumba. Nkongomiso lowu nga Bibeleni wu huma ka Xikwembu Nkulukumba, xileswo a wu nge tisoli loko u wu yingiseta. Xikwembu Nkulukumba a nge txhuki a hi lahlekisa.
Hi yini mintxhumu leyi nga ku pfunaka ku kota ku sungula ku dzri dondzra u tlhela u nyonxa a wuton’wini?