Hi Yini Ndlela Ya Ku Susa Londzrovoto Ledzrikulu A Bibeleni?

A hi nge u navela ku yaka yindlu ya yikulu, kambe u hetiwa ntamu hi ku vona ku dula ka switizro swa ku yaka ha swone. Akuva u kota ku yi sungula, kumbexana u nga ha vona swi yampswa ku tlhanganisa switizro ha katsrongotsrongo. Swi hi ndlela leyi fanaka loko u djula ku dondzra Bibele. U nga ha tivutisa leswi: ‘Ni ta sungula he kwini?’ Ka xidondzro lexi, hi ta vulavula hi mintxhumu yitsrongo leyi nga ku pfunaka ku yentxa leswaku ku dondzra ni ku kambisisa Bibele ku va ntxhumu wa ku nyonxisa.

1. Ha yini hi fanela ku dondzra Bibele siku ni siku?

Mhunu lweyi a dondzraka Bibele, kumbe ‘nawu wa Yehovha’, a kuma ku nyonxa nakone swi mu fambela ha hombe. (Dondzra Amapsalma 1:1-3.) Kumbexana u nga dzringisa ku sungula hi ku dondzra tindzrimana ti nge tingani hi siku. Loko u ya u tolovelana ni Zritu dzra Xikwembu Nkulukumba, leswo swi ta yentxa leswaku ku dzri dondzra ku va ntxhumu wa ku nyonxisa.

2. I yini xi nga ku pfunaka ku susa londzrovoto a ku dondzreni ka Bibele?

Akuva u susa londzrovoto ledzrikulu a ku dondzreni ka Bibele, i swa hombe ku pfana u yimanyana u yanakanyisisa hi leswi u swi dondzraka. Hi fanela ku dondzra Bibele hi tlhela hi ‘yanakanya ha dzrone’. (Yehošua 1:8) Nkama lowu u dondzraka, tihambe swivutiso swa ku fana ni leswi: ‘Xana leswi swi ni byela yini ha Yehovha Xikwembu Nkulukumba? Xana leswi ni nga swi tizrisisa kuyini a wuton’wini byanga? tindzrimana leti ni nga ti tizrisa hi ndlela yini akuva ni pfuna van’wana?’

3. U nga wu kumisa kuyini nkama wa ku dondzra Bibele?

Xana swa ku kazratela ku kuma mhunu wa ku dondzra Bibele na yene? Ku tala kwezru swa hi kazratela. Dzringisa ku ‘tamelisisa nkama’, leswi liki ku wu tizrisa ha hombe. (Ba-le-Efesa 5:16) U nga yentxa tanu hi ku tibekela nkama wa kukazri wa ku dondzra Bibele siku ni siku. Van’wana va tinyika nkama wa ku dondzra Bibele na ke he mixo. Van’wanyana va langa nkama wun’wana a ndzreni ka siku, kumbexana hi nkama wa ku fihlula. Kasi vambeni va dondzra Bibele a wusikwini na va nga si ya ku yetleleni. Hi wini nkama lowu u vonaka leswaku wu nga ku yampswela?

KELISISA

4. Zrandzra ku dondzra Bibele

Swi nga ha yentxeka swi nga nabyali ku va ni xihena xa ku do-ndzra. Kambe loko hi titoloveta, swa koteka ku navela ku dzri dondzra, ku fana ni leswi hi swi kotaka ku titoloveta ku zrandzra swakuda leswi hi nga samikiki hi swi da. Dondzrani 1 Petros 2:2, mi gama mi bulisana hi xivutiso lexi landzrelaka:

• Hi mavonela yaku, loko u ni xihena xa ku dondzra Bibele siku ni siku, xana swi nga ndzruluka ntxhumu lowu u wu zrandzraka ni lowu u navelaka ku tama u wu yentxa?

Vonani VHIDIYU ledzri kombisaka leswaku vambeni va yentxe yini akuva va nandzrikeliwa hi ku dondzra, mi gama mi bulisa-na hi swivutiso leswi landzrelaka:

VHIDIYU: Vampswha Lava Dondzraka Ku Zrandzra Zritu Dzra Xikwembu Nkulukumba (5:33)

• Ka vhidiyu ledzri, hi swini swizralanganya leswi vampshwa va swi hluliki?

• I yini xi nga va pfuna akuva va ya mahlweni ni kungu dzravu dzra ku dondzra Bibele?

• Xana va yentxe yini akuva ku dondzra kwavu ka Bibele ku va ntxhumu lowu nyonxisaka?

Mintxhumu leyi u nga yi yentxaka akuva u sungula ku dondzra Bibele:

• Hlawula Bibele ledzri dumbekaka ni ledzri swi nabyalaka ku dzri dondzra. Dzringisa ku dondzra Bibele dzra Wundzruluteli Bya Misava Leyimpshwa loko dzri kumeka hi lidzrimi dzraku.

• Sungula hi ku dondzra swiyenge leswi u swi vonaka na swi nyonxisa swinene. U nga kuma mavonela lani ku liki “Sungula Ku Dondzra Bibele”.

• Tsrala lani u gameliki kone ku dondzra. Tizrisa xiyenge lexi liki “Wa Dzrimuka Lani U Yimiki Kone?” lexi nga bukwini ledzri.

• Tizrisa JW Library^®. Hi xitizro lexi, swa koteka kuva u dondzra kumbe ku yingiseta Bibele kwini na kwini lomu u nga kone, hi ku tizrisa selulari, tablet kumbe komputadori.

• Tizrisa swiyengetela leswi nga Wundzruluteli Bya Misava Leyimpshwa. Swi patsra mimapa, matabela ni ntlhamuxelo wa mazritu leswi taka yentxa leswaku ku dondzra kwaku ku nyonxisa.

5. Tilulamisele akuva u ta dondzra Bibele

Dondzrani Amapsalma 119:34, mi gama mi bulisana hi xivutiso lexi landzrelaka:

• Ha yini swi li swa lisima ku khongota na u nga si dondzra Bibele kumbe na u nga si lulamisela xidondzro xaku xa Bibele?

U nga yentxa yini akuva u susa londzrovoto ledzrikulu ka dondzro yin’wana ni yin’wana? Nkama lowu u lulamiselaka xidondzro xaku xa Bibele, dzringisa ku yentxa leswi:

1. Dondzra mayava ya ku sungula ya dondzro.

2. Dondzra matsralwa lama kombisiwiki, u tlhela u dzringisa ku vona leswaku ma yelanisa kuyini ni mhaka leyi dondzriwaka.

3. Funga mazritu kumbe swiga leswi hlamulaka xivutiso ha xin’we. Leswi swi ta ku pfuna akuva u bulisana ha hombe hi dondzro ni lweyi u dondzraka na yene Bibele.

A wu swi tiva?

Swanga Timboni ta Yehovha, hi tizrise mabibele ya ku siyanasiyana. Kambe, hi zrandzra ngopfu Bibele dzra Wundzruluteli Bya Misava Leyimpshwa Bya Matsralwa Ya Ku Xwenga hikusa dzri ba kone, dzra nabyala ku dzri twisisa nakone dzri tizrisa vito dzra Xikwembu Nkulukumba.—Vona nhlokomhaka leyi nga ka jw.org leyi liki “Xana Timboni Ta Yehovha Ti Tizrisa Bibele Dzra Tone?”

NKATSRAKANYU

Akuva u susa londzrovoto ledzrikulu a Bibeleni, tibekele nkama lowunene wa ku dondzra, ni ku khongota akuva u twisisa leswi u swi dondzraka, u tlhela u lulamisela xiyenge xin’wana ni xin’wana xa dondzro yaku ya Bibele.

Mpfuxeto

• I yini xi nga ku pfunaka akuva u susa londzrovoto ledzrikulu a Bibeleni?

• Hi wini nkama lowu ku yampswelaka akuva dondzra Bibele?

• Ha yini swi li swa lisima ku lulamisela xiyenge xin’wana ni xin’wana xa dondzro yaku ya Bibele?

HANDZRISISA

Pfuxeta mayentxela man’wana lama nga ku pfunaka ku susa londzrovoto a ku dondzreni kwaku ka Bibele.

“Ndlela Ya Ku Susa Londzrovoto Ka Dondzro Yaku Ya Bibele” (Xihondzro Xa Ku Zrindzra N^o 1 2017)

Vona tindlela tizrazru ta ku dondzra Bibele.

“Xana Bibele Dzri Nga Ni Pfuna Hi Ndlela Yini?—Xiyenge 1: Tiva Bibele Dzraku Ku Yampswa” (Leswi kumekaka ka jw.org)

Vona ndlela ya ku dondzra Bibele hi mayentxela lama nyonxisaka.

“Xana Bibele Dzri Nga Ku Pfunisa Kuyini?—Xiyenge 2: Yentxa Dondzro Ya Bibele Yi Nyonxisa” (Leswi kumekaka ka jw.org)

Yingela leswi hlayiwaka hi lava nga ni malembe na va dondzra Bibele.

Yentxa Dondzro Yaku Ya Ximhunu Yi Bindzrula (2:06)