Xana u sama u djula ku dondzra Bibele kambe u titwa ku fana ni vhanu lava hlayiwiki lani henhla? Vanyingi, va vona ku dondzra Bibele swi li ntsrhwalu. Swi nga kuyini loko ku li leswaku ku dondzra Bibele swi nga ku pfuna ku kuma ku nyonxa ni ku hanya wutomi lebyi tsrhavisaka? Ku ni tindlela tin’wana leti nga ku pfunaka ku yentxa leswaku ku dondzra Bibele swi nyonxisa. Xana u nga swi nyonxela ku tiva tindlela leti Bibele dzri nga ku pfunaka ha tone?

Yingela leswi vhanu van’wana lava pfunekiki hi ku dondzra Bibele va swi hlayaka.

Ezekiel, lwa nga ni kolomu ka 20 wa malembe, a li: “Khale a ni hanya wutomi lebyi ngeke na nkongometo, kambe ku dondzra Bibele swi ni pfune swinene a wuton’wini. Dzri ni swilayu leswi pfunaka, leswi ni nga swi tizrisaka siku ni siku.”

Frieda, ku nga n’hwanyana lwa nga ni kolomu ka 20 wa malembe, a li: “Khale a ni li mhunu wa ku kahlula ni kwata, kambe Bibele dzri ni pfune ku dondzra ku tikhoma. Dzri tlhele dzri ni pfuna ku kota ku hanyisana ni vhanu van’wana, nakone swoswi ni ni vanghanu vanyingi.”

Eunice, lwa nga ni kolomu ka 50 wa malembe, loko a vulavula hi Bibele, a li: “Dzri ni pfuna ku yampswisa wumhunu byanga ni ku tsrhika mikhuva ya ku biha.”

Ku fana ni vhanu lava ha ha ka ku vulavula ha vone, ku patsra ni van’wana va ntsrandzravahlayi lava Bibele dzri va pfuniki, ku dzri dondzra swi nga ku pfuna akuva u nyonxa a wuton’wini. (Ezaya 48:17, 18) Dzri nga tlhela dzri ku pfuna akuva u 1) Yentxa swiboho leswinene, 2) u kuma vanghanu lavanene, 3) u kota ku langutana ni swiyimu swa ku bindzra, 4) nakone xa lisima swinene u dondzra ntiyiso mayelanu na Xikwembu Nkulukumba. Nkongomiso lowu nga Bibeleni wu huma ka Xikwembu Nkulukumba, xileswo a wu nge tisoli loko u wu yingiseta. Xikwembu Nkulukumba a nge txhuki a hi lahlekisa.

Hi yini mintxhumu leyi nga ku pfunaka ku kota ku sungula ku dzri dondzra u tlhela u nyonxa a wuton’wini?

Hi tini tindlela leti nga ku pfunaka ku yentxa leswaku ku dondzra Bibele swi nyonxisa? Xiya ntlhanu wa tindlela leti pfuniki vhanu vanyingi.

Djula mbangu lowunene wa ku dondzra kone. Kuma mbangu lowu ngeke na pongwe. Leswaku u talelisa miyanakanyu yaku ka leswi u swi dondzraka, susa mintxhumu leyi nga ku hingeletelaka. Loko u dondzra a nbangwini lowu nga ni gezi ledzri vonaka ha hombe naswone u kota ku beliwa hi moya, u ta swi zrandzra leswi u swi dondzraka.

Vana ni vonela ledzrinene. Leswi Bibele dzri humaka ka Tatana wezru wa le tilweni, u ta pfuneka swinene loko u titsrongahata ku fana ni n’wana lwentsrongo lweyi a tiyimiseliki ku dondzra ka mupswali wake. Tsrhika vonela ledzri hoxekiki hi Bibele u va u pfumelela Xikwembu Nkulukumba a ku dondzrisa.—Amapsalma 25:4.

Khongota na u nga si sungula ku dzri dondzra. Leswi Bibele dzri humaka ka Xikwembu Nkulukumba, swi le livaleni leswaku hi vilela pfunu wakwe leswaku hi ta kota ku dzri twisisa. Yehovha a dumbisa leswaku a ta va ‘nyika Moya lowa ku xwenga ku lava kombelaka ku yene’. (Luka 11:13) Moya wa ku xwenga wu nga ku pfuna ku twisisa Bibele. Hi nkama lowu faneliki, wu ta ku pfuna ku kota ku twisisa ‘leswi yentiki swa Xikwembu Nkulukumba’.—1 Ba-le-Korinte 2:10.

Hlaya hi kongometo wa ku twisisa. U nga djaheli ku heta. Yanakanyisisa hi leswi u swi dondzraka. Tihambe swivutiso swa ku fana leswi: ‘Hi wani matsrhamela lawa ni ma xiyaka ka mhunu lweyi ni dondzraka ha yene? Ni nga ma tizrisa hi ndlela yini a wuton’wini byanga?’

Tibekele makungu ya kukazri. Akuva u pfuneka hi ku dondzra kwaku ka Bibele, tibekele kungu dzra ku dondzra mintxhumu leyimpshwa leyi taka ku pfuna a wuton’wini. U nga ha tibekela makungu ya ku fana ni lawa: ‘Ni djula ku dondzra swinyingi hi Xikwembu Nkulukumba.’ ‘Ni djula ku yampswisa wumhunu byanga, ku va nuna kumbe nsati lwenene.’ Dondzra dzrungula dzra Bibele ledzri taka ku pfuna ku hetisisa makungu yaku..a

Tindlela leti ta ntlhanu, ti ta ku pfuna ku kota ku sungula ku dondzra Bibele. Xana u nga yentxisa kuyini akuva ku dondzra Bibele swi va ntxhumu lowu nyonxisaka swinene? Nhlokomhaka leyi landzrelaka yi ta ku nyika tindlela leti nga ku pfunaka.

Xana ku dondzra kwaku ka Bibele ku ta va hi ndlela yini? Ku ta nyonxisa kumbe ku ta hlundzrulana? Hinkwaswu leswo swi ta ya hi wene. A hi voneni leswi u nga swi yentxaka akuva ku dondzra kwaku ku nyonxisa.

Hlawula Bibele ledzri ndzruluteliwiki hi mavulavulela ya nan’waka ni lama dumbekaka. A nga kone lweyi a zrandzraka ku dondzra matsralwa lama nga ni mazritu ya ku kazrata ni lama nga tizrisiwikiki. Xileswo, loko u dondzra Bibele, djuletela Bibele ledzri ndzruluteliwiki hi ndlela leyi u taka yi twisisa ni leyi khumbaka mbilu yaku. Kambe vana ni wuxiyaxiya akuva u kuma wundzruluteli lebyi dumbekaka ni lebyi baka kone.a

Tizrisa tekinilojiya. Namunhla wa siku, Bibele dzra kumeka hi ndlela leyi gandlisiwiki ni mayentxela ya eletrónico. U nga dondzra Bibele ka internet kumbe u yentxa hi ku dzri baxara akuva u dondzra komputadori, tableti kumbe selulari . Mabibele mambeni hi yentxela dzra eletrónico, ma ni switizro swa ku setxhisisa ha swone swa ku nyonxisa swinene. Swin’wana swa switizro leswo, swi ku pfumelela akuva u dondzra tindzrimana tinyingi ta Bibele leti khanelaka hi mhaka ya yin’we. Xitizro xin’wana xi yentxa u swi kota ku fananisa ndzrimana ya yin’we ka mabibele ya ku hambana. Loko u zrandzra ku yentxa hi ku yingiseta ku tlula ku dondzra kunene, Bibele dzra kumeka hi mayentxela ya awudiyu. Vanyingi va nyonxisiwa hi ku yingiseta gravhasawu na va li ku fambeni a xapeni, va le ku hlampsweni kumbe loko va yentxa mintizro yin’wana. Ha yini u nga dzringisi dzrin’we ka mayentxela lawa?

Tizrisa switizro swa ku setxhisisa. Switizro swa ku dondzra swa Bibele swi nga ku pfuna ku susa londzrovoto a ku dondzreni kwaku. Hi xikombiso, mimapa ya matiko ya le Bibeleni, ma nga ku pfuna ku vona lomu swiyentxakalu leswi u swi dondzraka swi yentxekiki kone. Leswo swi ta yentxa ku dondzra kwaku ku hanya. Xin’wana lexi nga ku pfunaka ku susa londzrovoto, i tinhlokomhaka leti vulavulaka hi Bibele, ku fana ni leti nga ka revhixta ledzri kumbe ka pajina dzra jw.org, ka xiyenge lexi liki “Tidondzro Ta Bibele.”

Tizrisa mayentxela lama hambaniki. Xana swa ku godolisa loko u pimisa hi ku dondzra Bibele ku sukela masunguleni ku ya tlhasa wugan’wini ka dzrone? A swi vileli ku sungula hi buku dzra Genesis. U nga sungula hi ku dondzra xiyenge lexi u navelaka ku tiva swa kukazri ka xone. Hi xikombiso, u swi vonisa kuyini ku sungula hi ku dondzra hi vhanu lava ku vulavuliwaka swinene ha vone Bibeleni? Ka bokisi ledzri liki “Tiva Vhanu Lava Ku Vulavuliwaka Ha Vone Swinene A Bibele”, u ta kuma swidzringanyeto swa ku nyonxisa. Nakone u nga dondzra Bibele hi ku ya hi timhaka ta dzrone. Yentxela dzrin’wana i ku dondzra hi ku ya longoloko dzra mintxhumu hi lani yi yentxekiki ha kone. U swi vonisa kuyini ku nga dzringisi dzrin’we ka mayentxela lawa?

Bibele a dzri fani ni mabuku man’wana. Dzri ni nkongomiso lowu humaka ka Muvumbi wezru. (2 Timoteo 3:16) Dzrungula dzra dzrone dzri nga hi pfuna swinene a wuton’wini. Nakunene, Bibele dzri li: “Zritu dzra Xikwembu Nkulukumba dzra hanya, dzri ni ntamu.” (Ba-Heberu 4:12) Dzri ni ntamu wa ku yampswisa wutomi byezru hi tindlela tibidzri ta lisima: dzri nyikela nkongomiso wa ndlela leyi hi nga hanyaka ha yone swoswi ni ku hi pfuna leswaku hi tiva Xikwembu Nkulukumba xikan’we ni swidumbiso swakwe.—1 Timoteo 4:8; Yakob 4:8.

Dzri nga yampswisa wutomi byaku swoswi. Bibele dzri nga ku pfuna a timhakeni hinkwatu ta wutomi. Dzri nga ku nyika nkongomiso lowu nga ku pfunaka mayelanu ni leswi landzrelaka.

• Ku va ni wuxaka lebyinene ni vhanu van’wana. —Ba-le-Efesa 4:31, 32; 5:22, 25, 28, 33.

• Wutomi lebyinene.—Amapsalma 37:8; Amaproverbia 17:22.

• Mahanyela lamanene.—1 Ba-le-Korinte 6:9, 10.

• Ndlela ya ku tihanyisa.—Amaproverbia 10:4; 28:19; Ba-le-Efesa 4:28.a

Vatekani van’wana lava ha liki vampshwa va le Ásia, va wu tlangele swinene nkongomiso lowu va wu kumiki a Bibeleni. Ku fana ni vhanu vanyingi lava ha ka ku tekana, a swi va bindzrela ku tolovelana ni ku vulavulisana ha hombe. Kambe va sungule ku hanya hi ku pfumelelana ni leswi a va swi dondzra a Bibeleni. Xana wu ve wini ntsrhovelo wa kone? Nuna wa kone, Vicent, a li: “Leswi ni swi dondzriki a Bibeleni swi ni pfune ku kota ku tlhantlha swikazratu a wukatini byezru. Ku tizrisa milawu ya Bibele, swi yentxe leswaku hi va ni ku nyonxa a wukatini byezru.” Nsati wakwe, Annalou, a li: “Ku dondzra hi swikombiso swa vhanu lava nga Bibeleni swi hi pfunile swinene. Swoswi ni titwa na ni nyonxile ni tlhela ni yaneliseka a wukatini byezru.”

Hi tiva Xikwembu Nkulukumba. Vicent a nga vulavulanga hi ndlela leyi a pfunekiki ha yone a mhakeni ya wukati ntsena, kambe a tlhele a ku: “Ku dondzra Bibele swi yentxe leswaku ni va ni wuxaka lebyinene na Yehovha ku tlula ku sunguleni.” Vicent a boxe mhaka ya lisima swinene, ya leswaku Bibele dzri nga ku pfuna ku va munghanu wa Xikwembu Nkulukumba. Loko na wene u yentxa tanu, Xikwembu Nkulukumba a ta ku kongomisa nakone u ta tlhela u mu tiva ku yampswa tanihi munghanu waku. U ta swi xiya leswaku a ku dumbisa wumundzruku lebyinene, ku nga nkama lowu u taka tikholisa hi ‘vutomi lebyi nga byone’ hi la ku nga helikiki. (1 Timoteo 6:19) A ku na buku dzrin’wana ledzri dumbisaka mintxhumu leyi.

Loko u tama u dondzra Bibele, na wene u ta pfuneka swinene hi ku va u yampswisa wutomi byaku ni ku va u tiva Xikwembu Nkulukumba. Nambitanu, minkama yin’wana loko a li kazri u dondzra Bibele, swi ta yentxeka leswaku u pfa u va ni swivutiso swinyingi. Loko swoswo swi yentxeka, dzrimuka mutizreli wa Mu-Etiyopiya, lweyi a hanyiki ka malembe ya 2.000 lama hundzriki. A a ni swivutiso swinyingi mayelanu ni Bibele. Loko a vutisiwa leswaku awa swi twisisa leswi a a li ku swi hlayeni, a te: ‘Xana n’ta swi kotisa kuyini, loko ku nge na mhunu lwa taka ndzri kombisa ndlela?’b Kutani a pfumele leswaku Filipi a mu pfuna, lweyi a a li mudondzrisi wa Bibele nakone a a li mun’we wa vadondzrisiwa va Yesu va ku sungula. (Amintiṛo 8:30, 31, 34) Hi laha ku fanaka, na wene loko u djula ku tiva leswi yengetelekiki hi Bibele, hi kombela u yentxa xikombelo ka pajina dzrezru dzra www.jw.org/rng, kumbe u tsralela xikritori xa tiko dzrenu lexi kombisiwiki ka revhixta ledzri. U nga tlhela u kombela Timboni ta Yehovha ta lomu u tsrhamaka kone, kumbe u ya a Ndlwini ya tone ya Wugandzreli. Sungula ku dondzra Bibele namunhla u tlhela u dzri pfumelela kuva dzri ku kongomisa a wuton’wini byaku.