LESWI VAMPSWHA VA SWI VUTISAKA
Xana Bibele Dzri Nga Ni Pfuna Hi Ndlela Yini?—Tiva Bibele Dzraku Ku Yampswa—Xiyenge 1
“Mine ni dzringisile ku dondzra Bibele kambe loko ni dzri langusa swi ni heta ntamu!”—Briana, 15.
Xana na wene u titwa hi ndlela leyi fanaka? Nhlokomhaka leyi yi ta ku pfuna!
Ha yini swi li swinene ku dondzra Bibele?
Xana loko u pimisa ku dondzra Bibele swi ku yentxa u godola? A swi hlamalisi ku twisisa leswaku ha yini u titwa hi ndlela leyi. U nga ha yanakanya leswaku Bibele i buku ledzri nga ni matluka manyingi, dzri tale hi mazritu lamatsrongo, nakone a dzri na swifaniso. Swi nga ha tikomba ingiki televhizawu ni mavidhiyu ya internet swa dzri tlula Bibele.
Yanakanya hi leswi: Loko wo txhuka u kuma bokisi dzra dzrikulu dzra khale, a wu nga ti navela ku vona leswi nga ndzreni ka dzrone?
A Bibele dzri fanisiwa ni bokisi ledzri taliki hi wukosi, dzrone dzri ni tindzralama leti nga ku pfunaka:
Ku yentxa swiboho leswinene
Ku twanana ni vapswele va ku
Ku kuma vanghanu va xihlayelafumzri
Ku hlula ku hlatiyela
Xana buku ledzri dzra khale dzri nga swi kotisa ku yini ku va ledzri dzra ha tizraka hi ndlela leyinene masikwini yezru? Hi leswaku a ‘matsralwa hinkwawu ma huhutiwiki hi Xikwembu Nkulukumba.’ (2 Timoteo 3:16) Leswi hlaya leswaku Bibele dzri pfa hi ka xihlovo lexinene ku tlula hinkwaswu.
Bibele dzri fana ni bokisi ledzri taliki hi tindzralama ta lisima
Xana ni nga dzri dondzrisa ku yini Bibele?
Ndlela ya ku sungula: u nga dondzra Bibele ku sukela a masungulweni ku ya tlhasa wugamu. Leswi swi ta ku pfuna akuva u tiva dzrungula hinkwadzru dzra Bibele. Ku ni tindlela tinyingi ta ku dondzra Bibele hinkwadzru. Vona swikombiso swibidzri:
U nga dondzra 66 wa mabuku ya Bibele hi ku ya hi leswi ma longoloxisiwaka xiswone ku sukela ka Genesis ku ya ka Apfuletelo.
U nga dondzra Bibele hi ku dondzra longoloko dzra swiyexakalu hi ku ya hi minkama ya swone.
Mavonela: Ka xiyengetela A7 xa Wundzruluteli Bya Misava Leyimpswha hi Xitsonga, ku ni longoloko mayelanu ni swiyentxakalu swa lisima leswi yentxekiki ka wutomi bya Yesu Kriste.
Ndlela ya wubidzri: u nga dondzra xiyenge xa kukazri lexi yelanaka ni swikazratu leswi u lwisanaka na swone. Hi xikombiso:
Xana wa swa swi djula ku va ni vanghanu lava dumbekaka? Dondzra hi Davhida na Yonatana. (1 Samuel, tindzrima 18-20) Ntsrhaku tizrisa xiyenge xa Matluka Ya Xitoloveto, lexi liki “Ndlela Yo Kuma Vanghana Vo Tshembeka” akuva u dondzra swinyingi ka wudzrunguli lebyi.
Xana wa swi djula ku dondzra ndlela ya ku u tiyiselela minkutxetelo ya ku biha? Dondzra hi xikombiso xa Yosefa kutani u vona leswi a swi yentxiki. (Genesis, ndzrima 39) Ntsrhaku tizrisa xiyenge xa Matluka Ya Xitoloveto, lexi liki “Ndlela Yo Lwisana Ni Miringo . . . Yosefa—Xiyenge1” ni lexi liki “Ku Helhliwa Hi Mavunwa! Yosefa—Xiyenge 2” akuva u dondzra swinyingi ka wudzrunguli lebyi.
Xana wa swi djula ku tiva ndlela leyi xikhongoto xi nga ku pfunaka ha yone? Dondzra hi Nehemiya. (Nehemiya, ndzrima 2) Ntsrhaku tizrisa xiyenge xa Matluka Ya Xitoloveto, lexi liki “Xikwembu Xi Hlamule Xikhongoto Xa Yena” akuva u dondzra swinyingi ka wudzrunguli lebyi.
Mavonela: Loko u dondzra Bibele, djula mbangu lowu ngeke na pongwe akuva u kota ku dzikisa miyanakanyu ka leswi u swi dondzraka.
Ndlela ya wuzrazru: dondzra hi dzrungula dzra kukazri kumbe psalma dzra kukazri, ntsrhaku u vona ndlela leyi u nga swi tizrisaka ha yone. Ntsrhaku ka ku dondzra, tivutise leswi:
Ha yini Yehovha a djuli leswaku leswi swi tsraliwa a Bibeleni?
Xana leswi swi ni dondzrisa ku yini hi tsrhamela dzra Yehovha kumbe hi ndlela leyi a yentxaka mintxhumu hi yone?
Ni nga swi tizrisa hi ndlela yini a wuton’wini byanga?
Mavonela:Tizrisa Bibele dzra ku dondzra hi dzrone dzra Tradução do Novo Mundo akuva u vona mavhidiyu, mimapa, ni swin’wana leswi nga ku pfunaka ku susa londzrovoto a ku dondzreni kwaku.