Xana Bibele Dzri Nga Ku Pfunisa Kuyini?—Xiyenge 2: Yentxa Dondzro Ya Bibele Yi Nyonxisa

Mumpswha lwa vitaniwaka Will a te: “Ku dondzra Bibele swi nga voneka swi nga nyonxisi. Leswi swi nga yentxeka loko u nga swi tivi leswaku u nga dondzrisa kuyini.”

Xana wa swi djula ku gungula xihundla xa ku zrandzra ku dondzra Bibele? Nhlokomhaka leyi yi ta ku pfuna.

• Yentxa dondzro yaku yi hanya

• Setxhisisa!

• Leswi vampswha vambeni va swi hlayaka

Yentxa dondzro yaku yi hanya

Tinyiketeli ka leswi u swi dondzraka. U nga yentxa leswi landzrelaka:

1. Hlawula mhaka leyi u djulaka ku dondzra ha yone. U nga ha hlawula xiyentxakalu xin’we xa le Bibeleni kumbe xiyenge xa Evhangeli. U nga ha hlawula drama dzrin’we dzra ku dondzra ka Bibele ledzri kumekaka ka jw.org.

2. Dondzra dzrungula. U nga dondzra ha wuswaku, ni ndangu waku kumbe ni vanghanu. Mun’we a nga ha dondzra matimu wolawu kasi lavan’wana va patsreka ka matimu wolawu.

3. • Dezenyara swithombe ka swipapelana akuva u kombisa nxaxamelo wa swiyentxakalu leswi yentxekiki. Tsrala leswi yentxekiki ka xipapelana ha xin’we.

   • Tizrisa madiyagrama. Hi xikombiso, loko u dondzra hi wanuna wa ku dumbeka, kombisa matsrhamela ni swiyentxo leswi yelanaka ni mhunu yelweyo ni matovoko lawa a ma kumiki.

   • Yentxa dzrungula ledzro dzri va matimu. Tlhamuxela leswi yentxekiki hi tindlela ta ku siyanasiyana. Bulisana ni lava patsrekiki ka matimu wolawo ni vhanu lava va viki kone ka xiyentxakalu lexo.

   • Dzringisa ku yanakanya hi ma hetelela ya mhaka lama hambaniki. Yanakanya hi mun’we ka lava a va patsreka, lweyi a yentxiki xiboho xa ku biha u tlhela u yanakanyisisa hi leswi a a ta va a swi yentxile loko a a teke xiboho lexi hambaniki. Hi xikombiso, loko Petro a landzrule Yesu. (Marka 14:66-72) I yini leswi Petro a a ta va swi yentxile?

   • Loko u djula ku hamba ntxhumu lowu nyonxisaka, dzringisa ku tsrala a drama dzraku ledzri fambisanaka ni dzrungula dzra kukazri dzra Bibele. Patsra tidondzro leti u nga ti kumaka ka dzrungula ledzro.—Ba-le Roma 15:6

     

Setxhisisa!

Loko u kambisisa wutsrhokotsrhoko bya lisima, u ta kuma tindzralama leti tumbeliki. Minkama yimbeni zritu dzrin’we kumbe mabidzri ma nga ha txintxa matimu ya Bibele kumbe ma yentxa mhaka yi twisiseka hi ndlela yimbeni.

Hi xikombiso dzringanisa Matewu 28:7 na Marka 16:7.

• Ha yini Marka a patsre xiyenge xa leswaku ku nga li khale Yesu a a ta humelela ka vadondzrisiwa vake “na ye Petro”?

• Nhlamulo: Marka a a nga li kone hi ntshima loko mintxhumu leyo yi humelela. Swi nga ha yentxeka a kume dzrungula ledzri ka Petro.

• Tindzralama leti tumbeliki: Yesu, a djula ku tlhela a vona Petro. Ha yini leswo swi nga va swi yentxe Petro a nyonxa? (Marka 14:66-72) I yini leswi Yesu a swi yentxiki akuva a komba Petro leswaku a a li munghanu wake lwenene? Xana u nga mu tekelelisa kuyini Yesu u tlhela u va munghanu lwenene?

Loko u yentxa dondzro yaku yi va leyi hanyaka u tlhela u hamba wusetxhisisi hi swiyenge swa matimu, dondzro yaku ya Bibele yi ta va leyi nyonxisaka ngopfu swinene.