Loko Swi Voneka Ingiki A Swa Ha Sizi Ku Hanya

Hi xikombiso, le Estados Unidos xidzedze xi hohlotele ku tala ka mintxhumu leyi Sallya a a li na yone. Twana leswi a titwisiki xiswone: “Ni titwe ingiki a ni nge he na ku swi kota ku tiyiselela ku vaviseka. Masiku manyingi a ni titwa ingiki a ni li kusuhi ni ku buluka.”

Kumbe swi nga ku yini loko hi feliwa hi muzrandzriwa wezru? Twana leswi Janice, wa le Austrália, a titwisiki xiswone: “Loko ni feliwe hi vananga va vabidzri, swi djule ni boha mbilu. Ni khongote ka Xikwembu Nkulukumba ni ku: ‘Hosi, mbilu yanga a ya ha gwenti! Ni kombela ku fa. A na ha swi djuli ku hanya.’”

Hi tlhelo dzrin’wana, Daniel a tlhaveke mbilu loko a gungule leswaku nkatakwe a a ni mbuya. A li: “Loko nkatanga a pfumelile leswaku a a ni mbuya, ni titwe ingiki ne tlhaviwa hi mukwana a mbilwini. A swi tsrhama hi ku ni tlhavetela nkama hinkwawu—nakone swi teke tihweti ta ku tala na swa ha li mbilwini.”

Nhlayu leyi ya Xihondzro Xa Ku Zrindzra yi ta tlhamuxela leswaku ha yini hi nga fanelanga ku kazrala hi ku hanya nambi loko:

• Hi weliwa hi timhangu ta ntumbuluku

• Hi feliwa hi muzrandzriwa wezru

• Loko nuna kumbe nsati a suka a ya zrandzra van’wana

• Hi li ni mavabyi lamakulu

• Swi voneka ingiki a swa ha sizi ntxhumu ku hanya

A hi zrangeni hi ku hlamula xivutiso lexi liki: Hi nga yentxa yini loko hi weliwa hi timhangu ta ntumbuluku?