Loko Hi Weliwa Hi Timhangu Ta Ntumbuluku

LOKO u same u huluka mhangu ya ntumbuluku, kumbexana wa swi twisisa leswi van’wana lava hulukiki va titwisiki xiswone: U tsremeka nhlana, a wu kholwi leswi yentxekiki, wa pfilunganyeka, wa hlatiyela mfuzri u lozra swa ku txhavisa. Vanyingi lava hulukaka, hi ku helela hi ntamu ni ku twa ku kazrala, a va ha swi naveli ku tama va hanya.

Loko u weliwe hi mhangu ya ntumbuluku, swi nga ha yentxeka na wene u tivona na u li kusuhi ni ku buluka. U nga ha sungula ni ku pimisa leswaku a swa ha sizi ntxhumu ku hanya. Kambe Bibele dzri tlhamuxela leswaku swa ha siza ku hanya ni leswaku u nga va ni xivangelo xa ku twala xa ku lavisela wumundzruku lebyi nyonxisaka.

KU TIVA NTIYISO WA BIBELE SWI YENTXA HI VONA LESWAKU KU HANYA SWA SIZA

Eklesiasta 7:8 yi li: ‘A vugamu bya mhaka byi tlula masungulo ya yone.’ Loko wa ha sungulisa wutomi ntsrhaku ka ku weliwa hi mhangu, swi nga yentxa ingiki ni xa ku hanyela xone a wu xi tivi. Kambe loko u lehisa mbilu a nkama lowu u dzringisaka ku sungulisa wutomi, u nga ha vona leswaku mintxhumu yi ta yampswa.

Bibele dzri khanela hi nkama lowu ku taka ‘ku nga ha twali pongwe dzra xidzrilo. . .nambi pongwe dzra tihuwa’. (Ezaya 65:19) Leswo swi ta hetiseka loko misava yi ta ndzrulutiwa yi va paradeyisi hansi ka Mfumu wa Xikwembu Nkulukumba. (Amapsalma 37:11, 29) Timhangu ta ntumbuluku a ti nge he ti va kone. Ku kazrateka loku hi nga na kone ni swilondzra leswi vangiwiki hi tone swi ta susiwa hi ku helela, hikusa Xikwembu xa Ntamu Hinkwawu xi dumbisa leswi: ‘Ku nga ka ku nga ha dzrimukiwi timhaka ta ku sungula, ti nga ka ti nga ha buyeli a miyanakanyweni.’​—Ezaya 65:17.

Pimisa hi leswi: Mutumbuluxi a djula ku ku nyika ku ‘lavisela’ ka wumundzruku bya ku hanya ku zruleni a hansi ka Mfumu wakwe lowu hetisekiki. (Yeremiya 29:11) Xana ku tiva leswo swi nga ku pfuna ku vona leswaku ku hanya swa siza? Sally, lweyi ku khaneliwiki ha yene ku sunguleni, a li: “Ku tsrhamela ku yanakanya hi mintxhumu leyinene leyi a Mfumu wa Xikwembu Nkulukumba wu taka hi yentxela yone swi nga ku pfuna ku dzrivala leswi ku humeleliki ni ku kota ku tiyisela xiyimu xa swoswi.”

Swi ngo yini u dondzra swin’wana mayelanu ni leswi Mfumu wa Xikwembu Nkulukumba wu taka swi yentxela vhanu ku nga li khale? Loko u yentxa leswo, u nga va ni ku dumba ka leswaku nambi leswi u kumaniki ni mhangu, swa yampswa u tama u hanya na wa ha yimela nkama lowu timhangu ta ntumbuluku ti taka va ti nge he kone. Na ha ha yimela nkama lowo, Bibele dzri nyikela minkongomiso leyi nga ku pfunaka ku langusana ni gome ntsrhaku ka ku weliwa hi timhangu ta ntumbuluku. Vona yin’wana ya yone.