Loko Nuna Kumbe Nsati A Suka A Ya Zrandzra Van’wana

“Ni navele ni ku fa loko nkatanga a hlaye leswaku a a nga ha ni djuli hi mhaka ya wansati mun’wana lweyi a ha liki mumpswha. Hinkwaswu a swi nga twisiseki, ngopfu-ngopfu loko ni dzrimuke hinkwaswu leswi ni mu yentxeliki swone.”—Maria, wa le Espanha.

“Loko nkantanga a suketane a ni tsrhika, swi yentxe ingiki mbilu yanga a yi djula ku yima. Hinkwaswu leswi a hi navela ku swi yentxa xikan’we swi ndzruluke nyuku wa mbyana. A ku ni masiku lawa a ni pimisa leswaku ni swi dzrivalile leswi a swi yentxiki, kambe ku vaviseka a ku tlhela ku buyela.”—Bill, wa le Espanha.

LOKO nuna kumbe nsati a mbuyeta ni mhunu mun’wana, swoswo swi vavisa ngopfu swinene. Van’wana lava humeleliwiki hi leswo va vone swi yampswa ku dzrivalela nuna kumbe nsati loko a tisola, va va va pfuxeta wuxaka byavu.a Kambe, nambi wukati byi hela kumbe byi ya mahlweni, lweyi a doheliwiki a xaniseka ngopfu swinene. I yini lexi nga mu pfunaka ku langusana ni ku vaviseka koloko?

TINDZRIMANA TA BIBELE LETI NGA PFUNAKA

Vhanu vanyingi lava doheliwiki va kume ntxhavelelo a Bibeleni. Va swi tiva leswaku Yehovha awa yi vona minyembeti yavu nakone awa ku twa ku vavisa loku va ku twaka.—Malaki 2:13-16.

‘A ku taleni ka minhlatiyelo ya mbilu yanga, a swimiyeto swaku swi nyonxisisi hika dzranga.’—Amapsalma 94:19.

Bill a li: “Loko ni dondzra ndzrimana leyi, a ni yanakanya Yehovha na a ni miyeta, ku fana ni leswi papayi lweyi a nga ni lizrandzru a yentxaka ha kone.”

‘A mhunu lwe wa wumbilu, u ta mu yentxela wumbilu.’—Amapsalma 18:25.

Carmen, lweyi a nuna wakwe a nga heta tihweti na a mbuyeta ni mun’wana, a li: “Nkatanga a nga swi kotanga ku dumbeka, kambe a ni dumba leswaku Yehovha a minkama hinkwayu a a ta dumbeka. A a nge na ku ni siya wuswanga.”

‘Nʼwi nga hlatiyeleleni ntxhumu, kambe a timhakeni hinkwatu a ku kombela kwenu a ku tibyiwe hi Xikwembu Nkulukumba, hi ku khongota. . .Kutani a ku zrula ka Xikwembu Nkulukumba, loku tlulaka ku yanakanya hinkwaku, ku ta bekisa timbilu tenu.’—Ba-le-Filipi 4:6, 7.

Sasha a li: “Ni dondzre mazritu lawa makhambi ya ku tala. Ku khongota hi ku phindha-phindha swi ni pfune ku kuma ku zrula ka Xikwembu Nkulukumba.”

Hinkwavu lava hi khaneliki ha vone a va pfa va pimisa leswaku swa yampswa ku fa. Kambe va dumbe Yehovha Xikwembu Nkulukumba va tlhela va kuma ku tiyisiwa hi Zritu dzrakwe. Bill a li: “Ku dumba Yehovha swi ni pfune ku tlhela ni kuma xivangelo xa ku tama ni hanya nambi loko swi yentxa ingiki wutomi byanga a byi hahlukile hi ku helela. Nkama wun’wana a swi yentxa ingiki ni le ‘nkhinsini wa ntsrhuti wa ku fa’, kambe a ni vona leswaku Yehovha a na mine.”—Amapsalma 23:4.

a Akuva u dondzra swin’wana mayelanu ni leswaku i swinene ku dzrivalela kumbe ihim, vona nhloko-mhaka leyi liki “Quando o cônjuge é infiel”, ka Despertai! dzra 22 de Abril, 1999.

I Yini Swi Nga Ku Pfunaka Ku Tiyisela?

Pimisa hi mazritu ya Bibele lama tlemanaka mbilu.

Twana leswi hlayiwaka hi Bill: “Ni dondzre a buku dzra Yob ni dzra Amapsalma, na ni funga lomu a swi yelana ngopfu ni xiyimu xanga. Ni xiye leswaku vatsrali lavo va Bibele va kumane ni ku vaviseka ni ku kazrateka loku a ni ku twa.”

Titleme mbilu hi wunanga.

Twana mazritu ya Carmen: “Loko ku hela wuzrongo ni wusiku, a ni tolovela ku yingiseta wunanga. A ku li ndlela yin’wana ya ku kuma ntxhavelelo.” Daniel na yene a li: “Ni dondzrele ku txhaya vhiyola nakone wunanga byi ni pfune ku va ni ku zrula.”

Pfulela vambeni xifuva.

Daniel a tlhela a ku: “A ni nge na xihena xa ku vulavula hi matitwela yanga, kambe a ni ni vanghanu lavanene lava a ni va pfulela xifuva siku dzrin’wana ni dzrin’wana. A ni zrula mintsrhwalu yanga ka vone hi ku va tsralela kumbe hi ku bula navu hi ku kongoma. Leswo swi ni pfune ngopfu.” Sasha a li: “A mpfunu wa ndangu wanga wu ve wa lisima swinene. Mamana minkama hinkwayu a a li kusuhi na mine. Loko ni djula ku bula na yene, a a ni yingiseta ha hombe. Na yene papayi a ni tiyisile ngopfu, nakone a ni pfune ku tlhela ni kuma ntamu hi kutsrongo-kutsrongo.”

Tsrhama hi ku khongota.

Carmen a li: “A ni tsrhama hi ku khongota. Ni swi vonile leswaku Xikwembu Nkulukumba a a li kusuhi na mine, a ni yingiseta a tlhela a ni pfuna. Nkama hinkwawu lowu a ni li ku xanisekeni, a ni hamba swikhongoto ka Yehovha.”