Lizrandzru Ni Ku Tlangela Yehovha Swi Hi Susumetela Ku Babatisiwa

1-2. Hi ku ya hi Amintiṛo 8:27-31, 35-38, i yini lexi susumeteliki ndzruna ya mu-Etiyopiya ku babatisiwa?

XANA wa swi navela ku babatisiwa ni ku va mudondzrisiwa wa Kriste? Vanyingi va xi tekile xiboho lexo. Nakone leswi swi va susumeteliki ku ve lizrandzru ni ku tlangela loku va nga na kone hi Yehovha. Vona xikombiso xa ndzruna ya kukazri leyi a yi tizrela nkosikazi ya mu-Etiyopiya.

² Ntsrhaku ka loko yi dondzre leswi Matsralwa ma swi hlayaka, ndzruna ya mu-Etiyopiya yi teke xiboho hi ku hatlisa. (Dondzra Amintiṛo 8:27-31, 35-38.) I yini lexi yi susumeteliki ku babatisiwa? Handle ka ku ganaganeka, a yi dzri nyika lisima swinene Zritu dzra Xikwembu Nkulukumba; phela, a yi dondzra xiyenge xa buku dzra Ezaya na yi li kazri yi yendzra. Ntsrhaku ka mabulu lawa yi viki na wone na Filipi, ndzruna ya mu-Etiyopiya yi titwe na yi tlangela leswi Yesu a yi yentxeliki swone. Kambe i yini lexi yentxiki ndzruna leyo yi ya a Yerusalema? Ku ve hi leswi a yi zrandzra Yehovha. Hi swi tiva hi leswi wudzrunguli byi kombisaka leswaku a yi ye a Yerusalema akuva yi ya gandzrela Yehovha. Hi mazritu man’wana, swi tikomba na ndzruna leyo yi tsrhike wukhongoti bya yone yi va yi hlawula ku tipatsra ni vhanu lava a va tizrela Xikwembu xa ntiyiso. Yi yentxe ku txintxa hi leswi a yi zrandzra Yehovha. Lizrandzru ledzro dzri susumetele ndzruna ya mu-Etiyopiya ku teka xiboho xin’wana xa lisima swinene: xa ku babatisiwa ni ku va mudondzrisiwa wa Kriste.​—Mt 28:19.

3. I yini lexi nga sivelaka mhunu akuva a babatisiwa? (Vona bokisi ledzri liki “Xana Mbilu Yaku Yi Tsrhamisise Kuyini?”)

³ Ku zrandzra Yehovha swi nga ku susumetela ku babatisiwa. Kambe lizrandzru dzri nga tlhela dzri ku sivela ku teka xiboho lexo. Hi ndlela yini? Pimisa hi swikombiso swa kukazri. Swi nga yentxeka u zrandzra ngopfu maxaka ni vanghanu lava nga liki Timboni ta Yehovha, u tlhela u txhava leswaku va ta ku venga loko u babatisiwa. (Mt 10:37) Kumbe swi nga yentxeka u zrandzra mukhuva wa kukazri nakone nambi leswi u swi tivaka leswaku Xikwembu Nkulukumba a nga wu yamukeli, a wu swi koti ku wu tsrhika. (Ps 97:10) Nakone swi nga ha yentxeka u dzrimuka ku nyonxa loku a wu li na kone nkama lowu a wu tlangela minkhuvu ya wukhongoti bya madzrimi, nakone ndlela leyi u yi zrandzraka ha yone minkama leyo yi yentxa leswaku swi ku kazratela ku tsrhika mikhuva leyi Xikwembu Nkulukumba a yi vengaka. (1Ko 10:20, 21) Xileswo, tivutise: ‘I yini lexi ni xi zrandzraka ngopfu nakone i mani lweyi ni mu zrandzraka ngopfu?’

LIZRANDZRU DZRA LISIMA SWINENE

4. I yini lexi hakunene xi fanelaka ku ku susumetela ku babatisiwa?

⁴ I yinyingi mintxhumu leyinene leyi u yi zrandzraka leyi ku yentxaka u titwa na u tlangela. Hi xikombiso, na u nga si na sungula ku dondzra ni Timboni ta Yehovha, swi nga yentxeka a wu dzri bekela lisima dzrikulu Bibele. Handle ka leswo, swi nga yentxeka u dondzre ku zrandzra Yesu. Nakone swoswi u tivaka Timboni ta Yehovha, swi nga yentxeka u swi zrandzra ku va na tone. Ku zrandzra mintxhumu leyo i swinene, kambe a hi swone ntsena swi taka ku yentxa u tinyiketela ka Yehovha u va u babatisiwa. I yini lexi hakunene xi taka ku susumetela ku babatisiwa? I lizrandzru ledzri u nga na dzrone ha Yehovha. Loko u zrandzra Yehovha ku tlula hinkwaswu, a ku na ntxhumu lowu taka ku sivela ku tinyiketela ka yene. Nambi ntsrhaku ka ku babatisiwa, lizrandzru ledzri u nga na dzrone ha Yehovha dzri ta ku nyika ntamu wa ku tama u famba a ntiyisweni.

5. Hi ta bula ha yini swoswi?

⁵ Yesu a hlaye leswaku hi fanela ku zrandzra Yehovha hi mbilu yezru hinkwayu, hi moya wezru hinkwawu, hi ku yanakanya kwezru hinkwaku ni hi ntamu wezru hinkwawu. (Mr 12:30) I yini leswi u nga swi yentxaka akuva u va ni lizrandzru ledzrikulu ni xitxhavu lexikulu ha Yehovha? Yanakanyisisa hi ndlela leyi Yehovha a ku kombaka lizrandzru ha yone. Leswo swi ta ku susumetela ku djula ku mu zrandzra na yene. (1Yh 4:19) Nkama lowu u yaka u zrandzra Yehovha, matitwela man’wana ni swiyentxo swin’wana swi ta titela. Hi swini swa kone? Hi ta bula ha swone swoswi.b

6. Hi ku ya hi Ba-le-Roma 1:20, hi yini yin’we ya tindlela leyi u nga dondzraka ha Yehovha ha yone?

⁶ Dondzra ha Yehovha hi ku xiyisisa mintxhumu leyi a yi tumbuluxiki. (Dondzra Ba-le-Roma 1:20; Mpf 4:11) Yima u yanakanyisisa hi wutlhazri lebyikulu lebyi Yehovha a byi kombisiki loko a tumbuluxa minsinya ni swihazri. Dondzra kutsrongo hi ndlela ya ku hlamalisa leyi mizri wezru wu tizraka ha yone. (Ps 139:14) Pimisa hi ntamu wukulu lowu Yehovha a wu bekiki ndzreni ka dambu, ku nga nyeleti yin’we ntsena ka ta ntsrandzra-vahlayi.c (Eza 40:26) Ku yanakanyisisa ka muxaka lowo ku ta yentxa leswaku xitxhavu lexi u nga na xone ha Yehovha xi kula. Kambe a swi yanelanga ku tiva leswaku Yehovha a ni wutlhazri ni ntamu. Leswo ko va swin’we ka leswi djulekaka akuva u yaka wunghanu na yene. Loko u djula ku yengesela lizrandzru dzraku ha Yehovha, ku djuleka u dondzra leswi yengetelekiki ha yene.

7. Leswaku u va ni lizrandzru ledzri yentiki ha Yehovha, i yini leswi u fanelaka ku tiyiseka ha swone?

⁷ U fanela ku tiyiseka leswaku Yehovha awa zron’weka ha wene hi ku kongoma. Swa ku kazratela ku kholwa leswaku Muvumbi wa matilo ni misava awa ku tiva ni leswaku awa zron’weka ha wene ke? Loko swi li tanu, dzrimuka leswaku Yehovha ‘a nga kule ku hine hinkwezru’. (Min 17:26-28) Yene a ‘kamba timbilu hinkwatu’, nakone a ku dumbisa leswaku ‘loko u mu djula, u ta mu kuma’. (1Mk 28:9) Nakunene, lexi ku yentxaka u dondzra Bibele swoswi hi leswaku Yehovha a ku kokele ka yene. (Yr 31:3) Loko u ya u twisisa hinkwaswu leswi Yehovha a ku yentxelaka swone, lizrandzru ledzri u nga na dzrone ha yene dzri ta ya dzri kula.

8. U nga kombisa ku tlangela lizrandzru dzra Yehovha hi ndlela yini?

⁸ Yin’we ya tindlela ta ku kombisa leswaku u tlangela lizrandzru dzra Yehovha i ku bulisana na yene. Ka swikhongoto swaku, byela Xikwembu Nkulukumba leswi ku kazrataka u tlhela u tlangela mintxhumu leyinene leyi a ku yentxelaka yone. Xiyisisa ndlela leyi Yehovha a hlamulaka swikhongoto swaku ha yone. (Ps 116:1) Leswo swi ta yengesela lizrandzru dzraku ha Xikwembu Nkulukumba swi tlhela swi tiyisa wuxaka byenu. U ta ya u tiyiseka leswaku awa ku twisisa. Kambe leswaku u ya u tsrhindzrekela ka Yehovha, u fanela ku twisisa ndlela leyi a pimisaka ha yone ni leswi a swi yimelaka ka wene. Ko va ni ndlela yin’we ya ku va ni wutivi lebyo: ku dondzra a Zritu dzrakwe, ku nga Bibele.

9. U nga swi kombisisa kuyini leswaku wa dzri nyika lisima Bibele?

⁹ Dondzra ku nyika lisima Zritu dzra Xikwembu Nkulukumba. Ko va Bibele ntsena dzri khanelaka ntiyiso mayelanu na Yehovha ni leswi a djulaka ku ku yentxela swone. Xileswo, dondzra Bibele siku ni siku. Tilulamisele ha hombe leswaku u dondzra ni lweyi a ku fambiselaka xidondzro. Landzra hinkwaswu leswi u swi dondzraka. Hi ndlela leyo, u ta kombisa leswaku wa dzri nyika lisima Bibele. (Ps 119:97, 99; Yh 17:17) Xana u ni xiyimiso xa ku dondzra Bibele? Xana wa swi kota ku xi landzrelela siku ni siku?

10. Hi wini wun’we wa mintxhumu leyi kumekaka ntsena a Bibeleni?

¹⁰ Wun’we wa mintxhumu leyi kumekaka ntsena a Bibeleni i wudzrunguli bya vhanu lava voniki Yesu. Hi dzrone ntsena dzri tlhamuxelaka ntiyiso mayelanu ni leswi Yesu a ku yentxeliki swone. Ku dondzra leswi Yesu a swi hlayiki ni ku swi yentxa swi ta ku kutxa ku mu zrandzra.

11. I yini leswi nga ku pfunaka ku yengesela lizrandzru dzraku ha Yehovha?

¹¹ Dondzra ku zrandzra Yesu, xileswo lizrandzru dzraku ha Yehovha dzri ta kula. Ha yini? Hikusa Yesu a yetisela wumhunu bya Tatana wakwe hi ndlela leyi hetisekiki. (Yh 14:9) Hi ndlela leyo, loko u ya u dondzra ha Yesu, u ta ya u twisisa Yehovha ni ku tlhela u mu nyika lisima. Yanakanya hi ndlela leyi Yesu a a kombisa ha yone ntwela-wusiwana vhanu lava a va dzreliwa hi van’wana, ku nga swisiwana, timbabyi ni vhanu lava nga swi kotikiki ku tilwela. Tlhela u yanakanya hi swilayu leswi pfunaka leswi Yesu a ku nyikaka swone ni ndlela leyi wutomi byaku byi yampswaka ha yone loko u swi tizrisa.​—Mt 5:1-11; 7:24-27.

12. Ntsrhaku ka ku dondzra leswi yengetelekiki ha Yesu, i yini leswi u taka susumeteleka ku swi yentxa?

¹² Handle ka leswo, yanakanyisisa hi xitlhavelo lexi Yesu a xi nyikeliki hi ku swi zrandzra swinene: a hi felile akuva hi kota ku dzrivaleliwa swidoho swezru. (Mt 20:28) Handle ka ku ganaganeka, ku pimisa hi leswo swi ta kulisa lizrandzru ledzri u nga na dzrone ha Yesu. Handle ka leswo, u ta susumeteleka ku tisola ka swidoho swaku u va u kombela Yehovha akuva a ku dzrivalela. (Min 3:19, 20; 1Yh 1:9) Nakone loko u ya u zrandzra Yehovha na Yesu, u ta ya u djula ku va xikan’we ni vhanu lava titwaka hi ndlela leyi fanaka.

13. I yini leswi Yehovha a ku nyikaka swone?

¹³ Dondzra ku zrandzra ndangu wa Yehovha. Swi nga yentxeka maxaka yaku lama nga liki vapfumeli xikan’we ni vanghanu lava a wu li navu va nga swi twisisi leswaku ha yini u djula ku nyiketela wutomi byaku ka Yehovha. N’waninkama va nga ha patsra ni ku ku pfukela. Kambe Yehovha a nga ti ku tsrhika wuswaku: a ku nyika ndangu wa moya. Loko nkama hinkwawu u kumeka ni vamakwenu va le bandleni, u ta twa lizrandzru u tlhela u kuma mpfunu lowu u wu vilelaka. (Mr 10:29, 30; Hb 10:24, 25) Hi ku famba ka nkama, swi nga yentxeka leswaku maxaka yaku ma hlawula ku tizrela Yehovha xikan’we na wene ni ku hanya hi ku fambisana ni leswi Bibele dzri swi dondzrisaka.​—1Pe 2:12.

14. Hi la swi kombisiwiki ha kone ka 1 Yohan 5:3, i yini leswi u swi gunguliki mayelanu ni milawu ya Yehovha?

¹⁴ Dondzra ku hlonipha ni ku zrandzra milawu ya Yehovha. Na u nga si tiva Yehovha, swi nga yentxeka a wu li ni mavonela ya ka kwaku mayelanu ni leswi nga swinene ni leswi bihiki. Kambe swoswi a wu na ku ganaganeka ka leswaku milawu ya Yehovha i yinene ngopfu. (Ps 1:1-3; dondzra 1 Yohan 5:3.) Pimisa hi swilayu leswi Bibele dzri swi nyikaka vanuna, vasati, vapswali ni vana. (Ef 5:22–6:4) Xana u vona leswaku swilayu leswo swa wu pfuna ndangu waku leswaku wu ya wu nyonxa? Tlhela u pimisa hi swileleto leswi Yehovha a hi nyikaka swone mayelanu ni ku hlawula vanghanu. Xana u vona leswaku ku yingiseta swileleto leswo swi ku pfuna ku va ni mikhuva leyinene? Xana u vona leswaku ku nyonxa kwaku ko ya ku kula? (Pr 13:20; 1Ko 15:33) Swi nga yentxeka u hlamule u ku “ina” ka swivutiso leswo.

15. I yini leswi nga ku pfunaka ku tiva ndlela leyi u nga yi tizrisaka ha yone minsinya ya milawu ya Bibele?

¹⁵ Minkama yimbeni, swi nga yentxeka u nga yi tivi ha hombe ndlela ya ku tizrisa minsinya ya milawu ya Bibele leyi u yi dondzraka. Hi kola ka leswo, Yehovha a tizrisa nhlengeletanu yakwe akuva a ku pfuna. Yone yi ku nyika mabuku lama seketeliwiki a Bibeleni lama ku pfunaka ku tiva leswi nga swinene ni leswi bihiki. (Hb 5:13, 14) Loko u hlaya u tlhela u dondzra mabuku lawo, u ta swi xiya leswaku ma pfuna nakone ma khanela hi mintxhumu ya ku kongoma. Handle ka leswo, ma ta ku yentxa u navela ku hamba xiyenge xa nhlengeletanu ya Yehovha.

16. Xana Yehovha a va hlengeleta hi ndlela yini vhanu vakwe?

¹⁶ Dondzra ku zrandzra ni ku seketela nhlengeletanu ya Yehovha. Yehovha a hlengeleta vhanu vakwe hi mabandla. A beke N’wanakwe, Yesu Kriste, akuva a va nhloko ya wone. (Ef 1:22; 5:23) Swoswi, ku ni ntizro lowu yentxiwaka hi mabandla wolawo. Akuva ku zrangeliwa ntizro lowo, Yesu a beke ntlawa wutsrongo lowu a wu vitanaka ‘nandzra lwe wa ku dumbeka ni ku tlhazriha’. Ntlawa lowo wu vumbiwa hi vavanuna lava totiwiki lava byi nyikaka lisima swinene wutiyanguleli bya ku ku nyika swakuda swa moya ni ku ku sizrelela. (Mt 24:45-47) Yin’we ya tindlela leyi nandzra lwe wa ku dumbeka a yi tizrisaka akuva a ku hlayisa i ku tiyiseka leswaku ka bandla ledzri u nga ka dzrone ku va ni vakulu lava nga ni wuswikoti akuva va ku kongomisa ni ku ku sizrelela. (Eza 32:1, 2; Hb 13:17; 1Pe 5:2, 3) Vakulu va tiyimisele ku yentxa hinkwaswu leswi va nga swi kotaka hi nkonta yaku; va tsrhama na va tibekiselile akuva va ku txhavelela ni ku ku pfuna ku va ni wuxaka lebyi tiyiki na Yehovha. Nakone ntxhumu wumbeni wa lisima swinene lowu va nga ku yentxelaka wone i ku ku wupfisa akuva u dondzrisa vambeni hi Yehovha.​—Ef 4:11-13.

17. Hi ku ya hi Ba-le-Roma 10:10, 13, 14, ha yini hi khanela ha Yehovha ni vhanu vambeni?

¹⁷ Pfuna vambeni ku dondzra ku zrandzra Yehovha. Yesu a lelete valandzreli vakwe leswaku va dondzrisa vambeni hi Yehovha. (Mt 28:19, 20) I ntiyiso leswaku a hi ta yingiseta xileleto lexo hi leswi hi titwaka na hi sindzriseka ku swi yentxa. Kambe loko lizrandzru dzraku ha Yehovha dzri ya dzri kula, u ta titwa ku fana na mupostola Petro na mupostola Yohane. Vone va te: ‘A hi swi koti ku miyela ni leswi hi nga swi vona, ni leswi hi nga swi yingela.’ (Min 4:20) I yitsrongo mintxhumu leyi nga hi tiselaka ku nyonxa lokukulu ka ku fana ni loku hi ku twaka hi ku pfuna mhunu leswaku a zrandzra Yehovha. Yanakanya hi leswi mudondzrisiwa Filipi a nyonxisiki xiswone hi kuva a pfune ndzruna ya mu-Etiyopiya ku tiva ntiyiso lowu nga Matsralweni yi tlhela yi babatisiwa. Loko u yetisela xikombiso xa Filipi u tlhela u yingiseta xileleto xa ku zrezra, u kombisa leswaku u djula ku va Mboni ya Yehovha. (Dondzra Ba-le-Roma 10:10, 13, 14.) Loko u tlhasela ka xiyimu lexo, swi nga yentxeka leswaku u tihamba xivutiso lexi ndzruna ya mu-Etiyopiya yi tihambiki xone: ‘Xana ku nga sivela yini ku nha ndzri babatisiwa?’​—Min 8:36.

18. I yini leswi hi taka swi vona ka nhloko-mhaka leyi landzrelaka?

¹⁸ Xiboho xa lisima swinene a wuton’wini byaku i xa kuva u babatisiwa. Leswi ku nga xiboho lexikulu swinene, u fanela ku pimisa ha hombe hi hinkwaswu leswi patsrekiki. I yini leswi u fanelaka ku swi tiva mayelanu ni babatiso? I yini leswi u fanelaka ku swi yentxa a mahlweni ni ntsrhaku ka ku babatisiwa? Nhloko-mhaka leyi landzrelaka yi ta hlamula swivutiso leswo.