Ndlela Ya Ku Pfuna Swidondzro Swa Bibele Akuva Swi Babatisiwa​—Xiyenge Xa Ku Sungula

1. Xana a buku dzra 2 Ba-le-Korinte 3:1-3 dzri hi pfuna hi ndlela yini ku nyika lisima ndjombo leyi hi nga na yone ya ku fambisa swidondzro swa Bibele leswi gamaka swi babatisiwa? (Vona xifaniso lexi nga ka kapa.)

XANA u titwisa kuyini loko u vona xidondzro xa Bibele xa kukazri xa le nsin’wini yenu xi babatisiwa? Handle ka ku ganaganeka leswo swi ku yentxa u nyonxa ngopfu swinene. (Mt 28:19) Nakone loko ku li wene u dondzriki Bibele ni mhunu lweyo, u nyonxe ngopfu swinene loko u mu vone na a babatisiwa! (1Te 2:19, 20) Vadondzrisiwa lava ha ka ku babatisiwa i “mapapela ya ku hi yimela” lamanene, ku nga li ntsena ka lava va dondzriki navu kambe ni ka bandla hinkwadzru.​—Dondzra 2 Ba-le-Korinte 3:1-3.

2. a) Hi xini xivutiso xa lisima lexi hi fanelaka ku yanakanyisisa ha xone, nakone ha yini? b) I yini xidondzro xa Bibele? (Vona ntlhamuxelo wa le hansi.)

² Swi nyonxisa ngopfu ku vona leswaku ka mune wa malembe lama khalutiki ku fambisiwe kolomu ka 10.000.000 wa swidondzro swa Bibeleb hweti ni hweti a misaveni hinkwayu. Nakone ndzreni ka malembe wolawo, lembe dzrin’wana ni dzrin’wana vhanu lava tlulaka 280.000 va babatisiwile swanga Timboni ta Yehovha nakone va ndzruluke vadondzrisiwa va Yesu Kriste. Xana hi nga va pfunisa kuyini vhanu lava yengetelekiki ka magidigidi wolawo ya swidondzro swa Bibele akuva va babatisiwa? Swanga hi leswi Yehovha a lehisaka mbilu hi ku nyika vhanu nkama ni mukhandlu wa kuva va va vadondzrisiwa va Kriste, hi djula ku pfuna vhanu hi lani hi nga kotaka ha kone akuva hi xihatla va babatisiwa. Nkama wu le ku tsrutsrumeni ngopfu swinene!​—1Ko 7:29a; 1Pe 4:7.

3. I yini leswi hi taka swi vona ka nhlokomhaka leyi mayelanu ni ku fambisa swidondzro swa Bibele?

³ Akuva ku yanguliwa xivileleko xa xihatla xa ku yentxa vadondzrisiwa, mazrwavi ma kombeliwe ku kambisisa leswaku i yini leswi hi nga swi yentxaka akuva hi pfuna swidondzro swa Bibele leswi yengetelekiki akuva swi babatisiwa. Ka nhlokomhaka leyi ni ka leyi taka landzrela hi ta vona leswaku i yini leswi hi nga swi dondzraka ka maphayona, vazrumiwa ni valaviseli va miganga lava nga ni mfambu ka ntizro lowu.c (Pr 11:14; 15:22) Vone va tlhamuxela leswi vadondzrisi ni swidondzro swavu va fanelaka ku swi yentxa akuva xidondzro xavu xa Bibele xi va lexi humelelaka. Ka nhlokomhaka leyi, hi ta vona ntlhanu wa mintxhumu leyi xidondzro xa Bibele xin’wana ni xin’wana xi fanelaka ku yi yentxa akuva xi kota ku babatisiwa.

DONDZRANI VHIKI DZRIN’WANA NI DZRIN’WANA

4. I yini leswi hi fanelaka ku swi tiva mayelanu ni ku fambisa swidondzro swa Bibele a xipfalwini xa n’winyi wa muti?

⁴ Vamakwezru vanyingi va fambisa swidondzro swa Bibele na va li xipfalwini xa n’winyi wa muti. Nambi leswi leswo swi nga swinene akuva ku txutxeliwa ku navela kwakwe, mabulo lawo ma nga ha va lama gomiki ngopfu swinene nakone ma nga ha patsra ni ku kala ma nga yentxiwi vhiki ni vhiki. Akuva va txutxela ku navela loku yengetelekiki, vamakwezru van’wana va kombela nhlayu ya telefone ya mhunu lweyi a kombisiki ku nyonxela akuva va mu fonela kumbe va mu zrumela mensaje mayelanu ni dzrungula dzra kukazri dzra Bibele. Mabulu wolawo ya ku goma ma nga ha teka tihweti na mhunu wa kone a nga si na kombisa nhluvuku. Swi tikomba na mhunu a nga ti yentxa nhluvuku lakakuva a tinyiketela ka Yehovha a va a babatisiwa loko a tinyika nkama wutsrongo ni loko a nga yentxi minzamu leyi yengetelekiki akuva a dondzra Bibele.

5. I yini leswi Yesu a swi hlayiki ka buku dzra Luka 14:27-33, leswi hi nga swi tizrisaka akuva hi pfuna swidondzro swezru swa Bibele?

⁵ Khambi dzrin’wana, hi ku tizrisa xifananiso, Yesu a tlhamuxele leswaku i yini leswi mhunu a fanelaka ku swi yentxa loko a djula ku va mudondzrisiwa wakwe. Yene a khanele hi mhunu lweyi a djulaka ku yaka xihondzro ni hi hosi leyi djulaka ku ya yimpini. Yesu a hlaye leswaku mhunu lweyi a djulaka ku yaka a fanela ku ‘zranga a tsrhamisa, a nkonta leswi fanelaka ku humexiwa’ akuva a kota ku heta ku yaka xihondzro. A tlhele a hlaya leswaku hosi leyi djulaka ku ya yimpini yi fanela ‘ku sungula yi tsrhamisa yi khanela’ kumbe ku kambisisa leswaku masotxha ya yone ma nga swi kota ku hetisisa leswi yi swi djulaka. (Dondzra Luka 14:27-33.) Hi ndlela leyi fanaka, Yesu a a swi tiva leswaku loko mhunu a djula ku va mudondzrisiwa wakwe a fanela ku tsrhama hansi a kambisisa ha hombe leswi swi tlhamuxelaka swone ku mu landzrela. Hi mhaka ya leswo, hi fanela ku kutxa swidondzro swezru swa Bibele akuva swi dondzra vhiki dzrin’wana ni dzrin’wana. Xana hi swi yentxisa kuyini leswo?

6. I yini leswi hi nga ha dzringisaka ku swi yentxa akuva hi va ni swidondzro leswi yentxaka nhluvuku?

⁶ Sungula hi ku yengetela nkama lowu u wu hetaka ni vhanu lava u bulaka navu hi nkama wutsrongo. Kumbexana u nga ha dondzra tindzrimana tibidzri a matsrhan’wini ya ku dondzra ndzrimana yin’we. Loko n’winyi wa muti a titwa na a ntsrhunxekile hi nkama wa ku leha, mu vutise leswaku ku nga va ni mbangu wa kukazri lowu mi nga tsrhamaka ka wone akuva mi ya mahlweni ni mabulu yenu, nhlamulo ya n’winyi wa muti yi ta kombisa leswaku a swi nyika lisima ku ya tlhasa kwini ku dondzra Bibele. Hi wugamu akuva u mu pfuna ku hatla a yentxa nhluvuku u nga ha mu vutisa leswaku awa swi navela kuva mi hamba mi dondzra kabidzri hi vhiki. Kambe ku ni swin’wana leswi djulekaka handle ka ku dondzra kan’we kumbe kabidzri hi vhiki.

TILULAMISELI AKUVA U FAMBISA XIDONDZRO XIN’WANA NI XIN’WANA

7. I yini leswi mudondzrisi a nga swi yentxaka leswaku a tilulamisela ha hombe akuva a ya fambisa xidondzro xa Bibele?

⁷ Swanga mudondzrisi, u fanela ku tilulamisela ha hombe na u nga si ya fambisa xidondzro xin’wana ni xin’wana xa Bibele. U nga ha sungula hi ku dondzra mhaka hinkwayu leyi mi taka yi dondzra u tlhela u kambisisa tindzrimana ta kone. Kumisisa tinhlankulu ta mhaka ya kone. Yanakanyisisa hi nhlokomhaka, hi swinhlokwanamhaka, hi swivutiso, tindzrimana leti tsraliwiki leswaku “dondzra”, hi swifaniso ni hi vídeo dzrin’wana ni dzrin’wana ledzri pfunaka ku tlhamuxela mhaka ya kone. Hi wugamu, na u pimisa hi xidondzro xaku, yanakanyisisa hi ndlela leyi u nga xi tlhamuxelaka dzrungula hi ku nabyala ni hi ndlela leyi twisisekaka akuva xi hatla xi swi twisisa ni ku swi tizrisa.​—Neh 8:8; Pr 15:28a.

8. Xana mazritu ya mupostola Pawulo lama kumekaka ka buku dzra Ba-le-Kolosa 1:9, 10, ma hi dondzrisa yini mayelanu ni ku khongotelela swidondzro swezru swa Bibele?

⁸ Na wa ha tilulamisela, khongota ka Yehovha mayelanu ni lweyi u dondzraka na yene ni hi swivileleko swakwe. Mu kombele leswaku a ku pfuna ku mu dondzrisa Bibele hi ndlela leyi taka khumba mbilu yakwe. (Dondzra Ba-le-Kolosa 1:9, 10.) Tivutise leswaku ku nga va ni ntxhumu lowu nga ha kazratelaka xidondzro xaku xa Bibele ku wu twisisa kumbe ku wu pfumela. Tsrhama na wu swi dzrimuka leswaku nkongometo waku i wa ku xi pfuna akuva xi kota ku babatisiwa.

9. Xana mudondzrisi a nga mu pfunisa kuyini lweyi a dondzraka na yene akuva a lulamisela leswi va taka swi dondzra? Tlhamuxela.

⁹ Ku xuva kwezru i ka leswaku xidondzro xa Bibele lexi hi xi yentxaka nkama ni nkama xi pfuna mhunu lweyi hi dondzraka na yene akuva a tlangela hinkwaswu leswi Yehovha na Yesu va swi yentxaka ni kuva a tama a djula ku dondzra leswi yengetelekiki. (Mt 5:3, 6) Akuva a pfuneka hi ku helela, lweyi u dondzraka na yene Bibele, a fanela ku beka mimpimiso yakwe ka leswi a swi dondzraka. Akuva u mu pfuna ku yentxa leswo, mu byele lisima dzra kuva a lulamisela xidondzro xin’wana ni xin’wana hi ku va a dondzra leswi mi taka swi vona a tlhela a yanakanyisisa hi ndlela leyi a nga swi tizrisaka ha yone. Xana wene swanga mudondzrisi u nga mu pfunisa kuyini akuva a tilulamisela? Lulamiselani xikan’we akuva u mu komba leswaku swi yentxisiwa kuyini.d Mu kombe ndlela leyi ha yone a nga kumaka tinhlamulo leti kongomiki ni leswaku ku funga mazritu ya kukazri swi ta mu pfuna akuva a swi dzrimuka. Ntsrhaku mu kombele leswaku a hlamula hi mazritu yakwe. Loko a yentxa leswo, swi ta ku pfuna ku xiya leswaku a yi twisise ku ya tlhasa kwini mhaka ya kone. Kambe ku ni swin’wana leswi u nga kutxaka mhunu lweyi u dondzraka na yene akuva a swi yentxa.

MU DONDZRISE KU BULISANA NA YEHOVHA SIKU NI SIKU

10. Ha yini swi li swa lisima ku dondzra Bibele siku ni siku, nakone i yini leswi lweyi u dondzraka na yene a fanelaka ku swi yentxa akuva a susa londzrovoto ledzrikulu loko a dondzra Bibele?

¹⁰ Handle ka ku dondzra ni mudondzrisi wakwe vhiki ni vhiki, lweyi a dondzraka Bibele a nga pfuneka hi ku tiyentxela mintxhumu ya kukazri siku ni siku. A fanela ku bulisana na Yehovha. A nga swi yentxisa kuyini leswo? Hi ku yingiseta Yehovha ni ku khanela na yene. A nga yingiseta Xikwembu Nkulukumba hi ku dondzra Bibele siku ni siku. (Yš 1:8; Ps 1:1-3) Mu kombe ndlela leyi a nga xi tizrisaka ha yone “Xiyimiso Xa Ku Dondzra Ka Bibele” lexi kumekaka ka jw.org.e Nakunene, akuva u mu pfuna ku susa londzrovoto ledzrikulu loko a dondzra Bibele, mu kutxe ku yanakanyisisa hi leswi Bibele dzri mu dondzrisaka swone mayelanu na Yehovha ni hi ndlela leyi a nga swi tizrisaka ha yone leswi a swi dondzraka a wuton’wini byakwe.​—Min 17:11; Yk 1:25.

11. I yini leswi hi nga swi yentxaka akuva hi dondzrisa lweyi hi dondzraka na yene ku khongota hi ndlela leyinene, nakone ha yini swi li swa lisima kuva a khongota ka Yehovha nkama ni nkama?

¹¹ Kutxa lweyi u dondzraka na yene Bibele akuva a khanela na Yehovha hi xikhongoto siku ni siku. Hamba xikhongoto lexi sukelaka a mbilwini loko mi sungula ku dondzra ni loko mi heta. Mu patsre ka xikhongoto. Loko a yingiseta swikhongoto swaku, a ta dondzra ndlela leyi a nga khongotaka ha yone na swi sukela mbilwini na a kongomisa swikhongoto swakwe ka Yehovha hi vito dzra Yesu Kriste. (Mt 6:9; Yh 15:16) Yanakanya hi ndlela leyi ku dondzra Bibele siku ni siku (ku nga ku yingiseta Yehovha) ni ku khongota (ku nga ku khanela na Yehovha) swi taka pfuna ha yone lweyi u dondzraka na yene Bibele akuva a tsrhindzrekela kusuhi na Xikwembu Nkulukumba! (Yk 4:8) Ku yentxa leswo siku ni siku swi ta mu pfuna akuva a yentxa nhluvuku lakakuva a tinyiketela ka Yehovha a va a babatisiwa. I yini swin’wana leswi taka mu pfuna?

MU PFUNE KU KULISA WUXAKA BYAKWE NA YEHOVHA

12. Xana mudondzrisi a nga mu pfunisa kuyini lweyi a dondzraka na yene Bibele akuva a kulisa lizrandzru dzrakwe ha Yehovha?

¹² Hi djula leswaku lweyi hi dondzraka na yene Bibele a dondzra mayelanu na Yehovha. Kambe leswi a swi dondzraka swi fanela ku tlhela swi mu khumba mbilu lakakuva a djula ku tizrisa leswi a swi dondzraka. Yesu a dondzrise vhanu mintxhumu yinyingi nakone vone a va swi zrandzra ku dondzra ka yene. Kambe vhanu va sungule ku mu landzrela hi leswi a a tlhela a khumba timbilu tavu. (Lk 24:15, 27, 32) Lweyi u dondzraka na yene Bibele a fanela ku vona Yehovha swanga mhunu wa xivizri, mhunu lweyi hi nga vaka ni wuxaka na yene. Kambe a fanela ku tlhela a mu vona swanga Tatana, Xikwembu Nkulukumba wakwe ni Munghanu wakwe. (Ps 25:4, 5) Loko mi li ku dondzreni, khanyisa wumhunu bya ku xonga bya Xikwembu Nkulukumba. (Eks 34:5, 6; 1Pe 5:6, 7) Yentxa leswo ka mhaka yin’wana ni yin’wana leyi mi yi dondzraka. Mu pfune ku vona wumhunu bya ku xonga bya Yehovha​—lizrandzru dzrakwe, wumbilu ni ntwelawusiwana lowu a nga na wone. Yesu a hlaye leswaku ‘a leleto ledzri nga ledzrikulu’ i dzra ku ‘zrandzra Hosi, [Yehovha] Xikwembu Nkulukumba waku’. (Mt 22:37, 38) Dzringisa ku pfuna lweyi u dondzraka na yene akuva a zrandzra Xikwembu Nkulukumba hi mbilu hinkwayu.

13. Nyikela xikombiso xin’we xa ndlela leyi ha yone u nga pfunaka lweyi u dondzraka na yene Bibele akuva a tiva wumhunu bya ku xonga bya Yehovha.

¹³ Loko u bula ni lweyi u dondzraka na yene Bibele, mu kombe ndlela leyi u titwaka ha yone ha Yehovha. Leswo swi nga mu pfuna ku vona leswaku a fanela ku kulisa lizrandzru ledzri a nga na dzrone ha Yehovha ni wuxaka lebyi a nga na byone na yene. (Ps 73:28) Hi xikombiso, ka buku ledzri mi dondzraka ha dzrone, xana ku ni mazritu ya kukazri kumbe ndzrimana ya kukazri leyi kombisaka wumhunu bya Yehovha, bya ku fana ni lizrandzru dzrakwe, wutlhazri byakwe, wululami byakwe kumbe ntamu wakwe leyi ku khumbiki mbilu? Bula ha swone ni lweyi u dondzraka na yene, nakone mu yentxe a swi tiva leswaku lexo i xin’we xa swivangelo swinyingi leswi ku yentxaka u zrandzra Tatana wezru wa le tilweni. Kambe ku ni swin’wana leswi swidondzro hinkwaswu swa Bibele swi fanelaka ku swi yentxa akuva swi hluvuka lakakuva swi babatisiwa.

MU KUTXE KU YA A MINTLHANGANWINI

14. I yini leswi buku dzra Ba-Heberu 10:24, 25 dzri swi hlayaka mayelanu ni mintlhanganu ya bandla leswi nga pfunaka lweyi u dondzraka na yene Bibele akuva a yentxa nhluvuku?

¹⁴ Hinkwezru hi djula leswaku lava hi dondzraka na vone Bibele va yentxa nhluvuku lakakuva va babatisiwa. Yin’we ya tindlela leyi hi nga va pfunaka ha yone i ku va kutxa leswaku va hlalela mintlhanganu ya bandla. Vadondzrisi lava nga ni wuswikoti va hlaya leswaku swidondzro swa Bibele leswi hlalelaka mintlhanganu swi hantla swi yentxa nhluvuku. (Ps 111:1) Vadondzrisi van’wana va tlhamuxela swidondzro swavu leswaku va ta ya dondzra mintxhumu yinyingi a mintlhanganwini leyi va nga tiki yi dondzra ka xidondzro xavu. Dondzra Ba-Heberu 10:24, 25 ni lweyi u dondzraka na yene Bibele, u tlhela u mu komba mabindzru lawa a taka ma kuma loko a hlalela mintlhanganu. Mu kombe vídeo ledzri liki Ku Yentxeka Yini Andlwini ya Nfumu?f Pfuna lweyi u dondzraka na yene Bibele akuva a vona mintlhanganu ya vhiki ni vhiki swanga ntxhumu wa lisima a wuton’wini byakwe.

15. I yini leswi hi nga swi yentxaka akuva hi kutxa lweyi hi dondzraka na yene Bibele akuva a hlalela mintlhanganu vhiki ni vhiki?

¹⁵ I yini leswi u nga swi yentxaka loko lweyi u dondzraka na yene Bibele a nga si na sungula ku ya a mintlhanganwini kumbe a nga kumeki vhiki ni vhiki ka yone? Mu byeli na u nyonxile leswi u swi dondzriki ka ntlhanganu lowu wa ha ka ku va kone. Leswo swi nga mu susumetela akuva a kumeka ka yone ku tlula ku mu zramba ntsena akuva a ya mintlhanganwini. Mu hanane Xihondzro Xa Ku Zrindzra kumbe Xibukwana Xa Ntlhanganu Wa Wutomi Ni Wutizreli lexi xa ha dondzriwaka a mintlhanganwini. Mu kombe leswi taka dondzriwa ka ntlhanganu lowu taka landzrela nakone mu vutise leswaku i mpswini leswi swi mu nyonxisaka. Leswi lweyi u dondzraka na yene a swi vonaka ni ku swi yingela ka ntlhanganu wa ku sungula swi ta swi tlula ngopfu leswi a samiki a swi yingela ka mintlhanganu ya wukhongoti byin’wana. (1Ko 14:24, 25) Yene a ta kuma van’wana lava a nga yetiselaka xikombiso xavu lexinene ni lava va taka mu pfuna ku yentxa nhluvuku lakakuva a babatisiwa.

16. I yini leswi djulekaka leswaku hi pfuna lava hi dondzraka na vone Bibele akuva va babatisiwa, nakone hi ta bula hi yini ka nhlokomhaka leyi landzrelaka?

¹⁶ Hi ku ya hi leswi hi nga swi dondzra ku ta tlhasa swoswi, i yini leswi hi nga swi yentxaka akuva hi pfuna lava hi dondzraka na vone Bibele leswaku va babatisiwa? Hi ku pfuna mhunu mun’wana ni mun’wana lweyi hi dondzraka na yene Bibele akuva a vona lisima dzra ku dondzra, hi ku mu kutxa akuva mi dondzra vhiki ni vhiki ni ku tlhela a lulamisela hinkwaswu leswi mi taka swi dondzra. Nakone hi djula ku mu kutxa akuva a bulisana na Yehovha siku ni siku ni ku tlhela a kulisa wuxaka lebyi a nga na byone na yene. Hi wugamu, mu kutxe akuva a hlalela mintlhanganu ya bandla. (Vona bokisi ledzri liki “Leswi Swidondzro Swa Bibele Swi Fanelaka Ku Swi Yentxa Akuva Swi Tlhasela Ku Babatisiwa” Kambe, hi lani nhlokomhaka leyi landzrelaka yi taka tlhamuxela ha kone, ku ni mintxhumu yin’wana ya ntlhanu leyi vadondzrisi va Bibele va nga yi yentxaka leswaku va pfuna lava hi dondzraka na vone Bibele akuva va babatisiwa.