Hinkwezru A Bandleni Hi Nga Pfunisa Akuva Swidondzro Swi Hamba Nhluvuku Swi Tlhela Swi Babatisiwa

1-2. I mani lweyi a nga pfunaka xidondzro xa Bibele akuva xi hluvuka lakakuva xi babatisiwa?

AMY, lweyi a tsrhamaka Fiji, a li: “A ni swi zrandzra ngopfu leswi a ni swi dondzra a Bibeleni. A ni swi tiva leswaku a a li ntiyiso. Kambe ntsrhaku ka loko ni sungule ku heta nkama ni vamakwezru, ni sungule ku txintxa ni va ni babatisiwa.” Mfambu wa Amy wu hi dondzrisa ntxhumu wa lisima, wa leswaku xidondzro xi nga yentxa nhluvuku hi ku nabyala xi va xi babatisiwa loko xi pfuniwa hi vambeni a bandleni.

² Muzrezri mun’wana ni mun’wana a nga yentxa xa kukazri akuva a pfuna lavampshwa kuva va hamba xiyenge xa bandla. (Ef 4:16) Phayona dzra kukazri ledzri vitaniwaka Leilani, ledzri tsrhamaka Vanuatu, dzri te: “Ku ni xihlayahlaya lexi liki: ‘Hinkwavu a mugangeni va nga pfunisa a ku kuliseni ka n’wana.’ Ni yanakanya leswaku leswo swa tizra ni ka ntizro wa ku yentxa vadondzrisiwa.” Hi ntolovelo a bandla hi dzrone dzri pfunisaka akuva mhunu a ta ntiyisweni.” Vapswele, vanghanu ni vaprisori va nga pfuna n’wana kuva a wupfa. Va nga yentxa leswo hi ku kutxa n’wana ni ku mu dondzrisa leswi nga swa lisima. Hi ku fanana, vazrezri va nga kutxa swidondzro swa Bibele, va swi tiyisa ni ku swi bekela xikombiso lexinene akuva va swi pfuna kuva swi babatisiwa.​—Pr 15:22.

3. Hi nga dondzra yini ka leswi Ana, Dorin na Leilani va swi hlayiki?

³ Ha yini muzrezri lwa fambisaka xidondzro xa Bibele a fanela ku yamukela mpfunu lowu vazrezri van’wana va nyikaka xidondzro xakwe? Xiya leswi phayona dzra ku hlawuleka ledzri vitaniwaka Ana, ledzri tsrhamaka Moldávia, dzri swi hlayaka: “Swi kazrata ngopfu swinene akuva mhunu mun’we a kota ku twisisa swivileleko hinkwaswu swa xidondzro xa Bibele loko xi sungula ku hluvuka”. Dorin, phayona dzra ku hlawuleka ledzri tizraka a Moldávia, a li: “Hi ntolovelo, vazrezri vambeni va hlaya ntxhumu lowu khumbaka mbilu ya xidondzro, ntxhumu lowu ni ku wu pimisa a ni nga wu pimisi.” Leilani a tlhela a hlaya xivangelo ximbeni: “Loko xidondzro xi vona lizrandzru ni ku zron’weka loku vamakwezru va xi kombisaka, xi tekela ku swi vona leswaku lava i vhanu va Yehovha.”​—Yh 13:35.

4. Hi ta dondzra hi yini ka nhlokomhaka leyi?

⁴ Kambe u nga ha tivutisa leswi: “Ni nga yentxa yini akuva ni pfuna xidondzro xa Bibele kuva xi hluvuka loko a nga li mine ni fambisaka xidondzro xolexo?” Ka xidondzro lexi, hi ta vona leswaku u nga yentxa yini loko u zrambiwa kuva u hlengela ka xidondzro kumbe loko xidondzro xi sungula ku ya a mintlhanganwini. Hi ta tlhela hi vona leswi vakulu va nga swi yentxaka akuva va pfuna swidondzro swa Bibele leswaku swi yentxa nhluvuku swi va swi babatisiwa.

LOKO U ZRAMBIWA AKUVA U HLENGELA KA XIDONDZRO XA BIBELE

5. I yini leswi u fanelaka ku swi yentxa loko u zrambiwa ku hlengela ka xidondzro xa Bibele?

⁵ Ka xidondzro xa Bibele, a mufambisi wa xidondzro hi yene ku sungula a nga ni wutiyanguleli bya ku xi pfuna akuva xi twisisa Zritu dzra Xikwembu Nkulukumba. Loko mufambisi wa xidondzro a ku zramba akuva u hlengela ka xidondzro xolexo, u fanela ku tizrisana na yene swanga mupfunisi. (Ekl 4:9, 10) I yini leswi hi ku kongoma u nga swi yentxaka akuva xidondzro xa Bibele xi susa londzrovoto?

6. U nga wu tizrisa hi ndlela yini nsinya wa nawu lowu kumekaka ka Amaproverbia 20:18, loko u zrambiwa ku ya fambisa xidondzro xa Bibele?

⁶ Lulamisela xidondzro xa Bibele. Ku sungula, kombela mufambisi wa xidondzro akuva a ku byela switsrongo ha xone. (Dondzra Amaproverbia 20:18.) U nga ha mu vutisa leswi: “I yini leswi u swi tivaka mayelanu ni xidondzro xa Bibele? I yini leswi mi taka dondzra ha swone? He wini nkongometo waku ka leswi mi taka swi dondzra? Ku ni ntxhumu lexi ni nga fanelangakiki kumbe ni fanelaka ku xi hlaya kumbe ku xi yentxa loko hi li ku dondzreni? I yini xi nga pfunaka xidondzro lexi akuva xi hluvuka?” Handle ka ku ganaganeka, a n’winyi wa xidondzro a nge ti khanela hi mintxhumu leyi nga xihundla xa xidondzro kambe leswi a taka swi hlaya swi nga pfuna. Muzrumiwa wa kukazri lwa vitaniwaka Joy, a ni mabulu ya ku fana ni lawo ka lweyi a fambaka na yene akuva va ya fambisa xidondzro xa Bibele. A li: “Mabulu ya ku fana ni lawo, ma pfuna lweyi ni fambaka na yene akuva a tiva leswi a fanelaka ku swi hlaya leswaku a kota ku pfuna xidondzro xa Bibele.”

7. Loko u heketa mhunu ka xidondzro xa Bibele, ha yini u fanela ku lulamisela?

⁷ Loko u zrambiwa kuva u hlengela ka xidondzro xa Bibele, a swi ta va swinene kuva u lulamisela leswi taka dondzriwa. (Ezr 7:10) Dorin, makwezru lweyi hi sunguliki hi khanela ha yene, a li: “Ni nyonxa ngopfu loko lweyi ni taka famba na yene a lulamisela. Leswo swi mu pfuna kuva a hlengela hi ndlela leyinene.” Nakone xidondzro xi ta kota ku vona leswaku ha wubidzri byenu mi tilulamisele ha hombe nakone leswo swi ta va xikombiso lexinene ka xone. Nambi loko u nge ti swi kota ku lulamisela hinkwaswu leswi taka dondzriwa, tinyike nkama wa ku dondzra tinhlankulu.

8. U nga tiyiseka hi ndlela yini leswaku swikhongoto swaku swi pfuna swidondzro swa Bibele?

⁸ Xikhongoto i xiyenge xa lisima loko u fambisa xidondzro. Xileswo, u fanela ku pimisa leswaku i yini leswi u taka swi hlaya loko u zrambiwa ku hamba xikhongoto. Loko u yentxa leswo, xikhongoto xaku xi ta pfuna hi ku tlulisa. (Ps 141:2) Vona leswi yentxekeliki Hanae, lweyi a tsrhamaka a Japão. Na a ha dondzreliwa Bibele, mudondzrisi wakwe a a pfana a famba ni makwezru wa kukazri wa xisati akuva va fambisa xikan’we xidondzro. Ku ta tlhasa namunhla, Hanae a ha dzrimuka leswi makwezru lweyo wa xisati a swi hlayiki ka xikhongoto. A li: “Ni xiye leswaku a a ni wuxaka lebyi tiyiki na Yehovha, nakone a ni djula ku fana na yene. Nakone a ni titwa na ni zrandzriwa loko a patsra vito dzranga ka swikhongoto swakwe.”

9. Hi ku ya hi buku dzra Yakob 1:19, u nga yentxa yini akuva u va mupfuni lwenene a ku fambiseni ka xidondzro?

⁹ Pfuna mufambisi wa xidondzro loko mi li ku dondzreni. Omamuyovbi, phayona dzra ku hlawuleka a Nigéria, a hlaye leswi: “Loko lweyi a zrambiwiki ku ya fambisa xidondzro a yingiseta ha hombe a nga pfuna xidondzro. A pfuna ngopfu loko a hlaya xa kukazri kambe a nga khaneli ngopfu hikusa awa swi tiva leswaku mudondzrisi hi yene a fanelaka ku zrangela xidondzro.” Kutani, he wini nkama wa ku hlaya xa kukazri? Nakone i yini u fanelaka ku swi hlaya? (Pr 25:11) Yingiseta ha hombe loko xidondzro ni mudondzrisi va li kazri va bula. (Dondzra Yakob 1:19.) Hi ndlela leyo, u ta lulamela ku pfuna hi nkama lowu faneliki. Kambe handle ka ku ganaganeka, u fanela ku yanakanyisisa na u nge si na khanela. Hi xikombiso, a wu nge ti nyonxela ku khanela ngopfu, u tsremelisa miyanakanyu ya mudondzrisi kumbe ku bula hi mhaka leyi ku khaneliwiki ha yone. Kambe u nga tizrisa mazritu matsrongo, xivutiso kumbe xikombiso akuva u pfuna xidondzro leswaku xi twisisa yinhla ya kukazri leyi mi bulaka ha yone. Minkama yin’wana u nga ha titwa ingi a wu na ntxhumu xa ku pfuna xidondzro ha xone. Kambe loko u xi kulungela kumbe u kombisa ku zron’weka ha xone, u nga ha xi pfuna ku yentxa nhluvuku.

10. Xana mfambu waku wu nga xi pfuna hi ndlela yini xidondzro xa Bibele?

¹⁰ Swi dzrungulele mfambu waku. Loko u vona leswaku swi nga pfuna, byela xidondzro hi mazritu matsrongo leswaku u dondzrise kuyini xihlayelamfuzri, u wu hlulise kuyini ndzringo wa kukazri kumbe ndlela leyi u voniki voko dzra Yehovha dzri ku pfuna ha yone a wuton’wini byaku. (Ps 78:4, 7) Mfambu waku ku nga ha va ntxhumu lowu lweyi u dondzraka na yene a a wu vilela ku wu twa hi nkama wolowo. Leswo swi nga ha tiyisa lipfumelo dzrakwe kumbe ku mu kutxa kuva a tama a yentxa nhluvuku a va a babatisiwa. Nakone swi nga ha mu pfuna ku vona leswaku a nga wu hlulisa kuyini ndzringo lowu a kumanaka na wone. (1Pe 5:9) Gabriel, lweyi tsrhamaka a Brasil, lweyi swoswi a tizraka swanga phayona, a dzrimuka ndlela leyi a pfuniwiki ha yone loko a ha dondzreliwa Bibele. A li: “Loko ni twe mimfambu ya vamakwezru, ni dondzre leswaku Yehovha awa swi vona swikazratu hinkwaswu leswi hi kumanaka na swone. Nakone loko va swi kotile ku swi hlula, na mine ni nga swi kota.”

LOKO XIDONDZRO XA BIBELE XI SUNGULA KU YA MINTLHANGANWINI

11-12. Ha yini hi fanela ku yamukela swidondzro swa Bibele hi ndlela leyinene loko swi ta mintlhanganwini?

¹¹ Akuva xidondzro xa Bibele xi yentxa nhluvuku xi va xi babatisiwa, xi fanela ku hlalela mintlhanganu ya bandla vhiki ni vhiki ni ku tlhela xi pfuneka ka yone. (Hb 10:24, 25) Swi nga yentxeka mudondzrisi a ta xi zramba akuva xi hlalela mintlhanganu hi khambi dzra ku sungula. Loko xi ta, hinkwezru hi fanela ku xi kutxa akuva xi tama xi ta a Ndlwini ya Wugandzreli. Hi nga swi yentxisa kuyini leswo?

¹² Hoyozela xidondzro hi mbilu hinkwayu. (Ro 15:7) Loko xidondzro xi titwa ha hombe a mintlhanganwini xi nga ha navela ku tama xi ya a Ndlwini ya Wugandzreli. Losa xidondzro hi lizrandzru u tlhela u xi kombisa ka vhanu vambeni, kambe u nga xi danise. U nga tekele ku pimisa leswaku xi hlayisekile hikusa mudondzrisi wa xone a nga ha va a xwelile a mintlhanganwini kumbe a khomekile hi mintizro yimbeni. Yingiseta ha hombe leswi xidondzro xi swi hlayaka nakone kombisa leswaku wa zron’weka ha xone. Xana ku yamukeliwa ha hombe swi nga xi khumbisa kuyini xidondzro? Vona mfambu wa makwezru Dmitrii, lweyi a babatisiwiki malembenyana ntsrhaku, nakone swoswi a tizraka swanga nandzra wa wutizreli. Loko a dzrimuka siku dzra ku sungula a yiki a mintlhanganwini, a li: “Makwezru wa kukazri a ni vonile na ni yime handle ka Yindlu ya Wugandzreli na ni txhava. Kutani, hi lizrandzru a ni tekile a nghena na mine. Vamakwezru vanyingi va buye va ni losa. Swi ni hlamalise ngopfu. Swi ni nyonxise ngopfu lakakuva a ni navela ku va ni mintlhanganu siku ni siku. A ni ngi ngi sama ni titwa hi ndlela leyi.”

13. Xana mahanyela yaku ma nga xi khumbisa kuyini xidondzro xa Bibele?

¹³ Vana xikombiso lexinene. Mahanyela yaku ma nga pfuna xidondzro xa Bibele kuva xi kholwa leswaku xi kume ntiyiso. (Mt 5:16) Vitalii, lweyi a tizraka swanga phayona a Moldávia, a li: “Ni dondzre ka ndlela leyi van’wana a bandleni va hanyaka ha yone, va pimisaka ha yone ni ndlela leyi va tikhomaka ha yone. Leswo swi ni kholwise leswaku hakunene Timboni ta Yehovha hi tone ti nga ka wugandzreli bya xihlayelamfuzri.”

14. Xana xikombiso xaku xi nga ha pfuna vambeni akuva va hluvuka hi tlhelo dzra moya hi ndlela yini?

¹⁴ Xidondzro xa Bibele xi fanela ku hanya hi leswi xi swi dondzraka akuva xi faneleka ku babatisiwa. Kambe leswo a hi minkama hinkwayu swi nabyalaka. Kambe loko xidondzro xi vona ndlela leyi u pfunekaka ha yone hi ku tizrisa minsinya ya milawu ya Bibele, xi nga ha susumeteleka ku ku yetisela. (1Ko 11:1) Vona xikombiso xa Hanae, lweyi hi buliki ha yene. A li: “Vamakwezru a va yentxa hinkwaswu leswi a ni swi dondzra. Ni dondzre ndlela leyi ni nga tiyisaka vambeni, ni nga dzrivalelaka ni ku kombisa lizrandzru ha yone. Minkama hinkwayu a va khanela mintxhumu leyinene hi vhanu vambeni nakone a ni djula ku va yetisela.”

15. Hi ku ya hi buku dzra Amaproverbia 27:17, ha yini hi fanela ku hamba xingana ni xidondzro?

¹⁵ Hamba xinghanu ni xidondzro. Loko lweyi u dondzraka na yene a tama a ya a mintlhanganwini, tama u kombisa ku zron’weka ha yene. (Flp 2:4) Dzringisa ku mu tiva ku yampswa. U nga ha mu byela ndlela leyi u nyonxiki ha yone hi ku vona nhluvuku wakwe. U nga ha mu vutisa hi dondzro yakwe ya Bibele, ndangu ni ntizro wakwe. Kambe tivonele akuva u nga mu hambi swivutiso leswi taka mu danisa. Mabulu lawo ma nga ha yentxa mi va vanghanu. Ku yentxa xinghanu ni xidondzro swi ta xi pfuna kuva xi yentxa nhluvuku xi va xi babatisiwa. (Dondzra Amaproverbia 27:17.) Hanae swoswi a tizra swanga phayona dzra nkama hinkwawu. Loko a dzrimuka khambi dzra ku sungula a yini mintlhanganwini, a li: “Loko ni hambe vanghanu a bandleni, ni sungule ku zrandzra mintlhanganu, nakone a ni ya nambi loko ni kazralile. A ni nyonxa swinene hi ku vani vanghanu lavampshwa. Nakone leswo swi ni pfune ku helisa wunghanu lebyi a ni li na byone ni vhanu lava a va nga hanyi hi ku ya hi leswi ni swi kholwaka. A ni djula ku tsrhindzrekela kusuhi na Yehovha ni vamakwezru. Xileswo, ni bohe ku babatisiwa.”

16. I yini swimbeni leswi u nga swi yentxaka akuva u pfuna xidondzro kuva xi titwa na xi hamba xiyenge xa Bandla?

¹⁶ Loko xidondzro xi tama xi yentxa nhluvuku ni ku txintxa, xi pfuni kuva xi titwa na xi hamba xiyenge xa bandla. U nga yentxa leswo hi ku xi kombisa malwandla. (Hb 13:2) Loko a dzrimuka nkama lowu na a ha li xidondzro xa Bibele, Denis, lweyi a tsrhamaka Moldávia, a li: “Minkama yinyingi mine ni nsati wanga a hi zrambiwa akuva hi ya va kun’we ni vamakwezru. Va hi byele ndlela leyi Yehovha a va pfuniki ha yone nakone leswo swi hi tiyisile. Swiyentxakalo leswo swi hi yentxe hi kholwiseka leswaku hi djula ku tizrela Yehovha ni leswaku a hi tava ni wutomi bya ku nyonxisa.” Loko xidondzro xa Bibele xi faneleka kuva xi va muzrezri, na wene u nga xi zramba kuva mi famba xikan’we a nsin’wini. Diego, muzrezri wa le Brasil, a li: “Vamakwezru vanyingi va ni zrambile akuva ni ya nsin’wini. Leyo ku ve ndlela leyinene ya kuva ni va tiva ku yampswa. Hi ku yentxa leswo, ni dondzre swinyingi nakone ni titwe na ni li kusuhi na Yehovha na Yesu.”

XANA VAKULU VA NGA PFUNISA HI NDLELA YINI?

17. Xana vakulu va nga swi pfuna hi ndlela yini swidondzro swa Bibele?

¹⁷ Heta nkama ni swidondzro swa Bibele. Vakulu, lizrandzru dzrenu hi swidondzro dzri nga swi pfuna akuva swi hluvuka lakakuva swi babatisiwa. Xana u nga bulisana ni swidondzro minkama hinkwayu loko mi li mintlhanganwini? Loko u dzrimuka vito dzra swone, ngopfungopfu loko swi sungula ku hlamula, swidondzro swi nga titwa na swi zrandzriwa. Xana u nga lulamisa xiyimiso xaku loko u zrambiwa akuva u ya fambisa xidondzro xa Bibele ni mhunu? Loko u yentxa leswo, u nga xi pfuna hi ndlela leyi a wu yi yimelile. Jackie, phayona ledzri tsrhamaka a Nigéria, a li: “Swidondzro swinyingi swa hlamala loko swi tiva leswaku makwezru lweyi ni fambiki na yene akuva hi ya swi dondzrela i nkulu wa bandla. Xidondzro xa kukazri xi te: ‘Mufundhisa wanga a nge pfuki a yentxi swa ku fana ni leswi. A pfuxela ntsena lava ganyiki ni lava taka mu hakela!’” Xidondzro lexo swoswi xi hlalela mintlhanganu.

18. Hi ku ya hi Amintiṛo 20:28, xana vakulu va nga byi hetisisa hi ndlela yini wutiyanguleli lebyi va nyikiwiki byone?

¹⁸ Dondzrisa u tlhela u kutxa vafambisi va swidondzro. Vakulu, mi ni wutiyanguleli byikulu bya ku pfuna vazrezri akuva va zrezra ni ku dondzrisa hi ndlela leyinene. (Dondzra Amintiṛo 20:28.) Loko mhunu wa kukazri a txhava ku fambisa xidondzro xa Bibele na a na wene, tinyikele akuva u xi fambisa. Jackie, lweyi hi buliki ha yene a ku sunguleni, a li: “Minkama hinkwayu vakulu va ni vutisa mayelanu ni swidondzro swanga. Loko ni kumana ni swikazratu loko ni fambisa swidondzro swa Bibele, minkama hinkwayu va ni nyika mpfunu lowu ni wu vilelaka.” Vakulu va nga yentxa swinyingi akuva va pfuna ni ku kutxa lava fambisaka swidondzro swa Bibele akuva va tiyisela. (1Te 5:11) Jackie, a yengesela a ku: “Ni nyonxa swinene loko vakulu va ni kutxa va tlhela va ni byela leswaku va wu tlangela ntizro lowu ni wu yentxaka. Mazritu lawo ma fana ni kopo dzra mati ya ku titimeta hi siku dzra ku hisa. Mazritu yavu ma ni yentxa ni tiyiseka leswaku ni le ku dondzriseni hi ndlela leyinene ma tlhela ma yengesela ku nyonxa loku ni nga na kone ka ntizro wa ku dondzrisa vambeni.”​—Pr 25:25.

19. He kwini ku nyonxa loku hinkwezru hi nga ku kumaka?

¹⁹ Nambi loko hi nge na swidondzro swoswi, hi nga pfuna mhunu akuva a kula hi tlhelo dzra moya. Na hi nga khaneli ku tlula mpimu, hi nga hlaya mazritu lawa ma lulamiseliwiki ha hombe akuva hi pfuna mufambisi wa xidondzro. Hi nga hamba xinghanu ni swidondzro loko swi ta Ndlwini ya Wugandzreli, hi tlhela hi va xikombiso lexinene ka swone. Vakulu va nga pfuna swidondzro swa Bibele hi ku tinyika nkama wa ku va na swone ni ku wupfisa vadondzrisi va swone va tlhela va va kulungela. Nakunene, hi nyonxa ngopfu loko hi yentxa xa kukazri, nambi xi xitsrongo, akuva hi pfuna mhunu leswaku a zrandzra ni ku tizrela Papayi wezru, Yehovha!