Hi Nga Yentxa Yini Akuva Yehovha A Yingela Swikhongoto Swezru?

KHONGOTA KA YEHOVHA XIKWEMBU NKULUKUMBA HI VITO DZRA YESU

‘Hinkwaswu leswi n’wi taka kombela ku Tatana hi vito dzranga, a ta n’wi nyika.’​—Yohan 16:23.

Mazritu lawa ya Yesu a ma swi beka a livaleni leswaku Yehovha a djula ku va hi khongota hi ku tizrisa vito dzra Yesu ku nga li hi ku tizrisa swifaniso swa tintsrumi kumbe vafi. Loko hi khongota ka Xikwembu Nkulukumba hi ku tizrisa vito dzra Yesu, hi kombisa leswaku ha pfumela leswaku Xikwembu Nkulukumba awa hi yingela hi mhaka ya leswi Yesu a hi feliki. Yesu a te: ‘A ku na mhunu lwa nga taka ku Tatana loko ku nge ha mine.’​—Yohan 14:6.

KHONGOTA SWI SUKELA MBILWINI

‘Txhululani timbilu mahlweni kwakwe.’​—Amapsalma 62:8.

Loko hi khongota ka Yehovha, hi fanela ku khanela na yene ku fana ni loko n’wana a khanela ni tatana lweyi a mu zrandzraka. A matsrhan’wini ya ku yentxa hi ku dondzra swikhongoto leswi swe ke tsraliwa a mabukwini kumbe ku phindhaphindha mazritu wolawa ya man’we, hi fanela ku khongota hi xitxhavu ni hi mbilu hinkwayu.

KHONGOTA MAYELANU NI KU ZRANDZRA KA XIKWEMBU NKULUKUMBA

‘Leswaku loko hi kombela ntxhumu hi ku zrandzra kwakwe a hi yingela.’​—1 Yohan 5:14.

Yehovha a tizrisa Bibele akuva a hi byela leswi a taka hi yentxela swone ni leswi hine hi fanelaka ku mu yentxela swone. Loko hi djula leswaku Yehovha a yamukela swikhongoto swezru, hi fanela ku khongota hi ku ya hi ku zrandzra kwakwe. Akuva leswo swi yentxaka, hi fanela ku dondzra Bibele akuva hi mu tiva ku yampswa Xikwembu Nkulukumba. Loko hi yentxa leswo, yene a ta yingela swikhongoto swezru.

I YINI LESWI HI NGA SWI HLAYAKA KA SWIKHONGOTO SWEZRU?

Khongota U Kombela Leswi U Swi Vilelaka. Hi nga khongota hi kombela mintxhumu leyi hi yi vilelaka, ya ku fana ni swakuda, swa ku yambala ni mbangu wa ku tsrhama ka wone. Hi nga tlhela hi khongota hi kombela wutlhazri bya ku teka swiboho leswinene ni ntamu wa ku langusana ni swikazratu swezru. Hi nga tlhela hi khongota akuva hi yengetela lipfumelo dzrezru, ku va hi kota ku dzrivalela vambeni ni ku kombela pfunu ka Xikwembu Nkulukumba.​—Luka 11:3, 4, 13; Yakob 1:5, 17.

Patsra Van’wana Ka Swikhogoto Swaku. Vapswele lava nga ni lizrandzru, va nyonxa swinene loko vanavu va twanana. Yehovha na yene awa nyonxa loko a vona vanakwe lani misaveni na va zron’weka hi vambeni. Hi nga tlhela hi khongotelela ndangu wezru, nuna, nsati, vana ni vanghanu vezru. Mudondzrisiwa Yakobe a tsrale leswi: ‘N’wi khongotelelana.’​—Yakob 5:16.

Khongota U Tlangela Leswi U Nga Naswu. A Bibele dzri hlaya leswi mayelanu ni muvumbi wezru: ‘Yene a yentxa swinene, a n’wi nyika timpfula ta tilu, ni tinguva ta mihandzru. A n’wi yandzrisela swakuda, a va a tata timbilu tenu hi ku nyonxa.’ (Amintiṛo 14:17) Loko hi yanakanyisisa hi hinkwaswu leswi Xikwembu Nkulukumba a hi yentxeliki swone, hi ta djula ku mu tlangela hi xikhongoto. Nakone swi le livaleni leswaku hi fanela ku kombisa ku tlangela kwezru hi ku mu yingiseta.​—Ba-le-Kolosa 3:15.

LEHISA MBILU NAKONE TAMA U KHONGOTA

Minkama yin’wana u nga ha hela ntamu hi ku va u khongota u va u nga tekeli ku kuma nhlamulo. Xana leswo swi djula ku hlaya leswaku Xikwembu Nkulukumba a nga na mhaka na wene? Im-him. Vona leswi van’wana va swi hlayiki, leswi kombaka leswaku leswi djulekaka ntsena i ku va hi tama hi khongota.

Steve, lweyi ku khaneliwiki ha yene a ku sunguleni, a li: “Ni vona leswaku loko a ku nga li xikhongoto, a ni nge he ti tlhela ni kuma ku nyonxa.” I yini lexi yentxiki Steve a va ni vonela ledzrinene hi xikhongoto? A sungule ku dondzra Bibele ni ku dondzra hi xivileleko xa ku khongota a nga godoli. Yene a li: “Ni khongota ka Xikwembu Nkulukumba ni tlangela mpfunu lowu ni wu yamukelaka ka vanghanu vanga lava zrandzrekaka. A ni ngi sama ni va ni ku nyonxa ka ku fana ni loko ni nga na kone namunhla.”

Jenny a a yanakanya leswaku a nga faneleki ku yingeliwa hi Xikwembu Nkulukumba. A li: “Loko ni titwa ni nga pfuni ntxhumu, ni khongoti ka Xikwembu Nkulukumba ni kombela ku twisisa leswaku ha yini ni titwa ni nga li wa lisima.” Xikhongoto xi mu pfunise kuyini? A li: “Ku khongota ka Xikwembu Nkulukumba swi ni pfune akuva ni tivona hi ndlela leyi yene a i vonaka ha yone. Nambi loko mbilu yanga yi sola, Xikwembu Nkulukumba a nga ni soli. Xikhongoto xi tlhela xi ni pfuna ku va ni nga godoli.” Ma ve wani mabindzru ya kone? A li: “A xikhongoto xi ni pfune ku vona Yehovha swanga Tatana ni Xikwembu lexi nga ni lizrandzru, Munghanu lweyi a dumbekaka, lweyi a zron’wekaka ha mine. Loko ni tama ku tikazratela ku mu nyonxisa, minkama hinkwayu a ta ni pfuna.”

Tlhela u vona xikombiso xa Isabel. Loko a kume khuzri, vadotori va mu byele leswaku a n’wanakwe a a ta pswaliwa na a ni wulema lebyikulu. A tsrhoveke mazrambu. Vhanu va kukazri va mu byele leswaku a xixa khuzri. A hlaya leswi: “A ni va ni ku ni ta fa hi ku xaniseka.” I yini leswi a swi yentxeki? Ali: “Ni khongote ngopfu ka Xikwembu Nkulukumba ni kombela mpfunu.” Hi ku famba ka nkama,a ve ni n’wana lweyi a vitaniwaka Gerard, nakone a pswaliwe na a ni wulema byolebyo. Xana Isabel a vone leswaku Xikwembu Nkulukumba a swi hlamulile swikhongoto swakwe? Ina, a swi vonile. Hi ndlela yini? Isabel a li: “Loko ni vona n’wananga namunhla na a ni 14 wa malembe a hanya na a nyonxile nambi leswi a nga ni wulema, ni vona leswaku a n’wana lweyi a ve nhlamulo ya swikhongoto swanga nakone i tovoko ledzrikulu ledzri Xikwembu Nkulukumba a ni nyikiki dzrone.”

Mazritu ya ku fana ni lawa ma hi yentxa hi pimisa hi mazritu ya ku fana ni lawa hlayiyiki hi mupisalema lama liki: “Kambe u ta yingela xikombelo xa lava ku zrula, Oho Yehovha. U ta tiyisa timbilu tavu u tlhela u va yingela.” (Amapsalma 10:17, Tradução do Novo Mundo) Handle ka ku ganaganeka, hi ni swivangelo leswinene swa ku tama hi khongota.

A Bibeleni hi nga kuma swikhongoto swinyingi swa Yesu. Xikhongoto lexi tiviwaka ngopfu hi lexi a xi dondzrisiki vadondzrisiwa vakwe. Hi nga dondzra yini ka xikhongoto xolexo? A hi swi voneni.