Xikhongoto Xi Nga Ku Pfuna Hi Ndlela Yini?

Loko Pamela a gungule leswaku a a ni wuvabyi lebyikulu, a ye xipiritana. A tlhele a khongota ka Xikwembu Nkulukumba a kombela kuva a mu pfuna ku langusana ni xiyimu lexiya xa ku kazrata. Xana xikhongoto xi mu pfunile?

Pamela a li: “Nkama lowu na ni ni kankru, a ni txhava ngopfu swinene. Kambe loko ni khongoti ka Xikwembu Nkulukumba, a ni titwa na ni zrulile nakone ni kota ku langutana ni xiyimu lexo na ni nga txhavi ngopfu. Na ha twa ku vavisa swinene kambe xikhongoto xi ni pfuna ku vona mintxhumu hi ndlela leyinene. Loko vhanu va ni vutisa swaku swo yini, ni va byela leswi: ‘A swi ni fambeli ha hombe kambe ni nyonxile!’”

I ntiyiso leswaku a hi fanelanga hi yimela swiyimu swa ku kazrata akuva hi khongota ka Xikwembu Nkulukumba. Hinkwezru hi kumana ni swikazratu, swa swikulu kumbe swa switsrongo, nakone minkama yin’wana hi vilela mpfunu akuva hi langutana na swone. Xana xikhongoto xi nga hi pfuna?

Bibele dzri li: ‘Nyiketa Yehovha mahanyela yaku, yene a ta ku seketela; a nga ka a nga pfumeli leswaku mululami a tsrekatsrekisiwa hi minkama hinkwayu.’ (Amapsalma 55:22) Swi nyonxisa swinene ku tiva leswo. Kutani xikhongoto xi nga ku pfuna hi ndlela yini? Loko u khongota ka Xikwembu Nkulukumba hi ndlela leyi mu nyonxisaka, a ta ku nyika leswi u swi vilelaka akuva u lwisana ni swikazratu swaku.—Vona bokisi ledzri liki “Matovoko Lawa Hi Ma Kumaka Hi Ku Khongota.”

Matovoko Lawa Hi Ma Kumaka Loko Hi Khongota

Ku zrula ka miyanakanyu

‘A ku kombela kwenu a ku tibyiwe hi Xikwembu Nkulukumba, hi ku khongota, ni ku kombela ni ku tlangela. Kutani a ku zrula ka Xikwembu Nkulukumba loku tlulaka ku yanakanya hinkwaku, ku ta bekisa timbilu tenu ni miyanakanyu yenu ku Kriste Yesu.’ (Ba-le-Filipi 4:6, 7) Loko u khongota ka Xikwembu Nkulukumba u mu byela swikazratu swaku, yene a ta ku pfuna kuva u zrula ni ku ku pfuna kuva u tiva leswi u nga swi yentxaka nambi loko u kumana ni swiyimu swa ku kazrata.

Wutlhazri

‘Kambe loko mun’we ku n’wine a pfumala vutlhazri, a a kombele ku Xikwembu Nkulukumba lwa hananaka hinkwavu ntsena, a nga soli; kutani a ta hananiwa.’ (Yakob 1:5) Loko hi kumana ni swikazratu a hi minkama hinkwayu swi nabyalaka ku yentxa swiboho leswinene. Loko u khongota ka Xikwembu Nkulukumba u kombela kuva a ku nyika wutlhazri, yene a nga ku pfuna akuva u dzrimuka tindondzro ta lisima leti kumekaka a Zritwini dzrakwe ku nga Bibele.

Ntamu ni ntxhavelelo

‘Ndzri nga yentxa hinkwaswu hi [lwa] ndzri tiyisaka.’ (Ba-le-Filipi 4:13) Yehovha i Xikwembu Nkulukumba wa lizrandzru. Xileswo, a nga ku nyika ntamu lowu u wu vilelaka akuva u lwisana ni swikazratu kumbe ku swi tiyiselela. (Ezaya 40:29) Bibele dzri tlhela dzri hi byela leswaku Yehovha i ‘Xikwembu Nkulukumba wa ku miyeta hinkwavu’ yene a nga hi ‘miyeta a mahlomulweni yezru hinkwawu’.—2 Ba-le-Korinte 1:3, 4.

XANA WA SWI DJULA KU PFUNIWA HI XIKHONGOTO?

I ntiyiso leswaku Yehovha a nga sindzrisi mhunu akuva a khongota ku yene. A matsrhan’wini ya leswo, hi ndlela ya lizrandzru a ku zramba akuva u khongota ku yene. (Yeremiya 29:11, 12) Kambe swi li yini loko u pimisa leswaku a swikhongoto swaku a swi hlamuliwanga? U nga heli ntamu nakone u nga godoli. Swi nga yentxeka vapswele lava nga ni lizrandzru va nga pfuni vanavu hi nkama lowu vana va wu djulaka ni hi ndlela leyi vone va djulaka ha yone. Swi nga yentxeka vapswele volavo va ni ndlela ya ku yampswa ya ku va pfuna ha yone. Kambe lexi tiyiki hi lexi: Vapswele lava nga ni lizrandzru va va pfuna vanavu.

Yehovha Xikwembu Nkulukumba i Tatana lwa nga ni lizrandzru ku tlula hinkwavu nakone a djula ku ku pfuna. Loko u landzra nkongomiso wa Bibele mayelanu ni xikhongoto, Yehovha Xikwembu Nkulukumba a ta hlamula swikhongoto swaku hi ndlela leyinene!—Amapsalma 34:15; Mattheo 7:7-11.