Yetisela Mayanakanyela Ya Yehovha Na Yesu

1-2. I yini leswi patsrekaka ka ku zrandzra Yehovha nakone Yesu a dzri kombise hi ndlela yini lizrandzru ledzro?

YESU a tlhamuxele leswaku he wini Nawu lowukulu ni wa ku sungula ka Nawu wa Moxe loko a te: “U fanela ku zrandzra Yehovha Xikwembu Nkulukumba waku hi mbilu yaku hinkwayu, hi wutomi byaku hinkwabyu, hi ntamu waku hinkwawu ni hi miyanakanyu yaku hinkwayu.” (Luk. 10:27) Ku zrandzra Yehovha hi mbilu yezru hinkwayu swi patsra ku navela kwezru ni matitwela yezru, swi tlhela swi patsra ni ku tinyiketela kwezru ka Yehovha hi wutomi byezru ni ntamu wezru. Handle ka leswo, ku zrandzra Yehovha swi tlhela swi yelana ni miyanakanyu yezru ni ndlela leyi hi pimisaka ha yone. I ntiyiso leswaku a hi nge ti za hi ma twisisa hi ku helela mayanakanyela ya Yehovha kambe hi nga ma twisisa ku yampswa mayanakanyela yake hi ku tiva “miyanakanyu ya Kriste”. Phela Yesu a ma yetisele hi ku helela mapimisela ya Papayi wake.—1 Kor. 2:16.

² Yesu a a zrandzra Yehovha hi miyanakanyu yake hinkwayu. A a swi tiva leswi Yehovha a a swi yimelile kwake nakone a a tiyimisele ku yentxa leswo nambiloko a swi ta yentxa a xaniseka. A a beka miyanakanyu yake ka ku yentxa ku zrandzra ka Papayi wake, xileswo a nga pfumelelanga leswaku ku va ni ntxhumu wun’wana wa lisima ku tlula leswo.

3. He yini ndjombo leyi Petro a viki na yone nakone a kutxe vakriste leswaku va yentxa yini? (1 Petro 4:1)

³ Petro ni vapostola van’wana va ve ni ndjombo ya ku va na Yesu ni ku ma tiva ha hombe mayanakanyela yake. Loko Petro a tsrala papela dzrake dzra ku sungula a kutxe vakriste leswaku va tiyimisela ku va ni mayanakanyela lawa ma fanaka ni ya Kriste, ku nga ndlela leyi Yesu a a yanakanya ha yone.a (Dondzra 1 Petro 4:1.) A zritu ledzri Petro a dzri tizrisiki loko a ku: “Tiyimiselani” a dzri tizrisiwa ngopfu loko ku vulavuliwa hi yimpi. Xileswo, ku va ni mayanakanyela lawa ma fanaka ni ya Kriste swi hi sizrelela ka kuva hi nga yentxi mintxhumu leyi kalaka yi nga lulamanga ni ku fambela kule ni misava ya Sathana.—2 Kor. 10:3-5; Efe. 6:12.

4. Hi ta vona yini ka xidondzro lexi?

⁴ Ka xidondzro lexi hi ta vona ndlela leyi ha yone 1) ku yetisela mayanakanyela Yehovha swi hi pfunaka ku va ni mayanakanyela man’we, 2) ku titsrongahata ni 3) ku va ni mayanakanyela lamanene hi ku dumba Yehovha ni ku khongota kwake. Akuva hi dondzra leswo, hi ta vona ndlela leyi Yesu a a yanakanya ha yone ni ndlela leyi hi nga mu yetiselaka ha yone.

YANAKANYA KU FANA NA YEHOVHA

5. I ka xiyimu muni lani Petro a kalaka a nga pimisanga ku fana na Yehovha?

⁵ Petro a nga vanga ni vonela dzra Yehovha mayelanu ni mhaka ya kukazri. Yesu a byele vapostola vake leswaku a a ta ya a Yerusalema nakone a a ta khomiwa hi vazrangeli va wukhongoti a biwa a va a dlayiwa. (Mat. 16:21) Petro a a swi tiva leswaku Yesu a ku li Mesiya lweyi a a dumbisiwile akuva a huluxa vhanu va Xikwembu Nkulukumba, xileswo swi nga yentxeka swi mu kazratelile ku kholwa leswaku Yehovha a a ta pfumelela leswaku N’wanake a xaniseka hi ndlela leyo. (Mat. 16:16) Kutani Petro a vitane Yesu a va a ku: “Hosi, u nga tivitaneli khombo; a swi nge ti ku humelela leswo.” (Mat. 16:22) Kambe Yesu a nga pfumelelananga na swone leswo hikusa a mapimisela ya Petro a ma nga fani ni ya Yehovha.

6. Xana Yesu a swi kombise hi ndlela yini leswaku a a yetisela Yehovha ka ndlela leyi a a yanakanya ha yone?

⁶ Yesu a a ma yetisela hi ku helela mayanakanyela ya Papayi wake. Xileswo, a byele Petro a ku: “Suka, Sathana! U xihinga kwanga, hikusa leyo i mimpimiso ya vhanu a hi ya Xikwembu Nkulukumba.” (Mat. 16:23) Yesu a a swi tiva leswaku akuva a yentxa ku zrandzra ka Xikwembu Nkulukumba a swi ta djula kuva a xaniseka a tlhela a fa. Xileswo a nga xi yamukelanga xitsratsriyo xa Petro nambileswi kumbexana Petro a a zama ku mu pfuna. Hi ndlela leyo, Petro a dondzre leswaku a a fanela ku va ni mayanakanyela ya Xikwembu Nkulukumba. Leyi i dondzro ya lisima ni kwezru.

7. Xana Petro a txintxe mayanakanyela yake hi ndlela yini akuva ma fambisana ni ya Yehovha? (Vona mufoto ka )

⁷ Hi ku famba ka nkama Petro a dondzre leswaku a a fanela ku va ni mayanakanyela ya Yehovha. Leswo swi tikombe ha hombe loko ku tlhase nkama wa kuva Vamatiko kumbe lava va ku kala va nga li Vayuda va hamba xiyenge xa vhanu va Xikwembu Nkulukumba. Yehovha a nyike Petro xiyavelo xa ku zrezrela Korneliyu ku nga mun’we ka lava ku sungula a ndzrulukiki mukriste. A Vayuda a va nga hanyisani nikutsrongo ni vhanu Vamatiko, kutani a swi hlamalisi leswi Petro a a fanela ku txintxa ndlela leyi a a yanakanya ha yone. Ntsrhaku ka loko Yehovha a pfune Petro akuva a twisisa ku zrandzra kwake, Petro a txintxe mayanakanyela yake mayelanu ni vhanu Vamatiko a va a ya pfuxela Korneliyu na a nga ‘ganaganeki’. (Mint. 10:28, 29) Petro a ye zrezrela Korneliyu ni ndangu wake nakone va babatisiwile.—Mint. 10:21-23, 34, 35, 44-48.

8. Hi nga swi kombisa hi ndlela yini leswaku hi ni mayanakanyela ya Yehovha? (1 Petro 3:8 ni ntlhamuxelo wa le hansi)

⁸ Hi ku famba ka malembe, Petro a kutxe vakriste akuva va va ni “mayanakanyela man’we” kumbe va pimisa hi ndlela leyi fanaka. (Dondzra 1 Petro 3:8.) Hi nga yentxa leswo hi kuva hi dondzra Bibeleni ndlela leyi Yehovha a yanakanyaka ha yone hi va hi mu yetisela. Hi xikombiso, Yesu a kutxe vadondzrisiwa vake akuva va zrangisa Mfumu wa Xikwembu Nkulukumba a wuton’wini byavu. (Mat. 6:33) Hi nga yanakanya hi makwezru wa kukazri a bandleni dzrezru lweyi a tekaka xiboho xa kuva phayona dzra nkama hinkwawu kumbe ku nghenela ntizro wun’wana wa nkama hinkwawu. Ka swiyimu leswo, a hi djuli ku hlaya ntxhumu lowu taka mu godolisa kumbe ku mu yentxa a pimisa hi yene n’winyi, a matsrhan’wini ya leswo hi fanela ku vulavula hi ndlela leyinene hi makungu yake ya moya ni kuva hi mu pfuna.

TITSRONGAHATI

9-10. He xini xikombiso lexikulu xa ku titsrongahata lexi Yesu a hi nyikiki xone?

⁹ Ka wusiku bya wugamu na a nga si na fa, Yesu a dondzrise Petro ni vapostola van’wana lisima dzra ku titsrongahata. Ntsrhakunyana, Yesu a kombele Petro na Yohane leswaku va yentxa malulamiselo ya xilalelo xa wugamu. Wun’we wa mintxhumu lowu va wu yentxiki a ve ku teka basiya ni thawula akuva dzri tizrisiwa hi lweyi a a ta hlampswa minkondzro ya vazrambiwa na xilalelo xi nga si na sungula. Kambe i mani lweyi a a ta titsrongahata akuva a yentxa ntizro wa ku fana ni lowo?

¹⁰ Handle ka ku ganaganeka, Yesu a nyikele xikombiso xa xikulu xa ku titsrongahata. A yentxe ntizro lowu hi ntolovelo a wu yentxiwa hi xikazrawa. Kutani vapostola swi va hlamalise ngopfu loko Yesu a yentxa ntizro lowu hi ntolovelo a wu yentxiwa hi swikazrawa. A Bibele dzri hlaya leswaku Yesu a suse xiyambalu xake, kutani a teka thawula a tikhama masenge ha dzrone a txhela mati ka basiya a va a sungula ku va hlampswa minkondzro yavu. (Yoh. 13:4, 5) Yesu a hlampswe minkondzro ya 12 wa vapostola ku patsra na Yudasi lweyi hi ku famba ka nkama a a ta mu wonga. Swi nga yentxeka Yesu a teke nkama wa ku leha akuva a yentxa ntizro wa ku fana ni lowo kambe hi ku titsrongahata a wu hetisisile ntizro lowo. Hi ku lehisa mbilu a game a va tlhamuxela a ku: “Ma swi twisisa leswaku ha yini ni mi hlampswe minkondzro? N’wine mi ni vitana ‘Mudondzrisi’ ni ‘Hosi’, nakone mi tiyisile, hikusa ni yene. Xileswo, loko mine Hosi tlhelo Mudondzrisi, ni mi hlampswe minkondzro, na n’wine mi fanela ku hlampswana minkondzro.”—Yoh. 13:12-14.

11. Xana Petro a swi kombise hi ndlela yini leswaku a dondzre xa kukazri mayelanu ni ku titsrongahata? (1 Petro 5:5) (Tlhela u vona ni mufoto.)

¹¹ Petro a dondzre swa kukazri ka ku titsrongahata ka Yesu. Ntsrhaku ka loko Yesu a tlhelele tilweni, Petro a yentxe hlolana dzra kukazri. A dahe wanuna wa kukazri lweyi a a pswaliwe na a li xilima. (Mint. 1:8, 9; 3:2, 6-8) Xitsrhungu lexikulu lexi voniki hlolana ledzri xi tsrutsrume xi ya talela Petro lani a a li kone. (Mint. 3:11) Xana Petro a a ta londzrovota mukhandlu lowo akuva a tikulisa, swanga hi leswi a swi tolovelekile ka mahanyela yavu kuva mhunu a va ni xikhundla? Nikutsrongo! Petro a nga tikulisanga kambe a titsrongahatile hi ku yisa lidzrumu ka Yehovha na Yesu hi ku hlaya leswi: “Wanuna lweyi mi mu vonaka nakone mi mu tivaka, a tiyisiwe hi kola ka vito dzra Yesu ni hi lipfumelo ledzri hi nga na dzrone ka vito dzra Yesu.” (Mint. 3:12-16) Ka dzrin’we dzra mapapela yake lawa a ma tsraleliki vakriste, Petro a va kutxe leswaku va titsrongahata. Mazritu lawa ma hi dzrimuxa khambi ledzri Yesu a tikhamiki hi thawula akuva a hlampswa minkondzro ya vapostola.—Dondzra 1 Petro 5:5.

12. Ku fana na Petro, hi nga tama hi txutxela ku titsrongahata hi ndlela yini?

¹² Hi nga yetisela xikombiso xa Petro hi ku tama hi txutxela ku titsrongahata. Kambe dzrimuka leswaku ku titsrongahata a swi hlayi ntsena ndlela leyi hi vulavulaka ha yone. Ku “titsrongahata” ka hakakunene loku Petro a vulavuliki ha kone ku patsra ndlela leyi hi pimisaka ha yone ni leswi hi nga xiswone hi le ndzreni. Hi yentxela van’wana mintxhumu leyinene hi leswi hi zrandzraka Yehovha ni vhanu ku nga li hi leswi hi djulaka ku voniwa. Hi kombisa leswaku ha titsrongahata hakakunene loko hi tizrela Yehovha ni vamakwezru hi ku nyonxa nambiloko van’wana va nga swi xiyi.—Mat. 6:1-4.

VANA NI “MAYANAKANYELA LAMANENE”

13. Tlhamuxela leswaku ku patsreka yini ka ku va ni “mayanakanyela lamanene”.

¹³ Swi patsra yini ku va ni “mayanakanyela lamanene”? (1 Pet. 4:7) Mukriste lweyi a nga ni mayanakanyela lamanene a yentxa hinkwaswu leswi a nga swi kotaka akuva a teka swiboho leswi fambisanaka ni mapimisela ya Yehovha. A twisisa leswaku a ku na ntxhumu lowu nga ni lisima a wuton’wini byake ku tlula a wunghanu byake na Yehovha. Handle ka leswo, a ni vonela ledzri dzringaniseliwiki ha yene n’winyi nakone awa pfumela leswaku a nga tivi hinkwaswu. Mhunu lweyi a nga ni mayanakanyela lamanene a kombisa leswaku a dumba Yehovha hi kuva nkama hinkwawu a khongota kwake a kombela nkongomiso wake.b

14. I ka xiyimu muni lani Petro a kombisiki leswaku a a nga mu dumbi Yehovha?

¹⁴ Ka wusiku bya wugamu na a nga si fa, Yesu a byele vadondzrisiwa vake a ku: “Hinkwenu a lipfumelo dzrenu dzri ta tsrekatsreka hi kola ka leswi taka ni yentxekela wusiku lebyi.” Leswi a a tidumba ngopfu Petro a mu hlamule a ku: “Nambiloko lipfumelo dzra hinkwavu dzri ngo tsrekatsreka hi kola ka leswi taka ku yentxekela, dzranga a dzri nge ti txhuka dzri tsrekatsreka!” Ka wusiku byolebyo Yesu a tsratsriye van’we ka vadondzrisiwa vake a ku: “Tsrhamani na mi zrindzrile, mi ya mahlweni mi khongota.” (Mat. 26:31, 33, 41) Loko Petro a e landzra xitsratsriyo lexo, kumbexana a a ta va a ve ni xixixi xa ku hlaya leswaku yene i mudondzrisiwa wa Yesu kambe a yale Hosi yake a va a vaviseka hi leswi a swi yentxiki.—Mat. 26:69-75.

15. Xana Yesu a tame a va ni mayanakanyela lamanene hi ndlela yini ka wusiku byake bya wugamu swanga mhunu wa nyama?

¹⁵ Yesu a a mu dumba hi ku helela Yehovha. Nambileswi a a hetisekile, Yesu a khongote makhambi manyingi ka wusiku bya wugamu na a nge si fa nakone leswo swi mu nyike xixixi xa ku yentxa leswi Yehovha a a djula leswaku a swi yentxa. (Mat. 26:39, 42, 44; Yoh. 18:4, 5) Petro a vone ndlela leyi Yesu a khongotiki ha yone ka xiyimu lexo xa ku kazrata nakone leswo swi yentxe a nga xi dzrivali xiyentxakalu lexo a wuton’wini byake hinkwabyu.

16. Xana Petro a swi kombise hi ndlela yini leswaku a a txutxele mayanakanyela lamanene? (1 Petro 4:7)

¹⁶ Hi ku famba ka nkama, Petro a ye a dumba Yehovha hi ku khongota kwake a kombela nkongomiso. Ntsrhaku ka loko Yesu a pfuxiwile a tiyisekise Petro ni vapostola lavan’wana leswaku a va ta yamukela moya wa ku xwenga akuva va ta kota ku zrezra madzrungula lamanene. Kambe Yesu a va kombele leswaku va yima a Yerusalema ku ya tlhasa loko va yamukela moya wa ku xwenga. (Luk. 24:49; Mint. 1:4, 5) Xana Petro a a yentxa yini na a ha yimela leswaku leswo swi yentxeka? Yene ni vamakwavu “a va ya mahlweni va khongota”. (Mint. 1:13, 14) Hi ku famba ka nkama, ka papela dzrake dzra ku sungula, Petro a kutxe vakriste leswaku va va ni mayanakanyela lamanene ni kuva minkama hinkwayu va kombela nkongomiso wa Yehovha. (Dondzra 1 Petro 4:7.) Petro a dondzre ku dumba Yehovha nakone a ndzruluke mukriste lweyi a wupfiki.—Gal. 2:9.

17. Swi nge na mhaka wuswikoti lebyi hi nga ha va ka na byone, i yini leswi hi fanelaka ku tama hi swi yentxa? (Tlhela u vona ni mufoto.)

¹⁷ Akuva hi va ni mayanakanyela lamanene, hi fanela ku tama hi khongota ka Yehovha swi nge na mhaka ni wuswikoti byezru. Loko hi djula ku teka swiboho swa lisima a wuton’wini, hi fanela ku khongota ka Yehovha hi kombela nkongomiso wake na hi tiyiseka leswaku awa swi tiva leswi nga swinene kwezru.

18. Hi nga mu yetisela ku yampswa Yehovha hi ndlela yini?

¹⁸ Ha mu tlangela Yehovha hi leswi a hi vumbiki na hi ni wuswikoti bya ku yetisela matsrhamela yake. (Gen. 1:26) I ntiyiso leswaku a hi swi koti ku mu yetisela hi ku helela. (Eza. 55:9) Ingiki hi nga yentxa leswi hi swi dondzriki hi ku tama hi yetisela mapimisela ya Yehovha, hi txutxela ku titsrongahata.